Pabadi muiyilu Yesu balongiele nyikashi ibadi imuikashe bu mufubi ebuwa, na dingi nsaa ibafikile pa nsenga badi kileshesho ki buwa bukile kia muntu afubu na bangi kalolo. Kileshesho kia Yesu kilombene kuitukuasha mushindo kinyi? Nsaa yatulongo kino kileshesho kiaye, tui balombene kutundula mayi a kulonda asatu alombene kuitukuasha bua kuikala bena mufubo abafubu na bangi kalolo. Ano mayi a kulonda oso aaketukuasha buatudia kuikala na kikudi kia buumune, na kufuba na bangi kalolo.

Muina mufubo ebuwa ekala muiyishe, tanangushena’shi bangi bena mudimo tabena muulo. Takimba penda buwa buayeye nabene nya. Dino eyikashi dia kuiyisha Yesu badi muidilongiele kui Nshaye. Yehowa e nka bupenka buaye mulombene kuitayinua bu Mupangi, anka muate mudimo ubadi ufube Muan’aye na muulo ukata bu muina mudimo naye. Atumono bino mu mayi abakuile Efile Mukulu’shi: “Tukite muntu ku efwanyiko dyetu.” (Kib. 1:26) Nsaa ibekele Yehowa muakule bino bishima, Yesu baukile’shi Yehowa muiyishe ngofu.​—Mis. 18:35.

Na Yesu namu pabadi pa nsenga badi muiyishe ngofu. Nsaa ibabadi abamutumbula bua bioso bibadi akitshi, badi alusha ntumbo yoso kui Nshaye badi muiyilombene. (Mak. 10:17, 18; Yo. 7:15, 16) Yesu badi mufube ngofu buadia kulama butaale pankatshi paye na balongi baye, na tabadi ebamono bu bampika baye nya, anka badi ebamono bu bakuuku baye. (Yo. 15:15) Badi muibatumpe ku ngua bua kuibalesha  eyikashi dia kuiyisha. (Yo. 13:5, 12-14) N’atue namu abitungu tuate bafubi netu na muulo pamutue pa kutula mianda yetu kumpala kukila yabo. Atuikala na bipeta bi buwa su tubenemekieshena ku muntu na muntu, pamutue pa kuikalakasha bua kuuka mulombene kinemo na bafubu bikata.​—Lom. 12:10.

Muntu muiyishe euka’shi “pakudi baasha binangu beebungi byooso abilumbulukaa.” (Nki. 15:22) Sunga tuekala baukie mianda kinyi, sunga tuekala na ngobesha i naminyi, abitungu tutentekieshe’shi takui muntu mulombene kuuka mianda yoso. Sunga bibadi Yesu na kiukilo ki bungi, anka kubadi ingi mianda yashibadi auku. (Mat. 24:36) Badi atekie balongi baye buabadia kutusha namu mueneno abo sunga ingi mianda yabauuku, sunga bibabadi bakutue kupuidika. (Mat. 16:13-16) Nyi buakinyi babadi abepusha bulungantu nsaa yababadi bashale naye! Mu mushindo umune, su tuibeyishe atutentekiesha’shi tatuuku mianda yoso, na su atutemesha namu binangu bia bangi atue boso atukuatshishena butaale, na nsaa yatufubu boso pamune “abilumbulukaa.”

Abitungu bikishekishe bakulu bambule kuiyisha kua Yesu nsaa yabafubu na bakuabo pamune. Abitungu batentekieshe’shi kikudi kiselele kilombene kufubisha oso yawa e mu kasaka ka bakulu. Su mu bisangilo biabo bakulu abatompa kulama butaale, na kukimba bua’shi boso bepushe bulungantu mbalombene kuata kitshibilo akikuasha kakongie kashima.

Muina mufubo e buwa ekala na binangu bia kufukama nsaa yafubu na bangi esamba na bakuabo na atadila ingi mianda. Mu binyibinyi Yesu badi na mishindo i bungi yakutala bi binangu bia kufukama bia Nshaye. Bu kileshesho, Yehowa batumine Muan’aye pa nsenga buadia kupasha bantu sunga biabashi bapuidikie bapuandikiile lufu.​—Yo. 3:16.

Yesu badi alekiela ingi mianda su bina muulo sunga’shi mbilombene. Tentekiesha mushindo ubadi mukuashe muana mukashi muina Fenesie, sunga bibabadi bamutume munkatshi mua mikooko ishimine ya mu nshibo ya Isaleele. (Mat. 15:22-28) Badi dingi na binangu bia kufukama, nsaa ibadi atekie balondi baye mianda yabadia kukita. Kunyima kua kuuku aye apeshimba Mpyele kumupela munkatshi a bantu, Yesu badi mumufuile lusa. Kunyima kua mafuku bamupele mashito akata. (Luk. 22:32; Yo. 21:17; Bik. 2:14; 8:14-17; 10:44, 45) Kileshesho kia Yesu akitulesha kalolo’shi tui balombene ‘kulekiela binangu bietu bia kufukama biukibue kui bantu boso’ pakulekiela namu ingi mianda.​—Fid. 4:5.

