Tamy i Jesosy tan-dagnitse agney, le nianatse toetse maro nagnampe aze hahay hiara-hiasa amy ty hafa. Ie naho fa tan-tane etoy reke, le nagnomey modely soa hotsikombé o ndatio naho fa miara-miasa amy ty hafa iareo. Ino ty hagnampe antika handrambe soa amy ze modely i Jesosy zay? Mila mandineke ty raha natao’e tika. Hagnampe antika hahatrea toro lalagne telo afake magnampe antika hahay hiara-hiasa soa amy ty hafa ty fanoagne izay. Vao mainke hagnampe antika hiharo saigne ka o toro lalagne rehoe.

Miambane ty ndaty mahay miara-miasa amy ty hafa. Mihevetse o mpiara-miasa ama’eo ho sarobily ka reke sady tsy miseho ho ambone noho iareo. Taman-dRae’e ty nianara i Jesosy o toetse iohoe. Ndra tie i Jehovah raike avao aza ty fagneva ty hatao tihoe Mpamorogne, le nitea’e naho fanta o ndatio ty asa lahibey natao i Ana-dahi’e, i mpiara-miasa ama’ey. Magnampe antika hahatrea izay ty raha nisaontsie’e toy: “Andao tikagne hamboatse ndaty hambam-bintagne amantikagne.” (Gen. 1:26) Nihay i Jesosy boake amy io fa tena miambane ty Jehovah.​—Sal. 18:35.

Niambane ka ty Jesosy tamy i reke tan-tane etoỳ. Naho fa nisy ndaty nidera aze noho ty raha nivita’e, le i Andrianagnahare ty nimei’e voninahitse. (Mar 10:17, 18; Jaona 7:15, 16) Natao i Jesosy ze hahavy i mpiana’e rey ho fale naho fa miarake  ama’e, sady nindese’e manahake ty nama’e iareo fa tsy manahake o ndevò. (Jaona 15:15) Nisasà’e aza ty tombo iareo mba hampianaragne iareo hiambane. (Jaona 13:5, 12-14) Toko’e hagnaja o mpiara-miasa amantikagneo manahake i Jesosy tika fa tsy ze raha mahasoa antika avao ro ho eretseretentikagne. Ho maro ty raha ho vitantikagne naho itika ‘mifagnomey voninahitse’ sady tsy mifantoke amy tihoe ia ty hahazo dera amy ty asa raike naho fa vita.​—Rom. 12:10.

Ty ndaty raike miambane ka le magneke tie ‘tanterake ty raha iriegne hatao naho maro ty mpanolon-tsaigne.’ (Ohab. 15:22) Mila tadidientika fa tsy misy ndaty mahavita ze kila raha zao, ndra manao akore ndra manao akore ty fahaia’e. Ndra i Jesosy aza nagneke tie nisy raha tsy nihai’e. (Mat. 24:36) Nahaliagne aze ka ty hahafantatse ty heve o mpiana’eo ndra tie tsy voririke aza iareo. (Mat. 16:13-16) Tsy nahagaga areke naho nitea o mpiara-miasa ama’e rehoe ty niarake tamy i Jesosy. Naho miambane ka tika, sady mitadidy tie voafetra avao ty raha haintikagne, vaho tsanognentika ty heve ty hafa, le hiharo saigne tika sady ‘ho vita ty raha iriegne hatao.’

Tena mila miambane manahake i Jesosy o androanavi-pagnahio naho fa miara-miasa amy ty androanavi-pagnahy hafa. Mila tadidie iareo fa afake miasa amy ty tsikiraidraike amy iareo ty fagnahy masy i Jehovah. Toko’e hatao iareo tsapa ty androanavi-pagnahy hafa areke fa afake mirehake ty heve’e malalake reke. Handrambe fanapahan-kevetse hahasoa i fiangonagney iaby iareo naho miara-miasa hoe izay.

Mahay manahatsahatse ty ndaty mahay miara-miasa amy ty hafa. Mandefetse reke sady tsy sarote’e loatse. Tena maro ty fomba nahafaha i Jesosy nahatrea tie tena mahay manahatsahatse ty Baba’e. Fomba raike nahatreava’e izay zao ty nagniraha i Jehovah aze mba hagnavotse o ndatio ndra tie fagneva ty ho mate aza iareo.​—Jaona 3:16.

Nandefetse ty Jesosy naho fa nimete ty nanoagne izay. Tsiaro’o vao ty natao’e tamy i ampela fenisianay? Nagnampe o ampela iohoe reke ndra tie ty hagnampe o agnondry nimontso amo o Israelio eò aza ro tena nagnirahagne aze. (Mat. 15:22-28) Nahay nanahatsahatse ka ty Jesosy naho henteagne ty raha nitamae’e tamy i mpiana’e rey. Naho fa nandietse aze ty Petera, i nama’e maifitse azey, le namela aze reke. Tafara izay ty Jesosy nagnankigne andraikitse lahibey tamy i Petera. (Lioka 22:32; Jaona 21:17; Asa. 2:14; 8:14-17; 10:44, 45) Ty raha natao i Jesosy, le mampiseho tie  mila ‘mahay manahatsahatse’ tika. Manao izay tika naho fa mandefetse.​—Fil. 4:5.

