Jesu yono iruemu re chọrọ uko vwọ dia omamọ rẹ udje vwọ kẹ ihwo re vẹ ọyen gba wian vwẹ otọrakpọna. Mavọ yen avwanre sa vwọ mrẹ erere vwo nẹ udje ri Jesu na rhe? Avwanre da nabọ fuẹrẹn udje rọyen, a sa mrẹ odjekẹ erha re sa chọn avwanre uko vwo nene ihwo efa wian kugbe. Odjekẹ nana cha chọn avwanre uko vwo nene ihwo efa wian kugbe vwọrẹ oyerinkugbe.

Omamọ rẹ ọwiowian rọ vwẹ oma kpotọ vwẹ ẹro ọghanghanre vwo nẹ ihwo re vẹ ọyen gba wian kuẹgbe, ọ je davwan ro vwo djephia nẹ ọyen yovwin vrẹ aye-en. Jesu yono uruemu rẹ omaevwokpotọ tiọyena mie Ọsẹ rọyen. Dede nẹ Jihova ọvo yen ohwo ro muwan re se Ọmemama, ọ je nẹrhẹ ihwo riẹn kpahen owian ọghanghanre rẹ Ọmọ rọyen ruru. A mrẹ ọnana vughe vwẹ ota rẹ Ọghẹnẹ tare: “Gbe jẹ avwanre ma ohwo vwẹ oma rẹ avwanre.” (Jẹn. 1:26) O muẹro nẹ oma vwerhen Jesu kpahen omaevwokpotọ rẹ Ọsẹ rọyen na.—Une 18:35.

Jesu dje uruemu rẹ omaevwokpotọ tiọyena phia ọke rọ vwọ hẹ akpọ na. Ọke re vwo jiro vwọ kẹ obo ro ruru, ọ da vwẹ ujiri na vwọ kẹ ohwo ro muwan rọyen. (Mak 10:17, 18; Jọn 7:15, 16) Jesu wianre mamọ rere ufuoma vwọ dia uvwre rọyen vẹ idibo rọyen, o de ji nẹ ayen kerẹ igbeyan ukperẹ eviẹn. (Jọn 15:15) Ọ tobọ hworhẹ awọ rayen  ro vwo yono ayen kpahen omaevwokpotọ. (Jọn 13:5, 12-14) Ọtiọyena, ofori nẹ a vwẹ ero ọghanghanre vwo ni ihwo re vẹ avwanre gba wian kuẹgbe ukperẹ a vwọ vwẹ ọdavwẹ rẹ avwanre vwọ kobaro kẹ ọ rẹ ayen. E de mu ọghọ kẹ ohwohwo je kẹnoma kẹ a vwọ ro ẹnwan rẹ ohwo re che jiri, ke se ru emu buebun wiẹn.—Rom. 12:10.

Ohwo rọ vwẹ oma kpotọ riẹnre nẹ “ọvwiroro da herọ, emu ko shephiyọ.” (Isẹ 15:22) O toro obo ra riẹnre yẹrẹ obo re rhiẹromrẹ re-e, e jẹ a karophiyọ nẹ o vwo ohworakpọ vuọvo rọ riẹn emu eje-e. Jesu komobọ tobọ tanẹ o vwo erọnvwọn evo rẹ ọyen riẹnre-e. (Mat. 24:36) O ji vwo ọdavwẹ kpahen oborẹ idibo rọyen ri jẹgba na riẹnre vẹ oborẹ ayen roro. (Mat. 16:13-16) Ọna yen sorọ ẹwẹn rẹ idibo rọyen vwo totọ ọke ọ vẹ ayen vwọ herọ! Vwẹ idjerhe vuọvo na, avwanre da karophiyọ nẹ o vwo asan rẹ ẹgba rẹ avwanre teri ji phi uphẹn phiyotọ rẹ ihwo efa vwo toroba iruo na, ọna cha nẹrhẹ ufuoma dia, “emu ko shephiyọ” kidie avwanre eje wian kuẹgbe.

