Инмын улыкуз, Иисус умой сямъёссэ будэтӥз. Солы луыса, музъем вылын улыкуз, мукетъёсызлы соин ужаны капчи вал. Ойдолэ учкомы, кыӵе адӟем карон возьматӥз Иисус но эскеромы куинь возетъёсты, кудъёсызлы луыса мукетъёсызлы милемын ужаны капчи луоз. Соку вын-агайёсмы, милемын ужакузы, шумпотозы.

Мукетъёсызлы тонэн ужаны капчи мед луоз шуыса, зӥбыт-востэм луоно. Зӥбыт-востэм адями ӵош ужасьёссэ дунъя но аслыз укыр трос саклык уг висъя. Ӵапак талы ик Иисус аслаз Атаезлэсь дышетскиз. Иегова гинэ Кылдытӥсь луэ ке но, солэн потӥз, мукетъёсыз но мед тодозы шуыса, мар кариз Иисус, дуннеез кылдытон понна. Та адӟиське Инмарлэн кылъёсысьтыз: «Асьмелы укшась адямиез кылдытомы» (Ул.-выл. 1:26). Иисуслэн сюлмаз ик пыриз, дыр, Иегова сое зӥбыт-востэмен аслаз ӵош ужасеныз лыдъяз шуыса (Пс. 17:36).

Иисус но, музъем вылын улыкуз, зӥбыт-востэм сямзэ возьматӥз. Куке сое ушъяло вал, со котьку но Иеговаез данъяз, малы ке шуоно со гинэ данэз басьтыны ярамон луэ (Марк 10:17, 18; Иоанн 7:15, 16). Иисус ассэ озьы возиз, дышетскисьёсызлы соин капчи мед луоз шуыса. Со соосты эшъёсыныз лыдъяз, нош ляльчиосын ӧз (Иоанн 15:15). Одӥг пол Иисус дышетскисьёсызлэсь пыдъёссэс но миськиз. Озьы со возьматӥз,  кызьы зӥбыт-востэм сямез возьматоно (Иоанн 13:5, 12—14). Кызьы ми Иисуслэсь адӟем карыны быгатӥськомы? Дунъяно соосты, кинъёс милемын ӵош ужало, но асьмелэсь малпанъёсмес кужмысь ӵектоно ӧвӧл. Ми троссэ лэсьтыны быгатомы, куке мукетъёссэ гажаломы но асьмелы дан ум утчалэ (Рим. 12:10).

Озьы ик зӥбыт-востэм адями вала, «визь-кенеш сётӥсьёс трос ке, со уж быдэсме» шуыса (Мад. 15:22). Кӧня гинэ дыр ӵоже ми кыӵе ке ужен медам выре но кыӵе гинэ быгатонлыкъёсмы милям медам луэ, тодамы возёно: нокин но ваньзэ уг тоды. Иисус но ваньзэ ӧз тоды (Матф. 24:36). Озьы ик пусйыны кулэ: Иисуслэн тодэмез потӥз, мар сярысь малпасько тырбыдэстэм дышетскисьёсыз (Матф. 16:13—16). Соин ик паймонэз ӧвӧл: Иисусэн ӵош ужаны адямиослы шумпотон гинэ вайиз. Милемлы но зӥбыт-востэмен валаны кулэ, ми ваньзэ ум тодӥське шуыса. Соин ик ӵош ужасьёсмылэсь ӵектонъёссэс лыдэ басьтыны кулэ. Соку милям соосын умой кусыпъёсмы луозы, озьы ик ужмы азинлыко луоз.

Кинлы тужгес но адӟем карыны кулэ Иисуслэсь зӥбыт-востэм сямзэ? Тӧроослы. Куке соос кыӵе ке юанэз эскеро, соослы тодазы возёно: святой дух котькудзылэсь мылкыдзэ ӝутыны быгатэ вераны сое, мар умой ужпум кутыны юрттоз. Ужпум кутыкузы, тӧроослы асьсэды озьы возёно, котькудӥз аслэсьтыз малпанзэ капчиен вераны мед быгатоз шуыса. Соку соослэн кутэм ужпумъёссы быдэс кенешлы пайда ваёзы.

Адями, кудӥныз капчи ужаны, ассэ мукетъёсыныз визьмо возе, яке мукетъёслэсь малпанъёссэс лыдэ басьтэ. Иисус трос пол адӟылӥз Иеговалэсь визьмо луэмзэ. Кылсярысь, адямиос сьӧлыкаменызы сэрен кулыны кулэ вал. Озьы ке но Иегова аслэсьтыз Пизэ музъем вылэ ыстӥз, адямиосты кулонлэсь мозмытон понна (Иоанн 3:16).

Ачиз Иисус но мукетъёсызлэсь малпанъёссэс лыдэ басьтӥз, куке со кулэ вал но куке югдур тупа вал. Тодамы ваёмы: Иисус «Израиль юртлэн бырем ыжъёсыз доры гинэ» ыстэмын вал ке но, со хананей кышномуртлы но юрттӥз (Матф. 15:22—28). Озьы ик Иисуслэн визьмо луэмез адӟиськиз соку но, куке со дышетскисьёсызлэсь укыр троссэ ӧз возьма. Со учыре но, куке солэн матысь эшез Пётр ваньмыз азьын солэсь куштӥськиз, со сое простить кариз. Нош берлогес Иисус Пётрлы кулэ луись ужъёс оскиз (Лука 22:32; Иоанн 21:17; Ап. уж. 2:14; 8:14—17; 10:44, 45). Иисуслэн улонэз яркыт возьматэ, кызьы  улонэ пыртоно визь-кенешез, кудӥз гожтэмын Филиппыослы 4:5: «Вань адямиос мед адӟозы, тӥ лякыт сюлэмоесь шуыса».

