Yesu u dyondze vumunhu lebyinene lebyi n’wi pfuneke ku va xikombiso lexinene xo tirhisana kahle ni van’wana. Hi vuyeriwa njhani eka xikombiso xa Yesu? Loko hi dyondza eka xikombiso xakwe, hi ta kota ku vona milawu yinharhu leyi nga hi pfunaka ku va vatirhi lavanene ni van’wana. Yi ta tlhela yi hi pfuna ku va ni vun’we ni vamakwerhu.

Mutirhikuloni lonene wa titsongahata, u teka vatirhikulobye va ri va nkoka naswona a nga lavi leswi vuyerisaka yena n’wini ntsena. Sweswo hileswi Yesu a swi dyondzeke eka Tata wakwe. Hambileswi Yehovha ku nga yena ntsena loyi a faneriwaka hi ku vitaniwa Mutumbuluxi kambe a a lava leswaku vanhu va wu tiva ntirho wa nkoka lowu endliweke hi n’wana wakwe. Sweswo hi swi vona hileswi Xikwembu xi swi vuleke loko xi ku: “A hi endle munhu hi xifaniso xa hina.” (Gen. 1:26) Marito lawa ma endle Yesu a swi xiya leswaku Yehovha wa titsongahata.—Ps. 18:35.

Yesu u tekelele Tata wakwe hi ku titsongahata loko a ri laha misaveni. Loko a dzunisiwa hikwalaho ka mitirho yakwe, u yise ku dzuneka eka Loyi a faneriwaka hi ku dzunisiwa. (Mar. 10:17, 18; Yoh. 7:15, 16) U tirhe hi matimba ku kondletela ku rhula naswona a teka vadyondzisiwa vakwe tanihi vanghana, ku nga ri mahlonga. (Yoh. 15:15) U tlhele a va hlambisa ni milenge. (Yoh. 13:5, 12-14)  Hilaha ku fanaka, hi fanele hi xixima vatirhikulorhi naswona hi nga rhangisi swilaveko swa hina ku tlula swa vona. Loko hi va vo “rhanga eku xiximaneni” naswona hi nga lavi ku dzunisiwa, hi ta kota ku endla swo tala.—Rhom. 12:10.

Munhu loyi a titsongahataka wa swi tiva leswaku “laha ku nga ni vatsundzuxi vo tala swilo swa humelela.” (Swiv. 15:22) Hambi ho va hi ri ni ntokoto kumbe vuswikoti byo karhi, hi fanele hi tsundzuka ku a hi nge tivi swilo hinkwaswo. Hambi ku ri Yesu u pfumerile leswaku a a nga tivi swilo hinkwaswo. (Mat. 24:36) Nakambe a a lava ku tiva leswi vadyondzisiwa vakwe lava velekiweke ni xidyoho a va swi ehleketa kumbe ku swi tiva. (Mat. 16:13-16) Hi yona mhaka a va rhandza ku va ekusuhi na yena mikarhi hinkwayo! Hilaha ku fanaka, loko hi titsongahata naswona hi tsundzuka leswaku a hi tivi swilo hinkwaswo ni ku lava ku yingisela mavonelo ya van’wana, ‘swilo swi ta humelela.’

I swa nkoka leswaku vakulu va tekelela xikombiso xa ku titsongahata ka Yesu loko va tirhisana. Va fanele va tsundzuka ku moya lowo kwetsima wu nga ha tirhisa nkulu un’wana na un’wana leswaku a ta ni mavonelo ya vutlhari. Loko vakulu va khome nhlengeletano ya vona naswona va tiyiseka leswaku hinkwavo va tshunxeka ku vula mavonelo ya vona, sweswo swi ta va pfuna va teka swiboho swa vutlhari leswi nga ta vuyerisa vandlha.

Mutirhikulobye lonene wa anakanyela loko a tirhisana ni van’wana. Wa olova naswona u tiyimisele ku endlela van’wana leswinene. Yesu u ve ni nkarhi wo tala wo vona ku anakanyela ka Tata wakwe. Hi xikombiso, Yehovha u n’wi rhume emisaveni leswaku a ya kutsula vanhu eka xigwevo xa xidyoho ni rifu.—Yoh. 3:16.

Yesu a a tiyimisele ku endlela van’wana leswinene loko a vona ku ri ni xilaveko xo endla tano. Tsundzuka ndlela leyi a n’wi pfuneke hayona wansati wa Mufenikiya, hambileswi a a rhumiwe ntsena emutini wa Israyele. (Mat. 15:22-28) Nakambe a a nga langutelanga swo tala eka vadyondzisiwa vakwe, a a va anakanyela. Endzhaku ka loko munghana wakwe Petro a n’wi landzurile emahlweni ka vanhu, Yesu a a tiyimisele ku n’wi rivalela. Loko a pfuxiwile, u nyike Petro vutihlamuleri bya nkoka swinene. (Luka 22:32; Yoh. 21:17; Mit. 2:14; 8:14-17; 10:44, 45) Xikombiso xa Yesu xi hi dyondzisa leswaku “ku anakanyela ka [hina] a ku tiviwe hi vanhu hinkwavo” naswona hi va endlela leswinene.—Filp. 4:5.

