Jésus amanda asarango ye so na pekoni asara si lo duti mbeni nzoni tapande ti zo so lo na amba ti lo asara kua nzoni na ngoi so lo yeke na sese. Tongana nyen la e peut ti wara ye ti nzoni na lege ti tapande ti Jésus? Tongana e bâ tapande ti lo nzoni, e peut ti wara amama-ndia ota so apeut ti aidé e ti ga zo so lo na amba ti lo asara kua nzoni. Amama-ndia so ayeke aidé e ti duti beoko na aita ti e ahon ti kozo.

Zo so lo na amba ti lo asara kua nzoni ayeke sara terê ti lo kete lo bâ amba ti lo na nene ni nga lo yeke gboto lê na ndö ti lo ape. Jésus amanda sarango terê kete so na terê ti Babâ ti lo. Atâa so gï Jéhovah oko la alingbi ti tene a iri lo Lo so acréé aye, lo ye lani ti tene azo ahinga kota kua so Molenge ti lo asara. E hinga ni na lege ti tënë so Nzapa atene. Lo tene: “Zia e sara zo na image ti e.” (Gen. 1:26). Na ngoi so Jéhovah atene tënë so, Jésus ahinga so Jéhovah asara terê ti lo kete mingi.—Ps. 18:35.

Na ngoi so Jésus ayeke lani na sese, lo sara nga terê ti lo kete. Tongana azo agonda lo ndali ti aye so lo sara, lo kiri na gonda ni na Nzapa (Marc 10:17, 18; Jean 7:15, 16). Jésus asara kue ti bata siriri na popo ti lo na adisciple ti lo nga lo sara ye na ala tongana akamarade me pëpe tongana angbâa (Jean 15:15). Lo sukula même gere ti ala ti fa na ala ti sara terê ti ala kete (Jean 13:5, 12-14). E nga kue, a yeke nzoni e ne amba ti e so e  na ala e yeke sara kua me e zia aye so agbu bê ti e kozo na ti ala ape. Tongana ‘e ne mba na popo ti e’ nga e gi bê ti e ape na ndö ti zo so peut-être ayeke wara ande gonda, e peut ti sara aye mingi.—aRom. 12:10.

Zo so asara terê ti lo kete ahinga nga so “grâce na gbâ ti awamungo wango, ye aga nzoni.” (aProv. 15:22). Atâa e hinga ye tongana nyen wala e yeke na akode tongana nyen, a lingbi e girisa ape so mbeni zo so ahinga aye kue ayeke dä ape. Même Jésus ahinga so ambeni ye ayeke dä so lo hinga ni lani ape (Mat. 24:36). Lo ye nga lani ti hinga ye so adisciple ti lo so ayeke mbilimbili-kue ape ahinga wala apensé (Mat. 16:13-16). Ndani la amba ti lo so lo na ala asara kua abâ so ala yeke nzoni na terê ti lo. Legeoko nga, tongana e sara terê ti e kete e girisa ape so e hinga ye kue ape nga tongana e mä apensé ti amba ti e, e yeke maï siriri na popo ti e na ala, e na ala e yeke sara si “ye aga nzoni.”

A yeke mbilimbili kota ye ti tene a-ancien asara terê ti ala kete tongana Jésus na ngoi so ala yeke sara kua legeoko. A lingbi ala girisa ape so yingo vulu apeut ti pusu mbeni oko na popo ti ala ti fa mbeni ye so ayeke aidé ala ti mû mbeni nzoni desizion. Tongana na ngoi ti bungbi ti a-ancien ala sara kue ti tene zo kue apeut ti fa bango ndo ti lo, ala yeke mû adesizion so congrégation kue ayeke bâ nzoni dä.

Zo so lo na amba ti lo ayeke sara kua nzoni ayeke sara ye ahon ndö ni ape na ngoi so lo na amba ti lo ayeke sara kua. Lo yeke luti nganganga na ndö ti apensé ti lo ape. Kite ayeke dä ape so, fani mingi Jésus abâ Babâ ti lo so asara ye ahon ndö ni ape. Na tapande, Jéhovah atokua lani lo ti zi azo na gbe ti ngbanga ti kuâ so ala lingbi na ni.—Jean 3:16.

Jésus ayeke yeda lani ti sara ambeni ye so lo doit ti sara ape tongana lo bâ so a yeke kota ye wala a yeke na lege ni. Dabe ti mo so lo aidé lani mbeni wali ti Phénicie atâa so a tokua lo na mbage ti azo ti Israël (Mat. 15:22-28). Lo sara nga ye lani ahon ndö ni ape na yâ ti aye so lo ku na mbage ti adisciple ti lo. Na peko ti so kota kamarade ti lo Pierre atene na lê ti azo atene ni hinga lo ape, lo yeke lani nduru ti pardonné lo. Ambeni ngoi na pekoni, lo mû akota kua na Pierre (Luc 22:32; Jean 21:17; Kus. 2:14; 8:14-17; 10:44, 45). Tapande ti Jésus afa na e polele so e doit ti ‘zia azo kue ahinga so e yeke sara ye ahon ndö ni ape’ na lege so e luti nganganga ape na ndö ti apensé ti e.—aPhil. 4:5.