Озьы ик визьмо луон юрттоз милемлы пӧртэм адямиосын ужаны, милям ужмы азинлыко мед луоз шуыса. Иисус туж капчиен мукетъёсыныз огкыл шедьтӥз. Тушмонъёсыз но вожъяськеменызы сое янгыше уськытъязы, со «выт бичасьёслэн, сьӧлыкоослэн эшсы» луэ шуыса (Матф. 11:19). Быгатомы-а ми но, Иисус сямен, ӵош ужаны соосын, кинъёс милесьтым пӧртэм луо? Луис нимо агай аслаз учырез сярысь вераз. Мыныса-ветлыса ужакуз-тыршыкуз но Вефильын ужакуз, со пӧртэм вын-агайёсын но сузэр-апайёсын ӵош ужаз. Тани мар со вера: «Мукетъёсыныз ӵош ужан шоры мон тазьы учкисько: вераны луоз, ми пӧртэм быдӟалаен изъёс выллем, кудъёсызлэсь вольыт борддор пуктыны луэ. Та ужын мыным изъёсты тупатъяно ӧвӧл, нош тыршоно котькуд излы кулэ интызэ шедьтыны. Мыным асме тупатъяно, мукетъёсызлы монэн ужаны капчи мед луоз но уж медаз дугды шуыса». Тӥ соглаш луоды, дыр, та туж умой амал!

Эшшо кыӵе учыръёсы визьмо луоно? Кылсярысь, куке ми тодытон ужез нуись группаенымы ӵош ужаськомы. Ми быгатомы тодытыны пӧртэм арлыдъем ивортӥсьёсын, озьы ик соосын, кинъёслэн семьязы вань яке кинъёс кузпалъяськемын ӧвӧл. Дась-а ми тупатскыны соосъя, ужан-тыршон соослы тросгес шумпотон мед ваёз шуыса?

Со, кинэн капчи ужаны, мукетъёсызлы мае ке сётыны дась (1 Тим. 6:18). Инмын Атаеныз ӵош ужакуз, Иисус адӟиз, дыр, Иегова солэсь номыре ӧз ваты шуыса. Куке Иегова инмез кылдытӥз, Иисус соин ӵош вал но солэсь дышетскыны быгатӥз (Мад. 8:27). Берлогес Иисус но дышетскисьёсызлы вераз сое, мае Атаезлэсь кылӥз (Иоанн 15:15). Иеговалэсь адӟем карыса, ми быгатӥськомы вын-агайёсты но сузэр-апайёсты дышетыны басьтэм тодон-валанъёсмылы но быгатонлыкъёсмылы. Куддыръя адями мукетъёсызлэсь кулэ луись тодон-валанъёсты ватэ, со интые мукет адямиез медаз пуктэ шуыса. Валамон ини, со, кинэн капчи ужаны, озьы уг лэсьты. Со шумпотыса мукетъёсызлы вера сое, мар юрттоз соослы ужзэс быдэсъяны.

Эшшо шырыт сямо адями ӟеч кылъёссэ уг жаля. Милесьтым сюлэммес шунтэ, куке кин ке но адӟе милесьтым тыршеммес но со понна милемыз тау каре. Иисус ӵош ужасьёсызлэн юн палъёссылы саклыксэ висъяз. (Ӵошатэ Матфейлэсь 25:19—23; Лукалэсь 10:17—20.) Одӥг пол со дышетскисьёсызлы вераз, соин ӵошатыса, соос бадӟымгес ужъёсты лэсьтозы шуыса (Иоанн 14:12). Нош кулон азяз со оскымон апостолъёссэ ушъяз: «Визь сынаськыса улон дыръёсы тӥ Монэн огазьын вал» (Лука 22:28). Иисуслэн кылъёсыз соослэсь мылкыдзэс ӝутӥзы но соосты юнматӥзы, луоз! Та милемлы туж умой адӟем карон. Ми ушъямы ке ӵош ужасьёсмес, соослэн мылкыдзы ӝутскоз но соос трос ужъёсты быдэсъяны дась луозы.

Кайоде нимо агай вераз: «Мукетъёсызлы тонэн ужаны капчи мед луоз шуыса, кулэ ӧвӧл тырбыдэс адями луыны. Туж кулэ мукетъёсызлэсь мылкыдзэс ӝутыны но юрттыны соослы ужакузы асьсэды капчиен шӧдыны». Быгатӥськод-а тон сыӵе ужась луыны? Мылкыдыд вань ке, юа вын-агайёслэсь но сузэр-апайёслэсь, кудъёсыныз ӵош ужаськод, мар соос малпало та пумысен. Милям туж потэ, мукетъёсызлы милемын ужаны капчи мед луоз шуыса, кызьы дышетскисьёслы Иисусэн ужаны капчи вал. Кызьы пусйиз апостол Павел, соку ми сярысь вераны луоз, ми мукетъёсызлы шумпотыса улыны юрттӥськомы шуыса (2 Кор. 1:24).