Ina u ngu thumisana gwadi ni vambe?
“Nyi di khade bambe gwaye, nyi fanana ni muthu a wutigo thumo . . . gikhati gyatshavbo nyi di gu tsaka mbeli gwaye.” (Mav. 8:30) Livhesi leli la gu tshamuseya edzi Gyanana gya Nungungulu gi thumidego khidzo ni Papayi wagyo khu myaga nya yingi na gi si guti mafuni. Livhesi leli gambe la gu yeyedza gu khilo Jesu a di gu tsaka khu gu thuma ni Papayi Waye.
Jesu tepo a nga ba a romo ndzadzini, hevbulede makhalelo ma nga ba ma vbwetega gasi gu thumisana gwadi ni vambe. Hi nga phasega kharini khu giyeyedzo gya Jesu? Khu gu hevbula khu giyeyedzo gya Jesu, hi na mana matshina mararu ma na hi phasago gu thumisana gwadi ni vambe. Matshina yaya, ma na hi phasa gu pwana ni vandriyathu.
Pimedzeya giyeyedzo gya Jehovha ni Jesu khu gu bhuleya vambe esi u sitigo ni matshango yago
LITSHINA 1: “NINGA GITHAWO VAMBE”
Gasi hi si kodza gu thumisana gwadi ni vambe hi yede gu dzi nogisa. Hi yede gu wona vambe kha nga vathu nya lisima hi bwe hi si zami gu dzi yeyedza. Jesu hevbulede makhalelo yaya nya gu dzi nogise ga Papayi waye. Ambari olu Jehovha a ranwago gu pwane Muvangi, uye a di gu vbweta gu khuye vambe vati thumo nya lisima wu giridwego khu Gyanana gyaye. Ha gu pwisisa isoso avba nya esi Nungungulu a ganedego. Uye a di khuye: “Hongoleni hi gire muthu khu mufananiso wathu.” (Gen. 1:26) Tepo Jehovha a genedego malito yaya, Jesu wonide gu khuye uye muthu nya gu dzi nogise. — Ndzi. 18:35.
Tepo Jesu a nga ba a romo mafuni anuye a di gu dzi nogisa. Khu giyeyedzo, tepo vathu va nga ba va mu zundza, tepo yatshavbo a di gu yisa wuzundzu watshavbo ga Jehovha. (Marko 10:17, 18; Joh. 7:15, 16) Uye gambe a di gu dzigaradza gasi gu andrisa gurula ni vapizane vaye. Uye a di gu va wona kha nga dzipari nasiri dzigumbi. (Joh. 15:15) Uye handzide migondro ya vapizane vaye gasi gu va hevbudza gu khuye gudzinogisa gilo nya lisima. (Joh. 13:5, 12-14) Hi yede gu pimedzeya giyeyedzo gya Jesu hi bwe hi thangisa esi vandriyathu va si vbwetago. Ha gu ninga githawo vambe hi bwe hi si garadzegi khu oyu a na hakhago wuzundzo thumo wathu wu na gimbiya gwadi. — Rom. 12:10.
Muthu nya gu dzinogise a ngu dziti gu khuye “avbo gu guromo madhota nya mangi, makungo ma gu duga gwadi.” (Mav. 15:22) Si na ni lisima gu dundruga gu khethu mwalo muthu a tigo satshavbo ambari a gu ba ari ni makodzelo nyo khaguri mwendro gu wuti gwadi thumo. Ambari Jesu a di gu dziti gu khuye khandri satshavbo a sitigo. (Mat. 24:36) Jesu gambe a di gu vbweta guti mawonelo ya vapizane vaye ambari olu a nga ba dziti gu khuye kha va vbeleya. (Mat. 16:13-16) Isoso khiso si nga gira gu vapizane va dzipwa na va tshulegide gu khala naye. Tepo hi khalago vathu nya gudzinogise hi bwe hi dundruga gu khethu khandri satshavbo hi sitigo ni gu dzumeya mawonelo ya vambe, hi na andrisa gurula nigu “makungo ma gu duga gwadi.”
Khya lisima gu madhota ma landrisa giyeyedzo gya Jesu tepo ma thumago gumogo. Ayo ma yede gu dundruga gu khayo liphuvbo nya guage li nga thumisa lidhota limwedo gasi li ganeya silo si nga phasago Huwo nya madhota gu hunga silo khu wugengeyi. Madhota ma gu dzipwa na ma tshulegide gu ningeya mawonelo avba nya mitshangano yawe, si na vbevbuga gu hunga silo nya sadi nigu libandla latshavbo li na phasega.
LITSHINA 2: “WUWADI WANU WU NA WONEGE”
Gasi gu thumisana gwadi ni vambe hi yede gu khala vathu nyo vbevbuge hi bwe hi si gurumedzi gu khethu silo si girwa khedzi hi si vbwetago khidzo. Ga dzitepo nya dzingi, Jesu manegide ni lithomo nya gu wone edzi Jehovha a ninganiseyago khidzo silo. Khu giyeyedzo, Jehovha mu rumede gasi guta tshudzisa vathu ga tsayiso nya gufa wu nga ba wu va faneya. — Joh. 3:16.
