Okathi aari awe wiirimu, Yesu aahiixutta mikhalelo saamwiiriha okhala mutthu ooloka ovarana muteko. Nto moottharelana nuumala orwa valaponi, owo aari ntakiheryo nooloka na mutthu oreera ovarana muteko. Vano ninrowa ottottela sai mureerelo ntakiheryo na Yesu? Othokorerya ntakiheryo na Yesu, nnoophwanya malakiheryo mararu anrowa onikhaliherya ovara muteko saana ni atthu akina. Malakiheryo awo anoonikhaliherya okhalana murettele ni wiiwanana vaavo ninvara ahu muteko ni atthu akina.

Mutthu ooloka ovarana muteko toowiiyeviha, onnaavaha efaita ale onivara awe muteko ni khoniphavela ohimmwa. Yesu aahiixutta okhala mutthu oowiiyeviha okathi aavara awe muteko ni Tiithi awe. Nnaamwi Yehova paahi ori ene mutthu onireerela wiihaniwa okhala Mpattuxa, Yehova aaniphavela wira atthu otheene asuwele muteko wa efaita Mwanawe aavanre awe. Hiyo ninniweha eyo ni moolumo a Muluku ani: “Nimùpe mutthu onlattanahu”. (Maph. 1:26) Okathi Yehova alavunle awe moolumo awo, Yesu anoona wira Yehova toowiiyeviha.—Esal. 18:36.

Okathi ari awe valaponi, Yesu aaniiyeviha. Nave vaavo atthu yaamuttottopela aya mwaha wa itthu sooloka aapaka awe, Yesu anvuwiha Muluku. (Mar. 10:17, 18; Yoh. 7:15, 16) Yesu aanivara muteko ni murettele ni awiixutti awe nave aathokorerya ntoko apatthani  awe ohiya ntoko ipottha sawe. (Yoh. 15:15) Yesu aahirapiha inawu sa awiixutti awe wira owiixuttihe efaita eri aya wiiyeviha. (Yoh. 13:5, 12-14) Hiyo nave nihaana ovaha efaita itthu ale ninvara ahu muteko anipaka aya ohiya ohela nipuro noopacerya soophavela sahu. Okathi ‘ninttittimihana ahu mukina ni mukhwa awe’, hiyo khaninxanka nuupuwelaka wira ti pani onrowa ottottopeliwa mwaha wa itthu nipanke ahu. Maana etthu ya faita ovara muteko wa Muluku.—aRom. 12:10.

Mutthu oowiiyeviha, onnisuwela wira: “Yattá anvaha miruku sorera, miteko iyo sinokelela oholo”. (Mir. 15:22) Hata nisuwelaka itthu sinceene, nihaana wuupuwela wira khuuvo pinaatamu onsuwela itthu sotheene. Yesu aanisuwela wira khaasuwela itthu sotheene. (Math. 24:36) Owo aaniphavela osuwela muupuwelelo ni itthu yaasuwela aya awiixutti awe. (Math. 16:13-16) Tthiri awiixutti ale, yaanikhala ootaphuwa ovara hoothe ni Yesu. Mwa enamuna emosaru, vaavo moowiiyeviha ninsuwela ahu wira sookhala itthu nihinwerya ahu opaka, ninniweemererya atthu akina onikhaliherya! Nto eyo enninikhaliherya okhaliha murettele ni ovara itthu sinceene hoothe.

Ti vooloka axitokweene otakiha wiiyeviha wa Yesu okathi anivara aya hoothe. Awo ahaana wuupuwela wira munepa woowaarya wa Muluku pooti omukhaliherya khula mutokweene a nikhuuru nno. Okathi anipaka aya mithukumano saya, axitokweene ahaana okhaliha murette wira khula mutokweene okhaleke ootaphuwa ohimya moonelo awe. Akhala wira anoopaka eyo awo anoopaka soothanla sinrowa okumiherya mireerelo sinceene muloko wotheene.

Mutthu ooloka ovarana muteko, onnaathokorerya saana ale onivara awe muteko. Nave owo onnimananiha osuwela makhalelo aya ni khahiyo oorumexa. Yesu aahiweha ikwaha sinceene moota Tiithi awe onaathokorerya awe saana atthu akina. Mwa ntakiheryo, Yehova aahimuruma Yesu orwa valaponi wira owoopole apinaatamu etampi ni okhwa etthu yeeyo apinaatamu otheene aniphwanela aya.—Yoh. 3:16.

Yesu anaareerela murima atthu akina. Muupuweleke wira owo aahimukhaliherya muthiyana a oFeniisia nnaamwi aarummwale orowa owoopola atthu a wisarayeli. (Math. 15:22-28) Nave Yesu anaareerela murima awiixutti awe. Nuumala Pedru omukhootta Yesu, ohoolo wa atthu anceene, Yesu ahimulevelela ni murima wotheene. Muhoolo mwaya Yesu aahinvaha miritti sinceene murummwa Pedru. (Luka 22:32; Yoh. 21:17; Mit. 2:14; 8:14-17; 10:44, 45) Ntakiheryo na Yesu ninnooniherya oratteene wira ‘wathokorerya wahu akina ohaana osuweliwa ni atthu otheene’. Nto nnoopaka eyo naareerelaka murima.—aFil. 4:5.