Naho itika ka mahay manahatsahatse, le hahay hiovaova mifagnarake amy ze raha misy eo. Hahay hiara-hiasa soa amy ty karaza o ndaty iaby tika amy izay. Nifandrambe soa tamy ty ndaty magnodidigne aze ty Jesosy. Izay ty nahavy i fahavalo’e rey nirehake tie ‘miragnetse amo o mpamory hagao naho amy i mpanota’ nitsanogne i hafatse nitorie’e rey reke. (Mat. 11:19) Ho vitantika ka vao ty hahay hiara-hiasa soa amy ty hafa manahake i Jesosy? Misy rahalahy raike zay i Louis ty agnara’e. Niara-niasa tamy ty ndaty sambe karaza’e reke satria fa nanao ty asa ty faritse naho ni-Betelita. Hoe reke: “Hoe mamboatse manda amy ty vato tsy mitovy ty pozi’e naho ty habei’e rey rehe naho fa miara-miasa amy ty ndaty tsy voririke manahake azo. Mitake kezake bey ty famboaragne izay faie afake ty hahitsy soa avao i manday. Nikezake nanao fagnovàgne ka raho mba hahavy ahy hiara-hiasa soa amy ty hafa, amy izay ho vita ty asa teagne hatao.” Tena soa ze toe-tsaigne zay!

Naho fa ombia tika ro afake mampiseho tie mahay manahatsahatse amy ty ndaty amy ty fiangonagne misy antikagne? Afake manao izay tika naho fa miarake manompo amy ty andia-mpitory misy antikagne. Va’e hiarake hanompo amy ty mpitory tsy mitovy amy ty antika ty andraiki’e amo o keleiagneo eo ndra tsy mitovy taogne amantikagne tika. Kera azontika ovagne ty falaky ty liantikagne ndra ty fomba fitoriantikagne mba hifagnarake amy ze mete amy iareo, amy izay tena hahita fifaleagne amy ty fanompoagne iareo?

‘Tea mizara’ amy ty hafa ty ndaty mahay miara-miasa. (1 Tim. 6:18) Naho nagneta-draha tamy i Jesosy ty Baba’e, le tsy maintsy ho nivoamare’e avao zay. ‘Teo ohatse reke’ naho fa “nagnomagne i lagnitsey” ty Jehovah, sady niana-draha tama’e reke. (Ohab. 8:27) Naho fa tafara tatoy aza, le nahafale i Jesosy ty nagnambara tamy i mpiana’e rey ‘ze raha nirei’e’ tamy i Baba’e. (Jaona 15:15) Toko’e hanahake i Jehovah ka tika, le ho vognogne hizara amo o mpiara-manompò ty raha haintikagne. Ty ndaty mahay miara-miasa amy ty hafa le tsy mitagne ho aze irery avao ty raha hai’e ndra tie hihegne ty fahefa’e voka izay. I reke aza vognogne hizara amy ty hafa ty raha soa nianara’e.

Afake mirehake raha mampahery amo o mpiara-miasa amantikagneo ka tika. Tena fale ohatse tika naho fa misy ndaty mahatsikaritse ty kezake ataontika sady atoro’e ka fa tena mankasitrake antika amy ty fo’e reke. I Jesosy zao nanokagne fotoagne mba hirehafagne tamo o mpiara-miasa ama’eo ty raha soa natao iareo. (Ampitahao amy ty Matio 25:19-23; Lioka 10:17-20.) Nirehafe’e tamy iareo aza tie ‘hanao asa lahibey ambone’e’ iareo. (Jaona 14:12) Tamy i halegne taloha ty hamonoagne azey, le nidera i apostoli’e tsy nivalike rey hoe izao reke: “Inareo ro nipiteke tamako tamy i fitsapagne nahazo ahy rey.” (Lioka 22:28) Tsy maintsy ho nanohigne ty fo iareo naho nandrisike iareo hanao raha o reha i Jesosy rehoe. Naho itika ka manokagne fotoagne mba hideragne o mpiara-miasa amantikagneo, le azo antoke fa ho fale iareo sady vao mainke hahavita raha soa.

Hoe ze rahalahy raike atao tihoe Kayode zay: “Tsy tihoe hanjare voririke ty ndaty raike vaho izay hahay hiara-hiasa amy ty hafa. Manao ze hahafalefale ty hafa reke, sady tsy le sarote’e loatse.” Hoe izay vao ty fahatsapa’o ty vata’o? Ndra naho tsy hai’o, le magnino naho agnontenea’o ty ila’e amo o Kristiana nama’ò tie manao akore ty fahatreava iareo azo? Mahay miara-miasa amy ty hafa vao? Nahafale i mpiana i Jesosy rey ty niara-niasa ama’e. Naho mahafale ty hafa ka ty miara-miasa ama’o, le ho afake hirehake manahake i apostoly Paoly rehe tie: ‘Mpiara-miasa ama’areo mba hahazoa’areo fifaleagne zahay.’​—2 Kor. 1:24.