Jesu waba nebuntfu lobamsita kutsi abe sibonelo lesihle kulabo lasebenta nabo ngesikhatsi asemhlabeni. Singasisita njani sibonelo saJesu? Ngekucabangisisa ngesibonelo sakhe, singabona timiso letintsatfu letingasisita kutsi sisebente kahle nalabanye. Letimiso titasisita kutsi sibe nebunye futsi sibambisane nebazalwane betfu.

Sisebenti lesikahle sitfobekile futsi asitsandzi kutenta lesincono kunalabanye. Jesu wakufundza kuBabe wakhe kutfobeka. Nanobe kunguJehova kuphela lofanelwe kubitwa ngekutsi unguMdali, kodvwa bekafuna nalabanye bawati umsebenti lobalulekile lowentiwa yiNdvodzana yakhe njengobe bekasebenta nayo. Loku sikubona kuloko Nkulunkulu lakusho nakatsi: “Asente bantfu bafane natsi.” (Gen. 1:26) Ngesikhatsi Jehova asho lamavi, Jesu wabona kutsi Jehova utfobekile.—Hla. 18:35.

Nakasemhlabeni, naJesu wakhombisa kutsi utfobekile. Ngesikhatsi bantfu bamdvumisa ngaloko lakufezile, lonkhe ludvumo walunika Loyo lolumfanele. (Mak. 10:17, 18; Joh. 7:15, 16) Jesu bekaciniseka kutsi kunekuthula emkhatsini wakhe nebafundzi bakhe futsi bekabaphatsa njengebangani bakhe, hhayi tigcili. (Joh. 15:15) Waze wabageza tinyawo kuze abafundzise kutfobeka. (Joh. 13:5, 12-14) Natsi kufanele sibahloniphe  labo lesisebenta nabo, sibeke tidzingo tabo kucala kunetetfu. Kunyenti lesingakufeza nangabe ‘sihloniphana’ futsi singakhatsateki ngekutsi ngubani lotawudvunyiswa.—Rom. 12:10.

Umuntfu lotfobekile uyati kutsi emacebo “ayaphumelela nangabe kunebeluleki labanyenti.” (Taga 15:22) Ngisho nobe sinelwati lolungakanani nobe emakhono, kufanele sikhumbule kutsi kute umuntfu lowati konkhe. Ngisho naJesu wavuma kutsi kunetintfo lebekangatati. (Mat. 24:36) Bekafuna nekwati kutsi yini bafundzi bakhe labanesono labayatiko nalabayicabangako. (Mat. 16:13-16) Kungako labo lebekasebenta nabo bebativa bakhululekile nabanaye. Ngendlela lefanako, nangabe sitfobekile sitawukhumbula kutsi asikwati konkhe futsi sitayemukela imibono yalabanye, nasenta njalo kutawuba nekuthula emkhatsini wetfu futsi lesikwentako ‘kutawuphumelela.’

Kubaluleke kakhulu kutsi labadzala belibandla balingise Jesu nabasebenta ndzawonye. Kufanele bakhumbule kutsi umoya longcwele ungasebenta kunobe ngumuphi lomdzala welibandla. Nangabe emihlanganweni yabo, labadzala benta kutsi bonkhe bative bakhululekile kuveta imibono yabo, sigungu salabadzala sitawenta tincumo letitawusita libandla.

Sisebenti lesikahle siyabacabangela labo lesisebenta nabo. Sivumelana netimo futsi asinamatseli emibonweni yaso. Jesu wabona kanyenti kutsi Babe wakhe uyacabangela. Sibonelo saloku kutsi, wamtfuma kutsi atosindzisa bantfu ekufeni.—Joh. 3:16.

Jesu bekavumelana netimo nakunesidzingo. Khumbula kutsi wamsita umfati longumFenisiya, nanobe bekatfunywe kuma-Israyeli. (Mat. 15:22-28) Kubafundzi bakhe, bekangalindzeli lokungetulu kwemandla abo. Ngemuva kwekutsi umngani wakhe Phetro amphike embikwebantfu, Jesu wamcolela. Ngekuhamba kwesikhatsi, wamnika imisebenti lebalulekile. (Luk. 22:32; Joh. 21:17; Imis. 2:14; 8:14-17; 10:44, 45) Sibonelo saJesu sisikhombisa ngalokucacile kutsi kufanele ‘kucabangela kwetfu kwatiwe ngibo bonkhe bantfu’ ngekutsi sivumelane netimo.—Fil. 4:5.