Waareerela murima atthu akina, onniniiriha opaka marukunuxo wira nivareke muteko ni khula mutthu. Yesu aanaathokorerya saana atthu otheene waahela muhina awanani awe yaawo yaamoothenrye wira aari “mpatthani a alipa-ooliviha mpoosito ni anatampi” yaawo yeemererya muhupi aalaleya awe. (Math. 11:19) Nto niireke nnoomutakiha Yesu nivaraka muteko saana ni khula mutthu? Munna Louis yoowo aarumeela okathi munceene ntoko mutokweene a esirkwiitu ni aarumeela oBetheli, aahikhalana eparakha ya ovara muteko ni atthu a makhalelo oovirikana. Owo onihimya so: “Ovara muteko ni atthu oottheka ori ntoko oteka epareti ni maluku a munnuwelo wovirikana. Nto okhala wira maluku awo toovirikana, vanitthuneya wiimananiha. Masi epareti eyo pooti okhala yoowookololowa. Miyo, kinniimananiha opaka marukunuxo wira kivareke ni murettele ni atthu akina. Maana opaka eyo ennikhaliherya muteko ovariwa saana”. Tthiri ola moonelo wooloka!

Ninrowa wooniherya sai wira ninnivara saana ni atthu akina mmulokoni mwahu? Hiyo, pooti wooniherya wira ninnivara saana okathi ninlaleerya ahu ni atthu akina. Maana hiyo pooti olaleerya ni anamalaleerya oovirikana, akina a yaawo arina imusi ni arina miritti sikina. Nave pooti ovara ni anamalaleerya arina iyaakha soovirikana. Vaavo nniimananiha ahu opaka marukunuxo a enamuna ni moota woolaleerya, ninnakhaliherya atthu akina ohakalala ni ninnivara saana muteko woolaleerya.

Mutthu ooloka ovarana muteko ‘onikhala oolikane ene wira aaleeleke atthu akina itthu orina awe’. (1 Tim. 6:18) Okathi aavara awe muteko ni Tiithi awe, Yesu aanoona wira Yehova khaavitha etthu. Okathi Yehova aapattuxa awe erimu, Yesu “ahikhala-vo” ni aniixutta etthu. (Mir. 8:27) Okathi arwiiye awe valaponi, Yesu aanihakalala waasuweliha awiixutti awe ‘itthu sotheene amwiiwale awe Tiithi awe’. (Yoh. 15:15) Nuupuwela aka ntakiheryo na Yesu, hiyo nihaana waaleela itthu ninsuwela ahu ale ninvarana ahu muteko. Tthiri mutthu ooloka ovarana muteko, khaarowa waavitherya etthu wala ohaasuweliha etthu ale onivarana awe muteko wira okathi wotheene omakeleke waakhaliherya. Owo onnihakalala waaleela atthu akina itthu sooloka iixuntte awe.

Etthu ekina enrowa onikhaliherya okhala mutthu ooloka onivara muteko ni atthu akina, ori waattottopela ale ninvara ahu muteko. Niireke khamunhakalala vaavo ale anivara nanyu muteko anixukhurela aya itthu sotheene munipaka anyu? Yesu aanavya okathi wira aaleele ale aavarana awe muteko itthu sooloka yaapaka aya. (Mulikanyihe ni Matheyo 25:19-23; Luka 10:17-20.) Nave Yesu aahaaleela wira: ‘Awo yanvara miteko suulupale ovikana miteko aavanre awe’. (Yoh. 14:12) Ohiyu aarowa awe wiiviwa, Yesu aahaattottopela arummwa awe oororomeleya oriki: “Nyuwo khimwaakihiyale hata okathi keehereriwa aka”. (Luka 22:28) Nkahaya muupuwele moota moolumo awo yaavanre aya murima ni owiiriha ophavela ovara muteko! Nave akhala wira hiyo nnimwaavya okathi wira naattottopele ale ninvara nahu muteko, awo anoohakalalaka ni anoovaraka oratteene muteko.

Munna oniihaniwa Kayode ohimmye so: “Mutthu ninvarana ahu muteko khonitthuneya okhala oomalela. Masi owo onnaahakalaliha atthu akina ni tookhweya ovarana muteko”. Nto niireke nyuwo mwa mutthu ntoko owo? Nyuwo pooti waakoha anna ni arokora munivarana anyu muteko wira yooleeleni akhala wira munnikhweya ovarana muteko aahiiso nnaari. Nto akhala wira onnaasivela ovara muteko ni nyuwo ntoko awiixutti a Yesu waasivela aya ovara muteko ni yena, tthiri munoowerya ohimya etthu emosaru aahimmye awe murummwa Paulo oriki: “Hiyo ninnvara muteko vamosa ni nyuwo niirelaka otteeliwa wanyu murima”.—2 aKor. 1:24.