Yezu aciyigizize morhere manji minja gamurhabire abe lwiganyo lwinja lw’omukozi-murhabazi kuli balya bakagikola haguma naye. Gurhi rhwakayungukamwo n’olwiganyo lwa Yezu? Omu kurhanya kwa bulîri oku lwiganyo lwage, rhwanabona makanuni asharhu gakarhurhabala rhube bakozi-barhabazi binja. Ago makanuni ganarhuhashisa rhube n’iroho ly’okukola omu cinyabuguma haguma n’abandi.

Omukozi-murhabazi mwinja anashagalukire n’obwirhohye ababo bakozi arhanacibona oku ali wa bulagirire kubalusha. Obo bwirhohye kali kantu kaguma ka mw’ebi Yezu aciyigirizagya kugerera Ishe. Ciru akaba Yehova yene oshinganine okuhamagalwa Lulema, alonza abandi bamanye omukolo Omugala na mukozi-murhabazi wage ajijire. Rhubwine ntyo kugerera ebi Nnâmahanga aderhaga: “Rhujire omuntu oku nshusho yirhu.” (Murh. 1:26, NWT) Kobinali Yezu ashagalukire obwirhohye bwa Nnâmahanga muli eyo njira.​—Enna. 18:35.

Yezu ayerekine obwirhohye bwa ntyo erhi ali hanw’igulu. Erhi abantu bakamuhire irenge enyanya z’ebi ahikirizize, eryo irenge akagiliha Omuguma olishinganine. (Mk. 10:17, 18; Yn. 7:15, 16) Yezu akagikola omu murhula haguma n’abanafunzi bage arhanakagibabona nka baja cikone nka bîra bage. (Yn. 15:15) Ciru ahikira aha abashuka amagulu  ly’abayigiriza isomo ly’obwirhohye. (Yn. 13:5, 12-14) Nirhu rhunajire bwinja erhi rhuhira amalagirire g’abirhu bakozi-barhabazi oku nafasi ntanzi kulusha agirhu. Rhunajire binji erhi “ngasi muguma [wirhu] akakenga ababo” na ntyo rhurhacilibuza n’okulonza okumanya indi oshinganini okuhabwa irenge.​—Rm. 12:10.

Omuntu mwirhohye anahugûkwe oku “ahali abahabûzi [bahanûzi] banji, emihigo kuyunjula eyunjula.” (Mig. 15:22) Ciru akaba rhwacibwinire bintu binji erhi rhugwerhe bumanye bunji, rhushinganine rhuhugûkwe oku nta mwene muntu oyishi ebintu byoshi. Ciru na Yezu alihugûsirwe oku hali ebintu arhal’imanyire. (Mt. 24:36) Kandi, akagishibirira ebi abanafunzi bage barhali bimana balimanyire erhi kuderha. (Mt. 16:13-16) Co cakagirhuma ababo banyakazi-barhabazi bakagishagalukira okuba haguma naye! Ko n’oko, erhi obwirhohye bwakakarhushumya rhuhugûkwe oku rhurhakahasha ngasi kantu rhwanayumva entanya z’abandi n’okuhira omurhula haguma nabo, omu kujira ntyo rhweshi haguma ‘emihigo yanayunjula.’

Kuli kwa bulagirire bwenene abagula bayige olwiganyo lwa Yezu amango bali bakola haguma n’ababo. Bashinganine bakengere oku iroho litagatifu lyanakola kuli ngasi mugula omu mbaraza. Erhi omu ntimanano zabo ngasi muguma akakajira okwage koshi ly’ahira ehali nyinja yakarhuma ngasi muntu aciyumva oku naye anahâna entanya zage, boshi haguma banakola omu kurhôla emihigo yakalerhera ecigamba coshi obunguke.

Omukozi-murhabazi mwinja aba wa lugero omu lushangi lwage haguma n’ababo bakozi. Aba mwirhohye na wakuleka abandi bajire erhi baderhe bintu bilebe. Yezu abire n’obulyo bwinja bw’okubona oborhere b’okuba wa lugero bw’Ishe. Kwa lwiganyo, Yehova amurhumaga ly’ayokola abantu kurhenga omu buhane bw’ecaha n’olufû balishinganine.​—Yn. 3:16.

Yezu akagiyumva abandi omu mango galishinganine. Okengere gurhi arhabalaga omukazi w’e Foinike, ciru ankaba Yezu arhumagwa omu nyumpa ya Israheli. (Mt. 15:22-28) Na kandi ali wa lugero kushimbana n’ebi akagihûna abanafunzi bage oku bajire. Erhi omwîra wage Petro ayusimuhakana embere z’abantu boshi, Yezu aba mubidu okumubabalira. Enyuma z’aho, aha Petro emikolo y’obulagirire. (Lk. 22:32; Yn. 21:17; Ebj. 2:14; 8:14-17; 10:44, 45) Olwiganyo lwa Yezu luyerekine n’obwalagale oku rhushinganine “rhuleke oborhere [bwirhu] bw’okuba ba lugero bumanyikane  embere z’abantu boshi” omu kurhaseza abandi oku bashimbe entanya zirhu.​—Fl. 4:5, NWT.