 Kucabangela kutawusenta sikhone kuvumelana netimo, kuze sisebente ngekuthula nato tonkhe tinhlobo tebantfu. Jesu bekabaphatsa kahle bonkhe labo lebebadvutane naye futsi lebebamukela umlayeto wakhe, kangangekutsi titsa takhe letinemona taze tatsi “ungumngani webatselisi netoni.” (Mat. 11:19) NjengaJesu, singakhona yini kusebenta kahle nalabanye? Lomunye umzalwane lokutsiwa nguLouis, loke waba ngumbonisi wesigodzi futsi wasebenta naseBethel, asebenta nebazalwane labehlukene, utsi: “Bantfu lengisebenta nabo ngivame kubafananisa nelubondza lolwakhiwe ngematje langafani. Nawushintjashintja indlela lobeka ngayo lamatje, lolubondza lungacondza. Nami ngetama kuvumelana netimo kuze lolubondza lucondze.” Lona ngumbono lomuhle!

Kunini lapho singasebentisana kahle nalabanye ebandleni? Sinelitfuba lekukwenta loku nasinebazalwane labasecenjini letfu lensimu. Kungenteka sisebente nebamemeteli labanakekela imindeni nobe labaneminyaka lengafani neyetfu. Singakhombisa yini kutsi siyabacabangela ngekutsi singashakuteli nasihamba nobe sisebentise indlela lebalungelako yekushumayela kuze bawujabulele umsebenti wekushumayela?

Sisebenti lesikahle ‘sikulungele kwabelana.’ (1 Thim. 6:18) Ngesikhatsi Jesu asebenta naBabe wakhe, kungenteka wabona kutsi Jehova kute lamfihlela kona. Ngesikhatsi Jehova “enta emazulu,” Jesu ‘bekakhona’ futsi bekangafundza kuye. (Taga 8:27) Ngekuhamba kwesikhatsi, naJesu wabafundzisa bafundzi bakhe ‘tintfo lebekative kuBabe’ wakhe. (Joh. 15:15) Natsi singasilingisa lesibonelo, ngekutsi sifundzise labo lesisebenta nabo loko lesikwatiko. Sisebenti lesikahle angeke sigodlele labanye lwati labaludzingako kuze nje sitive sibalulekile. Sitakujabulela kutjela labanye loko lesikufundzile.

Singaphindze sibakhutsate labo lesisebenta nabo. Nangabe lotsite abona imetamo yetfu, asijabuli yini nakasibonga ngalokusuka enhlitiyweni? Jesu watjela labo lebekasebenta nabo tintfo letinhle lebekatibona kubo. (Catsanisa naMatewu 25:19-23; Lukha 10:17-20.) Waze wabatjela kutsi ‘batawenta imisebenti lemikhulu’ kuneyakhe. (Joh. 14:12) Ngebusuku lobungaphambi kwekutsi afe, wancoma baphostoli bakhe labetsembekile ngekutsi atsi: “Nine benisolo ninami kuko konkhe kuhlupheka kwami.” (Luk. 22:28) Cabanga nje kutsi lamavi akhe abakhutsata njani futsi abasita kutsi bachubeke benta lokuhle! Nangabe natsi sibancoma labo lesisebenta nabo, batawujabula futsi batikhandle emsebentini labawentako.

Lomunye umzalwane lokutsiwa nguKayode utsi: “Sisebenti lesikahle akudzingeki size sibe bete sono, kodvwa senta labo lesisebenta nabo bajabule futsi sente umsebenti ubonakale umelula.” Unjalo yini nawe? Kungaba njani ubute labanye bazalwane nabodzadze kutsi usisebenti lesinjani? Nangabe bakujabulela kusebenta nawe, njengobe bafundzi baJesu bakujabulela kusebenta naye, nawe ungasho emavi lafanako newemphostoli Pawula nakatsi: “Sitisebenti letikanye nani kute nijabule.”—2 Khor. 1:24.