Di Yesus ben de na hemel, a leri moi fasi di ben o yepi en bakaten fu wroko bun nanga trawan dyaso na grontapu. Fa wi kan kisi wini fu na eksempre fu Yesus? Te wi e teki ten fu studeri na eksempre fu en, dan wi o si dri gronprakseri di o yepi wi fu wroko bun nanga trawan. Den gronprakseri disi o yepi wi fu libi moro bun nanga wi brada nanga sisa èn fu de wán nanga den.

Wan sma di e wroko bun nanga trawan e sori sakafasi fu di a e warderi a sma nanga suma a e wroko èn a no e suku fu kisi grani. Na so Yesus ben de tu. A sori sakafasi fu di a ben leri dati fu en Papa. Aladi na Yehovah wawan na a Mekiman, toku a no suku fu kisi grani, ma a poti prakseri na en Manpikin di ben e wroko makandra nanga en. Na Genesis 1:26 Gado e taki: „Meki wi meki libisma fu gersi wi.” Wi kan de seiker taki Yesus ben lobi a fasi fa Yehovah e sori sakafasi.​—Ps.18:35.

Di Yesus ben de na grontapu, a ben e sori sakafasi tu. Te sma ben e prèise en gi den sani di a du, dan a ben e sori den taki a no en ben musu kisi a grani, ma na Gado (Mark. 10:17, 18, Yoh. 7:15, 16). Yesus ben e du ala san a man fu meki taki wánfasi de na mindri den disipel fu en. A no ben e si den leki  srafu, ma leki en mati (Yoh. 15:15). A wasi den futu fu den disipel fu en srefi fu leri den sakafasi (Yoh. 13:5, 12-14). Wi kan sori sakafasi tu te wi e gi grani na den sma di wi e wroko makandra nanga den, na presi fu suku fu kisi grani. ’Te wi e lespeki makandra’, dan wi no o broko wi ede nanga suma o kisi grani. Dati o meki taki wi o man du moro gi a Gado fu wi.​—Rom. 12:10.

Wan sma di abi sakafasi e frustan taki „te furu raiman de, sani e waka bun” (Odo. 15:22). Awansi o furu ondrofeni nanga koni wi abi, wi musu hori na prakseri taki nowan sma de di sabi ala sani. Yesus srefi ben taki dati a no sabi ala sani (Mat. 24:36). A ben aksi den disipel fu en tu fu taki san den ben e denki èn san den ben sabi (Mat. 16:13-16). Fu dati ede a no e fruwondru wi taki den disipel fu en ben lobi fu de makandra nanga en. Te wi e sori sakafasi tu èn wi e frustan taki wi no man du ala sani, dan wi o gi trawan na okasi fu yepi wi. Disi o meki taki wánfasi de èn ’sani o waka bun’.

A prenspari taki owruman e teki na eksempre fu Yesus èn e sori lespeki gi trawan te den e wroko makandra. Den musu hori na prakseri taki a santa yeye kan yepi ibriwan fu den owruman fu taki wan sani di kan yepi den fu teki bun bosroiti. Te ibri owruman na tapu wan owruman konmakandra e firi fri fu taki fa a e denki fu wan tori, dan makandra den o man teki bun bosroiti di o tyari wini kon gi a heri gemeente.

Wan sma di man wroko bun nanga trawan e hori den sma na prakseri di e wroko nanga en. A no strak tumusi èn a e fiti ensrefi. Yesus kisi furu okasi fu si fa en Papa sori taki a e hori trawan na prakseri. Fu eksempre, fu di Yehovah ben hori sma na prakseri, meki a seni Yesus kon na grontapu fu frulusu libisma fu a dedestrafu di den ben musu kisi.​—Yoh. 3:16.

Yesus ben e du sani tra fasi te dati ben de fanowdu èn te a ben fiti. Memre fa a ben yepi wan Fenisia uma, aladi a ben kon fu yepi den Israelsma (Mat. 15:22-28). A no ben e aksi tumusi furu tu fu den disipel fu en. Baka di en bun mati Petrus taki na fesi furu sma taki a no sabi en, Yesus ben de klariklari fu gi en pardon. Bakaten, a sori taki a ben e frutrow Petrus èn a gi en prenspari frantwortu (Luk. 22:32; Yoh. 21:17; Tor. 2:14; 8:14-17; 10:44, 45). Na eksempre fu Yesus  e sori wi krin taki wi musu ’de klariklari fu fiti wisrefi na ala fasi’.​—Fil. 4:5.

