Yesu jwalijiganyisye ndamo syambone syasyamkamuchisye kuŵa chisyasyo chambone mnope kwa ŵandu ŵaŵakamulaga nawo masengo paŵaliji pachilambo chapasi. Ana yaŵatesile Yesuyi mpaka yitukamuchisye chamtuli? Patukulolechesya muŵatendelaga yindu Yesu, mpaka tupate mfundo sitatu syampaka situkamuchisye kamulaga masengo chenene ni ŵane. Mfundo syelesi mpaka situkamuchisye kuti tuŵeje ŵakamulana mnope ni abale ni alongo.

Mundu jwakusakamula masengo chenene ni achimjakwe akusaŵa jwakulinandiya soni akusiŵawona achimjakwe ŵakusakamula nawo masengo kuŵa ŵakusosekwa. Yesu jwalijiganyisye ndamoji kutyochela kwa Atatigwe. Atamose kuti Yehofa ni juŵapanganyisye yindu yosope, nambope jwalakwe jwasakaga kuti ŵane amanyilile masengo gakusosekwa gaŵatendaga Mwanache jwakwe. Yeleyi yikusawonechela m’maloŵe gaŵaŵechete Mlungu gakuti, “Kwende tupanganye ŵandu mchilandanyichisyo chetu.” (Gen. 1:26) Yesu pajwapikene maloŵega jwayimanyi kuti Yehofa ali jwakulinandiya.—Sal. 18:35.

Nombe najo Yesu ali pachilambo chapasi jwalosisye kulinandiya. Ŵandu paŵamyamichilaga pa yindu yatesile, jwalakwe jwamchimbichisyaga Mlungu. (Maliko 10:17, 18; Yoh. 7:15, 16) Yesu jwatendaga yindu yakuti atameje mwamtende ni ŵakulijiganya ŵakwe, soni nganiŵawonaga mpela achikapolo  nambo mpela achimjakwe. (Yoh. 15:15) Jwalakwe jwayikene pakojesya sajo sya ŵakulijiganya ŵakwe pakusaka kwajiganya ndamo ja kulinandiya. (Yoh. 13:5, 12-14) Nombe m’weji tukusosekwa kwawona ŵandu ŵatukusakamula nawo masengo kuŵa ŵakusosekwa mmalo mwakulongosya yakusaka yetu. Patukwachimbichisya ŵane tuchikombola kutenda yejinji nambosoni tuchiŵambala kusaka kuti ŵandu atuyamichileje m’wejo.—Alo. 12:10.

Mundu jwakulinandiya akusamanyililasoni kuti “pati atupile apungu, yakuyiganichisya kuyitenda yikusakomboleka kusyene.” (Mis. 15:22) Chinga tukusamanyilila yindu yejinji chamtuli, tukusasosekwa kukumbuchila kuti pangali mundu jwakusamanyilila yosope. Atamose Yesu jwamanyilile kuti pana yindu yine yanganamanyililaga. (Mat. 24:36) Jwalakwe jwawusyagasoni nganisyo sya ŵakulijignya ŵakwe atamose kuti ŵaliji ŵangali umlama. (Mat. 16:13-16) Yili yangakayikasya kuti ŵandu ŵaŵakamulaga masengo ni Yesu ŵasangalalaga pali ni jwalakwe. Mwakulandana ni yeleyi, patukulingalinga kuŵa ŵakulinandiya soni kumanyililaga malile getu, nambosoni kwapa achimjetu upile wakusala nganisyo syawo, pelepo ‘yakuyiganichisya kuyitenda yichikomboleka kusyene.’

Achakulungwa ŵamumpingo ni ŵakusosekwa mnope kumsyasya Yesu mwakuŵa ŵakulinandiya pakutenda yindu ni achimjawo. Jemanjaji akusosekwa kumbuchila kuti msimu weswela mpaka umlongolele jwamkulungwa jwalijose kuŵecheta yindu yampaka yakamuchisye kusagula yindu mwalunda. Naga pamisongano jakusakola achakulungwaŵa akusalingalinga kupeleka upile kwa jwalijose kuti asale nganisyo syakwe, yichakamuchisya kusagula yindu yampaka yikamuchisye mpingo wosope.

Mundu jwakusakamula masengo chenene ni achimjakwe akusaŵa jwakulitimalika pakukamula masengo ni achimjakwe. Jwalakwe akusaŵa jwakoseka kunda nganisyo sya ŵane. Yesu jwakwete upile wakwawona Atatigwe ali mkulosya ndamo ja kulitimalika. Mwachisyasyo, Yehofa ŵamtumisye Yesu pachilambo chapasi kuti akawombole ŵandu ku chiwa.—Yoh. 3:16.

Yesu jwakundaga nganisyo sya ŵane payasosekwaga kutenda myoyo. Akumbuchile kuti jwalakwe jwamkamuchisye jwamkongwe jwa mtundu wine. Jwatesile yeleyi atamose kuti ŵamtumile kwa ŵandu ŵamtundu wa Isalaeli. (Mat. 15:22-28) Yesu jwalijisoni jwakulitimalika payindu yaŵatendaga ŵakulijiganya ŵakwe. Petulo juŵaliji mjakwe jwapamtima ali amkanile Yesu pameso pa ŵandu, jwalakwe jwaliji jwakoseka kumkululuchila. Panyuma pakwe ŵampele Petulo maudindo gakusosekwa mnope. (Luk. 22:32; Yoh. 21:17; Mase. 2:14; 8:14-17; 10:44, 45)  Chisyasyo cha Yesu chikusatukamuchisya kumanyilila kuti tukusosekwa kutenda yakuti “kulitimalika [kwetu] kuwonecheje pameso pa ŵandu wosope” mwakukunda nganisyo sya ŵane.—Afil. 4:5.

