Kuchanya, Yesu wakasambira mikhaliro yiwemi iyo yikazakamovwira pano pa charu chapasi kuti wateŵetenge makora na ŵanji. Kasi tingasambirako vichi kwa Yesu? Para tighanaghanirengepo pa ivyo wakachita, tingasambirako fundo zitatu izo zingatovwira kuti titeŵetenge makora na ŵanji. Fundo izi zitovwirenge kuti tiŵe ŵakukolerana chomene na ŵabali na ŵadumbu ŵithu.

Munthu uyo wakuteŵetera makora na ŵanji wakuŵa wakujiyuyura. Iyo wakuwona kuti ŵanyake awo wakuteŵetera nawo mbakuzirwa, ndipo wakulimbana na kujilongora yayi kwa iwo. Kujiyuyura kwa nthena uku ndiko Yesu wakasambira kufuma kwa Adada ŵake. Nangauli Yehova ndiyo ni Mlengi, kweni wakakhumba kuti ŵanji ŵamanye mulimo wakuzirwa uwo Mwana wake wakachita. Tikuwona fundo iyi kwizira mu ivyo Chiuta wakayowoya. Iyo wakati: “Tipange munthu mu chikozgo chithu.” (Gen. 1:26) Yehova wati wayowoya mazgu agha, Yesu wakamanya kuti Yehova ngwakujiyuyura chomene.—Sal. 18:35.

Panyengo iyo wakaŵa pa charu chapasi, Yesu nayo wakaŵa wakujiyuyura. Apo ŵanthu ŵakamulumbanga pa ivyo wakachita, iyo wakalumbanga Chiuta. (Mrk. 10:17, 18; Yoh. 7:15, 16) Yesu wakachitanga vinthu kuti palutilire kuŵa mtende pakati pa iyo na ŵasambiri ŵake, ndipo wakachitanga nawo vinthu nga mbabwezi ŵake m’malo mwakuchita nawo vinthu nga mbazga. (Yoh. 15:15) Wakafika na pakuŵageziska mu malundi wuwo kuti waŵasambizge  kujiyuyura. (Yoh. 13:5, 12-14) Nase tingachita makora kuti tichindikenge ŵanyithu awo tikuteŵetera nawo m’malo mwakudangizga vyakukhumba vithu pakwamba. Tingachita vinandi chomene para ‘tikuchindikana,’ kweniso para tikufipa mtima yayi na vyakuti ni njani walumbikenge.—Rom. 12:10.

Munthu wakujiyuyura wakumanya kuti “vinthu vikwenda makora para pali ŵakupeleka fundo ŵanandi.” (Zinth. 15:22) Nanga tingaŵa kuti tili na luso panji tikumanya vinthu vinandi, kweni tikwenera kukumbuka kuti palije munthu uyo wakumanya vyose. Nanga ni Yesu nayo wakazomerezga kuti pakaŵa vinthu vinyake ivyo wakavimanyanga yayi. (Mat. 24:36) Kweniso wakakhumbanga kumanya ivyo ŵasambiri ŵake ŵakamanyanga na kughanaghana, nangauli ŵakaŵa ŵambura kufikapo. (Mat. 16:13-16) Lekani ntchakuzizika yayi kuti awo wakateŵetanga nawo, ŵakafwatukanga nayo. Mwakuyana waka, para tiŵenge ŵakujiyuyura na kukumbuka kuti tikumanya vyose yayi, kweniso kupulika maghanoghano gha ŵanji pa nkhani zinyake, tiŵenge nawo pamtende kweniso ‘vinthu vyendenge makora.’

Ntchakuzirwa chomene kuti ŵalara ŵayezgenge Yesu pa nkhani ya kujiyuyura para ŵakuchita uteŵeti wawo. Ŵakwenera kukumbuka kuti mzimu utuŵa ungawovwira mulara waliyose pa wupu wawo. Para ŵalara ŵakukumana, ŵakuwoneseska kuti waliyose waŵe wakufwatuka kupeleka maghanoghano ghake, ndipo pamoza ŵangasankha makora vinthu ivyo vingawovwira mpingo wose.

Munthu uyo wakuteŵetera makora na ŵanji wakuchita vinthu mwamahara na ŵanyake awo wakugwira nawo ntchito. Wakuŵa wambura kusuzga kweniso wakupulikiska. Yesu wakaŵa na mwaŵi wapadera chomene wakuwona umo Adada ŵake ŵakachitiranga vinthu mwamahara. Mwachiyelezgero, Yehova wakamutuma kuti wazakaponoske ŵanthu ku nyifwa iyo yikiza chifukwa cha kwananga kwawo.—Yoh. 3:16.

Yesu wakayezeskanga kovwira ŵanji usange ntchakwenelera. Kumbukani umo wakawovwilira mwanakazi wa ku Fonike yura, nangauli iyo Yesu wakatumika ku nyumba ya Israyeli. (Mat. 15:22-28) Kweniso wakachitanga vinthu mwamahara na ŵasambiri ŵake ndipo wakakhazganga vinandi yayi kwa iwo. Mubwezi wake Petrosi wati wamukana pamaso pa ŵanthu, Yesu wakaŵa wakunozgeka kumugowokera. Ndipo pamanyuma, wakamupa Petrosi maudindo ghanyake ghapadera. (Luka 22:32; Yoh. 21:17; Mil. 2:14; 8:14-17; 10:44, 45) Nga umo Yesu wakachitiranga, nase ‘mahara ghithu ghamanyikwe ku ŵanthu wose,’ ndipo tiŵapulikiskenge ŵanyithu.—Fil. 4:5.

