Κο ουρανός, ο Ιησούς σικλιλό ο ιδιότητες σο βοηθιντέ-λες τι κερέλ λατσσές μπουτί ι γιαβερέντζαρ. Αντικάς, κάνα αβιλό κι πφουβ, ισινέ εκ μπουτ λατσσό παράδειγμας οπράλ ανταλέστε. Σαρ βοηθίντιβασα κατά παράδειγμας ι Ιησούσκο; Καζόμ ντικχάσα λέσκο παράδειγμας, αρακχάσα τριν αρχές σο βοηθίνενα-αμέν τι κεράς μπουτί λατσσές ι γιαβερέντζαρ. Ανταλά αρχές κα βοηθίνεν-αμέν τι αβάς πο ενωμέ αμαρέ πφραλέντζαρ.

Εκ τζενό σο κερέλα λατσσές μπουτί ι γιαβερέντζαρ ισί ταπεινός. Πακιάλα ότι οντουλά σο κερένα λέσαρ μπουτί ισί σημαντικοί ντα να μανγκέλα τι ταρτίνελ ι προσοχή οπρά-πέστε. Ο Ιησούς σικλιλό τι αβέλ ταπεινός πι Νταντέσταρ. Παρόλο σο σάντε ο Ιεχωβά αξίνελα τι βακέρντιβελ σαρ Οντουβά σο κερντάς-λεν σαρέ, μανγκέλας τι τζανέν ο γιαβερά ι σημαντική μπουτί σο κερντάς λέσκο Τσσαβό. Αγαβάσα-λες ανταβά ακαλέ λαφίνταρ σο βακερντάς ο Ντεβέλ: «Τι κεράς τζενές τι μοιάζελ αμέντε». (Γέν. 1:​26) Κάνα βακερντάς ο Ιεχωβά ανταλά λάφια, ο Ιησούς αγαντάς ότι ο Ιεχωβά ισί μπουτ ταπεινός.​—Ψαλμ. 18:35.

Καζόμ ισινέ κι πφουβ, ο Ιησούς-ντα ισινέ ταπεινός. Κάνα ο τζενέ ισαρένας-λες οντουλένγκε σο κερέλας, βοβ ντέλας ι δόξα κο Ντεβέλ. (Μάρκ. 10:​17, 18· Ιωάν. 7:​15, 16) Ο Ιησούς μανγκέλας τι τθερέλ ειρήνη πι μαθητέντζαρ ντα ντικχέλας-λεν σαρ αμαλά ντα όχι σαρ δούλοι. (Ιωάν. 15:​15) Τθοντάς ατζέ-ντα λένγκε πιντρέ για τι σικλιαρέλ-λεν τι αβέν ταπεινοί. (Ιωάν.  13:5, 12-14) Αμέν-ντα πρέπει τι σεβάνας οντουλέν σο κεράσα λέντζαρ μπουτί ντα τι τσσουβάς λένγκο λατσσιπέ πο οπρέ αμαρέσταρ. Κάνα “σικαβάσα σεβασμός” ντα να χάλα-αμέν ανάγκη κάστε κα ντιντιόλ ο ισαριπέ, μπορίνενα τι αβέν-πες πο μπουτ πράγματα.​—Ρωμ. 12:10.

Εκ ταπεινός τζενό αγαβέλα επίσης ότι η «επιτυχία [αβέλα] κάνα μπουτ τζενέ σο τθερένα σοφία βακερένα πουμαρέ απόψεις ο εκ κο γιαβέρ». (Παρ. 15:​22) Καζόμ-ντα πράγματα τι νακχλάμ ή τι τζανάσα τι κεράς, πρέπει τι ντας-αμέν γκοντί ότι καέκ να τζανέλα-λεν σαρέ. Ατζέ-ντα ο Ιησούς αγαβέλας ότι ισινέ πράγματα σο να τζανέλας. (Ματθ. 24:​36) Επίσης, μανγκέλας τι σικλιόλ σο τζανένας ή σο σκεφτίνενας λέσκε ατελείς μαθητές. (Ματθ. 16:​13-16) Άκ’ σόσκε οντουλά σο κερένας λέσαρ μπουτί νιωθίνενας λατσσές πασέ λέστε! Αντικάς αμέν-ντα, κάνα ισινάμ ταπεινοί ντα ντάσα-αμέν γκοντί ότι να τζανάσα-λεν σαρέ ντα κάνα ασουνάσα οντουβά σο πακιάνα ο γιαβερά, τθεράσα ειρήνη λέντζαρ, ντα γιεκ “τθεράσα επιτυχία”.

