Kʼakgapun, Jesús katsinilh makgapitsi tayat nema tlan xmakgtayalh xlakata akxtum xkataskujli amakgapitsin. Chu akxni xlama kKatiyatni kamakgxtakgnilh akgtum lu tlan liʼakxilhtit tiku akxtum taskujkgolh. ¿La kinkamakgtayayan xliʼakxilhtit? Akxni nalichuwinanaw xliʼakxilhtit, naʼakxilhaw pulaktutu tastakyaw nema nakinkamakgtayayan tlan akxtum nakataskujaw amakgapitsin, nakinkamakgtayayan makxtum nalayaw chu nalamakgtayayaw.

Lataman tiku katsini kataskuja amakgapitsin taktuju, xtapalh kaʼakxilha tiku akxtum kataskuja chu ni tlankajwanan. Jesús akxilhli pi xTlat xtaktuju. Maski kajwatiya Jehová lakgchan nalimapakuwikan Malakatsukina, lichuwinalh lu xlakaskinka taskujut nema tlawalh xKgawasa akxni akxtum taskujli. Uma liwana tasiya xlakata tuku wa Dios: «Katlawaw chixku chuna la akinin» (Gén. 1:26). Akxni Jehová wa uma, Jesús akxilhli pi xTlat lu taktuju (Sal. 18:35).

Akxni Jesús xlama kKatiyatni, na limasiyalh pi xtaktuju. Akxni latamanin xwanikgo laktlan tachuwin xlakata tuku xtlawa, xla ankgalhin xwan pi chuna xtlawanit xlakata xtamakgtay Jehová (Mar. 10:17, 18; Juan 7:15, 16). Nachuna, lu liskujli xlakata lu tlan xkatalalilh xtamakgalhtawakgen chu kalikatsinilh la xʼamigos, chu ni kaʼakxilhli la xlakskujnin (Juan 15:15). Asta katuchakgelh xlakata nakamasiyani pi xlitaktujutkan xwanit (Juan 13:5, 12-14). Chuna la Jesús,  xtapalh kiliʼakxilhatkan tiku akxtum kataskujaw chu tlakg xlakaskinka naʼakxilhaw tuku lakaskinkgo nixawa tuku akinin lakaskinaw. Akxni lamaxkiyaw kakni kinchatunukan chu ni wa lilakgaputsayaw tiku namalankikan, lhuwa tuku tlan natlawayaw (Rom. 12:10).

Lataman tiku taktuju katsi pi «niku anan lhuwa stakyawananin tlan kitaxtu» (Prov. 15:22). Maski lhuwa tuku titaxtunitaw o lhuwa tuku katsiniyaw tlawayaw, kalakapastakwi pi nipara chatum lataman putum katsini. Asta Jesús wa pi xʼanan tuku ni xkatsi (Mat. 24:36). Nachuna, xkatsiputun tuku xlakpuwankgo kstalaninanin tiku makglakgalhinanin xwankgonit (Mat. 16:13-16). Wa xlakata xtaskujnin lu xpaxuwakgo akxni akxtum xtawilakgolh. Xtachuna la uma, akxni taktujuyaw, katsiyaw pi ni putum tlan tlawayaw chu kgaxmatputunaw tuku lakpuwankgo amakgapitsin, makgtayananaw naʼanan takaksni chu tlan kitaxtu tuku tlawayaw kiliputumkan.

Akxni lakgkgolotsin makxtum skujkgo lu xlakaskinka pi nastalanikgo xliʼakxilhtit Jesús chu nataktujukgo. Xlilakapastakatkan pi espíritu santo tlan namakgtaya chatum kgolotsin xlakata nawan tuku nakamakgtaya putum lakgkgolotsin nalaksakkgo tuku tlan. Komo kxtamakxtumitkan naliskujkgo xlakata nalakgalhskinkgo tuku lakpuwankgo, tuku nalaksakkgo nalitamakgtaya putum congregación.

Chatum tiku tlan taskujkan ni malakatsali tuku kaskini amakgapitsin. Wa xlakata wi tuku lakgpali akxni talakaskin. Xlikana pi Jesús makglhuwa akxilhli la xTlat ni xmalakatsali tuku xkaskini amakgapitsin. Akgtum li’akxilhtit, Jehová makamilh kKatiyatni xlakata xkalakgmaxtulh latamanin kkalinin (Juan 3:16).

Jesús wi tuku lakgpalilh akxni chuna xtalakaskin. Kalakapastakwi la makgtayalh chatum puskat xalak Fenicia, maski xla xmalakgachakanit xlakata kajwatiya xmakgtayalh kachikin Israel (Mat. 15:22-28). Na ni malakatsalilh tuku xkaskini pi xtlawakgolh kstalaninanin. Akxni Pedro, x’amigo, wa pi ni xlakgapasa, Jesús xatapaxuwan tapatilh, chu alistalh lakgayawalh lu xlakaskinka taskujut (Luc. 22:32; Juan 21:17; Hech. 2:14; 8:14-17; 10:44, 45). Xli’akxilhtit Jesús liwana masiya pi wi tuku kililakgpalitkan akxni chuna talakaskin xlakata putum nakatsikgo pi kgalhiyaw xatlan talakapastakni (Filip. 4:5).

