Ne tauloto ne Iesu a uiga kolā ne fai ei a ia fakamuli mo fai te ‵toe fakaakoakoga ‵lei i te ga‵lue tasi mo nisi tino. Ne a mea aoga e maua ne tatou mai te fakaakoakoga a Iesu? Mai te sukesuke faka‵lei ki tena fakaakoakoga, e mafai ei o iloa ne tatou a akoakoga fakavae e tolu kolā e mafai o fesoasoani mai ke fai tatou pelā me ne tino ‵lei i te ga‵lue tasi mo tino. Ka fakamalosi aka ne akoakoga fakavae konei a te ‵tou ‵kau fakatasi mo te fealofani.

A te tino ‵lei i te ga‵lue tasi mo tino e fakatāua ne ia mo te loto maulalo ana soa ga‵lue kae e se fakamatamata. Tenā te kilokiloga loto maulalo ne tauloto ne Iesu mai tena Tamana. E tiga eiloa ko Ieova tokotasi fua e ‵tau o taku me ko te Mafuaga, ne manako a ia ke iloa ne nisi tino a te tulaga tāua o tena Tama e pelā me se tino e ga‵lue tasi mo ia. E lavea ne tatou te mea tenā i pati konei a te Atua: “Ke faite ne tāua a te tagata ki te tā fakatusa.” (Kene. 1:26) Kāti ne fakatāua ne Iesu a te loto maulalo o Ieova i te feitu tenei.—Sala. 18:35.

I tena nofoga i te lalolagi, ne fakaasi atu ne Iesu a te loto maulalo tai ‵pau penā. Kafai e tavae atu mō ana galuega ne fai, ne avatu ne ia a vikiga ki te Tino e ‵tau o maua ne ia. (Male. 10:17, 18;  Ioa. 7:15, 16) Ne galue a Iesu ke fakatumau se va filemu mo ana soko kae ne kilo atu ki a latou e pelā me ne taugasoa i lō ana pologa. (Ioa. 15:15) Ne mulumulu foki ne ia olotou vae ke akoako latou ke loto maulalo. (Ioa. 13:5, 12-14) Kae se mea ‵lei foki ke se fakatāua ne tatou ‵tou manakoga i lō nisi tino. Kafai e “fakaasi atu te āva o te suā tino ki te suā tino” e se manava‵se tatou me ko oi ka maua ne ia a tavaega kae uke atu a galuega ‵lei e mafai o fai.—Loma 12:10.

E iloa foki ne te tino loto maulalo me “ka taunu eiloa a palani e auala i tino fakatonutonu e tokouke.” (Faata. 15:22) Faitalia ‵tou atamai, e ‵tau o masaua ne tatou me e seai se tino e iloa ne ia a mea katoa. Ke oko ki a Iesu ne fai ‵tonu mai a ia me e isi ne mea e se iloa ne ia. (Mata. 24:36) Ne fia iloa foki ne ia a mafaufauga mo lagonaga o ana soko sē ‵lei katoatoa. (Mata. 16:13-16) E se tioa eiloa o se ma‵taku a tino kolā ne ga‵lue tasi mo ia! I se auala tai ‵pau, kafai e talia ne tatou a ‵tou tapula mo manatu o nisi tino, ka fakamalosi aka ne tatou se va filemu mo latou kae “ka taunu eiloa a palani.”

E tāua ‵ki ke fakaakoako a toeaina ki a Iesu i te feitu tenei i te taimi e ga‵lue fakatasi ei latou. E ‵tau o masaua ne latou me e mafai o fesoasoani atu te agaga tapu ki so se toeaina i te potukau toeaina. Kafai e taumafai a toeaina o fai ke mo a ma ma‵taku a nisi tino o fai olotou manatu, ko mafai ei ne latou katoa o fai a fakaikuga kolā ka aoga ki te fakapotopotoga.

A te tino ‵lei i te ga‵lue tasi mo nisi tino, e uiga faigofie i ana faifaiga ki ana soa ga‵lue. A ia e uiga faigofie kae loto malamalama. Ne maua eiloa ne Iesu a avanoaga e uke ke iloa ne ia a te uiga faigofie o tena Tamana. E pelā mo te ugamaiga ne Ieova ke faka‵sao ne ia a tino mai te lotou fakasalaga ki te mate.—Ioa. 3:16.

Ne talia ne Iesu ke ‵fuli tena kilokiloga māfai e ‵tau kae e fetaui ‵lei foki. Masaua la me ne fesoasoani a ia ki te fafine Foinikia faitalia me ne uga atu fua a ia ki te fenua o Isalaelu. (Mata. 15:22-28) Ne uiga faigofie foki a ia e ‵tusa mo mea e mafai ne ana soko o fai. I te taimi ne fakafiti a ia ne Petelu, tena taugasoa pili, i mua o tino katoa, ne toka a Iesu o fakamagalo a ia. Fakamuli ifo, ne tuku atu ne ia ki a Petelu a tiute tāua e uke. (Luka 22:32; Ioa. 21:17; Galu. 2:14; 8:14-17; 10:44, 45) E fakaasi manino mai i te fakaakoakoga a Iesu me e ‵tau o “iloa ne tino katoa i a [tatou] e uiga faigofie” mai te fakaasi atu o te loto malamalama.—Fili. 4:5.

