L’olongo, Yeso ekaka wekeka wayisa ndookotshɛ ndambo l’ɔkɔngɔ djɛnde ndjala ndjɔmbɔmba kɛ wɔlɔ le wanɛ wayisa ndokamba esanga lande lá looko. Wopo wɔkɔnge okokaso mba wapɔ má ndjɔmbɔmba kɛ Yeso? Má ndjeka ndjɔmbɔmba kɛnde la nkɔmɛ nkfumɔ, iso nkoka ndjisola tɔkfɔ tosato tokoka ntokotshɛ djɛ ndjewa nkamba l’anto ankina wɔlɔ. Tɔkfɔ tosato tɔsɔ tongotokotshɛ dj’iso nkamba la wananyɔ waso l’osanga.

Kanga lewaka nkamba wɔlɔ nya winande angoyalake l’okitshakitshɛ, nde ndɔsaka winande w’olemo la ntshina la apahonaka ndakamoyɛ. Eyalelo k’okitshakitshɛ kɛ nghɔsɔ ndeke Yeso ndeeke me Papa kɛnde. Kaanga oyɛwɔ ngo Yehova ndeke l’ɛdje djɛ ndjetama Ontongi, nde nkɔpaka dj’anto ankina ndjewa olemo wɔ djonyi wokambisa Wɔnande etengo winande w’olemo. Iso nyɛnaka nsɔsɔlɔ kɛ nkambo djɛsɔ m’etepela wɛ Ndjambe wɛnɛ: ‘Totonge onto l’ɛfɔ kɛso.’ (Ewa. 1:26) Winá wɔ Yehova ndatepela etepela wɛsɔ, Yeso ewaka ante nsɔsɔlɔ Yehova alekɔ l’okitshakitshɛ.—Yee. 18:35.

Winá wɔ Yeso ndooyɛka lá looko, nde ɛnyɛka okitshakitshɛ wɔkɔ. Winá w’anto yolumɛka lá kɛnɛ kɛ ndananghaka nde apɛyɛki lomo lɔsɔ ngo te Kanga l’ɛdje. (Mar. 10:17, 18; Dj. 7:15, 16) Yeso ananghaka la wolo djɛ ndjala la djokanelo djɛ vu nya ambeki wande la awɔsaki etengo tolongo l’edjena kɛ ndawɔsa etengo ase olemo. (Dj. 15:15) Nde asolaka edjinge ekolo wɛwɔ djɛ ndaapɛyɛ olakanyelo w’okitshakitshɛ. (Dj. 13:5, 12-14) Ngo ngete  nde, iso ladjɛ ndɔsaka winaso w’olemo la ntshina l’edjena kɛ mpetshɛka ngo wapɔ wɛso la ntondo kɛ wɛwɔ. Ntsha l’anteyi kɛso topahone ngo djɛ mba lomo lonkfumɔ koko ‘mponaka djɛ mpɛyɛ anto ankina lomo,’ efula k’akambo w’onanghaso nkoka mbɔnga.—Ɔrɔ. 12:10.

Lonkina, kanga okitshakitshɛ nsipisoyɛka ante ‘má lotshimbo l’andaki efula akambo mbɔngaka.’ (Woo. 15:22) Ayale balo kana akoka wakɔnge w’okotshɛso, iso ladjɛ mvungɔka ente lako onto w’ewaka akambo ankfumɔ. Kaanga Yeso asipisoyɛki ante akambo amɔtshi walekɔ wa ndopewe. (Mat. 24:36) Lonkina, nde ilaki yimba lá kɛnɛ kewaki la kekanelaki ambeki wande watayala anto wa djɔ. (Mat. 16:13-16) Djɛkondeke winande w’olemo iyoyawokaka wɔlɔ winá wɔ yakambaka esanga lande! Wopo w’ɔkɔmɔ ndeke, ntsha iso ndjewa elelo wɛso l’okitshakitshɛ onkfumɔ la ndjawola tokanyi t’anto ankina, tongoyala vu lawɔ edjinge ‘akambo w’onanghaso esanga wangɔwɔnga.’