 Ti sara ye ahon ndö ni ape ayeke pusu nga e ti sara achangement tongaso si e sara kua na yâ ti siriri na azo kue. Jésus asara ye lani nzoni mingi na azo so ayeke na terê ti lo, a sara si awato ti lo so bê asara ala atene so “lo yeke kamarade ti azo ti rongo nginza ti impôt na ti awasiokpari” so ayeda na tënë ti lo (Mat. 11:19). Tongana ti Jésus, eskê e peut ti sara kua nzoni legeoko na azo so ayeke nde na e? Louis, mbeni ita-koli, so asara kua na gbâ ti azo nde nde na ngoi so lo yeke surveillant so ague na ando nde nde nga na ngoi so lo sara kua na Béthel, atene: “Mbi gi ti haka groupe oko oko kue so mbi sara kua na yâ ni na mbeni mur so a monté ni na atênë so ayeke nde nde. Tongana mo leke atênë ni nzoni, mur ni apeut ti luti droit. Mbi wani mbi gi nga ti sara achangement tongaso si mbi na amba ti mbi e sara kua na yâ ti siriri.” So tâ pendere bibe!

Na ngoi wa la e peut ti duti na bibe ti sara kua maboko na maboko na aita ti congrégation ti e? E yeke sara ni na ngoi so e na aita ti groupe ti e, e yeke fa tënë. Peut-être e na awafango tënë so kua ti ala na yâ ti sewa ayeke nde na ti e wala ngu ti ala ayeke nde na ti e la e yeke fa tënë. Eskê e peut ti sara ye ahon ndö ni ape na lege so e changé fason ti fango tënë ti e ti lingbi na ti ala wala e duti nduru ti sara mbage ti fango tënë so ala ye tongaso si ala wara ngia mingi na fango tënë?

Zo so lo na amba ti lo ayeke sara kua nzoni ayeke “duti nduru ti kangbi ye na zo”. (1 Tim. 6:18). Na ngoi so Jésus ayeke sara kua na terê ti Babâ ti lo, lo doit lani ti bâ so Jéhovah ahonde ambeni ye na lo ape. Na ngoi so Jéhovah ayeke “leke yayu,” Jésus ‘ayeke lani dä’ nga lo manda ye na terê ti lo (aProv. 8:27). Na pekoni, Jésus ayeke lani na ngia ti fa na adisciple ti lo ‘aye so [lo] mä na yanga ti Babâ ti lo.’ (Jean 15:15). E peut ti sara ye tongana Jéhovah ti fa na aita ti e aye so e manda. Zo so lo na amba ti lo ayeke sara kua nzoni ayeke gi ti komande amba ti lo ape na lege so lo ke ti fa na ala aye so ala bezoin ti hinga wala aye so apeut ti aidé ala. Lo yeke na ngia ti fa na ala anzoni ye so lo hinga.

E peut nga ti kpengba amba ti e so e na ala e yeke sara kua na lege ti atënë ti yanga ti e. Tongana mbeni zo abâ a-effort so e sara na lo kiri singila na e ndali ni, a yeke nzere na e mingi. Jésus amû lani ngoi ti fa na amba ti lo so lo na ala asara kua anzoni ye so lo bâ ala sara. (Bâ Matthieu 25:19-23; Luc 10:17-20.) Lo tene même na ala so ala yeke sara “akusala so ayeke kota ahon” ti lo (Jean 14:12). Na bï so na ndade ni lo kui, lo gonda abazengele ti lo so ayeke be-ta-zo, lo tene: “Ala yeke azo so angbâ na terê ti mbi na yâ ti atara so asi na mbi.” (Luc 22:28). Imaginé tongana nyen la atënë so andu bê ti ala na apusu ala ti sara kua. Tongana e nga kue e mû ngoi ti gonda amba ti e so e na ala e yeke sara kua, kite ayeke dä ape so ala yeke duti na ngia mingi nga peut-être ala yeke sara kua mingi ahon ti kozo.

Mbeni ita-koli so iri ti lo Kayode atene: “Zo so lo na amba ti lo asara kua nzoni abezoin ti duti mbilimbili-kue ape, me lo yeke sara si amba ti lo aduti na ngia nga kua ayapu.” Eskê mo yeke mara ti zo tongaso? Peut-être mo peut ti hunda ambeni ita ala pensé mo yeke mara ti zo ti kua wa? Tongana a nzere na ala ti sara kua legeoko na mo tongana ti so a nzere na adisciple ti sara kua legeoko na Jésus, mo peut ti tene mara tënë ti Paul so lo tene: “E yeke amba ti ala awakua ndali ti ngia ti ala.”​—2 aCor. 1:24.