Ta chʼulchan te Jesús la snop te taleliletik ya skʼan ay yuʼun, swenta lek ya x-aʼtej sok te yantike. Ta patil, te kʼalal xtaluk ta Balumilal la yakʼbey yil lekil ejemplo te machʼatik aʼtejik soke. ¿Bin-utʼil ya skoltayotik te ejemplo yuʼune? Ya kiltik oxeb talelil te ya skoltayotik swenta lekil jkoltaywanej ya xkʼootik sok jun ya x-aʼtejotik sok te yantike.

Ay spekʼelil yoʼtan te machʼa ya smulan aʼtel sok te yantik, mukʼ skʼoplal ta yoʼtan sok ma stoy sba. Te Jesús la sta ta ilel te pekʼel yoʼtan te sTate. Manchukme jaʼnax snujpʼ ya yichʼ albeyel Jpaswanej te Jehová, la yal te jun-nax aʼtej sok te sNichʼane. Jaʼ jich ya xchiknaj ta ilel te kʼalal jich la yal te Diose: «Ya jpastic ants-winic te ya jlopʼtay jbahtic a» (Gén. 1:26). Te kʼalal jich la yal te Jehovae, te Jesús la yil te mero pekʼel yoʼtan te sTate (Sal. 18:35).

Te kʼalal xtaluk ta Balumilal te Jesús la yakʼ ta ilel spekʼelil yoʼtan. Kʼalal utsilkʼoptayot, jaʼ la yakʼ ta ichʼel ta mukʼ te Jehová (Mar. 10:17, 18; Juan 7:15, 16). La spas tulan swenta ayuk lamalkʼinal sok te jnopojeletik sok jich la yil bitʼil yamigotak, ma jichuk te bitʼil j-abatetik yuʼun (Juan 15:15). Sok la spoktiklanbey yok swenta ya yakʼbey yil te spekʼelil yoʼtan (Juan 13:5, 12-14). Jich bitʼil la spas te Jesús, ya skʼan mukʼ skʼoplal  ya kiltik te joʼtaktik sok te ma jaʼuk ya jpastik te bin ya skʼan koʼtantike. Teme talel kʼaxel ya kichʼ jbatik ta mukʼ sok te ma jmel koʼtantik yuʼun te machʼa ya yichʼ utsilkʼoptayel, bayal bin ya xlokʼ kuʼuntik-a (Rom. 12:10).

Te machʼa pekʼel yoʼtan jaʼnix jich ya snaʼ te «lec ya xcʼoht ta loqʼuel» te bin ya yichʼ chapel teme ay tsobol jtojobteswaneje (Prov. 15:22). Ma jaʼuk mukʼ skʼoplal teme bayal bin ya jnaʼtik spasel, juluk ta koʼtantik te maʼyuk machʼa spisil bin ya snaʼ. Jaʼnix jich te Jesús la yal ta jamal te ay bin ma snaʼoje (Mat. 24:36). Sok mukʼ skʼoplal ta yoʼtan te bin ya snopik te jnopojeletik yuʼun te jmulawiletike (Mat. 16:13-16). Jaʼ yuʼun kʼax lek la yaʼiy sbaik te machʼatik aʼtejik sok te Jesuse. Jaʼnix jich, teme pekʼel koʼtantik, teme ya jnaʼtik te ay bin ma xjuʼ kuʼuntik spasel sok teme ya jchʼam kaʼiytik te bin ya yalik te yantike, ya x-ayin lamalkʼinal sok «lec ya xcʼoht ta loqʼuel» spisil te bin ya jpastike.

Kʼax mukʼ skʼoplal te ya snopbeyik spekʼelil yoʼtan te Jesús te ancianoetik kʼalal jun-nax ya x-aʼtejik. Ya skʼan ya xjul ta yoʼtanik te chʼul espíritu ya stijbey yoʼtan jtul anciano yuʼun ay bin ya yal te ya skoltay spisil te ancianoetik ta stael ta nopel te bin lek ya spasike. Teme ya yaʼiybey sba skʼopik, yame sta slekilal spisil te congregación.

Lek ta jokinel ta aʼtel te machʼa ma jaʼuk spisil-ora ya yakʼ ta pasel te bin ya yale, sok ya spas-euk te bin ya yal te yantike. Te Jesús bayal buelta la yil te jich stalel te sTate. Jun ejemplo, jaʼ te kʼalal tikunot tal ta yakʼbeyel skolel te ants winiketik te snujpʼ ya xlajik-ae (Juan 3:16).

Te Jesús la spas te bin kʼanbot kʼalal snujpʼ la yile. Juluk ta koʼtantik te la skoltay te fenicia-ants manchukme jaʼnax la yichʼ tikunel tal ta skoltayel te lum Israel (Mat. 15:22-28). Te Jesús maba ilin te kʼalal ay bintik ma juʼ yuʼunik spasel te jnopojeletik yuʼune. Kʼalal mukot ta yoʼtan yuʼun te yamigo Pedro, te Jesús la spasbey perdón sok la yakʼbeyxan mukʼ yaʼtel ta patil (Luc. 22:32; Juan 21:17; Hech. 2:14; 8:14-17; 10:44, 45). Te ejemplo yuʼun Jesús ya yakʼ ta ilel te aynix bin-ora ya skʼan ya jpastik te bin ya yal te yantike yuʼun ya xchiknaj ta ilel te ma spisiluk-ora jaʼ ya jpastik te bin ya jkʼantike (Filip. 4:5).

