Nahita modely soa Jesosy tan-danitsy any, ka lasa nahay niaraky niasa amin’olo. Lafa niavy tan-tany etoy amy zay ie le nanome modely farani-ze soa amy fahaiza miaraky miasa amin’olo zay. Mahasoa antsika koa va zay? Laha dinihintsika soa ty modely nengani-Jesosy, le misy torolala telo hanampy antsika hahay hiaraky miasa amin’olo. Hanampy antsika hiharo raiky torolala reo.

Miambany ty olo mahay miaraky miasa amin’olo. Ataony an’eritseritsy hoe tena ilà mpiaraky miasa aminy iny le tsy manao raha hahavy olo hifantoky aminy ie. Anisani-raha nianarani-Jesosy baka amy Babany resaky fiambanea io. Marina fa Jehovah raiky avao ro maeva ho kaihy hoe Mpamoro, fe teany ho hain’olo koa ty asa bevata nataoni-Anakilany iny. Ahità ani-zay, ohatsy, Safàny toy: “Ndao tsika hanamboatsy olo mitovy soraky amintsika.” (Gen. 1:26) Nihaini-Jesosy hoe tena niambany vatany Jehovah lafa nivola ani-reo.—Sal. 18:35.

Niambany ho zay koa Jesosy lafa tan-tany etoy. Lafa nisy olo nidera azy tamy ty raha nataony le Ndranahary avao ro nameany voninahitsy. (Mar. 10:17, 18; Jaona 7:15, 16) Niezaky nifandramby soa tamy mpianatsiny rey avao Jesosy, le nama ty fandrambesany an-drozy fa tsy andevo. (Jaona 15:15) Nisasàny mihintsy aza ty tombokin-drozy mba hampianara an-drozy mikasiky fiambanea. (Jaona 13:5, 12-14) Tokony hanao ho  zay koa tsika, zany hoe tokony hameantsika voninahitsy ty mpiaraky miasa amintsika ka ze hahasoa an-drozy tse ro ilàntsika. Hahavita raha maro tsika laha ‘mifanome voninahitsy’ sady tsy hiasa loha hoe ia amintsika ty tokony hoderà.—Rom. 12:10.

Mieky koa ty olo miambany hoe laha misy raha teany hatao le ho tanteraky raha zay laha “maro ty mpanoro hevitsy.” (Ohab. 15:22) Ndre mahay raha noho mana traikefa manao akory tsika, le tokony hotiarovintsika avao hoe tsy misy olombelo mahay ty raha iaby zao. Ndre Jesosy aza nieky hoe misy raha sisany tsy hainy. (Mat. 24:36) Teany ho hay koa hoe ino ty raha eritseretini-mpianatsiny tsy lavorary rey noho ty raha hain-drozy. (Mat. 16:13-16) Tsy itsereha laha tsy nihafahafa mihintsy ze olo niaraky niasa aminy! Mila miambany ho zay koa tsika ka tiarovintsika avao hoe tsy haintsika ty raha iaby. Mila mijanjy ty hevitsini-mpiaraky miasa amintsika avao tsika. Laha manao ani-reo tsika le hifanaraky soa amin-drozy sady ho vita ze raha teantsika hatao miaraky amin-drozy.

Tena mila miambany manahaky ani-Jesosy koa ty anti-panahy lafa miaraky miasa. Tokony hotiarovin-drozy hoe samby afaky mitariky ty kiraidraiky amin-drozy ty fanahy masy. Lafa mivory rozy, le samby tokony hiezaky hivola ty hevitsiny amy zay rozy afaky handramby fanapahan-kevitsy mahasoa ty fiangona iaby.

Mahay mandanjalanja ty olo mahay miaraky miasa amin’olo. Mandefitsy ie sady tsy sarotiny. Tena mahay mandefitsy Jehovah. Azo antoky fa nana fahafaha nandiniky ani-toetsini-Babany zay Jesosy. Maeva ho maty, ohatsy, ty olombelo fe naniraky azy tan-tany etoy Jehovah mba hanavotsy ty olombelo amy fahafatesa zay.​—Jaona 3:16.

Nandefitsy Jesosy lafa nilà ty nanao ani-zay. Tiarovo fa nanampy ani-ampela fenisianina iny ie, ndre ho amy taranakini-Israely teo avao aza ty naniraha azy. (Mat. 15:22-28) Tsy nitaky raha maro marè tamy mpianatsiny rey koa ie. Nandà azy tamason’olo, ohatsy, Petera fe niparè hanenga ty hadisoany avao Jesosy. Tafarani-zay ie nanome andraikitsy bevata ani-Petera. (Lioka 22:32; Jaona 21:17; Asa. 2:14; 8:14-17; 10:44, 45) Hitantsika mazava soa amy modelini-Jesosy fa tokony ‘hahay mandanjalanja’ tsika ka handefitsy.​—Fil. 4:5.

