Yesu wa lilongisa ovituwa okuti noke vio kuatisa oku kala ongangu ku vana va laikele oku likongela laye kupange a linga palo posi. Tu kuatisiwavo ndati longangu ya Yesu? Poku konomuisa ongangu yaye, tu pondola oku sanga olonumbi vitatu vi tu kuatisa oku talavaya ciwa la vakuetu. Olonumbi viaco, vi ka tu kuatisa oku likuata vali omunga la vamanji.

Ekamba liwa liupange lumbombe o kapako upange wa va kuavo vatalavayela kumosi kuenda ka seteka oku lipanda. Ocituwa eci cumbombe, oco Yesu a lilongisa ku Isiaye. Ndaño okuti Yehova eye lika o tukuiwa okuti Ululiki, pole, eye wa yonguile okuti vakuavo va kũlĩha eci catiamẽla kupange wa velapo Omõlaye a linga. Tua ci limbukila kolondaka Suku a popia hati: “Tu lulike omanu vakuesetahãlo lietu.” (Efet. 1:26) Citava okuti Yesu wa sola umbombe Yehova a lekisa.—Osa. 18:35.

Eci Yesu a kala palo posi, wa lekisavo ocituwa caco cumbombe. Eci omanu va enda oku u pandiya omo liupange a linga, eye wa eca esivayo liaco ku Suku. (Mar. 10:17, 18; Yoa. 7:15, 16) Yesu wa enda oku koka ombembua pokati kolondonge viaye kuenda ka va tendele ndapika, pole, wa va kapeleko ndakamba vaye. (Yoa. 15:15) Eye wa sukula olomahi viavo oco a va longise ocituwa coku kala ambombe. (Yoa. 13:5, 12-14) Ndeci ca linga Yesu, etu tu sukilavo oku  lekisa esumbilo ku vana tu talavayela kumosi okuti ka tu pitisa kovaso olonjongole vietu lika. Eci tu ‘lekisa esumbilo ku vakuetu’ okuti ka tu sakalala lomunu o tambula epandiyo, tu pondola oku tẽlisa upange walua.—Va Rom. 12:10.

Omunu embombe o limbukavo okuti, “lolondunguli vialua pa kala onima yiwa.” (Olosap. 15:22) Ndaño tu kuete uloño umue, ale epondolo, tu sukila oku ivaluka okuti lomue omunu o tẽla cosi. Ndaño muẽle Yesu wa limbukilevo okuti, kua kala ovina vimue eye ka kũlĩhĩle. (Mat. 24:36) Eye wa kapelekovo ovina olondonge viaye ka via lipuile via kũlĩhĩle levi va enda oku sima. (Mat. 16:13-16) Eli olio esunga lieci okuti olondonge viaye via enda oku lianja oku kala kumue laye! Cimuamue haico okuti, eci tu lekisa umbombe kuenda tu limbuka okuti ka tua kũlĩhĩle ovina viosi kuenje tu yevelela ovisimĩlo via vakuetu, “pa kala onima yiwa.”

Ci kuete esilivilo okuti akulu vekongelo va sukila oku setukula umbombe wa Yesu, osimbu va talavayela kumosi. Ovo va sukila oku ivaluka okuti espiritu sandu li pondola oku vetiya umue pokati kavo oku popia cimue ci pondola oku kuatisa vakuavo oku nõla onjila ya sunguluka. Nda akulu vekongelo kolohongele viavo va sanda oku koka ombembua okuti vosi va lianja oku sapela, vosi va ka nõla onjila yi kuatisa ekongelo liosi.

Ekamba liwa liupange li lekisa esunguluko poku talavaya la vakuavo. Eye uwa kuenda wa lianja. Ocili okuti Yesu wa kuatele a puluvi awa oku mola esunguluko lia Isiaye. Ndeci, Yehova wa tuma Yesu oco a popele omanu kolofa.—Yoa. 3:16.

Yesu wa lekisa esunguluko eci ca sukiliwile. Ivaluka eci eye a kuatisa ukãi umue wo ko Foinike, ndaño wa tumiwile kepata lia va Isareli. (Mat. 15:22-28) Eye wa lekisavo esunguluko kueci eye a lavokaile kolondonge viaye. Noke liekamba liaye Petulu oku u li kala pokati kowiñi, Yesu wo wecela. Kuenje wa eca ku Petulu ocikele ci kuete esilivilo lialua. (Luka 22:32; Yoa. 21:17; Ovil. 2:14; 8:14-17; 10:44, 45) Ongangu ya Yesu, yi lekisa ciwa okuti ‘esunguluko lietu li kũlĩhĩwa lomanu vosi.’—Va Fil. 4:5.

