Musita lwabanga wali ku muulu, Yesu waasambiliile mibeele yaweeme yaamukwasiizie kwaluka muntu ali wabomba buino pamo ni bange. Kisia lwaaizile pa kyalo, waalukile mufuano uweeme saana wa muntu ali wabomba buino pamo ni bange. Mufuano wakue Yesu kunti watukwasia siani? Kutoosia buino mufuano wakue, kunti kwatukwasia kupata mafunde atatu a kutukwasia kubomba buino pamo ni bange. Azo mafunde akaba kutukwasia tukile kukwatana pamo ni balupua betu.

Muntu ali wabomba buino pamo ni bange ali wasaangua waikefiizie. Ali wasaangua wabamwene babombi nakue kuya bali ba mana, kabili teezi kubalengia bange bapoozesie maano kuli weene bunke. Yesu waasambiliile kwikeefia kwa evio kuli Baba wakue. Anzia kine Yehova bunke i apalile kukuutua Kabumba, waatonene bantu bange bamane miilo ya mana yaakitile Muana wakue. Twamana evio kupitila milandu yaalandile Leeza. Waalandile eevi: “Tukite muntu mu kipalo kyetu.” (Kut. 1:26) Musita Yehova lwaalandile ezio milandu, Yesu waainikile nangue Yehova ekefiizie saana.​—Malum. 18:35.

Lwaali pa kyalo, Yesu ni weene waalangiliile mibeele ya kwikeefia. Musita lubaamupeele bulumba palua bintu byaakitile, weene waamupeele bulumba Olia apalile kupeelua bulumba bobo. (Mark. 10:17, 18; Yoan. 7:15, 16) Yesu waaikwindile kusuunga mutende pamo ni basambi bakue. Kabili kuliko kubamona nga bazia, weene wabamwene kuya bali babibuza bakue. (Yoan. 15:15) Waabasambile ni maulu abo eevi kubasambilizia mibeele ya  kwikeefia. (Yoan. 13:5, 12-14) Nga evelia vyaakitile Yesu, ni fwefue tupalile kukindika babombi neetu, ni kutiina kubiika pa ntaanzi beelia bitutonene kuliko bintu byabo. Kunti twakita bintu bingi kine ‘twabakindika’ bange kuliko fwefue, kabili kine te twizi kutona kutasiiwasie lyonse.​—Bar. 12:10.

Kabili muntu ekefiizie ali wasaangua wainikile nangue “bintu bili byafikiliziiwa kupitila bantu bengi bakuleeta musoko.” (Tus Maf. 15:22) Anzia kine tuli ni kibeelezio ni bufundi, tupalile kulanguluka nangue te kuli muntu amanine kila kantu. Atasie Yesu waali wamanine nangue kubanga kwali bintu byaasyaali wamanine. (Mat. 24:36) Waali wapooza maano ku bintu byaali byamanine basambi bakue basipuililikile ni bibaali batontonkania. (Mat. 16:13-16) Keekio i kyaalengiizie babombi nakue beyunvue buino kuya bali peepi nakue! Evio vyenka ni fwefue, kine twikeefiizie ni kuya twalangulukile nangue te tumanine kila kantu, kabili ni kuya twatuilizia malanga a bange, tuli kukwasia kuleeta mutende.

Kabili ni kintu kya mana bakote kupala mibeele ya kwikeefia yakue Yesu musita ubali babomba pamo. Bapalile kulanguluka nangue mupasi utakatiifu kunti wakwasia mukote onse mu kabungue, alande kantu kali kukwasia kabungue konse kakwate bupinguzi buweeme. Kine bakote lubali bakolonghana juu ya kilie kyabo bali baikwinda kuleeta mutende, ni kulekelela kila mukote aleete malanga akue, bonse bali kufikiila kukwata bupinguzi buli kukwasia kilonghaano kyonse kinoonkelemo.

Muntu ali wabomba buino pamo ni bange ali wasaangua wateekameene. Ali waaluluka ni kwipatanisia. Yesu waali ni fuasi iweeme ya kumona Baba wakue vyaali walangilila maano ateekameene. Kwa mufuano, Yehova waamutumine eevi apususie bantu kufuma mu lufu lwabo.​—Yoan. 3:16.

Yesu waali waaluluka musita lwaali wamona nangue kipalile ao kili buino kukita evio. Languluka vyaamukwasiizie mwanakazi umo Mufoinike anzia kine Yesu waatuminue ku nsesi ya Israeli. (Mat. 15:22-28) Kabili waalangiliile nangue waali ni maano ateekameene mu beelia byaali waketekeele basambi bakue bakite. Kisia kukaanua ntaanzi ya bantu na Petro, kibuza wakue, Yesu waali waleengelesie kumweleela. Kisia waamupeele bifulo bikata. (Luk. 22:32; Yoan. 21:17; Miil Bat. 2:14; 8:14-17; 10:44, 45) Mufuano wakue Yesu watulangilila buino nangue tupalile ‘kulekela maano [etu] ateekameene amanike ku bantu bonse’ kupitila kuya twaaluluka.​—Baf. 4:5, NWT.

