Nkama Yesu na a li matilweni a djondze ku va ni wumunhu la linene leli hi ku famba ka nkama li nga mu pfuna swaku a tirhisana kahle ni van’wana. Se hina hi nga djondza yini ka xikombiso xa Yesu? Phela loko hi pimisa kahle hi xikombiso xa Yesu, hi nga djondza swilo swinharhu swa lisima leswi nga hi pfunaka ku va hi tirhisana kahle ni van’wana naswona swilo swoleswo swi nga hi pfuna kuva hi twanana nkama hi tirhisanaka ni vamakwerhu.

Munhu lweyi a tirhisanaka kahle ni van’wana wa tiveka hansi, a va nyika lisima lava a tirhaka na vona funtshi a nga tibyeli. Yesu a djondze ku tiveka hansi nkama na a tirha ni Papayi wa yena. Hambileswi Yehovha a nga Muyentxi wa swilo hinkwaswu a lave swaku vanhu va swi tiva leswaku Yesu na yena a ve kona ku yentxeni ka swilo. Leswo swi tikomba ka leswi a nga swi vula loko a te: “A hi yentxi munhu hi xifaniso xa hina.” (Gen. 1:26) Phela nkama Yehovha a nga vula marito lawa, Yesu a swi vonile swaku Papayi wa yena wa tiveka hansi. — Pis. 18:35.

Nkama lowu Yesu na a li lani misaveni a tekelele Papayi wa yena hi ku tiveka hansi. Nkama lowu vanhu va nga mu khensa hileswi a nga swi yentxa, a vule swaku a va fanele va khensa Yehovha. (Marku 10:17, 18; Yoh. 7:15, 16) Yesu a yentxe hinkwaswu a nga swi kota swaku a tirhisana hi ku rhula ni vadjondzisiwa va yena naswona a a nga va voni na va li vatirhi kambe a a va vona na va li vanghanu va yena. (Yoh. 15:15) Phela a patse ni ku va hlambhisa minenge kuva a va djondzisa swaku i swa lisima  ku tiveka hansi. (Yoh. 13:5, 12-14) Ku fana na Yesu, na hina hi fanele hi va nyika lisima lava hi tirhaka na vona naswona a hi fanelanga hi rhangisa leswi rhandziwaka hi hina. Leswaku ntirho wu famba kahle hi fanele hi “hlonipha van’wana” hi tlhela hi nga lavi swaku ku dzunisiwa hina hi ntirho lowu hi wu yentxaka. — Rom. 12:10.

Munhu wa ku tiveka hansi wa swi tiva swaku “loko ku ni vatsundzuxi va vanyingi swilo swi famba kahle.” (Swi. 15:22) Hambiloko hi swi kota ku wu yentxa kahle ntirho, hi fanele hi khumbuka swaku a nga kona munhu lweyi a tivaka ku yentxa swilo hinkwaswu. Hambileswi Yesu a a ni wutivi, a a pfumela swaku a a nga tivi swilo hinkwaswu. (Mat. 24:36) Hambileswi vadjondzisiwa va yena a va ni xidjoho, a a swi nyika lisima leswi a va swi tiva ni leswi a va titwisa xiswona. (Mat. 16:13-16) Leswo swi yentxe swaku vadjondzisiwa va yena va titwa va chunsekile loko va li na yena. Na hina loko hi tiveka hansi hi ta pfumela swaku a hi koti ku yentxa swilo hinkwaswu naswona hi ta tirhisana kahle ni van’wana hi ku rhula leswaku “swilo swi famba kahle.”

I swa lisima hintamu kuva madoda ma tekelela Yesu loko ma tirhisana. Ma fanele ma khumbuka swaku loko ma li ka ntlhanganu wa madoda, moya wa ku kwetsima wu nga pfuna doda lin’wana ni lin’wana swaku li vula swilo leswi nga ta ma pfuna kuva ma yentxa swiboho swa kahle. Loko ma li ka mintlhanganu ya madoda, ma fanele ma yentxa swaku doda lin’wana ni lin’wana li titwa li chunsekile ku nyikela mavonelo ya lona. Se leswo swi ta yentxa swaku ma yentxa swiboho leswi nga ta pfuna bandla hinkwalu.

Munhu lweyi a tirhisanaka kahle ni van’wana a nga sindzisi mavonelo ya yena, a titwananisa ni xiyimu naswona a yentxa swaku lava a tirhaka na vona va titwa kahle. Yesu a swi vonile leswo nkama na a tirhisana ni Papayi wa yena Yehovha. Hi xikombiso, Yehovha a rhume Yesu swaku a ta ponisa vanhu ka xidjoho ni lifu hambileswi a va faneliwa hi ku fa. — Yoh. 3:16.

Yesu a a nga sindzisi mavonelo ya yena. Khumbuka swaku siku lin’wana a pfune wansati wa Mufenisiya hambileswi a nga rhumeliwa ku ta pfuna Vayuda. (Mat. 15:22-28) A tlhele a nga sindzisi mavonelo ya yena loko a tirhisana ni vadjondzisiwa va yena. Hambileswi Pedru munghanu wa yena wa mukulu a nga mu yala lani a ku tale hi vanhu, a a tinyimisele ku mu rivalela a tlhela a mu nyika mintirho yin’wana swaku a yi yentxa. (Luk. 22:32; Yoh. 21:17; Mint. 2:14; 8:14-17; 10:44, 45) Xikombiso xa Yesu xi hi djondzisa swaku vanhu ‘hinkwavu va fanele va swi vona swaku a hi sindzisi mavonelo ya hina.’ — Filp. 4:5.