Oku kala ukuesunguluko, ci ka tu vetiyavo oku kala lombembua lomanu vosi. Yesu wa tata ciwa vana va kala laye, okuti ca vetiya ovanyali vaye oku u lundila okuti “ekamba lia vakuakutambula elisimu kuenda lia vakuakandu” haivo va tava  kesapulo liaye. (Mat. 11:19) Ndeci Yesu, tu pondola oku talavaya ndati lomanu vana va li tepa letu? Louis, manji umue ulume okuti wa endale oku linga ungende walua oco a ende kupange kuenda oku talalayava ko Betele lomanu valua va litepa, wa popia hati: “Nda siata oku sokisa ocimunga locimunga ndi talavaya laco, ndovimano via tungiwa lovawe alitepa. Poku suñamisa oku kapa ovawe, ove o limbuka okuti ocimano ca miuha ciwa. Nda siatavo oku seteka oku linga apongoloko komuenyo wange oco ndi talavaye lombembua lomanu vakuavo.” Eci ocituwa cimue ciwa!

Apuluvi api tu kuete oku lekisa okuti tua sunguluka, poku talavaya la vamanji vekongelo? Tu kuete epuluvi lioku ci linga, eci tu kala kocimunga cetu cupange woku kunda. Pamue tu pondola oku talavaya lakundi va kuete ovikele via litepa letu vioku tekula epata, ale vakuotunga a litepa. Tu likolisilako ndati poku lekisa esunguluko, nda tu yongola oku va kuatisa oco va kuate esanju kupange woku kunda?

Ekamba liwa liupange li lekisa ocituwa coku “li tepela la vakuavo.” (1 Tim. 6:18) Osimbu Yesu a kala oku talavaya kumue la Isiaye, eye wa limbukile okuti Yehova ka lolimbika lacimue. Eci Yehova “a tumbika ovailu,” Yesu ‘opo a kala’ kuenda wa lilongisa laye. (Olosap. 8:27) Noke, Yesu wa sapuila kolondonge viaye “ovina viosi [eye] a yeva” ku Isiaye. (Yoa. 15:15) Locindekaise eci, etu tu sukilavo oku sapuilako vamanji ovina tu tẽla levi tua kũlĩha. Ocili okuti ekamba liwa liupange ka li li selekela ovina viwa a tẽla. Eye o sanjuka oku sapuilako vakuavo ovina viwa eye a tẽla.

Etu tu pondolavo oku pamisa lolondaka vietu vana tu talavayela kumosi. Eci omunu umue a limbuka alikolisilo tu kasi oku linga kuenda oku eca olopandu viutima wosi, ka ci tu sanjuisa hẽ? Yesu wa enda oku sokiya otembo yoku vangula lakamba vaye vupange catiamẽla kovina viwa eye a limbuka kokuavo. (Sokisa la Mateo 25:19-23; Luka 10:17-20) Eye muẽle wa va sapuila hati ovo va laikele oku ‘linga ovopange anene okuti’ waye u sule. (Yoa. 14:12) Vuteke osimbu handi ka file, eye wa pandiya ovapostolo vaye vakuekolelo hati: “Ene wa kali kumue lame kolohali viange.” (Luka 22:28) Sokolola ndomo olondaka via Yesu via sanjuisa ovitima viavo kuenda ndomo va vetiyiwa oku likolisilako oku linga upange! Nda tupa otembo yoku pandiya vana tu talavayela kumosi, ovo va ka sanjuka, loku vokiya ombili yavo kupange.

Manji umue o tukuiwa Kayode wa popia hati, “ekamba liwa liupange ka li sukila oku li pua, pole, eye o kokela vakuavo esanju kuenje upange wenda ciwa.” Anga hẽ kupange, ove wukamba liwa? Momo lie ku pulila umue manji oco a ku sapuile catiamẽla kekalo liove poku talavaya la vakuẽle? Nda va ku sapuila okuti va yeva esanju poku talavaya love, ndeci olondonge via Yesu via sanjukile poku talavaya laye, o pondola oku popia ndeci upostolo Paulu hati: “Tu talavayela kumue lene oco vu kuati esanju.”—2 Va Kor. 1:24.