Efu wi man fiti wisrefi, dan dati o yepi wi fu man wroko bun nanga ala sortu sma. Fu di Yesus ben e libi bun nanga den sma na en lontu, meki den feanti fu en ben e dyarusu na en tapu. Dati meki den ben taki dati a „de wan mati fu den sma di e teki belasting-moni gi lanti èn wan mati fu den sondari”. Sonwan fu den sma disi ben arki a bun nyunsu di Yesus ben e preiki (Mat. 11:19). Neleki Yesus, wi man wroko bun nanga sma di de tra fasi leki wi. Louis, wan brada di ben wroko nanga furu sma fu difrenti kulturu na ini a kringwroko èn na Betel, e taki: „Mi ben e agersi ibri grupu sma di mi ben musu wroko nanga den, nanga wan skotu di bow nanga ston di no bigi a srefi. A e teki moro ten nanga muiti fu bow nanga ston di no bigi a srefi, ma efu yu poti den ston bun, a skotu fu yu no o kron. Mi kenki wan tu sani na ini mi libi tu so taki mi kan fiti misrefi na trawan. Dati yepi mi fu man wroko moro bun nanga den.” Dati na wan bun fasi fu denki!

Sortu okasi wi abi fu sori taki wi e fiti wisrefi na trawan na ini wi gemeente? Wi abi na okasi disi te wi e wroko makandra nanga a preikiwroko-grupu fu wi. Wi kan wroko nanga preikiman di abi tra osofamiri frantwortu leki wi, noso di no de wi speri. Yu denki taki wi kan meki muiti fu fiti wisrefi na a fasi fa den lobi fu preiki, so taki den kan abi moro prisiri na ini a preikiwroko?

Sma di man wroko bun nanga trawan, de „klariklari fu prati san den abi” nanga sma (1 Tim. 6:18). Di Yesus ben e wroko makandra nanga en Papa, dan a musu fu de taki a si taki Yehovah no ben e kibri sani gi en. Di Yehovah ben „e sreka hemel”, Yesus „ben de drape” èn a ben man leri fu en (Odo 8:27). Bakaten Yesus no ben kibri sani gi den disipel fu en, ma a taigi ’den ala den sani di a yere’ fu en Papa (Yoh. 15:15). Wi kan teki na eksempre fu en te wi e fruteri wi brada nanga sisa san wi leri. Wan sma di man wroko bun nanga trawan no o weigri fu taigi den san den musu sabi soso fu di a wani basi den. Ma na presi fu dati a o prisiri fu fruteri trawan den bun sani di a leri èn di kan yepi den.

Wi kan taki sani tu fu gi deki-ati na sma di e wroko makandra nanga wi. Fa yu e firi te wan sma si a muiti di yu meki èn te a e prèise yu? Yu no e firi bun? Yesus ben gwenti taigi den disipel fu en di ben e wroko makandra nanga en san a ben lobi fu den. (Luku Mateyus 25:19-23; Lukas 10:17-20.) A taigi den srefi taki den „o du moro bigi sani leki” san a du (Yoh. 14:12). A neti fosi a dede, a prèise den apostel fu en èn a taigi den: „Unu na den wan di tan nanga mi di mi ben kisi tesi” (Lukas 22:28). Prakseri fa den wortu disi ben naki den ati èn fa a ben gi den deki-ati fu du moro. Efu wi e teki ten tu fu prèise den wan di e wroko makandra nanga wi, dan den o de nanga moro prisiri èn den o wani du moro wroko srefi.

Wan brada di nen Kayode e taki: „Yu no abi fu de wan kefaleki koni sma fu man wroko bun nanga trawan.” A e taki tu: „So wan sma e meki trawan prisiri èn a e meki a wroko moro makelek gi den wan di e wroko makandra nanga en.” Na so wan sma yu de? Kande yu kan aksi wan tu brada nanga sisa fa den feni en fu wroko makandra nanga yu. Efu den e prisiri fu wroko makandra nanga yu neleki fa den disipel fu Yesus ben e prisiri fu wroko makandra nanga en, dan yu kan taki a srefi sani di na apostel Paulus ben taki: „Wi e wroko makandra nanga unu so taki unu kan de nanga prisiri.”​—2 Kor. 1:24.