Di wooko di Jesosi bi wooko makandi ku hën Tata, bi heepi ën faa ko abi bunu fasi di bi mbei a bi ko dë wan sëmbë di wotowan bi sa wooko bunu makandi ku ën a goonliba aki. A dë di möön bunu sëmbë di u sa waka nëën baka a di pisi aki. Andi u sa lei u Jesosi? Te u öndösuku unfa Jesosi bi tja hënseei a di pisi aki, nöö u ta feni dii mama wëti di sa heepi u fuu ko dë wan sëmbë di sa wooko bunu makandi ku wotowan. Dee mama wëti aki o heepi u fuu ta möön libi fiifii makandi ku dee baaa ku dee sisa fuu.

Wan sëmbë di ta wooko bunu makandi ku wotowan ta abi sakafasi, nöö a ta si dee bunu wooko di dee wotowan fëën ta du, nöö an ta fii hënseei. Di lö sakafasi aki Jesosi bi lei nëën Tata. Hii fa Jehovah da di Sëmbë di mbei soni, tökuseei a bi kë sëmbë sabi taa di Womi Mii fëën, di ta wooko makandi ku ën, bi du gaan wooko tu. Unfa u du sabi di soni aki? Luku andi Gadu bi piki Jesosi di a o mbei libisëmbë. A bi taki taa: „Ko boo mbei libisëmbë, kumafa useei dë” (Ken. 1:26). Di soni aki bi mbei Jesosi si unfa Jehovah abi sakafasi tjika.​—Ps. 18:35.

Di Jesosi bi dë a goonliba aki, a bi lei taa a abi di wan seei sakafasi aki tu. An bi ta tei di gafa di de bi ta gafëën u dee soni dee a bi ta du, ma a bi ta mbei Gadu feni hii gafa (Maik. 10:17, 18; Joh. 7:15, 16). Jesosi bi mbei möiti u hën ku dee bakama fëën bi sa ta libi fiifii ku deseei hii juu. A bi möön  suti dëën u si de kuma hën baaa ka faa kai de futuboi (Joh. 15:15). De futu seei a bi wasi u lei de fa de musu abi sakafasi tjika (Joh. 13:5, 12-14). Wë useei musu ta wai ku dee sëmbë dee u ku de ta wooko makandi, ka fuu ta kë du andi useei kë nöö a kaba. Te u ta ’hopo di wotowan fuu’, söseei te wa ta booko u hedi ku ambë o feni gafa, nöö woo sa du möön hia soni makandi.​—Lom. 12:10.

Wan sëmbë di abi sakafasi ta fusutan taa „te hia laima ko makandi, nöö soni ta waka bunu” (Nöng. 15:22). Aan toobi un longi u ta du wan wooko kaa, nasö unfa u sa’ u du ën tjika, tökuseei u musu hoi a pakisei taa wan kodo sëmbë wanwan an sa sabi hii soni. Jesosi seei bi taki taa na hii soni a bi sabi (Mat. 24:36). A bi kë sabi andi dee bakama fëën bi sabi ku andi de bi ta pakisei, hii fa de bi abi zöndu (Mat. 16:13-16). Fëën mbei dee sëmbë dee a bi ta wooko makandi ku de, bi ta fii bunu te de bi dë makandi ku ën! Sö a dë tu taa te u abi sakafasi, nöö woo hoi a pakisei taa wa sabi hii soni, söseei woo da wotowan pasi u de taki unfa de pakisei. A sö wan fasi woo sa libi fiifii ku wotowan. Nöö te u wooko makandi ku de, ’soni o waka bunu’.

Möön gaanfa dee gaanwomi musu ta djeesi Jesosi a di lö fasi aki te de ta wooko makandi ku deseei. De musu hoi a pakisei taa di santa jeje sa wooko ku hiniwan u dee gaanwomi u di kemeente. Te de ta ko makandi kuma gaanwomi, nöö de musu mbei möiti u du soni a sö wan fasi taa hii de tuu ta fii bunu u taki unfa de ta pakisei. A sö wan fasi, te de taki fiti makandi, nöö de o sa du soni di o tja wini ko da hii di kemeente tuu.

Wan sëmbë di ta wooko bunu makandi ku wotowan, an ta suku fini a soni poi. An ta hoi a wan soni nöö, ma a ta wooko ku dee pakisei u dee wotowan fëën tu. Jesosi bi musu u si unfa hën Tata bi lei taa a dë kabakaba u fiti hënseei. Wan fasi fa Jehovah du di soni aki, hën da di a manda Jesosi ko puu libisëmbë a dëdë basu.​—Joh. 3:16.

Jesosi bi ta fiti hënseei te a bi dë fanöudu ku te a bi fiti. Pakisei unfa a bi heepi di mujëë u Finisia, hii fa dee Isaëli sëmbë nöö a bi musu heepi (Mat. 15:22-28). An bi ta suku soni a dee bakama fëën di a sabi taa de an bi o sa du. Baka di di gaan mati fëën de kai Petuisi bi piki sëmbë taa an sabi ën, tökuseei Jesosi bi dë kabakaba u dëën paadon. Baka wan pisiten, hën a da Petuisi gaan faantiwöutu faa tja (Luk. 22:32; Joh. 21:17; Tjab. 2:14; 8:14-17; 10:44, 45). Di fasi fa Jesosi libi aki, ta lei u gbelingbelin taa u musu ‘mbei hii sëmbë ko sabi taa u dë kabakaba u fiti useei a hii futu’,  u di u ta wooko ku dee pakisei u dee wotowan fuu tu.​—Fil. 4:5.