Miezaky mizatsy miaraky miasa amin’olo sankarazany koa ty olo mahay mandanjalanja.  Nifandramby soa amy ty olo nanodidy azy Jesosy, zay nahavy ani-mpanohitsy azy rey nivola hoe “namani-[azy] mpamory hetra noho mpanota” nijanjy ty hafatsy nambarany rey ie. (Mat. 11:19) Afaky manahaky ani-Jesosy koa va tsika ka miaraky miasa soa amin’olo samby hafa? Niaraky niasa tamin’olo sankarazany rahalahy Louis, tamin’ie mbo nimpiandraikitsini-faritsy noho niasa tamy Betela ao. Zao ty nivolaniny: “Azo ampitovizy amin’olo raiky mamboatsy lakoro vato ty hoe miaraky miasa amin’olo tsy lavorary sankarazany. Tsy mitovy ty habeni-vato rey noho ty poziny ka tena mila ezaky ty miasa ani-lakoro iny. Fe afaky hahity soa avao lakoro iny. Niezaky nanao fanovà aho mba hahay hiaraky miasa amy ty hafa, amy zay mba vita soa ty asanay.” Tena soa toe-tsainy zay!

Amy fotoa manao akory tsika ro afaky mampiseho hoe mahay mandanjalanja amin’olo amy fiangona eo? Afaky manao ani-zay tsika lafa miasa amy faritany eny miaraky amy andia-mpitory misy antsika. Mety hiaraky miasa amy mpitory mana andraikitsy samby hafa amy fianakavia eo tsika lafa eny na miaraky amy mpitory tsy mitovy tao amintsika. Azontsika atao amy zay ty manova ty fomba fivolanantsika na ty fomba fitoriantsika mba hanampea an-drozy hahazo tavy ty fanompoa.

“Parè hizara” ty olo mahay miaraky miasa amin’olo. (1 Tim. 6:18) Lafa niaraky niasa tamy Babany Jesosy, le tsy maintsy ho niambiny hoe tsy nisy raha navonini-Jehovah. Lafa “namoro ty lanitsy” Jehovah, le “teo” Jesosy ka afaky niana-draha baka aminy. (Ohab. 8:27) Nifalifaly mihintsy Jesosy tafara atoy, nizara tamy mpianatsiny rey ‘ze raha nireny’ tamy Babany. (Jaona 15:15) Manahaky ani-Jehovah koa tsika laha zaràntsika amy rahalahy noho anabavintsika reo ze raha nianarantsika. Misy olo sisany, avonivoniny ty raha soa ho haini-mpiaraky miasa aminy rey na ty raha mety hanampy an-drozy satria teany ho ambaniny avao olo rey. Fe mazava ho azy fa tsy manao ho zay ty olo mahay miaraky miasa amin’olo. Vomaiky aza ie falifaly mizara ani-raha rey.

Afaky mampahery ani-mpiaraky miasa amintsika reo koa tsika. Manao akory tsika lafa misy olo mahita ty ezaky ataontsika ka mampiseho hoe tena mankasitraky antsika? Tsy mba falifaly va ty fontsika? Zay mihintsy ty nataoni-Jesosy. Niresahiny tamy mpiaraky miasa taminy rey ze raha soa nihitany tamin-drozy. (Ampitovizo amy Matio 25:19-23; Lioka 10:17-20.) Nivola tamin-drozy mihintsy aza ie hoe “hanao asa bevata mandilatsy” azy rozy. (Jaona 14:12) Tamy haliky talohani-hahafaty azy iny koa ie nidera ani-apostoliny tsy nivaliky rey hoe: “Nivahatsy tamiko avao nareo tanatini-fitsapà maro nahazo ahy rey.” (Lioka 22:28) Mba eritsereto moa hoe mety ho nanao akory ty hafalean-drozy lafa naharè ani-reo, le mety ho ino ty raha nivitan-drozy tafarani-zay! Laha midera ani-mpiaraky miasa amintsika reo koa tsika, le ho falifaly biby rozy sady vomaiky hahita vokatsy soa.

Nivola rahalahy mana anara Kayode zay hoe: “Tsy voatery ho lavorary ty olo raiky vo hahay hiaraky miasa amin’olo. Ataony avao ze hahavy ty olo hafa ho falifaly noho ho mora hahavita asa.” Olo manahaky ani-zay va iha? Vasa afaky anontaneanao rahalahy noho anabavinao reo hoe manao akory ty fahitan-drozy anao? Laha tean-drozy ty miaraky miasa aminao, manahaky ty nitiavani-mpianatsini-Jesosy rey niaraky niasa taminy, le afaky mivola manahaky ani-apostoly Paoly iha hoe: ‘Mpiaraky miasa hahazoanareo fifalea zahay.’​—2 Kor. 1:24.