Pekapeka tokokolo walekɔ la djonyi djɛ ndjokola okitshakitshɛ wɔ Yeso winá w’okambawɔ esanga. Iwɔ ladjɛ mvungɔka ambɔ nyuma k’ekina nkoka nkamba l’onto onkfumɔ wolekɔ l’oloyi wɔwɔ. Ntsha tokokolo nanghaka kenkfumɔ k’okokawɔ nangha dj’onto onkfumɔ ndawoka djɛ alekɔ la lotshungɔ lɔ mpɛyɛ ikanyi winá w’onanghawɔ nsanghanyɛ yɛwɔ, mbɔ wangɔsaka akano wangoyakala wapɔ l’otshumano w’otondo.

Kanga lewaka nkamba wɔlɔ la winande ndjalaka l’ekanedji kɛ wɔlɔ winá w’okambande l’anto ankina. Nde ndjalaka entshupa djɛ ntshikitanyɛ ikanyi yɛnde ko ndjawola y’anto ankina. Yeso awaka nsɔsɔlɔ mbamba yɛ wɔlɔ yɛ nkɔmɛ ekanedji kɛ wɔlɔ kɛ Papa kɛnde. Ndjɔmbɔmba, Yehova otomaka djɛ ntowikɛ anto má nyɔyi.—Dj. 3:16.

Yeso atatshinyinyalaki ngo l’ɛlɛmbɛ winá wɔ nkambo djɛsɔ yayalaka djoyi. Kokanela wopo wɔ ndakotshɛ omoto ɔmɔtshi w’ose Fenikiya, kaanga yotome ngo lá nkambo dj’owila w’Isariyɛlɛ toko. (Mat. 15:22-28) Nde ayalaki lonkina l’ekanedji kɛ wɔlɔ lá kɛnɛ kɛ ndahonaka djɛ ambeki wande nangha. Kaanga yayalaka tolongo tɔ ma ma, Pɛtɛlɔ anghanaka Yeso lá ntshandjawala, koko nde ayalaka entshupa djɛ ndoowimeyɛ. M’ɔkɔngɔ, nde ayɛka ndɔpɛyɛ Pɛtɛlɔ edjito wɛ djonyi efula. (Luka 22:32; Dj. 21:17; Ele. 2:14; 8:14-17; 10:44, 45) Ndjɔmbɔmba kɛ Yeso ntɛnyɛka papoo ente ‘ekanedji kɛso kɛ wɔlɔ ladjɛ ndjewama le anto ankfumɔ’ ipa ndjala l’enanghedji kɛ ndeka ntshinyinyala ngo l’ɛlɛmbɛ.—Flp. 4:5.

Lonkina ndjala l’ekanedji kɛ wɔlɔ angotokotshɛ djɛ ndjekesanela l’akambo l’ikanyi yɛ nkamba la  wepo w’anto ankfumɔ esanga lá vu. Yeso ananghelaki anto wayalaki entshupa lande akambo wa wɔlɔ efula djɛkondeke, antonyi wande wa lonkandjema yofungaka ambɔ alekɔ ‘ilongo y’anfutanyishi y’elambo la y’ananghi y’evunga’ wawolisa losango lɔnde. (Mat. 11:19) Etengo Yeso, shii tokoka ndonga má nkambaka esanga l’anto ankina wɔlɔ? Louis, wɔnanyɔ wokambisa l’anto efula watshikitanyi l’olemo w’edjingadjinga la lá Betɛlɛ ntepelaka ante: “Nkamba esanga l’anto ankina wa ntshamba djɛ djɔ alekɔ etengo kanga l’emadjɛ epele kɛ mvulu l’ave watshikitanyi. Ladjikɛnde ave wapalekɔ lɛdji lɔmɔ, kɛsɔ ndɔmbaka welo efula dj’epele nsembɔ. Langonanghake etshikitano ɛmɔtshi djɛ nkamba lá vu esanga l’anto ankina ngo djɛ olemo nkambema.” Ɔsɔngo eyalelo kɛsɔ wɔlɔ!

