Ho Yesu adu ni ngbangbaturũ yo, ko aima wirika badungu wene asino nga gu nasako ko du ni wene badiasunge. Na ho ko adu ni auru kpotosende, ko angia bawene kpiapai kisusi nga ga gu boro namangisunge wenengai na kura aboro. Waigu rengbe ani ka gbia undo ti ga Yesu kpiapai? Ni wisigo ani gako kpiapai, ani nika bi arugute biata nga gu rengbe ka undo rani ani naamangasunge wenengai na kura aboro. Agi arugute re nika undo rani ani du na bakere kodatise na awirinarani.

Wene badiasunge na umbasitise. Ni naberã gupai nga gani abadiasunge nyakipa yo na ni aˈasadanga ka gbe berã aboro kina kuti tini te. Yesu awiriki gu sino nga ga du na umbasitise re be Bako. Wa vura duhe nga kina Yekova sa rẽ na gupai nga i yambu ko nga Bakusiahe, ko aima ida aboro inipa gu nyanyakipa sunge Wiriko amangihe. Ani narugatirani na gipai re ti gupai Mbori apehe nga: ‘Ani fú boro ni kpiarani.’ (Bam. P. 1:26) Ho Yekova agumba agu afugo re ni, Yesu aima ino gupai nga Yekova na bakere umbasitise.—Tam. 18:35.

Ho Yesu adu ni auru kpotosende, ko ayugu kina gu bangisa umbasitise re. Ho aboro aatambua ko ni tipa agu apai ko amangihe, ko atambua Mbori. (Mk. 10:17, 18; Yo. 7:15, 16) Yesu amangi nyanyaki asadatise ka banda zereda na gako abawiriki na ko aamangapai na yo wa abakure angianga wa amoyambu ya. (Yo. 15:15) Na zavura ko azundu nduyo na ki yugu gupai fuyo nga si naida i du na umbasitise. (Yo. 13:5, 12-14) Wakina Yesu,  si naida ani yugu irisa fu gaani abadiasunge kuba gu nga kaa maa kina agu apai ani nakpinyemuhe mbatayo fu gayo. Ani ima rengba ka manga badungu apai ho ani ayugo irisa ni fu kura aboro na ki zanga ka ida gupai nga kina rani naagbia taarimo ti aregbo dunduko.—Rom. 12:10.

Boro umbasitise naruga tini na gupai nga, “bambiko rimbasa aboro rondo apai ni nyakasinyakasi he wenengaĩ” watadu apai nadu na diabese. (Snz. 15:22) Ka ani vura du vurũ na kina gini inohe watadu tandu apai, si naida ani tingidi gupai nga, boro ho ini apai dunduko te. Zavura Yesu aima ino gupai nga kuraapai kinaho ko aainongo ho ya. (Mt. 24:36) Na berewe a, ko aima du na nyemu gupai gako abawiriki nangia kpakpa aboro aini he watadu aaberãha. (Mt. 16:13-16) Si du nga ndu gupai gako abadiasunge adu ti ni na ngbarago kadu pati ko! Wakina gure a, ho du ani ni na umbasitise na kini tingidi gupai nga ani ainongo apai dunduko te na ho ani adegaturani ni kuti agu aberãpai nga ga kura aboro, ani nika fubee kuti padu na zereda na yo, na wa sa, ‘apai nika du ni nyakasinyakasi he wenengaĩ’ watadu si nika du na diabese.

Si ni nyanyakipa pai gbe fu abaakumba i wiriki ga Yesu umbasitise ho i amangasunge ni wa sa. Si naida i tingidi gupai nga, ziazia toro ima rengba kadu na maapai kurii ai bakumba rogo gu rondo nga ga abaakumba. Na ti regbo agu adunguratise nga ga abaakumba, abaakumba ima rengba ka bi gupai nga ai boro du na ranirii ka fu gani berãpai.

Wene badiasunge na ruru berã ho ni amangasunge ni na kura aboro. Ni akanga kina kuti bangisa berãpai sa te na ni nadia agu aberãpai adia nga ga kura aboro kugume. Si ni rengo nga, Yesu aima du na badungu amomu ka bi Bako ko niyugu ruru berã. Ni kpiapai, Yekova akedi ko ko ye ka batasa ngbatunga aboro dunduko be gu kpio aboro aima rẽ tipaha.—Yo. 3:16.

Yesu anadia gu berãpai adia kugume nga ga kura aboro ho si ani rẽarẽ ni watadu ho si anaaidaha aida ni wo. Oni tingidipa wai ko aundo dee ni boro Kanana wa si avura du vurũ nga i akedi ko fuo ngbatunga Yisaraere. (Mt. 15:22-28) Ko aduadu a na ruru berã nibipa agu apai ko aaidaha be gako abawiriki. Tifuo mbembedi bakurea Yesu nangia Petero aoro rimoko ni dagba aboro, Yesu aima du regerege ka mbupai fuko. Kusa, ko afu nyanyakipa asunge fu Petero. (Rk. 22:32; Yo. 21:17; Amo. 2:14; 8:14-17; 10:44, 45) Ga Yesu kpiapai nayugo gupai furani ziazia nga, si naida aboro ini rani dunduko “ni agu aboro du na ruru  berã” ni dia ani agu aberãpai nga ga kura aboro kugume.—Frp. 4:5, NW.