 Kuchita vinthu mwamahara kungatovwira kuti tigwirenge ntchito na munthu waliyose mwamtende. Yesu wakachitanga vinthu mwamahara na awo ŵakaŵanga pafupi nayo, mwakuti ŵalwani ŵake ŵakamuchitiranga sanji na kumunena kuti ni “mubwezi wa ŵakusonkheska msonkho na ŵakwananga” nangauli ŵanthu aŵa ndiwo ŵakapulikizganga uthenga wake. (Mat. 11:19) Kasi nase tingamuyezga yayi Yesu mwakuchita vinthu mwamahara na ŵanthu awo ŵakupambana na ise? Mubali Louis uyo wali kuchitapo uteŵeti wakwendakwenda na kuteŵetera pa Beteli, ndipo wagwira ntchito na ŵanthu ŵakupambanapambana wakuti: “Kuteŵetera lumoza na ŵanthu ŵakupambanapambana awo mbambura kufikapo, kuli nga kuzenga chiwumba na malibwe agho ghakupambana ukuru wake. Chifukwa chakuti malibwe ngakupambana, pakukhumbikwa kuŵikapo mtima kuti vinthu vyende makora, ndipo chiwumba chingaŵa chakunyoloka. Naneso nayezga kusintha vinthu vinyake kuti niteŵetenge mwamtende na ŵanji mwakuti mulimo wende makora.” Uku ndiko nkhuwona vinthu mwamahara.

Kasi ni mipata wuli iyo tingalongolera mahara ku ŵanyithu mu mpingo withu? M’pata wakwamba ni para tili lumoza na gulu lithu la uteŵeti. Tinganjira mu upharazgi na ŵabali panji ŵadumbu awo ŵali na maudindo ghanandi gha mu mbumba kuyaniska na ise panji awo tikupambana nawo vyaka. Tingachita vinthu mwamahara para tingachita nawo upharazgi uwo iwo ŵakutemwa kweniso uwo ŵangakwaniska mwakuti nawo ŵakondwenge.

Munthu uyo wakuteŵetera makora na ŵanji wakuŵa ‘wakunozgeka kugaŵana na ŵanyake.’ (1 Tim. 6:18) Apo Yesu wakagwiranga ntchito pamoza na Adada ŵake, wakwenera kuti wakawona kuti Yehova wakabisanga vinthu yayi. Ndipo apo Yehova “wakanozganga machanya,” Yesu ‘wakaŵapo’ ndipo wakasambirangako kwa iyo. (Zinth. 8:27) Pamanyuma, Yesu nayo wakagaŵirangako panji kuti kuphalirako ŵasambiri ŵake ‘vinthu vyose ivyo wakapulika kwa Adada’ ŵake. (Yoh. 15:15) Nase tikwenera kuyezga Yehova mwakuphalirako ŵabali na ŵadumbu vinthu ivyo tasambira. Munthu uyo wakuteŵetera makora na ŵanji wakubisa yayi ivyo wakumanya panji kutondeka kovwira ŵanyake kuti nawo ŵachitenge makora vinthu. M’malo mwake iyo wakukondwa kuphalirako ŵanji vinthu viwemi ivyo wakumanya.

Kweniso tingaphalirako awo tikuteŵetera nawo lumoza mazgu ghakukhozga. Kasi para munthu munyake wawona kuyezgayezga kwithu pakovwira ŵanji ndipo watiwonga, asi tikujipulika makora? Yesu wakaŵaphaliranga awo wakateŵetanga nawo, vinthu viwemi ivyo wakawonangamo mwa iwo. (Yaniskani na Mateyu 25:19-23; Luka 10:17-20.) Nakuti wakachita na kuŵaphalira kuti ‘ŵachitenge milimo yikuru kuluska iyo wakachitanga.’ (Yoh. 14:12) Pa usiku waumaliro pambere wandafwe, wakawonga ŵapositole ŵake ŵakugomezgeka na kuŵaphalira kuti: “Imwe ndimwe mwakhala nane mu viyezgo vyane.” (Luka 22:28) Ghanaghanirani waka umo mazgu agha ghakaŵakhozgera ŵasambiri ŵake na kuŵachiska kuti ŵalimbikire chomene mulimo. Usange nase tiwongenge ŵanji awo tikuteŵetera nawo, ŵaŵenge ŵakukondwa kweniso ŵafiskenge kuchita vinandi.

Mubali munyake zina lake Kayode wakati: “Munthu uyo wakuteŵetera makora na ŵanji wakukhumbikwira kuŵa wakufikapo yayi, kweni wakwenera kupangiska ŵanyake awo wakuteŵeta nawo kuti ŵakondwenge na kupangiska mulimo kuŵa upusu kwa iwo.” Kasi ndimo imwe muliri? Panyake mungachitaso makora kufumba ŵabali na ŵadumbu ŵanyake kuti ŵayowoyepo umo ŵakumuwonerani pa nkhani ya umo mukuchitira pakuteŵetera na ŵanji. Usange ŵayowoya kuti ŵakukondwa kuteŵetera namwe nga umo ŵasambiri ŵa Yesu ŵakakondweranga kuteŵetera nayo, mbwe ndikuti namwe mungayowoya nga umo wakayowoyera mpositole Paulosi kuti: “Tili ŵantchito ŵanyinu kuti muŵe ŵachimwemwe.”—2 Kor. 1:24.