Rango Jesosy tandan̈itry tan̈y, izy efa niezaka hanan̈a toetry han̈ampy izy hahay hiaraka hiasa aminolo. Ke izy koa fa navy tambony tany teto, tianolo mare niaraka niasa taminany. Ke tsara alaintsika tahaka izy. Hahita toro lalan̈a telo han̈ampy atsika hahay hiaraka hiasa aminolo atsika izikoa handiniky modely nambelany Jesosy. Toro lalan̈a aby zen̈y han̈ampy atsika hahay hiray hina amy piaramanompo.

Olo araiky mahay miaraka miasa aminolo zen̈y manetry ten̈a. Man̈isy valerany olo miaraka miasa aminany izy salakady tsy misariky jerinolo aminany. Karaha zen̈y tsarabe toetsain̈y nianarany Jesosy baka tamy Babany. Jehovah zaraiky fo vain̈y kahian̈a Pamôron̈o, kanefa nataony koa raha hahaizanolo asa nataony Zanany. Ahitan̈a zen̈y raha nivolan̈iny tamy Jesosy ty: ‘Alô atsika han̈amboatra olo miramira amintsika.’ (Gen. 1:26) Misaora ravoravo Jesosy naharen̈y zen̈y, fotony hitany baka amy raha nivolan̈iny Jehovah io fa manetry ten̈a ankitin̈y Babany.​—Sal. 18:35.

Nanetry ten̈a koa Jesosy taminizy tambony tany teto. Izikoa fa nisy olo nidera izy tamy raha vitany, Zan̈ahary fo namezany voninahitry. (Mar. 10:17, 18; Jaona 7:15, 16) Nifen̈y koa Jesosy ho tsara fihavanan̈a tamy pianatranany. Nataony kamarady iro fa tsy andevo. (Jaona 15:15) Nisy lera aby nisasàny foeky vitindro, fotony izy tihampianatra iro hanetry ten̈a. (Jaona 13:5, 12-14) Karaha Jesosy, tokony han̈amia voninahitry olo miaraka miasa amintsika atsika, ke hitady raha mahatsara iro alohany raha mahatsara ain̈intsika. Ho maro asa ho vitantsika izikoa atsika ‘mifan̈amia voninahitry.’ Avio atsika tsy tokony han̈anten̈a  oe hisy olo hidera atsika fo isaka atsika mahavita raha.​—Rom. 12:10.

Olo araiky manetry ten̈a zen̈y man̈eky fa ‘ho maro asa ho vita, izikoa maro panolotsain̈y.’ (Ohab. 15:22) Aza adin̈a fa ndray mahay raha be karakory atsika, tsisy olo mahay raha jiaby. Na Jesosy fo nan̈eky fa misy raha tsy hainy. (Mat. 24:36) Ary tiany ho hay koa hevitrindro pianatrany tsy lavorary aby io. (Mat. 16:13-16) Zen̈y nahavy olo niaraka niasa taminany alaizy tsarabe. Karaha zen̈y koa, izikoa ikentsika fa misy limitiny raha haintsika ndreky raha vitantsika, ho moramora amintsika han̈ambela olo hafa han̈aboaka hevitrindro. Ho tsara fihavanan̈a amindro atsika koa man̈ano zen̈y, avio ‘ho maro asa ho vitantsika.’

Antipan̈ahy ny ten̈a mila mahay miaraka miasa. Hahavita zen̈y iro izikoa manetry ten̈a karaha Jesosy. Lera iro mivory, mila alaindro onon̈o fa samby iasàny fan̈ahy masin̈y aby antipan̈ahy tsiaraikiaraiky. Ke zen̈y mahavy araiky amindro hivolan̈a raha mety han̈ampy iro han̈ano fanapahankevitry tsara. Ke izikoa mifen̈y fo iro jiaby man̈ano raha hahavy namandro tsy hisalasala han̈aboaka hevitry, hahavita han̈ano fanapahankevitry mahatsara olo jiaby an̈ivony fiangonan̈a edy iro.

Mahay miaraka miasa aminolo olo araiky izikoa mahay mandanjalanja fa tsy sarôtindraha. Jehovah ny ten̈a mahay mandanjalanja. Hay be fa nahita fomba maro nan̈aboahany Jehovah toetry io i Jesosy. Ohatra, Adama ndreky Eva koa fa nanota, tokony hofoaty taranakandro jiaby. Kanefa, Jehovah mbala nandefa Jesosy fo han̈avotro olombelon̈o amy fahafatesan̈a nilovain̈a io.​—Jaona 3:16.

Nahay nilefitry Jesosy izikoa hitany fa nilain̈a zen̈y. Aleva onon̈o baka! Marin̈y fa tamy tran̈ony Israely fo tany nan̈irahan̈a izy. Kanefa, izikoa fa nisy man̈angy fenisianin̈y nangataka vonjy taminany, nampiany fo izy. (Mat. 15:22-28) Nahay nandanjalanja fo koa Jesosy ke tsy nitaky raha be loatra tamy pianatranany. Kamaradiny Jesosy marikitry i Petera, kanefa nisy fotoan̈a Petera tsy nasaky niaro izy tan̈ivonolo maro. Fa ndray zen̈y, mbala nan̈ambela hadisovan̈anany fo Jesosy. Baka io tafara tatỳ, nan̈ankinany andraikitry maventy koa Petera. (Lioka 22:32; Jaona 21:17; Asa. 2:14; 8:14-17; 10:44, 45) Hita baka tamy modely tsara nambelany Jesosy fa, izikoa atsika tsy sarôtindraha, ‘ho hitanolo jiaby fa atsika mahay mandanjalanja.’​—Fil. 4:5.