Κάνα ο πρεσβύτεροι κερένα μπουτί γιεκ, ισί σημαντικός τι αβέν ταπεινοί σαρ ο Ιησούς. Πρέπει τι ντεν-πες γκοντί ότι κο συναθροίσεις κι πρεσβυτερόνγκε ο άγιος πνεύμας μπορίνελα τι κερέλ εκχέ πρεσβυτερός τι βακερέλ εκ πράγμας σο κα βοηθίνελ τι λιντιόλ εκ λατσσί απόφαση. Άμα πουμαρέ συναθροισιέντε ο πρεσβύτεροι κερένα ο πο λατσσό για τι νιωθίνεν σαρέ άνετα τι βακερέν οντουβά σο πακιάνα, κα λεν γιεκ αποφάσεις σο κα κερέν λατσσιπέ σαρέ ι κχανγκιριάκε.

Εκ τζενό σο τζανέλα τι κερέλ λατσσές μπουτί ι γιαβερέντζαρ ισί λογικός κάνα κερέλα λέντζαρ μπουτί. Κερέλα ο αλλαγές σο χρειαζίντιβελα ντα κερέλα παλάλ. Ο Ιησούς σίγουρα τθερέλας μπουτ ευκαιρίες τι ντικχέλ καζόμ λογικός ισί λέσκο Ντατ. Για παράδειγμας, ο Ιεχωβά μπουτσσαντάς-λες τι σώνελ ι τζενέν κατά μεριπέ σο αξίνενας τι τθερέν.​—Ιωάν. 3:16.

Ο Ιησούς κερέλας παλάλ κάνα έπρεπε ή κάνα ντικχέλας ότι ισινέ λατσσό. Ανέν τουμαρέ γκοντιάτε σαρ βοηθιντάς εκχέ Φοινισσά, παρόλο σο μπουτσσάντιλοας ι Ισραηλιτένγκε. (Ματθ. 15:​22-28) Επίσης, μπεκλεντίνελας λογικά πράγματα πι μαθητένταρ. Κάνα εκ λατσσό αμάλ λέσκο, ο Πέτρος, βακερντάς ανγκλάλ γιαβερέντε ότι να τζανέλας-λες, ο Ιησούς ισινέ έτοιμος τι συγχωρίνελ-λες. Σοράν, ντινάς κο Πέτρος σημαντικές ευθύνες. (Λουκ. 22:​32· Ιωάν. 21:​17· Πράξ. 2:​14· 8:​14-17· 10:​44, 45) Ο παράδειγμας ι Ιησούσκο σικαβέλα αμένγκε μπουτ λατσσές ότι πρέπει τι κεράς παλάλ για τι “ντικχίντιβελ σαρέ κο τζενέ ότι ισινάμ λογικοί”.​—Φιλιπ. 4:5.

 Άμα ισινάμ λογικοί, κα κεράς ο αλλαγές-ντα σο χρειαζίντιβελα για τι κεράς ειρηνικά μπουτί σαβέ τι μανγκές τζενέντζαρ. Ο Ιησούς ισινέ αζόμ λατσσό ι γιαβερέντζαρ σο λέσκε ντουσμάνια βακερένας ότι ισινέ “αμάλ τζενέντζαρ σο γκίντενας ο φόροι ντα αμαρτωλέ τζενέντζαρ” σο ασουνένας λέσκε λάφια. (Ματθ. 11:​19) Αβέλα-πες αμέν τι κεράς μπουτί ειρηνικά ι γιαβερέντζαρ, σαρ ο Ιησούς; Ο Λούις, εκ πφραλ σο κερντάς μπουτί σαβέ τι μανγκές τζενέντζαρ κο έργος τθαν τθανέστε σαρ επίσκοπος ντα κο Μπέθελ, βακερέλα: «Κεράβα ο πο λατσσό για τι μοιασκιαράβ οντουλέν σο κεράβα λέντζαρ μπουτί εκχέ ντουβαρίσαρ σο ισί κερντό μπαρέ ντα χουρντέ μπαρέντζαρ. Επειδή ο μπαρά ισί διαφορετικά, μανγκέλα πο μπαρί προσπάθεια, αλλά ο ντουβάρι μπορίνελα τι αβέλ ίσιος. Μαράβα-μαν τι κεράβ αλλαγές με-ντα μι ζωγιάτε για τι κεράβ μπουτί ειρηνικά ι γιαβερέντζαρ, ντα αντικάς τι αβέλ-πες η μπουτί». Σο λατσσό τρόπος σκέψης!