Ọyen obo re ghanre mamọ ekpako vwọ vwẹrokere Jesu ọke ayen da wian kuẹgbe, ofori nẹ ayen karophiyọ nẹ ẹwẹn ọfuafon na sa vwẹ ukẹcha kẹ ekpako eje vwẹ echidiotọ rẹ ekpako na siẹrẹ ayen da davwẹngba rere ayen eje se vwo toroba ota na, kẹ ayen se brorhiẹn ro che fierere vwọ kẹ ukoko na eje.

Omamọ rẹ ọwiowian nene ihwo re vẹ ọyen gba wian kuẹgbe yerẹn vwọrẹ ẹruọ, ọyen ohwo rọ sa nuẹ. Jesu vwo uphẹn sansan rọ vwọ mrẹ ẹruọ rẹ Ọsẹ rọyen djephia. Kerẹ udje, Jihova jiro rhe tan ihworakpọ hirhe vwo nẹ ughwu rẹ ayen rhe ghwu jovwo na.—Jọn 3:16.

Jesu nuẹre vwẹ ọke ro de fo nẹ o ru ọtiọyen. Karophiyọ obo rọ vwẹ ukẹcha kẹ aye ri Fonisha na wan, dede nẹ e jiro kpo uwevwin rẹ Izrẹl. (Mat. 15:22-28) Ọ je vwẹ ẹro abavo vwo ni obo ro rhẹro rọyen vwo miẹ idibo rọyen. Ọke rẹ ugbeyan rọyen rọ vẹ ọyen gba kẹre mamọ Pita vwọ siọn vwẹ azagba nu, Jesu muegbe ro vwo ghovwo. Ọke vwọ yan obaro, ọ da je vwẹ ewian eghanghanre vwọ kẹ. (Luk 22:32; Jọn 21:17; Iruo 2:14; 8:14-17; 10:44, 45) Udje ri Jesu djerephia phẹphẹn nẹ ofori nẹ “ihwo riẹn akoechiro rẹ [avwanre]” womarẹ a vwọ nuẹ.—Fil. 4:5.

 Ẹruọ je cha chọn avwanre uko vwọ dia ohwo rọ nuẹ rere a vẹ kohwo kohwo sa vwọ wiankugbe. Jesu nabọ nene ihwo efa yerin tẹ ẹdia rẹ ivwighrẹn rọyen re yoma da hanrhọ nẹ “ugbeyan rẹ imiarhọghọ kugbe iruimwemwu” re dia ihwo re kerhọ rọyen yẹn o ruẹ. (Mat. 11:19) Kerẹ Jesu avwanre se nene ihwo efa wiankugbe? Louis rọ dia oniọvo ọshare rọ ghwọrọ ọke buebun phiyọ iruo ri kienkin vẹ ẹga ri Bẹtẹl ro nene ihwo sansan ri nẹ asan sansan rhe wiankugbe re da ta: “Me davwẹngba me vwọ vwẹ ẹko vuọvo ri mi nene wiankugbe re vwo dje igbẹhẹn ra reyọ ikuta sansan vwọ bọn. Wọ da rhuẹrẹ ikuta na evo fẹnẹ obo wọ rhuẹre efa phiyọ, igbẹhẹn na kọ sa nabọ riẹn dia. Me je davwẹngba me vwọ nuẹ komobọ rere mi se vwo toroba igbẹhẹn ro che shephiyọ na.” Ọnana ghini omamọ rẹ ẹwẹn!

