Pikhali Yezu kudzulu apfundza makhaliro akuti mukupita kwa ndzidzi amphedza toera kukhala munthu wakuti akhaphata basa mwadidi na andzace pa dziko yapantsi. Tinaphedzeka tani na citsandzo ca Yezu? Tingapfundza citsandzo cace, tinagumana mdidida mitatu yakuti inatiphedza toera kuphata basa mwadidi na anango. Midida ineyi inatiphedza toera kukhala akuphatana kakamwe na abale athu.

Munthu wakuti asaphata basa mwadidi na andzace ndi wakucepeseka. Iye asaona anyabasa andzace kukhala akufunika, pontho iye nkhabe cita pinthu toera kuoniwa ninga wakufunika kakamwe. Yezu apfundza makhaliro anewa akucepeseka na Babace. Maseze ndi Yahova basi adathema kucemerwa Nciti, iye asafuna kuti anthu adziwe pinthu pyakufunika kakamwe pidacita Mwanace. Ife tisadziwa pyenepi thangwi ya mafala adalonga Mulungu kuti: ‘Tendeni ticite munthu ninga ife.’ (Gen. 1:26) Pidalonga Yahova mafala anewa, Yezu adzindikira kuti Yahova ndi wakucepeseka kakamwe.—Masal. 18:35.

Pidabwera iye pa dziko yapantsi, Yezu apitiriza kukhala wakucepeseka. Pikhasimbwa iye thangwi ya pinthu pikhacita iye, Yezu akhapasa mbiri Mulungu. (Marko 10:17, 18; Juwau 7:15, 16) Yezu akhawangisira toera kukhala mwantendere na anyakupfundzace, pontho iye akhaatsalakana ninga axamwali ace m’mbuto mwakuatsalakana ninga mabitcu. (Juwau  15:15) Iye atsuka miyendo yawo toera kuapfundzisa kuti iwo akhafunika kukhala akucepeseka. (Juwau 13:5, 12-14) Ninga Yezu, ife tisafunika kulemedza anyabasa andzathu m’mbuto mwakuikha pifuno pyathu pa mbuto yakutoma. ‘Tingalemedzana unango na ndzace’ mbatikhonda kudzudzumika kuti mbani anafuna kupaswa mbiri, ife tinakwanisa kucita pinthu pizinji kakamwe.—Aroma 12:10.

Munthu wakucepeseka asadziwa kuti ‘pangakhala na maphungu mazinji pinthu pisafamba mwadidi.’ (Mis. 15:22) Mwakukhonda tsalakana pinthu pinadziwa ife peno maluso athu, ife tisafunika kukumbuka kuti nkhabe munthu anadziwa pinthu pyonsene. Ngakhale Yezu, akhadziwa kuti pakhali na pinthu pyakuti iye nee akhapidziwa. (Mat. 24:36) Iye akhafuna kudziwa pinthu pikhanyerezera anyakupfundzace akusowa ungwiro peno pikhadziwa iwo. (Mat. 16:13-16) Na thangwi ineyi, anyakupfundzace akhafuna kukhala dhuzi na iye! Munjira ibodzi ene, tingakhala akucepeseka mbatikumbuka kuti nee tisadziwa pyonsene, ife tinabvera maonero a anango, tinakhala mwantendere na anango, pontho ‘pinthu pinafamba mwadidi kakamwe.’

Mphyakufunika kakamwe kuna akulu a mpingo kutowezera Yezu angaphata basa pabodzi. Iwo asafunika kukumbuka kuti nzimu wakucena unakwanisa kuphedza m’bodzi na m’bodzi toera kupereka maonero akuti anaphedza nsoka wa akulu a mpingo toera kucita pisankhulo pyadidi. Khala pa misonkhano yawo, akulu a mpingo asapangiza makhaliro akuti asacitisa onsene kukhala akusudzuka toera kupereka maonero, iwo anacita pisankhulo pyakuti pinaphedza mpingo onsene.

Munthu wakuti asaphata basa mwadidi na andzace asakhala na maonero akulinganira mu ndzidzi unaphata iye basa na anango. Iye ndi waphinga, pontho asabvera. Yezu akhali na nkhombo yakuona Babace mbakapangiza maonero akulinganira. Mwacitsandzo, Yahova antuma toera kuombola anthu akuti akhadathema kufa.—Juwau 3:16.

Midzidzi inango Yezu akhatawira kucita pinthu pinango. Kumbukani kuti iye aphedza tani nkazi wa ku Fenisya maseze iye akhadatumwa kuna mbumba ya Izraeli. (Mat. 15:22-28) Iye akhalimbo na maonero akulinganira thangwi ya anyakupfundzace. Maseze xamwali wace wa pantima Pedhru akhadan’khonda pa mwinji, Yezu akhali dzololo toera kumulekerera. Mukupita kwa ndzidzi, iye apasa Pedhru basa yakufunika kakamwe. (Luka 22:32; Juwau 21:17; Mabasa 2:14; 8:14-17; 10:44, 45) Citsandzo ca Yezu cisapangiza pakweca kuti ife tinakwanisa kupangiza kuna ‘anthu onsene kuti tiri na maonero akulinganira’ tingakhala akubvera.—Afil. 4:5.