Καλά ευκαιρίες τθεράσα για τι σικαβάς ότι ισινάμ λογικοί ι πφραλέντζαρ ντα ι πφενίντζαρ αμαρέ κχανγκιριάτε; Τθεράσα ι ευκαιρία τι κεράς-λες ανταβά ι πφραλέντζαρ σο ισινάμ κο ίδιος όμιλος. Μπέκιμ τι νικιάσα κο έργος πφραλέντζαρ σο να τθερένα σαρ αμαρέ ευθύνες πουμαρέ φαμιλιάτε ή σο ισί είτε πο μπαρέ είτε πο χουρντέ αμένταρ. Κα σικαβάς ότι ισινάμ λογικοί άμα πφιράσα αντικάς σαρ πφιρένα βον ή άμα τραμπίνασα τι κεράς έργος σαρ μανγκένα βον για τι τθεράς χαρά κο έργος.

Εκ τζενό σο κερέλα λατσσές μπουτί ι γιαβερέντζαρ ισί “έτοιμος τι ντελ πι πραγματένταρ”. (1 Τιμ. 6:​18) Καζόμ κερέλας μπουτί πασέ πι Νταντέστε, ο Ιησούς πρέπει τι ντικχλάς ότι ο Ιεχωβά να γκεραβέλας πράγματα. Κάνα ο Ιεχωβά «λατσσαρέλας ο ουρανός», ο Ιησούς “ισινέ οτθέ” ντα μπορίνελας τι σικλιόλ λέσταρ. (Παρ. 8:​27) Σοράν, ο Ιησούς-ντα μουτθαντάς χαράσαρ πι μαθητένγκε “οντουλά σο ασουντάας” πι Νταντέσταρ. (Ιωάν. 15:​15) Μοιάζασα κο Ιεχωβά κάνα βακεράσα αμαρέ πφραλένγκε ντα πφενίνγκε οντουλά σο σικλιλάμ. Σίγουρα, εκ λατσσό τζενό σο κερέλα λατσσές μπουτί ι γιαβερέντζαρ να κα γκεραβέλας λένταρ πράγματα σο κα χρειαζίντιβελας τι τζανέν ή σο κα βοηθίνενας-λεν σάντε για τι τθερέλ βοβ ο πράγματα πι βαστέντε. Κα βακερέλας χαράσαρ κο γιαβερά ο λατσσέ πράγματα σο σικλιλόας.

Μπορίνασα τι ντας ζορ-ντα αμαρέ λαφίντζαρ οντουλέν σο κεράσα λέντζαρ μπουτί. Κάνα εκ τζενό ντικχέλα ο προσπάθειες σο κεράσα ντα σικαβέλα αμένγκε πι εκτίμηση, ανταβά κερέλα-αμέν τι νιωθίνας μπουτ σουκάρ. Ο Ιησούς ντέλας πι σαατίσταρ για τι βακερέλ οντουλένγκε σο κερέλας λέντζαρ μπουτί ο λατσσιπέ σο ντικχέλας λέντε. (Ντικχέν Ματθαίος 25:​19-23· Λουκάς 10:​17-20) Βακερντάς λένγκε ατζέ-ντα ότι κα κερένας «πράγματα πο μπαρέ» οντουλένταρ σο κερντάς βοβ. (Ιωάν. 14:​12) Ι ιράτ πριν τι μερέλ, ισαρντάς πι πιστέ αποστολόν ακαλέ λαφίντζαρ: «Τουμέν ατσσιλέν πασέ μάντε μι δοκιμασιέντε». (Λουκ. 22:​28) Ανέν τουμαρέ γκοντιάτε καζόμ ζορ πρέπει τι λιντέ ντα καζόμ πο μπουτ πράγματα πρέπει τι μανγκλέ τι κερέν κάνα ασουντέ λέσκε λάφια! Άμα ντάσα αμέν-ντα αμαρέ σαατίσταρ για τι ισαράς οντουλέν σο κεράσα λέντζαρ μπουτί, σίγουρα βον κα αβέν πο χαρούμενοι ντα μπέκιμ τι κερέν πο μπουτ πράγματα.

«Ο τζενό σο κερέλα λατσσές μπουτί ι γιαβερέντζαρ να χρειαζίντιβελα τι αβέλ τέλειος», βακερέλα εκ πφραλ σο βακερένα λέσκε Κάγιοντε, «αλλά πφερέλα χαρά ι γιαβερέν ντα κερέλα ι μπουτί πο εύκολη οντουλένγκε σο κερένα λέσαρ μπουτί». Ισινέν ασακέ τζενέ τουμέν; Κα μπορίνενας τι πουτσέν μερικέ πφραλέν ντα πφενίν για τι σικλιόν σο πακιάνα βον τουμένγκε. Άμα μπεϊντίνενα τι κερέν μπουτί τουμέντζαρ, σαρ ο μαθητές-ντα ι Ιησούσκε μπεϊντίνενας τι κερέν λέσαρ μπουτί, μπορίνενα τι βακερέν σαρ ο απόστολος Παύλος: «Ισινάμ συνεργάτες για τι αβέν χαρούμενοι».​—2 Κορ. 1:24.