Ọke vọ yen e se vwo dje ẹwẹn rẹ ọwiankugbe phia vwẹ evun rẹ ukoko rẹ avwanre? E vwo uphẹn ọtiọyena e de nene ẹko rẹ iruo aghwoghwo rẹ avwanre wian kuẹgbe. E se nene ighwoghwota ri vwẹ oghwa rẹ orua rọ fẹnẹre yẹrẹ ihwo ri viẹ avwanre wiankugbe. E se dje ẹruọ phia womarẹ e vwo ruẹ ewene phiyọ oyan vẹ aghwoghwo rẹ avwanre rere a sa vwọ vwẹ ukẹcha kẹ ayen vwọ riavwerhen rẹ iruo rẹ aghwoghwo na vọnvọn?

Omamọ rẹ oruiruo “ru ẹse.” (1 Tim. 6:18) Ọke rẹ Jesu vwo nene Ọsẹ rọyen wian ọ mrẹvughe nẹ Ọsẹ rọyen dia ohwo rọ djavwen evu-n, ọke ri Jihova “vwọ ma obo odjuvwu na” Jesu “etiyin” o ji yono mie. (Isẹ 8:27) Ọke vwọ yan obaro, Jesu ji vuẹ idibo rọyen obo ro nyo miẹ Ọsẹ rọyen. (Jọn 15:15) Vwo nene udje yena, o ji fo nẹ a vuẹ ihwo re vẹ avwanre gba wian kuẹgbe oborẹ a riẹnre vẹ obo re rhiẹromrẹ re. O muẹro nẹ omamọ rẹ ọwiowian cha djavwe ovuẹ ro fori nẹ ọ vwọ phia-a kidie nẹ ọ guọnọre nẹ a vwẹ okpẹro vwo ni ọye-en. Oma cha vwerhọn rọ vwọ vuẹ ihwo efa kpahen omamọ rẹ erọnvwọn ro yono re.

A je sa vuẹ ihwo re vẹ avwanre gba wian kuẹgbe eta rẹ uduephiophiyawọ. Oma vwerhan avwanre siẹrẹ ohwo de vwo oniso rẹ ẹgbaẹdavwọn rẹ avwanre je vuẹ avwanre kpahọn? Jesu vuẹ ihwo re vẹ ọyen gba wiankugbe emu erhuvwu rọ mrẹre vwẹ oma rayen. (Ni Matiu 25:19-23; Luk 10:17-20.) Jesu tobọ vuẹ ayen nẹ ayen che “ru iruo re rhonọ” e rọyen. (Jọn 14:12) Vwẹ ason rọ koba o ki ghwu, o de jiri idibo rọyen re fuevun re vẹ ọyen gba herọ na, ọ da ta: “Ovwan hẹ otu re vẹ ovwẹ gba herọ vwẹ evun rẹ odavwini mẹ.” (Luk 22:28) Vwẹ ẹwẹn roro oborẹ ota rọyen na te ẹwẹn rayen te vẹ obo ro mu ayen vwo ru! Avwanre de jiri ihwo re vẹ avwanre gba wian kuẹgbe, oma cha vwerhen ayen, ọna je cha nẹrhẹ ayen wian kpobarophiyọ.

Oniọvo ọshare ọvo re se Kayode da ta: “Omamọ rẹ ọwiowian dia ohwo rọ gbare-e, ẹkẹvuọvo ọyen ohwo rọ nẹrhẹ oma vwẹrhan ihwo re vẹ ọyen gba wian kuẹgbe, ọ je nẹrhẹ owian dia frae vwọ kẹ ayen.” Oka rẹ ọwiowian ọtiọyen wọ hepha? Wọ sa nọ ihwo re vẹ owẹ gba wian wọ vwọ riẹn oborẹ ayen roro kpahen owẹ vwẹ ẹdia nana? Oma da vwerhen ayen ayen vwo nene uwe wian kirobo rẹ oma vwerhen idibo ri Jesu ayen vwo nene wian, ko wọ sa ta kirobo rẹ ọyinkọn Pọl tare: “Avwanre nene ovwan ruẹ iruo fiki re aghọghọ rẹ ovwan.”—2 Kọr. 1:24.