 Komo kgalhiyaw tlan talakapastakni, na xatapaxuwan wi tuku nalakgpaliyaw xlakata tlan akxtum nakataskujaw putum latamanin. Jesús lu tlan xkatalalin putum latamanin, wa xlakata xtalamakgasitsin lu sitsinikgolh chu limawakakgolh pi tlan xkatalalinkgo tiku xmatajinanin lilakgaxokgon xwankgonit chu makglakgalhinanin tiku makglhtinankgolh xtamakatsin (Mat. 11:19). ¿Tlan nastalaniyaw xli’akxilhtit Jesús chu xatapaxuwan nakataskujaw amakgapitsin maski ni xtachuna la akinin? Chatum tala tiku wanikan Louis, tiku skujnit la superintendente de circuito chu kBetel, chu akxtum kataskujnit natalan tiku tanu tanu xkilhtsukutkan, wan: «Kimpalakata, akgatunu grupo xla natalan xtachuna la akgtum patsaps nema litatlawanit chiwix nema tanu tanu xlilanka chu tanu tanu la tasiyakgo. Komo nalakgpaliya chuna la kakaxwilikanit makgapitsi chiwix, tlan natlawaya akgtum lakaxtum patsaps. Na kliskujnit naklakgpali kintayat xakata xatapaxuwan nakkataskuja amakgapitsin chu chuna tlan nataxtuyacha taskujut». ¡Lu tlan talakapastakni!

¿La tlan nalimasiyayaw tlan talakapastakni kcongregación? Akgtum liʼakxilhtit, max kʼgrupo niku makgtapakgsiyaw wilakgolh natalan tiku tanu tanu kata kgalhikgo chu tanu tanu tuku lakgayakgo kxfamiliajkan tuku akinin ni lakgayaw. Akxni nakalitachuwinanaw Dios, ¿tlan nalichuwinanaw Dios chuna la xlakan matlanikgo o namaklakaskinaw tuku xlakan tlakg lakgatikgo?

Chatum tiku lu tlan taskujkan “limakgtayanamputun tuku kgalhi” (1 Tim. 6:18). Akxni akxtum taskujli xTlat, Jesús akxilhli pi Jehová ni anan tuku malakgtsekga. Akxni Jehová «tlawalh akgapun», Jesús «anta xwi» chu lhuwa tuku tlan xkatsini xlakata xTlat (Prov. 8:27). Alistalh, Jesús xatapaxuwan kalitachuwinalh kstalaninanin tuku xlitachuwinanit xTlat (Juan 15:15). Kastalaniw xliʼakxilhtit Jehová chu xatapaxuwan kakawaniw chu kakamasiyaniw kinatalankan tuku katsininitaw. Liwana tasiya pi chatum tiku lu tlan taskujkan ni matsekga tuku makgtayanan o tuku xlitakatsit kaj xlakata xla mapakgsinamputun. Wata xatapaxuwan kalitachuwinan amakgapitsin tuku lu tlan katsininit.

Atanu la tlan namakgtayananaw wa akxni nakamakgpuwantiniyaw kinatalankan. ¿Ni xlikana pi lu tlan makgkatsiyaw akxni wi tiku akxilha pi palha skujaw chu xatapaxuwan kinkapaxtikatsiniyan? Jesús limaxtulh kilhtamaku xlakata nakawani tiku akxtum xkataskuja tuku lu tlan tayat xkgalhikgo (katamalakxtupi Mateo 25:19-23; Luc. 10:17-20). Asta kawanilh pi xʼamakgo tlawakgo «tlakg laklanka tatlaw» nixawa xla (Juan 14:12). Chu katsisni akxni nina xmakgnikan kawanilh laktlan tachuwin xʼapóstoles. Kawanilh: «Wixin nikxni kimakgxtakgnitantit maski ktitaxtunit tuku lu tuwa» (Luc. 22:28). Xlikana pi tuku kawanilh lu kamakgpuwantinilh chu tlawalh pi wi tuku xtlawakgolh. Komo akinin na nalimaxtuyaw kilhtamaku xlakata nakawaniyaw kinatalankan laktlan tachuwin, tlakg napaxuwakgo chu tlakg lhuwa tuku natlawakgo.

Chatum tala tiku wanikan Kayode wan: «Ni talakaskin ni nakgalhiya talakgalhin xlakata nalitaxtuya chatum tiku lu tlan taskujkan, pero tlan nakamakgapaxuwaya amakgapitsin chu nakamakgtayaya xlakata tlakg nituwa namakgkatsikgo xtaskujutkan». ¿Tlan chuna nawankan mimpalakata? ¿Tuku xlakata ni kakgalhskina amakgapitsi natalan komo liʼakxilhkgoyan chuna la tiku lu tlan taskujkan? ¿Lu lakgatikgo akxtum natatawilakgoyan chuna la kstalaninanin Jesús lu xlakgatikgo akxtum xtatawilakgo? Komo chuna, tlan xwanti chuna la apóstol Pablo: «Akinin akxtum kkataskujman xlakata napaxuwayatit» (2 Cor. 1:24).