 Kabili, kuya twali ni maano ateekameene kunti kwatukinkizia twipatanisie eevi tubombe mu mutende pamo ni bantu ba misango yonse. Yesu waabakitiile buino saana baalia baali wapisia musita pamo naabo. Keekio kyaalengiizie baluani bakue bamunvuile bunkua ni kumusongela nangue weene ni “kibuza kya bakasonkia ba musonko ni kya bantu ba bibalo” baali baitabila mpunda yakue. (Mat. 11:19) Eba, ni fwefue kunti twaviinda kubomba buino pamo ni bantu bange nga Yesu? Lupua umo ali wakuutua Louis, waakitile miaka ingi wabomba mu miilo ya muputule ni miilo ya ku Beteli kabili waabombele pamo ni bantu bali ni aali ipusene-puseene. Walanda eevi: “Kubomba pamo ni bantu basipuililikile, kuli nga kukuula kibumba na mabue apuseene bukata. Ili yaloomba kwikwinda saana eevi kibumba kyoloke, pakuba mabue apuseene. Naaikwindile kukita bupilibuko eevi mbombe mu mutende pamo ni bange. Kukita evio, kwaakwasiizie miilo ibombeke buino.” Kakiine ezio mibeele iweeme saana!

Ni musita ki utupalile kulangilila nangue tuli ni maano ateekameene mu kilonghaano kyetu? Tuli twasaangua ni fuasi ya kukita evio, musita utuli pamo ni kikundi kyetu kya miilo ya kusimikila. Kunti twabomba pamo ni bakasimika bali ni miilo mu lupua lwabo ipuseene ni yeetu ao bali ni miaka ipuseene ni yeetu. Eba, kunti twaikwinda kuya twali ni maano ateekameene kupitila kwalulula lwendo ao nzila yeetu ya kusimikilamo eevi ni beene basekelele miilo ya kusimikila?

Muntu ali wabomba buino pamo ni bange, ali wasaangua ‘waiteaniizie kukwasia.’ (1 Tim. 6:18) Kipalile musita Yesu lwaali wabomba pamo ni Baba wakue, waainikile nangue Yehova taali wamufiika tuntu. Musita Yehova “lwaateaniizie myulu,” Yesu ‘abanga walipo’ kabili waali wasambilila kupitila weene. (Tus Maf. 8:27) Kisia musita, Yesu muine waasekeleele kubabuilako basambi bakue “byonse byaaunvuile” kuli Baba wakue. (Yoan. 15:15) Kunti twapala mufuano wakue Yehova kupitila kubabuilako balupua ni bankazi bintu bitwaasambiliile. Kakiine muntu ali wabomba buino pamo ni bange, teezi kubafiika bange beelia bibapalile kumana ao bipalile kubakwasia eevi amoneke nangue ali ni buviinde pakati kabo. Ali wasekelela kubabuilako bange bintu byasambiliile.

Kabili, kunti twabateekia mutima babombi neetu. Musita muntu lwali wamona vituli twaikwinda kisia watutasia kufuma ku mutima, eba, keekio tekiizi kutulengia twiunvue buino? Yesu waali wapisia musita pamo ni babombi nakue wababuila bintu biweeme bibaali bakita. (Palania ni Mateo 25:19-23; Luka 10:17-20.) Kabili, waabalandile nangue ‘bakakita miilo ikata kukila’ miilo yakue. (Yoan. 14:12) Mu busiku bwatangiliile lufu lwakue waabatasiizie basambi bakue wabalanda eevi: “Mwemue i bali pamo nane mu nghemo yane.” (Luk. 22:28) Tontonkania ezio milandu viyaakumiizie mutima wa basambi bakue ni kubakinkizia kubomba! Ni fwefue kine twapisia nsita twabatasia babombi neetu, kakiine bakaba kunvua nsaansa kabili kunti bakila kubomba.

Lupua umo ali wakuutua Kayode waalanda eevi: “Muntu ali wabomba buino pamo ni bange taloombele kuya wapuililikile, inzi ali wabalengia bange baaluke ni nsaansa kabili ali wakita miilo ileenge ku baalia bali wabomba naabo.” Eba, ni weewe i vyuli wabomba buino pamo ni bange? Paange kunti wabeepuzia balupua ao bankazi boli wabomba naabo eevi bakubuile kine uli wasaangua siani. Kine bali basekelela kubomba pamo ni weewe nga evelia basambi bakue Yesu vibaali basekelela kubomba pamo nakue, ni weewe kunti walanda nga evelia vyaalandile mutumua Paulo. Waalandile eevi: “Tutonene kubomba pamo neenu eevi muwaaminue.”​—2 Bakor. 1:24.