 Ku kala hi nga sindzisi mavonelo ya hina swi ta hi pfuna ku titwananisa ni xiyimu hi tlhela hi tirhisana kahle ni vanhu hinkwavu. Yesu a a tirhisana kahle ni vanhu hinkwavu lakaku hambi vanhu lava a va mu nyenya va vule swaku a a li “munghanu wa vahakelisi va rhesa ni vadjohi” lava a va mu yingisa. (Mat. 11:19) Ku nga va swaku na hina hi nga swi kota ku tekelela Yesu hi ku tirhisana kahle ni van’wana? Makwerhu Luis lweyi a nga tirha ni vanhu va ku ta hi ka tindhawu ta ku hambanahambana ka ntirho wa wudjikelezi ni Betele a vula leswi: “Ku tirha ni vanhu lava va yentxaka swihoxo, swi fana ni ku yaka paredi hi mabiloko ya ku kala ma nga ringani. Leswi mabiloko ma kalaka ma nga ringani swi lava u tikarhata swaku u ma veketela kahle kuva paredi li tshamiseka. Hi ku fanana, ni zame ku titwananisa na vona swaku hi tirhisana kahle hi tlhela hi yentxa ntirho lowu a wu laveka.” Impela leswi makwerhu lweyi a nga swi yentxa i swinene, naswona na hina hi lava ku mu tekelela.

I ka swiyimu swini lani hi nga kombisaka swaku a hi sindzisi mavonelo ya hina loko hi tirhisana ni van’wana abandleni? Hi nga yentxa leswo loko hi chumayela ni grupu ya hina ya nsimu hi tlhela hi chumayela ni vamakwerhu va ku hambana ni va tintanga ta ku hambana. Naswona loko hi chumayela hi nga ha txintxa machumayelelo ya hina swaku hi titwananisa na vona kuva na vona va ta tsaka.

Munhu lweyi a tirhisanaka kahle ni van’wana a ‘tinyimisele ku yavelana’ na vona leswi a swi tivaka. (1 Tim. 6:18) Nkama na a tirha ni Papayi wa yena, Yesu a swi vonile swaku Yehovha a a nga mu fihleli nchumu. Nkama Yehovha a nga “yentxa matilo” Yesu a a “li kona” naswona a djondze hintamu ka yena. (Swi. 8:27) Hi ku famba ka nkama, Yesu a yavelane ni vadjondzisiwa va yena leswi a nga swi djondza ka Papayi wa yena. (Yoh. 15:15) Na hina hi nga tekelela Yesu hi ku byela vamakwerhu lava hi tirhaka na vona hinkwaswu leswi hi swi tivaka hi ntirho lowu hi wu yentxaka. Hi mhaka leyo, a hi fanelanga hi fihlela vamakwerhu lava hi tirhaka na vona swilo swa lisima leswi fambisanaka ni ntirho wa hina leswaku va nga nyimeli hina ntsena kuva va yentxa ntirho. Swa hi tsakisa ku byela lava hi tirhaka na vona swilo swa swinene leswi hi nga swi djondza ka ntirho lowu hi wu yentxaka.

Hi nga tlhela hi byela lava hi tirhaka na vona marito lama tiyisaka. Phela hi tsaka hintamu loko munhu a vona minzamu leyi hi yi yentxaka ka ntirho wa hina a tlhela a hi khensa. Phela Yesu a tinyike nkama wa ku byela lava a a tirha na vona swilo swa swinene leswi a va swi yentxa. (Lerha Matewu 25:19-23; Luka 10:17-20.) A tlhele a va byela swaku a va ta “yentxa mintirho ya yikulu ya ku tlula leyi” yena a nga yi yentxa. (Yoh. 14:12) Ka wusiku leli a nga fa hi lona, Yesu a byele vapostolo va yena a ku: “Hi n’wina mi nga tiyisela na mina ka swikarhatu swa mina hinkwaswu.” (Luk. 22:28) Pimisa hi leswi marito wolawo ma nga va tiyisisa xiswona vadjondzisiwa va yena ma tlhela ma va pfuna ku wu yentxa kahle ntirho wa vona. Na hina loko hi tinyika nkama wa ku khensa vamakwerhu lava hi tirhaka na vona, va ta tsaka naswona va ta wu yentxa kahle ntirho wa vona.

Vona leswi Makwerhu Kayodi a nga swi vula loko a te: “Kuva munhu a va mutirhi wa kahle a swi vuli swona swaku a nga ta phazama. Kambe a yentxa swaku lava a tirhisanaka na vona va tsaka a tlhela a vevukisa ntirho.” Ku nga va swaku na wena u tirhisana kahle ni van’wana? Loko u lava ku tikambela, swi ngo yini u vutisa vamakwerhu lava u tirhaka na vona swaku u tshamise ku yini. Loko lava u tirhaka na vona va rhandza ku tirha na wena ku fana ni leswi vadjondzisiwa va Yesu a va swi rhandza ku tirha na yena, u ta fana na mupostolo Pawulo lweyi a nga vula leswi: ‘Hi tirha xikan’we swaku hi tsaka.’ — 2 Kor. 1:24.