Kulitimalika kuchitulimbikasyasoni kuti tukamuleje masengo mwamtendele ni ŵandu wosope. Nombe Yesu jwatendaga yeleyi, mwamti ŵandu ŵaŵamŵengaga ŵamjimbaga magambo kuti akusakunguluka ni “ŵakomesya msongo ni ŵandu ŵakulemwa” ŵaŵapikanilaga utenga wakwe. (Mat. 11:19) Ana mpaka tukombole kutenda yindu ni ŵandu ŵane mpela muŵatendele Yesu? M’bale Louis, juŵaliji jwakulolela dela kwa ndaŵi jelewu soni juŵakamulaga masengo pa Beteli ni ŵandu ŵandamo syakulekanganalekangana jwatite, “Ŵandu ŵambele ndili mkukamula nawo masengo mbele ndili mkwalandanya ni lipupa lyetaŵe ni maganga gakulekanganalekangana. Mundu jwakutaŵa, mpaka akombole kutaŵa lipupa lyakongoka chenene naga akuchengachenga malo gakuŵika magangago. Unejisoni mbele ndili mkuchenga yindu paumi wangu kuti ngombole kukamula masengo mwamtendele ni ŵane.” Chelechitu chili chisyasyo chambone mnope.

Ana mpaka tulosye chamtuli kuti tuli ŵakulitimalika mumpingo mwetu? Mpaka tulosye ndamoji patukutenda yindu ni ŵandu ŵa mkagulu ketu ka utumiki. Mpaka tujende mu utumiki ni ŵakulalichila ŵakwete maudindo ga mwiŵasa gakulekangana ni getu soni ŵatukulekangana nawo yaka. Ana mpaka tuŵe ŵakoseka kuchenga yindu paumi wetu pakusaka kwakamuchisya jemanjajo kuti asangalaleje ni utumiki?

Mundu jwakusakamula masengo chenene ni ŵane akusaŵa jwakoseka ‘kwagayila ŵane.’ (1 Tim. 6:18) Yesu pajwakamulaga masengo ni Atatigwe jwayiweni kuti Yehofa jwangasisa yindu. Pandaŵi ‘jiŵayitamilichisyaga Mlungu yosope ya kwinani’ Yesu jwaliji ali ‘apali.’ (Mis. 8:27) Kaneko, Yesu jwasalile ŵakulijiganya ŵakwe yindu ‘yajwapikene’ kutyochela kwa Atatigwe. (Yoh. 15:15) M’wejisoni mpaka tumsyasye Yehofa mwakwasalila achimjetu ŵatukusakamula nawo masengo yindu yatukusamanyilila. Mundu jwakusakamula masengo chenene ni achimjakwe jwangalepela kwasalila ŵane yindu yakusamanyilila pakogopa kuti chamsumule udindo. Jwalakwe akusaŵa jwakusangalala kwasalila ŵane yindu yalijiganyisye.

Mpaka twalimbikasyejesoni ŵandu ŵatukusakamula nawo masengo. Kusala yisyene naga mundu jwine atuyamichile pa yindu yambone yatutesile tukusasangalala mnope. Yesu jwapataga ndaŵi jakwayamichila ŵandu ŵaŵakamulaga najo masengo payindu yambone yatesile jemanjajo. (Alole Mateyu 25:19-23; Luka 10:17-20) Jwalakwe jwayikene pakwasalila jemanjajo kuti “tachiyitenda atamose yindu yakupunda” yajwatesile jwalakwejo. (Yoh. 14:12) Pa chilo chakumalisya cha umi wa Yesu pachilambo chapasi, jwalakwe jwasalile ŵandumetume ŵakwe kuti, “Jemanja ni ŵamtemi ni une mu yisawusyo yangu yosope.” (Luk. 22:28) Kusala yisyene, maloŵega gakwayiye mumtima soni galimbikasisye kutendapo kandu. Naga m’wejisoni tukupata ndaŵi ja kwayamichila achimjetu ŵatukusakamula nawo masengo, jemanjajo chachiŵa ŵakusangalala soni chachitenda yejinji.

M’bale jwine lina lyakwe Kayode jwatite, “Mundu jwangasosekwa kuŵa jwamlama kuti akombole kukamula masengo chenene ni achimjakwe. Mmalo mwakwe jwalakwe akusiŵatendekasya achimjakwe kuŵa ŵakusangalala soni akusagatendekasya masengo kuŵa gangasawusya.” Ana yeleyi ni yakusatenda wawojo? Mpaka atende chenene kumwusya m’bale kapena mlongo kuti ŵasalile naga akusakamula masengo chenene ni achimjawo? Naga ŵandu ŵakusakamula nawo masengo akusasangalala kukamula masengo ni wawojo, pelepo wawojo tachiŵecheta maloŵe gakulandana ni gaŵaŵechete ndumetume Paulo gakuti, “Tukukamula namwe masengo kuti mŵe ŵakusangalala.”—2 Akoli. 1:24.