Ga siemo nyo khaguri, Jesu yeyedzide gu khuye a diri muthu nyo ninganiseye. Dundruga gu khuwe Jesu phaside nyamayi moyo nya Mufenisiya ambari a nga ba adziti gu khuye uye rumedwe gasi guta phasa vathu va Nungungulu. (Mat. 15:22-28) Uye yeyedzide gambe gu khuye a diri muthu nya gu ninganiseye kholu kha vireya gu khuye vapizane vaye va vbeleya. Jesu divalede pari yaye Pedro ambari hwane nya gu ba a dangide vbakari nya vathu khuye kha muti Jesu. Khu hwane nya tepo, Jesu ningide Pedro mithumo nya lisima. (Luka 22:32; Joh. 21:17; Mith. 2:14; 8:14-17; 10:44, 45) Giyeyedzo gya Jesu gya gu hi hevbudza gu khigyo hi yede gu khala vathu nya gu vbevbuge hi bwe hi diga ‘wuwadi wathu wu wonega ga vathu vatshavbo.’ — Filp. 4:5.
Guninganiseya gu nga hi phasa gambe gu dzi pwananisa ni gyevbini giemo gasi gu andrisa gurula ni vathu vatshavbo. Jesu a di gu phara gwadi vathu vatshavbo nyo bwe valala vaye va ganeya gu khavo uye a gu khala “pari nya vakhupisi ni sighohi”, a gu ava va nga ba va dzumeya mahungu yaye. (Mat. 11:19) Hi nga pimedzeya kharini Jesu tepo hi thumisanago ni vambe? Louis a thumidego ni vathu nya vangi nyo hambane kha nga muwoneleyi nya gipandre ni Bheteli wari khuye: “Gu thumisana ni vathu nya mba vbeleya sa gu fana ni gu vbaha muru khu dzibloku nya dzimedhidha nya gu hambane. Si ngu ningana thumo gu vbaha muru khu dzibloku nya kharato. Ganiolu, si ngu kodzega ha gu dzi vega avba dzi vbwetegago. Eni nya gu zama gu dzi pwananisa ni gyevbini giemo gasi gu andrisa gurula nyi bwe nyi thumisana gwadi ni vambe.” Anethu hi yede gu gira sasimweso.
Muthu a thumisanago gwadi ni vambe, kha va siheyi mahungu va yedego gu mati.
Khu yavbini mathomo hi gu nawo gasi gu yeyedza wuwadi ga vandriyathu libandlani? Ethu hi na ni lithomo nyo gu yeyedze isoso tepo hi hongolago thumoni nyo tshumayele. Hi nga hongola thumoni nyo tshumayele ni vahuweleyi nyo hambane nya dzitanga nyo hambane. Ina hi nga zama gu dzi pwananisa ni matshumayelelo ya muhuweleyi ni muhuweleyi gasi hi mu phasa gu tsaka khu thumo nyo tshumayele?
LITSHINA 3: ‘DZI EMISEYE GU HENGEYA NI VAMBE ESI U GU NASO’
Muthu a thumisanago gwadi ni vambe a dzi emisede gu hengeya esi a gu naso navo. (1 Thim. 6:18) Tepo Jesu a nga ba a thuma ni Papayi waye ndzadzini, uye wonide gu khuye Jehovha kha nga ba a siha gilo. Tepo Jehovha a nga ‘dongiseya ndzadzi,’ ni silo satshavbo Jesu a ‘diri eyi’ nigu uye hevbude nya singi khu satshavbo a si wonidego. (Mav. 8:27) Nigu, tepo Jesu a nga ba ari mafuni bhulede vapizane vaye esi ‘a si pwidego’ ga Papayi waye. (Joh. 15:15) Anethu hi nga pimedzeya Jehovha khu gu bhuleya vandriyathu esi hi si hevbudego. Muthu a thumisanago gwadi ni vambe, kha zami gu va siheya mahungu va yedego mu mati mwendro ma na va phasago. Uye a ngu tsaka khu gu bhuleya vambe esi a sitigo.
Ethu gambe hi nga tiyisa vandriyathu. Ina kha wu tsaki tepo muthu nyo khaguri a gu zundzago ni gu gu bonga khu gu dzigaradza u gu girago? Jesu a di gu dzi ninga tepo nya gu embeye valandreyi vaye silo nya sadi a nga ba a si wona gwawe. (wona gambe Matewu 25:19-23; Luka 10:17-20.) Uye a di bwe a va embeya gu khuye va di hadzi “gira mithumo ya yikhongolo guvbindra” eyi yaye. (Joh. 14:12) Ga wutshigu wule na si gufi Jesu a di zundza vapostoli vaye khuye: “Enu khenu mu nga nyi bangaladzani gikhati gyatshavbo gulingwani gwangu.” (Luka 22:28) Nga dundrugeya khedzi malito yaye ma va tiyisidego khidzo ni gu va kutsa gu gira gilogyo! Ha gu zundza vandriyathu, avo va na tsaka nigu va na thuma gwadi.
U NGA SI KODZA GU THUMISANA GWADI NI VAMBE
Ndriyathu moyo nyo pwane khu Kayode wari khuye: “Muthu a thumisanago gwadi ni vambe kha si lombi gu a vbeleya. Ganiolu, uye a gu tsakisa vambe a bwe a vbevbugisa thumo wawe.” Ina uwe u ngu thumisana gwadi ni vambe? Adzina u nga wudzisa vandriyathu gu khuwe va gu gu wona kharini? Va gu ba va tsaka khu gu thuma nago, nya nga vapizane va nga ba va tsaka khu gu thuma ni Jesu, adzina u nga ganeya malito yamamowo ni aya ya mupostoli Pawulo a nga khuye: Ha “gu mi phasa gutsakani gwanu.” — 2 Kor. 1:24.