Di fiti di u ta fiti useei a hii futu, ta mbei taa u sa ta wooko suti ku hii pei sëmbë, biga wa o ta suku fini a soni poi. U di Jesosi bi ta libi a sö wan bunu fasi ku dee sëmbë dee bi ta ko nëën, mbei dee felantima fëën bi ta kosi ën taa „a ta hulu dee pii lantimönima ku takulibisëmbëma” (Mat. 11:19). Woo sa wooko bunu makandi ku wotowan di an dë kuma u, leti kumafa Jesosi bi du ën u? Wë wan baaa de kai Louis bi taki wan soni. Di baaa aki bi wooko ku peipei sëmbë. A bi ta du di keling-wooko, söseei a bi wooko a Bëtëli tu. A bi taki taa: „Mi bi ta mbei möiti u mi si hiniwan kulupu sëmbë di mi bi ta wooko makandi ku de, kuma sitonu di de mbei wan peni ku ën. Wotowan bigi wotowan piki. Ma te i mbei möiti u buta hiniwan u de a di soifi kamian, nöö a sa mbei taa te u kaba fëën di peni ko dë tololoo. Wë miseei ta mbei möiti u wooko fiifii ku wotowan sö taa u sa du di wooko bunu makandi.” Disi da wan waiti fasi u si soni!

Na un ten u sa lei taa u dë kabakaba u fiti useei a dee wotowan fuu a di kemeente? Wë u sa ta du ën, te u dë ku di peleikiwooko kulupu fuu. U sa wooko makandi ku peleikima di u ku de an dë pei, nasö di an abi di wan seei faantiwöutu kuma u. Kandë u sa tooka soni a di fasi fa u ta peleiki sö taa dee lö sëmbë aki sa ta dë waiwai a di peleikiwooko te u ku de ta wooko makandi.

Wan sëmbë di ta wooko bunu makandi ku wotowan ta dë „kabakaba u paati” soni ku wotowan (1 Tim. 6:18). Di Jesosi bi ta wooko makandi ku hën Tata, nöö a bi musu u si taa Jehovah an bi ta tjubi soni dëën. Di Jehovah bi ta „seeka liba ala,” Jesosi „bi sai dë”, nöö a bi ta lei ën soni tu (Nöng. 8:27). Bakaten, Jesosi seei bi ta wai u lei dee bakama fëën „dee soni dee a jei” nëën Tata (Joh. 15:15). Te u ta pakisei di fasi fa Jehovah ku Jesosi bi du soni, nöö useei musu dë kabakaba u paati dee soni dee u lei ku dee wotowan dee ta wooko makandi ku u. Awa, wan sëmbë di ta wooko bunu makandi ku wotowan an o hoi bunu soni a baka da dee wotowan fëën, u di a kë abi taki a de liba. Ma a o wai seei u konda dee bunu soni dee a ko sabi, da wotowan.

U sa ta taki soni di ta da dee wotowan dee u ta wooko makandi ku de taanga. An ta suti da i ö, te wan sëmbë gafa i u di a si fa i ta mbei möiti tjika u? Jesosi bi ta tei hën ten u konda da dee sëmbë dee a bi ta wooko makandi ku de andi da dee bunu soni dee a bi ta si a de. (Luku Mateosi 25:19-23; Lukasi 10:17-20.) A bi piki de seei taa de bi o „du möön gaan wooko möön ën” (Joh. 14:12). A di ndeti bifö a dëdë a bi gafa dee apösutu fëën dee bi hoi deseei nëën. A bi taki taa: „Unu bi da dee sëmbë dee bi dë ku mi sömëni longi, ku dee pena u mi ku dee fuka libi u mi te kisi fa u dë aki” (Luk. 22:28). Pakisei fa dee wöutu aki bi musu u da de taanga u de du möön gaan soni! Ee u ta tei u ten u gafa dee wotowan di u ku de ta wooko makandi, nöö de o ta möön ta dë waiwai, söseei de o ta du di wooko u de möön bunu.

Wan baaa de kai Kayode bi taki taa: „Wan sëmbë di ta wooko bunu makandi ku wotowan an abi fu dë söndö föutu, ma a ta mbei wotowan fii bunu te de ta wooko makandi ku ën, söseei a ta mbei di wooko möön fukë da de.” Sö iseei ta du soni te i ta wooko makandi ku wotowan u? Ja bi o kë hakisi wantu u dee baaa nasö sisa unfa de si taa i ta wooko makandi ku de u? Ee wotowan ta wai u wooko makandi ku i, leti kumafa dee apösutu u Jesosi bi ta wai u wooko makandi ku ën, nöö leti kuma Paulosu, joo sa taki taa: „U ta wooko makandi ku unu, sö taa unu sa dë waiwai.”​—2 Kol. 1:24.