 Ku anakanyela swi ta hi susumetela leswaku hi va ni ku rhula ni vanhu hinkwavo. Yesu a a tirhisana kahle ni vanhu hinkwavo lava a va yingisela leswi a swi dyondzisa, lerova valala vakwe va kale va n’wi vondzoka va vula ku “i munghana wa valuvisi ni vadyohi.” (Mat. 11:19) Xana hi nga tirhisana kahle ni van’wana lava hambaneke na hina hilaha Yesu a endleke hakona? Makwerhu Louis loyi a tirheke ni vanhu vo hambanahambana eBethele ni le ka ntirho wo va mulanguteri wa muganga, u ri: “Vanhu hinkwavo lava ndzi tirheke na vona a ndzi va fanisa ni swi tina leswi nga foromiwangiki kahle. Loko wo kota ku swi veketela kahle switina sweswo, ku nga huma khumbi leri yimeke kahle. Hikwalaho, ndzi ringete ku antswisa ndlela leyi ndzi endlaka swilo ku ndzi kota ku tirhisana kahle ni vamakwerhu hi ku rhula leswaku hi hetisisa ntirho lowu hi wu endlaka.” Mawaku langutelo ronghasi!

Hi nga swi kombisa njhani leswaku ha anakanyela loko hi ri evandlheni? Hi pfulekeriwe hi tindlela to tala to kombisa ku anakanyela loko hi ri eka ntlawa lowu hi tirhaka na wona nsimu. Hi nga tirha ni vahuweleri lava nga ni vutihlamuleri kumbe malembe lawa ma hambaneke ni ya hina. Hi nga kombisa ku va anakanyela hi ku antswisa matirhelo ya hina kumbe hi chumayela hi ndlela leyi va yi tsakelaka.

Mutirhikulobye lonene u ‘tiyimisele ku avela van’wana.’ (1 Tim. 6:18) Loko a ri karhi a tirha ni Tata wakwe, Yesu u swi vonile leswaku Yehovha a nga na swihundla. Loko Yehovha a “lulamisa matilo,” Yesu a a “ri kona” naswona u dyondze swo tala. (Swiv. 8:27) Hi ku famba ka nkarhi, Yesu u avele vadyondzisiwa vakwe ‘swilo hinkwaswo leswi Tata wakwe a n’wi byeleke swona.’ (Yoh. 15:15) Hilaha ku fanaka, na hina hi fanele hi tiyimisela ku avelana ni vatirhikulorhi vutivi ni ntokoto lowu hi nga na wona. Mutirhikuloni lonene a nga byi fihli vutivi kumbe vuxokoxoko lebyi nga pfunaka van’wana. U khapakhapa hi ntsako loko a avela van’wana swilo leswi a swi dyondzeke.

Hi nga ha tlhela hi avelana ni van’wana hi ku va khutaza. Xana a swi hi tsakisi loko van’wana va khensa ndlela leyi hi va pfuneke hayona? Yesu a a tinyika nkarhi wo byela vatirhikulobye hi swilo leswinene leswi a a swi vona eka vona. (Ringanisa na Matewu 25:19-23; Luka 10:17-20.) U va byele nileswaku a va ta “endla mitirho leyikulu ku tlula leyi” a yi endleke. (Yoh. 14:12) Hi vusiku byo hetelela a nga se dlayiwa, u bumabumele vaapostola vakwe a ku: “Mi ndzi seketerile emaxangwini ya mina.” (Luka 22:28) Ehleketa ndlela leyi marito lawa ma va khumbeke mbilu hayona ni ku va susumetela ku teka goza! Loko hi tinyika nkarhi wo bumabumela vatirhikulorhi, va ta tsaka swinene naswona va ta tirha hi matimba.

Makwerhu Kayode u ri: “Loko munhu a ri mutirhikuloni lonene a swi vuli swona leswaku a nga swi endli swihoxo kambe u tirha hi matimba leswaku a tsakisa lava a tirhaka na vona ni ku va olovisela ntirho.” Xana u tano? Kumbexana u nga kombela makwerhu un’wana leswaku a ku hlamusela ku u mutirhikulobye wa njhani. Loko va tiphina hi ku tirha na wena hilaha vaapostola va Yesu va tiphineke hakona hi ku tirha na yena, u ta vula hilaha muapostola Pawulo a vuleke hakona loko a ku: “Hi vatirhikuloni leswaku mi tsaka.”—2 Kor. 1:24.