 Kuikala muntu e na binangu bia kufukama, kulombene dingi kuitutakula bua kuiubidishena na kobesha bia kufuba na bantu ba mishindo yoso mu butaale. Yesu badi akitshina bantu boso babadi mushale nabo mianda ibuwa sunga bibadi beshikuanyi abamukuatshila kiutu, na kumufunda’shi “nkuuku a baudishi ba bitadi na bankitshishi a milwisho” babadi abakumina mukandu waye. (Mat. 11:19) Tatui balombene namu kuikala bu Yesu pa kobesha kufuba na bangi su? Louis mukuetu mulume mukishe nsaa i bungi mu mudimo wa bu mukunkushi a kifunda na kufuba ku Betele na bakuetu bakudile ku ma mbalo elekenelekene akula’shi: “Nadi nekitshisha bua kumona kisaka kia bakuetu kinadi afubu nakio pamune bu mudimba wibakie na mabue, a bukata na bula builekenelekene. Pakutula angi mabue pa mbalo yao we mulombene kupeta mudimba ululame. Nadi mulongie biandia kushintula ingi mianda bua’shi tufube na bangi mu butaale.” Kino kinangu ki buwa bukile!

Nsaa kinyi yatudi balombene kulesha kinangu kia kufuba na bangi bakuetu mu kakongie? Atupete mushindo wa kukita biabia nsaa yatudi mu kasaka ka mudimo wa bulungudi. Tui balombene kufuba na bangi balungudi bena mashito a mu bifuko akile etu, sunga’shi tuina bipua bilekene tui balombene kuikitshisha bua kuikala na binangu bilekene nsaa yatushintula ingi mianda mu mudimo wa bulungudi, bua kuibakuasha bua’shi bapete muloo wa kukita mudimo wa bulungudi kalolo.

Muntu afuba na bangi kalolo ekalaa na “bukidi bwa kupaana.” (1 Tim. 6:18, Esambi dipya 2015) Sunga nsaa ibadi afubu mudimo na Nshaye, Yesu bamuene’shi Yehowa tabadi amufi kintu su kimune. Nsaa ibadi Yehowa ‘mutule eilu mbalo yâdyo,’ Yesu ‘badi panka’ na badi mulongiele bi bungi kuadi. (Nki. 8:27, EEM) Kunyima Yesu aye nabane na muloo oso badi muiukishe namu balondi baye ‘kioso [kibadi] mupushe’ namu kui Nshaye. (Yo. 15:15, Kilombeeno Kipya 2014) Na kino kileshesho mu binangu, tui balombene kuilumbula bua kuukisha bena kifuko netu mianda yatuuku na yatudi bamone. Muina mufubo afuba na bangi kalolo, tamulombene kulama mianda ina muulo ilombene kukuasha bangi bua nka’shi bangi batungunukie na kukulupila nka penda muadi nya. Mulombene kuikala na muloo, bua kuukisha bangi bena mufubo naye mianda i buwa yadi muukie.

Tui balombene dingi kulungula bena mufubo netu bishima abibanyingisha. Nsaa i muntu amono mushindo watuikitshisha na etulungula tabitukumu namu kuishimba su? Yesu badi muate nsaa yakulungula bena mufubo naye mianda ibuwa ibadi amono kuabadi. (Puandikisha na Mateo 25:19-23; Luka 10:17-20.) Badi muibalungule mpa na’shi ‘anukakitshi mianda ikile bukata’ kunkila. (Yo. 14:12) Dingi efuku bufuku kumpala kua lufu luaye balunguile batumibua baye basha lulamato amba’shi: “Anwe nwi bantu bashaale bwimane naami na kunyinga mu bitompwanga byande.” (Luk. 22:28) Banda kunangushena bishima biaye bibabidi bibakume ku mashimba, na bibabidi bibatakule bua kunyisha kufuba! N’atue namu su tubata nsaa ya kutumbula bena mufubo netu, abekala na muloo wibungi abibakuasha buabadia kufuba ngofu.

Ungi mukuetu mulume abetanyina bu Kayode, badi mubekiele kalolo akula’shi, “kuikala muntu afuba na bantu kalolo, takutekie kuikala mupuidikie nya, anka kuikasha muloo mui bantu bofubu nabo akuikasha mudimo bu ubofole.” Obe namu we muina mudimo auno mushindo su? Pangi we mulombene kuipusha bena mufubo nobe balume na bakashi, mushindo wabakumona. Su bena mufubo nobe abasankila kufuba nobe we mulombene kuakula nka bibakuile balongi ba Yesu babadi basankile kufuba naye, na we kuakula nka bu Mpoolo mutumibua’shi: “Twi bena mufubo nenu, bwa muloo wenu.”​—2 Kod. 1:24, NWT.