Quando Gesù l’era nel cielo, el ga imparà a gaver le bele qualità che ghe ocore par laorar insieme con altri. Dopo, quando l’è vegnesto ala Tera, el ga insegnà queste bele qualità ai so dissìpoli. Anca noantri podemo imparar del bel esémpio de Gesù. Adesso, ndaremo parlar sora tre prinsipi che i ne giuta a laorar insieme con altri fradei e a esser pi unidi.

Savemo che sol Geovà l’è el Creador ma anca cossita el ga volesto che i altri i savesse che Gesù lu ga giutà. In Génesi 1: 26, Geovà el ga dito: “Femo el omo ala nostra imàgine.” Con queste parole Gesù el ga capio che Geovà l’è tanto ùmile e el ga anca imparà a esser ùmile. (Sal. 18:35) Anca noantri ghemo de esser ùmili par laorar insieme coi altri. Mostremo questa qualità quando demo valor a quei che i laora insieme con noantri e quando mai volemo farse veder.

Gesù el ga mostrà che l’era tanto ùmile quando l’era qua nela Tera. Par esémpio, quando qualchedun lo lodea, el disea che Geovà el gavea de esser lodà. (Mar. 10:17, 18; Gioani 7:15, 16) Lu el tratea i so dissìpoli come amighi, e nò come schiavi, e el se sforsea che ghen fusse pace intrà de lori. (Gioani 15:15) Lu el ghe ga insegnà a esser ùmili quando el ga lavà i so pié. (Gioani 13:5, 12-14) Come che podemo far come Gesù? Quando femo quel che l’è pi importante par i altri, invesse de quel che  l’è pi importante par noantri. Ghemo anca de dar onor ale altre persone, e no spetar esser lodadi par i laori che femo. Cossita, saremo boni de laorar ben insieme coi altri. — Rom. 12:10.

Fin Gesù el ga dito che no’l savea de tuto. Lu el scoltea i so dissìpoli anca che i fusse imperfeti. (Mat. 16:13-16; 24:36) Par causa de questo, i dissìpoli sempre i parlea quel che i pensea a lu. Come che podemo far come Gesù? Ghemo de ricordarse che no savemo de tuto anca se semo boni de far tanti laori. E, ghemo de scoltar quel che i altri i parla, parché la Bìblia la dise che ghen sarà boni resultadi se scoltemo consili. (Pro. 15:22) Cossita, saremo boni de viver in pace coi altri e de far un bel laoro.

L’è tanto importante che i ansiani i se sforse de esser ùmili come Gesù quando i ga de far dessision insieme. I ansiani i ga de ricordarse che Geovà el pol dar spìrito santo a tuti, e nò sol a un de lori. Alora, nte una riunion dei ansiani, l’è importante che tuti i parle quel che i pensa. Sicuro che quando i ansiani i fà cossita, sarà pi fàcile che i fae bone dessision par la congregassion.

Quando laoremo coi altri, ghemo de acetar far i laori anca come lori i vol o cambiar la maniera de farli parché l’è meio par lori. Gesù el ga visto che Geovà el ga fato cossita tante volte. Par esémpio, par causa del pecato, le persone le meritaria morir, ma Geovà l’è stà misericordioso e el ga dato el so Fiol come sacrifìssio par salvar a tuti. — Gioani 3:16.

Gesù el fea come so Pare, Geovà. Par esémpio, Geovà el gavea mandà Gesù par giutar el so pòpolo, e nò le persone dele altre nassion. Ma, Gesù el ga giutà una dona dela Fenìssia. (Mat. 15:22-28) Gesù no’l spetea che i so dissìpoli i fesse tuto perfeto. Anca se Piero el ga dito che no’l cognossea a Gesù, Gesù lo ga perdonà e ghe ga dato laori tanto importanti par far. (Luc. 22:32; Gioani 21:17; Ati 2:14; 8:14-17; 10:44, 45) El esémpio de Gesù el ne insegna che dele volte ghemo de cambiar la maniera de far le robe e no ghemo  de spetar che i altri i fae tuto perfeto. — Fil. 4:5.

Quando cambiemo la maniera de far le robe parché l’è meio par i altri, podemo laorar in pace con lori. Gesù el fea tanto ben questo che i so nemighi i disea che lu l’era amigo de quei che i tolea su imposti e de pecadori. (Mat. 11:19) Varda el esémpio del fradel Louis. Lu el ga laorà con arquanti fradei difarenti quando el ga servio come superintendente de sircuito e in Betel. Lu el ga dito: “Par mi, laorar con altre persone l’è come far su una taipa con tanti sassi difarenti un del altro. Sicuro che no l’è fàcile far una taipa con sassi cossita. Ma, la resta bela se semo boni de meter cada sasso nel so posto giusto. Anca mi proo cambiar quel che me ocore par laorar in pace con tuti.” Che bel esémpio par noantri far compagno!

Ghemo anca de far quel che l’è meio par i nostri fradei quando semo nela predicassion. Noantri ghemo de proar laorar con tuti i fradei, star atenti a quel che i ga de bisogno e far quel che l’è meio par lori. Par esémpio, podemo fermarse un pochetin quando el fradel che l’è con noantri el ga de bisogno.

Par laorar ben coi altri, ghemo de insegnarghe quel che savemo. (1 Tim. 6:18) Quando Gesù el laorea insieme con Geovà nel cielo, Geovà el volea che el so Fiol el savesse de quel che l’era drio far. Par esémpio, quando Geovà el ga creà i cieli e tute altre robe, Gesù el ga imparà con tuto quel che el ga visto. (Pro. 8:27) Quando Gesù l’era qua nela Tera el ga parlà ai so dissìpoli de tuto quel che el ga imparà de so Pare. (Gioani 15:15) Noantri femo come Geovà quando restemo contenti de insegnar i altri. No ne ocore gaver paura che i ndarà ciapar el nostro laoro e che no gavaremo pi gnente de far.

Sicuro che tuti i resta contenti quando i ze lodadi e ringrassiadi par un laoro che i ga fato. Gesù el ghe piasea tanto lodar i altri. (Vedi anca Mateo 25:19-23; Luca 10:17-20) Par esémpio, Gesù el ga dito ai so dissìpoli che lori i ndaria far robe tanto pi grande che lu. (Gioani 14:12) E, nela note vanti de morir, Gesù el ga dito ai so dissìpoli: “Sì stati valtri che sì restadi dela me banda nele me provassion.” (Luc. 22:28) Proa imaginar come i dissìpoli i se ga sentio quando i ga scoltà quele parole de Gesù. Sicuro che questo ghe ga dato tanto forsa! Anca noantri volemo sforsarse par sempre lodar i fradei che i laora con noantri. Quando femo questo, lori i resta pi contenti e i fà un laoro ancora pi bel.

Varda quel che el fradel Kayode el ga dito: “No te ghè de far tuto perfeto par laorar coi altri. Te toca sol sforsarte par giutarghe a far i so laori e par assarli contenti.” Proa domandar ai fradei e sorele se ghe piase de laorar con ti. Fursi lori i ndarà dir che si, cossita come i dissìpoli ghe piasea de laorar con Gesù. Alora, te podarè dir la medèsima roba che el apòstolo Paolo: “Laoremo insieme a valtri par contribuir cola vostra felicità.” — 2 Cor. 1:24.