 Teme ma spisiluk-ora jaʼ ya jpastik te bin ya jkʼantike, jun ya x-aʼtejotik sok te yanyantike. Te Jesús lek la yil sba sok te ants winiketik, jaʼ yuʼun ma lek jajch ta ilel yuʼun te skontratak sok albot te jaʼ yamigotak te jkʼan patanetik sok te jmulawiletik te aʼiybot skʼop yuʼune (Mat. 11:19). ¿Yabal xjuʼ ya jtʼuntik te ejemplo yuʼun Jesús sok te ya x-aʼtejotik sok stseʼelil koʼtantik sok te yantik manchukme ma pajalotik sok? Jtul hermano te Louis sbiil te aʼtej ta circuito sok ta Betel, bayal hermanoetik aʼtejem sok, jich ya yal: «Te jujun tsojb hermanoetik jich ya kil te bitʼil pajkʼ te pasbil ta tonetik te yanyantik yilel sok te yanyantik smukʼule. Teme ya jlebeytik yawil te tonetik ya xjuʼ te tojnax ya yichʼ latsel moel. Jaʼnix jich jpasoj tulan te ya jlekubtes te jtalel swenta jun-nax koʼtantik ya x-aʼtejotik sok jich lek ya xlokʼ-a te aʼtelile». ¡Kʼax lek te bin ya snop te hermanoe!

¿Bin-utʼil ya kakʼtik ta ilel te ya kichʼtik ta wenta te bin ya snopik te hermanoetik ta congregación? Jun ejemplo, jaʼ te kʼalal ya jcholtik skʼop Dios sok hermanoetik te yanyantik yaʼbilalik o yanyantik yilel te skuxlejalik ta sfamiliaik. ¿Yabal xjuʼ ya kichʼtik ta wenta te bin-utʼil ya smulanik scholel skʼop Dios o te jayeb ya xjuʼ yuʼunik spasele?

Lek ta jokinel ta aʼtel te machʼatik ya smulan snojptesel te yantike (1 Tim. 6:18). Kʼalal te Jesús aʼtej sok te sTate, la yil te maʼyuk bin muken ya spase. Kʼalal te Jehová «la schahpan te chʼulchan», tey ay-a te Jesuse sok la snopbey te bin la spase (Prov. 8:27). Ta patil, te Jesús la scholbey te jnopojeletik spisil te bin la yal te sTate (Juan 15:15). Teme ya jtʼunbeytik stalel te Jehová, ya kakʼbeytik snop te kermanotaktik te bin jnopojtikixe, te machʼa ma snojptes te sjoʼtake jaʼnax pʼij ya skuy sba sok mukʼ skʼoplal ya skʼan ya yichʼ ilel. Lek ta jokinel ta aʼtel te machʼa ya smulan yakʼel ta nopel te bin snopojixe.

Jaʼnix jich ya kakʼbeytik yip yoʼtan te kermanotaktike. ¿Mabal jichuk te kʼax tseʼel koʼtantik ya kaʼiy jbatik te kʼalal ay machʼa ya yil te ya jpastik tulan sok ya yalbotik wokol? Te Jesús la slokʼes tiempo ta yalbeyel te bin lek ya spasik te sjoʼtake (paja sok Mateo 25:19-23; Luc. 10:17-20). La yaltiklanbey te «cʼaxem to xan» jich ya spasik-a te bitʼil la spas stukele (Juan 14:12). Sok ta ajkʼabal te nopol ya yichʼix milel-ae la yutsilkʼoptay te jpuk-kʼopetik yuʼune. Jich la yalbey: «Haʼex te machʼa jun awoʼtanic ta jtojol te cʼalal ayon ta contrahinel a» (Luc. 22:28). Ta melel, akʼbotik yip yoʼtanik sok tijbot yoʼtanik te bin albotike. Jaʼnix jich te joʼotik teme ya jlokʼestik tiempo ta yutsilkʼoptayel te kermanotaktike tseʼelxan yoʼtanik sok bayalxan bin lek ya spasik.

Te hermano te Kayode sbiil, jich la yal: «Ma puersauk tojil ants winikat yuʼun ya smulanik te ya sjokinat ta aʼtel te yantik, pero ya xjuʼ ya awakʼbey stseʼelil yoʼtanik sok te maba wokol ya yaʼiyik spasel te yaʼtelike». ¿Jichbal atalel te jaʼate? ¿Jaxan teme ya ajojkʼoybey te hermanoetik teme lek ya yaʼiy sbaik te kʼalal ya sjokinat ta aʼtele? ¿Jichbal ya yaʼiy sbaik te bitʼil la yaʼiy sbaik te jnopojeletik yuʼun te Jesús? Teme jiche, ya xjuʼ ya awal-euk te bin la yal te jpuk-kʼop Pablo: «Jmohlol jbahtic ta aʼtel scuenta yuʼun ayuc stseʼelil awoʼtanic» (2 Cor. 1:24).