Du na ruru berã nika undo rani a ani ini wai ka mangasunge rogo zereda yo na ngbatunga aboro dunduko. Yesu amangipai na agu aboro naadu mbembedi na ko ni bawenehe si ki sa gupai nga agu avurako naadu na ngbaduse kitingbanga ko nga ko nga “badia abarogo marã ngbeti na aboro ingapai” mbiko i nangia agu aboro namangipai kuti gako pangbanga. (Mt. 11:19) Wakina Yesu, ya mo ani rengbe ka mangasunge wenengai na agu aboro du kia ti rani? Louis, nga gu ko naima mangasunge na badungu aboro ni bakiakia rogo sunge ta kaa biko adungurati na Betere yo aya: “Mangasunge wa sa na kpakpa aboro wakina me ndugu na agu ambia du bakioho ni bakiakia. Mbiko gupai nga agi ambia re ni bakiakia, si naida na bakere asadatise. Ono ndugu ima rengba kadu ni ruruhe. Mi ima asada ka manga aariapai tipa kaa mangasunge na aboro rogo zereda yo tipa wa ka ani mangi gu sunge re.” Gure nga bawene sino kisusi!

Gini amomu du berani ka yugo gupai nga ani nayugo ruru berã fu agu aboro du rogo gaani dungurati? Ani na momu ka manga gipai re ho du ani ni na gaani badona nga ga tungusapai. Ani ima rengba ka tungusapai na agu abatungusipai du gayo atindiro nga ga gayo aborokporo kia ti gaani watadu du agarã yo kia. Ani ima rengba ka aria gene gaani tungusapai watadu ka manga ngbatunga gu tungusapai i aidaha tipa wa ka i du na bakere ngbarago gene tungusapai yo.

Wene badiasunge regerege ka ‘fu ahe.’ (1 Tim. 6:18) Ho Yesu aamangasunge ni na Bako, ko aima bi gupai nga Yekova aagbunga na apai te. Ho Yekova “anyakasi angbangbaturũ ni,” Yesu “adu kina yo” na ko aima rengba ka wirikapai beko. (Snz. 8:27) Kusa, Yesu adu na ngbarago ka yugo agu apai fu gako abawiriki dũ ko “agi ngba” Bako. (Yo. 15:15) Ani rengbe ka wirika ga Yekova kpiapai ni gumba ani pa agu apai fu awirinarani ani nawirikihe. Nirengo, wene badiasunge aˈasadanga kadu kurii akurani ni zanga ni gumba agu apai fuyo si aida i inihe watadu gu rengbe ka undo yo te. Ni nadu na ngbarago ka gumbapa gu weneapai ni nawirikihe fu kura aboro.

Ani ima rengba a ka ngarasa gaani abadiasunge. Ho boro abi gaani asadatise ni na ki fu tambuahe kina boro ngbaduni yo, ya mo si asanga rani ani du na ngbarago te? Yesu adi regbo ka gumbapa gu weneapai fu gako abadiasunge ko abihe rogoyo yo. (Oni ringbisinga ha na Matayo 25:19-23; Ruka 10:17-20.) Zavura ko agumba gupai fuyo nga, i nika ‘manga apai amanga bakere susi’ ko. (Yo. 14:12) Rogo gu yuru naadu mbata fu ko kpi, ko afu tambuahe fu gako ruru amokedi, ko aya: “Oni nga agu yo naadu na mi ho i aasadi re ni.” (Rk. 22:28) Oni berẽnga pa wai gako afugo angarasi yo na ki sa yo i mangipai! Ka ani di regbo a ka fu tambuahe fu gaani abadiasunge, i nika duadu na bakere ngbarago na i kini mangi asunge ni bakerehe.

Wirina du rimoko nga Kayode aya, “Si aidanga wene badiasunge du ni rengberengbe ni te, ono ni nasa kura aboro i du na ngbarago na ki sa sunge si du taata fu agu aboro ni amangasunge na yo.” Ya mo mo nga gu ngbatunga badiasunge re? Isoke mo ima rengba ka nasa kura awirinamo aKristano tipa i pepa ngbatunga gini boro sunge i aberãha nga mo nga ni? Ka singia i na ngbarago kaa mangasunge na mo wakina wai ga Yesu abawiriki adu na ngbarago kaa mangasunge na ko, mo ima rengba ka gumbapai wakina gu gu mokedi nangia Pauro agumbaha nga: “Ani nga amounda gaoni ngbarago.”—2 Kor. 1:24.