 Hahavita hiaraka hiasa aminolo isankarazany atsika izikoa mora ifan̈arahan̈a fa tsy sarôtindraha. Farandraha nahay niaraka niasa taminolo eky Jesosy. Be fô izy iro fahavalonany aby io, ke nataondro fa “namanolo pamory latety ndreky olo panota” izy, fotony nitandren̈y izy tsarabe olo aby zen̈y. (Mat. 11:19) Akory mety hahavy atsika hahay hiaraka hiasa aminolo, karaha nataony Jesosy? Nikoran̈a momba zen̈y Rahalahy Louis. Efa navy piandraikitry faritry tan̈atiny taon̈o maro izy, fa izy iziô betelita ke miaraka miasa aminolo samby amy tany faviany. Karaha ty ho izy: “Nampiran̈iko tamy vato hananganan̈a riba lan̈iany olo miaraka miasa aminaka. Vato aby io samby isany, ao ny madiniky ao ny maventy. Fa izikoa mety tsarabe fandrafetan̈a vato aby io, hilamin̈y sady ho tsara zahan̈a riba io. Tsy maintsy nan̈itsy ten̈a koa zaho izikoa tihahay hiaraka hiasa aminolo. Nanjary vitanay tsara asanay baka tiô.” Tsara toetsain̈inany zen̈y!

Akory koa mety han̈aboahantsika fa mahay miaraka miasa aminolo fiangonan̈a araiky amintsika atsika? Afaka man̈ano zen̈y atsika lera miaraka aminy andiampitory misy atsika. Samby isany taon̈ony pitory tsiaraikiaraiky ao, avio tsy miran̈a andraikitrindro an̈ivony fianakavian̈a. Ke mahay mandanjalanja atsika izikoa somary mandeha moramora na mangala kajo matetitetiky lera miaraka amy pitory sasany, amy zen̈y iro ho ravoravo fo koa fa manompo.

Olo araiky mahay miaraka miasa aminolo zen̈y ‘tia mandrasa’ raha. (1 Tim. 6:18) Jehovah tsy tia manitrisitriky raha, ary raha zen̈y hitany Jesosy taminizy niaraka niasa tamy Babany. Jehovah koa fa ‘niasa lan̈itry’, ‘tiô’ Jesosy sady nianatra raha baka taminany. (Ohab. 8:27) Tafara tatỳ, ravoravo Jesosy nitantara tamy pianatranany ‘raha ren̈iny’ baka tamy Babany. (Jaona 15:15) Mangala tahaka Jehovah atsika izikoa tsy matity fahaizan̈a fa mazoto mandrasa raha haintsika amy piaramanompo. Misy olo kinia tsy man̈ambara raha sasany na manitriky fan̈azavan̈a, ndray zio hainy fa mety han̈ampy olo, fotony mavozo izy tsao hihen̈y fahifan̈anany na ho vôsotro plasinany. Olo mahay miaraka miasa aminolo ndraiky tsy karaha zen̈y, fa ravoravo fo izy mikoran̈a aminolo zay raha tsara hainy.

Atsika koa tsy tokony hisalasala hidera olo miaraka miasa amintsika. Man̈ano akory anao izikoa fa misy olo midera anao nohony raha tsara vitanao? Ravoravo mare anao, tsy zen̈y? Nahita fomba fo Jesosy nideran̈a pianatranazy tamy raha tsara vitandro. (Ampiràn̈a amy Matio 25:19-23; Lioka 10:17-20.) Nivolan̈a lastio izy fa iro mbala ‘han̈ano asa bebeny nataony.’ (Jaona 14:12) Mbala nidera apostolinany tsy nivadiky aby io fo izy, ndray taminy alin̈y talohany nifatesany. Ho izy: ‘Tsy niala zaho foeky anaro tamy fitsapan̈a nahazo zaho.’ (Lioka 22:28) Miniminia hely baka karakory haravoan̈andro koa fa naharen̈y zen̈y! Nanjary nahavita raha tsaratsarany tiô iro izikoa fa nahazo teny fideran̈a. Ke atsika koa mazoto midera olo miaraka miasa amintsika, ho ravoravo mare iro salakady hahavita asa tsara.

Karaha ty nambarany Rahalahy Kayode: “Tsy voatery ho mety aby raha jiaby ataonolo araiky zay izy vo mety koran̈iny mahay miaraka miasa aminolo. Fa miezaka fo izy man̈ano raha hahavy olo miaraka miasa aminany ho ravoravo. Ataony koa raha hahavy iro tsy ho sahiran̈a man̈ano asandro.” Ke asa anao mba man̈ano karaha zen̈y? Nan̈ino tsy an̈ontanianao iro rahalahy na ranabavy miaraka miasa aminao, akory fahitandro anao? Ravoravo pianatrany Jesosy niaraka niasa taminany. Izikoa olo miaraka miasa aminao ravoravo karaha zen̈y koa, hitovy amy raha nivolan̈iny apostoly Paoly ty raha tsapanao. Ho izy: ‘Zahay piaramiasa aminaro, hazahoanaro haravoan̈a.’​—2 Kor. 1:24.