Kandi okuba ba lugero kwanarhuhashisa rhukacikomereza ngasi hali lyo rhukola omu cinyabuguma haguma na ngasi bantu. Yezu akagikolera bwinja abantu akagiyegera n’oko kwarhuma abashombanyi bage b’obumvu bamushobeka oku ali “mwira wabavurhisa b’ikoli n’abanyabyaha” bakagiyumvirhiza omwanzi gwage. (Mt. 11:19, Mashi Bible) Aka Yezu, karhunahashe okukola bwinja haguma n’abandi? Mwene wirhu Louis wakolaga omu kazi k’omuzunguko na buzinda ayishikolera oku Beteli haguma n’abantu ba ngasi lubero, adesire ntya: “Nakalonza okushushanya ngasi cikundi c’abantu nakagikola naco n’ecibambazi c’enyumpa ciyubasirwe n’amabuye garhayumanini. Omu kukubula aha ngasi mabuye maguma na maguma gali, wanabona wamayubaka ecibambazi ciyimanzire bwinja. Na nani nacihangana okukubula entanya zani lyo nkakola omu murhula haguma n’abandi.” Ezo ziri ntanya nyinja bwenene!

Mangaci rhushinganine rhuyerekane oku rhuli ba lugero omu kukola haguma n’abandi omu cigamba? Rhunayerekane ntyo amango rhuli haguma n’ecikundi cirhu c’amahubiri. Hali amango rhwakahubiri n’abahubiri bagwerhe eyindi mikolo y’okujira omu mulala gwabo kulusha eyi rhugwerhe erhi abagwerhe emyaka eri lubero n’eyirhu. Ka rhwanaba ba lugero omu kukubula eprograme yirhu erhi oku rhuhubiri lyo rhubarhabala bahubiri n’omwishingo?

Omukozi-murhabazi mwinja aba mubidu ‘okushangira’ haguma n’abandi. (1 Tm. 6:18) Erhi Yezu ali akola haguma n’Ishe, acibonera oku Yehova arhakagimufulika kantu lugenda emikolo bakagijira. Amango Yehova “àyimanikaga amalunga,” Yezu ‘ahali’ akananaciyigirizize binji kugerera ye. (Mig. 8:27) Enyuma z’aho, Yezu naye ashangira n’obulonza haguma n’abanafunzi bage “ngasi byoshi” Ishe amumanyisize. (Yn. 15:15) Omu kubika oko omu bukengere, na nirhu rhushinganine okuba babidu okushangira haguma n’abirhu banyakazi-barhabazi obumanye bwirhu. Kobinali, omukozi-murhabazi mwinja arhakafulika emyanzi y’obulagirire mpu lyo yene agendekeza omukolo. Anashagalukira okushangira haguma n’abandi ebintu binja aciyigirizize.

Na kandi anashangira enderho z’okuhâna omurhima haguma n’ababo bakozi-barhabazi. Erhi muntu mulebe abona obushiru bwirhu n’okurhuvuga omunkwa n’obwalagale, k’oko kurharhuma rhwaciyumva bwinja? Yezu akagiciha akasanzi k’okubwira abakozi-barhabazi bakagikola boshi ebinja ababwineko. (Oshushanye na Mateyo 25:19-23; Luka 10:17-20) Ahikira aha ababwira oku ‘banajire ciru ebilushire’ ebyage. (Yn. 14:12) Omu budufu bw’embere z’olufû lwage, Yezu avuga entumwa zage omunkwa, omu kuderha ntya: “Mwe mwabêzire haguma nani omu malibuko gani.” (Lk. 22:28) Orhanye gurhi ezo nderho zahumire oku murhima gwabo zanabashumya okukola! Erhi nirhu rhwakakavuga abirhu bakozi-barhabazi omunkwa, banashagaluka na kandi nkaba banajira omukolo bwenene kulusha.

Mwene wirhu ohamagalwa Kayode, adesire ntya: “Birhahûna mpu omukozi-murhabazi mwinja abe mwimana, cikone anarhuma omwishingo gwaba egarhi k’aba bali bakola boshi na ntyo analembeza ababo bakozi-barhabazi omukolo.” K’oba mukozi-murhabazi wa ntyo? Nkaba wanadoza abinyu bakozi-barhabazi Bakristu baguma na baguma ly’omanya oba mukozi-murhabazi wa gurhi. Erhi akaba banashagalukire okukola haguma na nawe, nk’oku abanafunzi ba Yezu bashagalukiraga okukola haguma naye, wanahikira aha waderha aka entumwa Paolo yaderhaga ntya: “Rhuli bakozi-barhabazi haguma na ninyu lyo muba n’omwishingo.”​—2 Kr. 1:24, NWT.