 Kukhala na maonero akulinganira, kunatiphedza toera kukhala akudzolowereka toera tikwanise kuphata basa mwantendere na anthu anango. Yezu akhatsalakana mwadidi anthu onsene, ndi pyenepi pidacitisa anyamalwa ace kumpambizira kuti iye ndi “xamwali wa anyakulipisa misonkho na wa anyakudawa” akuti ndi ale adatawira mphangwa zace. (Mat. 11:19) Ninga Yezu, ife tinakwanisa kuphata basa mwadidi na anango maseze tiri na makhaliro akusiyana. M’bale Luis wakuti atumikira ninga muyang’aniri wa cisa, pontho atumikira pa Bheteli na anthu a makhaliro akusiyana-siyana, alonga: “Ine ndayesera kulandanisa misoka yakusiyana-siyana idaphata na ine basa na paredhi yakumangwa na mabhuloko a thunga yakusiyana-siyana. Munthu angapaka mwadidi mabhuloko, mbaasasanyira, pakumalisa paredhi isakhala yakuzwerera mwadidi. Munjira ibodzi ene, ine ndayesera kucita macinjo mu umaso wanga toera ndiphate basa mwantendere na anango.” Unoyu ndi n’khaliro wadidi kakamwe!

Ndi midzidzi ipi inafunika ife kupangiza kuti tisaphata basa mwakuphatana pa mpingo pathu? Ife tinakwanisa kucita pyenepi tingakhala pabodzi na nsoka wathu wakumwaza mphangwa. Panango ife tinaenda mu utumiki na amwazi mphangwa akuti ali na mabasa akusiyana na athu thangwi yakutsalakana banja peno a mathunga akusiyana. Ife tinakwanisa kuwangisira toera kukhala akulinganira mbaticinja njira yathu yakumwaza mphangwa mwakubverana na makhaliro awo toera iwo akhale akutsandzaya m’basa yakumwaza mphangwa.

Munthu wakuti asaphata basa mwadidi na andzace asakhala ‘dzololo toera kupasa anango.’ (1 Tim. 6:18) Pikhaphata iye basa pabodzi na Babace, Yezu adzindikira kuti Yahova nee asabisa pinthu. Yahova ‘pidacita iye kudzulu,’ Yezu ‘akhali kweneko’ pontho akwanisa kupfundziswa na iye. (Mis. 8:27) Mukupita kwa ndzidzi, mwakutsandzaya Yezu apangambo anyakupfundzace ‘pinthu pidabva’ iye kwa Babace. (Juwau 15:15) Ife tinatowezera citsandzo ca Yahova tingapanga abale na alongo athu pinthu pidapfundza ife na pinadziwa ife. Munthu wakuti asaphata basa mwadidi na andzace, nee asaabisira pinthu pyakuti iwo asafunika kupidziwa peno pyakuti mbapidaaphedza, basi ene toera iwo anyindire iye. Iye asakomerwa na kupanga anango pinthu pinadziwa iye.

Ife tinakwanisambo kulonga mafala akuti anawangisa andzathu anaphata basa na ife. Kodi ndzathu anaphata na ife basa angaona kuwangisira kunacita ife, mbapereka takhuta thangwi ya kuwangisira kwathu, pyenepi nee pisatiwangisa? Yezu akhasaka ndzidzi toera kupanga andzace pinthu pyadidi pikhaona iye kuna iwo. (Onani Mateu 25:19-23; Luka 10:17-20.) Kusiyapo pyenepi, iye aapangambo kuti iwo “anadzacita mabasa makulu kupiringana” adacita iye. (Juwau 14:12) Namasiku Yezu mbadzati kufa, asimba apostolo ace akukhulupirika, mbaapanga: “Imwe mwapitiriza kukhala na ine m’mayesero anga.” (Luka 22:28) Nyerezerani kuti mafala a Yezu akhuya tani apostolo ace, mbaakulumiza toera kucita pinthu! Ife tingasakambo ndzidzi toera kusimba andzathu, iwo anakhala akutsandzaya kakamwe, pontho pyenepi pinaaphedza toera kucita pizinji.

M’bale anacemerwa Kayode, alonga: “Munthu anaphata basa mwadidi na andzace nee asafunika kukhala waungwiro, mbwenye asacitisa ale anaphata na iye basa kukhala akutsandzaya, pontho asacitisa basa kukhala yakululupa.” Kodi imwe musaphata basa mwadidi na andzanu? Imwe munakwanisa kubvundzisa abale na alongo anango toera kubva kuti asanyerezeranji thangwi ya imwe. Khala iwo asakomerwa kuphata basa pabodzi na imwe ninga anyakupfundza a Yezu akuti akhakomerwa kuphata basa pabodzi na iye, imwe munakwanisa kulonga ninga mpostolo Paulu kuti: “Ife ndife anyabasa andzanu toera mukhale akutsandzaya.”—2 Akor. 1:24.