Mbamba yɛkɔnge y’okotshɛso yɛ nyɛnyɛ ente tolekɔ l’ekanedji kɛ wɔlɔ te anto wal’otshumano wɔso? Tolekɔ la mbamba kɛ nangha nkambo djɛsɔ winá w’oyɛso esanga l’ase iloyi yɛso y’olomo w’ipoposanyɛ. Iso nkoka nkamba esanga l’ansakodji yelekɔ l’edjito welá nkfumbo wetshikitanyi la wɛso kana walekɔ l’ɛnɔnyi wetshikitanyi laso. Topakoke ntshikitanyɛ yopo yɛso yɛ mpoposanyɛ ko nangha yopo y’olekakawɔ nkɔpa dj’iwɔ ndeka ndjala l’osasa l’olemo w’ipoposanyɛ?

Onto wewa nkamba wɔlɔ ndjalaka ‘entshupa djɛ nkapana l’anto ankina.’ (1 Ti. 6:18) Winá wɔ Yeso ndakambaka nya Papa kɛnde, nde ɛnaka djɛ Yehova atowisaki akambo. Winá wɔ Yehova ‘ndalɔngɔsɔlaka olongo,’ Yeso ‘ayalaka l’eteyi,’ la akokaka ndjeka akambo amɔtshi me nde. (Woo. 8:27) M’ɔkɔngɔ, Yeso akapanaka l’osasa onkfumɔ nya ambeki wande ‘akambo wa ndooke’ me Papa kɛnde. (Dj. 15:15) La ndjɔmbɔmba yɛsɔ lá wɔɔngɔ, iso ladjɛ ndjala entshupa djɛ nkapana la winaso w’olemo balo djɛso l’akoka waso. Lá nsɔsɔlɔ, onto w’ewaka nkamba olemo l’anto ankina, apawisaka akambo wa djonyi w’okokawɔ ndjewa ngo l’ikanyi yɛ iwɔ nkindjɛ ndjalaka l’anse kɛnde. Koko nde ndjalaka l’osasa wɔ nkapana l’anto ankina akambo wa wɔlɔ wa ndeeke.

Iso nkoka nkapana la winaso w’olemo totepela tokembɛ. Ntsha onto ɔmɔtshi ambɛna welo wɛso ko ambɔtɔpɛyɛ djedjɛ l’oloko ɔmɔ, djoyi djɛsɔ mpangosasangɛ eloko wɛso? Yeso ɔsaki winá djɛ nshimela winande w’olemo akambo wa wɔlɔ wa ndɛnaka lewɔ. (Ɛdjɛ la Mateo 25:19-23; Luka 10:17-20.) Nde ashimelaki kaanga ambeki wande ante ‘iwɔ wangonangha akambo wa nkekete ndooleka’ nde. (Dj. 14:12) L’otsho ɔmɔtshi lá ntondo kɛ nyɔyi kɛnde, nde awandolaka apɔstɔlɔ wande wa nkɔmano, má ndaashimela ante: ‘Nyo ndeke wanɛ wambokindjɛ ntshikala esanga la lemi l’ehemba wɛmi.’ (Luka 22:28) Kokanela wopo w’etepela wɛsɔ yayale ladjɛ ndaakembɛ la ndaatshinda dj’iwɔ ndeka ndjala l’entete! Ntsha tɔngɔsake winá wɔ mbandola winaso w’olemo, kɛsɔ kengapɛyɛ osasa la wangoleka mba eposelo wɛ wɔlɔ.

Wɔnanyɔ ɔmɔtshi w’etawɔ Kayode, atepelaka ante: “Kanga l’ewaka nkamba wɔlɔ nya winande apahonaka djɛ ndjala djɔ, koko nde mpɛyɛka anto ankina osasa la nanghaka dj’ipa olemo ndjala odjito le winande ankina.” Ongonanghake nghɔsɔ te winako w’olemo? Lamo ngopopola la nkɔmɛ nkfkumɔ winako Akristo w’okambɛ nyawɔ ntsha wangosasangake nkamba esanga lawɛ? Ntsha iwɔ nsasangaka nkamba lawɛ ngo ngete ambeki wa Yeso yasasangaka nkamba esanga lande, mbɔkoko okoka ntepela etengo ɔpɔstɔlɔ Poolo ndatepela ante: ‘Tolekɔ winanyo enkambi wekamba djɛ nyo ndjala l’osasa.’—2 Kɔ. 1:24.