 A te uiga faigofie ka mafai ei o ga‵lue tasi tatou mo te fealofani mo nisi vaegā tino valevale. Ne ‵lei ‵ki a faifaiga a Iesu ki tino i ana tafa telā ne loto masei ‵ki ana fili kae fai atu me i a ia “se taugasoa o tino ‵tae lafoga mo tino agasala” kolā ne ‵saga atu ki tena fekau. (Mata. 11:19) E mata, e mafai o ga‵lue tasi tatou mo nisi tino e pelā mo Iesu? A Louis, se taina telā ne ga‵lue mo tino e tokouke i te galuega faimalaga e pelā foki mo te Peteli, ne fai mai: “Ne taumafai au o fakatusatusa a potukau takitasi ne galue au i ei ki se ‵pui ne faite ki fatu kese‵kese. Mai te fakamafulifuliga o te tukuga o fatu, e mafai loa o fai i ei ke ‵tonu te ‵pui. Ne taumafai foki au o fai a fakama‵fuliga totino ko te mea ke fesoasoani atu ki te faiga o te ‵pui ke ‵tonu.” Ko oko eiloa i te gali o te kilokiloga tenā!

Ko te taimi fea e mafai o fakaasi atu ne tatou ‵tou uiga faigofie i te ‵tou fakapotopotoga? E mafai o fai tatou penā māfai ko ga‵lue i te galuega talai. E mafai o ga‵lue tasi tatou mo tino talai kolā e kese‵kese olotou tiute i te kāiga io me e ‵kese olotou tausaga. E a, e mafai o fakaasi atu ne tatou te uiga faigofie o fai a fakama‵fuliga ki te makini mo te auala e talai ei koe ko te mea ke fiafia kae gali ki a ia te lua galuega talai?

A tino ‵lei i te ga‵lue tasi mo nisi tino e “toka o tufa atu olotou mea.” (1 Timo. 6:18) I te taimi ne ga‵lue fakatasi mo tena Tamana, kāti ne lavea ne Iesu me i a Ieova e se fai ‵funa ana galuega. I te taimi “ne fakatoka ei ne [Ieova] te lagi, ne nofo” atu a Iesu “i konā” kae ne tauloto mai i a ia. (Faata. 8:27) Fakamuli ifo, ne fakaasi atu ne Iesu ki ana soko “a mea katoa kolā ne lagona ne [ia]” mai tena Tamana. (Ioa. 15:15) Kafai e masaua ne tatou te fakaakoakoga tenā, e ‵tau foki mo tatou o toka o tufa atu ‵tou iloa mo ‵tou atamai ki tino e ga‵lue tasi tatou. E tonu, a te tino ‵lei i te ga‵lue tasi mo nisi tino, e se ‵funa ne ia a fakamatalaga aoga ko te mea fua ke pule atu a ia ki nisi tino. Ka fiafia eiloa a ia ke fakaasi atu ki nisi tino ana mea e iloa.

E mafai foki o fakamalosi atu ne tatou a ‵tou soa ga‵lue. Kafai e lavea ne se tino ‵tou taumafaiga, kae fakaasi mai ne ia tena loto fakafetai, e a, ka se fai ei ke fia‵fia tatou? Ne fakaaoga ne Iesu ana taimi ke fai atu ki ana soa ga‵lue a mea ‵lei ne lavea ne ia i a latou. (Fakatusa ki te Mataio 25:19-23; Luka 10:17-20.) Ne fai atu foki a ia ki a latou me ka fai ne latou “a galuega kolā e sili atu i [ana] galuega konei.” (Ioa. 14:12) I te po mai mua o mate, ne fakamālō atu a ia ki ana apositolo fakamaoni, ana muna: “Ko koutou eiloa ne ‵piki ‵mau ki a au i oku tofotofoga.” (Luka 22:28) Mafaufau la ki te lasi o te otia o olotou loto kae fai ei ke gasue‵sue malosi latou! Kafai foki e fakaaoga ne tatou a taimi ke fakamālō atu ki ‵tou soa ga‵lue, ka fia‵fia eiloa latou kae uke foki a galuega e mafai o fai.

“A te tino ‵lei i te ga‵lue tasi mo nisi tino e se ‵tau o ‵lei katoatoa,” ko pati a te taina ko Kayode, “kae e faka‵pisi atu ne ia te fiafia, ko fakafaigofie aka ei te faiga o te galuega mō tino katoa.” E mata, a koe se vaegā soa galue penā? Kaia e se fesilisili atu koe ki nisi taina mo tuagane ke fai mai olotou kilokiloga me ko koe se vaegā tino galue pefea? Kafai e fia‵fia latou o ga‵lue fakatasi mo koe, e pelā eiloa mo te fia‵fia o soko o Iesu ke ga‵lue fakatasi mo ia, ko mafai ei o fai atu koe pelā mo pati a te apositolo ko Paulo: “Matou ne tino e ga‵lue fakatasi mo koutou mō te otou fia‵fia.”—2 Koli. 1:24.