1. Tyen lok acel ma oweko Yecu oporo lulub kore ki romi obedo ngo?

YECU oporo wat ma tye i kin en ki lulub kore ki wat ma tye i kin lakwat ki romine. (Jon 10:14) Lapor meno rwatte. Romi gingeyo lakwatgi dok giwinyo dwanne. Lawot mo acel oneno meno ki wange. En owaco ni: “Luwot ma i gurupwa onongo gimito mako cal romi mogo dok gutemo lwongogi wek gubin cok. Ento romi magi pe gubino botwa pien onongo pe gingeyo dwanwa. Ci latin awobi mo matidi ma lakwat obino; cutcut ma en olwongogi, gulubo kore.”

2-3. (a) Lulub kor Yecu ginyuto nining ni gitye ka winyo dwanne? (b) Gin ango ma wabinyamo i pwony man ki ma lubo?

² Lok pa lawot meno poyo wiwa i kom lok pa Yecu madok i kom romine—nyo lupwonnyene. En owaco ni: “Gibiwinyo dwana.” (Jon 10:16) Ento Yecu tye i polo. Dong watwero winyo dwanne nining? Wawinyo dwanne ka wakwano pwonye dok waketo i tic i kwowa.—Mat. 7:24, 25.

³ I pwony man ki ma lubo-ni, wabineno pwony pa Yecu mogo. Kit ma wabineno kwede, Yecu opwonyo ni omyero wajuk timo jami mogo dok watim jami mukene. Wabicako kong ki neno jami aryo ma lakwat maber-ri ojukowa ni pe watim.

4. Ma lubbe ki Luka 12:29, ngo ma twero weko ‘cwinywa bedo ka tamo lok mapol’?

⁴ Kwan Luka 12:29. Yecu ocuko cwiny lulub kore ni omyero ‘cwinygi pe obed ka tamo lok mapol’ madok i kom jami ma mitte me kom. Wangeyo ni tira pa Yecu kare ducu bedo me ryeko dok tye atir. Wamito ni waket i tic, ento i cawa mukene lubone twero bedo tek. Pingo?

5. Pingo jo mukene gitye ki par pi kit me nongo jami me kom ma mitte?

 ⁵ Jo mukene giromo bedo ki par pi kit ma gibinongo  kwede cam, ginaruka, ki kabedo. Twero bedo ni gikwo i lobo ma pol pa danone lucan dok tek adada me nongo tic. Oromo bedo ni tek adada pigi me nongo cente muromo me gwoko jo me odigi. Gwok nyo ngat ma onongo tiyo me kelo cente paco oto woko, dong jo me ot meno pe gitye ki cente muromo me wilo jami ma mitte. Jo mapol bene gurwenyo ticgi macalo adwogi me two Korona. (Latit. 9:11) Ka jami ma kit meno nyo peko mukene mapat otimme i komwa, watwero lubo tira pa Yecu ma waco ni wajuk bedo ki par nining?

6. Tit kong gin mutimme i kom lakwena Petero i nino mo acel.

⁶ I nino mo acel, lakwena Petero kacel ki lukwena mukene onongo gitye i yeya i Nam me Galilaya ma yamo tye ka kodo magwar ci guneno Yecu tye ka wot i wi pii. Petero owaco ni: “Rwot, ka meno aye in, ci wek abin boti kunnu kun awoto ki i wi pii.” I kare ma Yecu olwonge ni “bin,” Petero oa woko ki i yeya “owoto ki i wi pii obino bot Yecu.” Nen kong gin mutimme i nge meno. “Ka oneno yamo tye ka kodo, ocako doko lwor, onongo bene dong ocako lwiny woko i pii, ci odangnge matek ni, “Rwot, lara do!’” Yecu ocwalo cinge ci olare. Pire tek ni wi opo ni, Petero onongo twero wot i wi pii i kare ma en ociko wange i kom Yecu. Ento i kare ma Petero oneno yamo ma tye ka kodo magwar, ocako bedo ki lworo kacel ki akalakala madit ci ocako lwiny i pii.—Mat. 14:24-31.

7. Watwero nongo pwony ango ki i gin mutimme i kom Petero?

⁷ Watwero nongo pwony ki i gin mutimme i kom Petero. I kare ma Petero oa woko ki i yeya ci onyono nam, en onongo  pe otamo ni lworo bimake dok ebicako lwiny i pii. En onongo mito ni emedde ki wot i wi pii wang ma eo bot Laditte. Ento me ka ciko wange i kom Yecu, en ocako bedo ki par i kare ma oneno yamo ma tye ka kodo magwar. I kare-ni, mitte ni wabed ki niye me kanyo pekkiwa kit ma Petero onongo mito niye me wot i wi pii. Ka pe waciko wangwa i kom Jehovah kacel ki cikkene, niyewa twero doko goro, dok wabibedo calo watye ka lwiny i par. Dong kadi bed watye ki pekki madongo adada, omyero waket tamwa i kom Jehovah ki kerone me konyowa. Watwero timo meno nining?

8. Gin ango ma romo konyowa pe me bedo ki par mukato kare woko pi jami me kom ma mitte?

⁸ Me kaka bedo ki par i kom pekki ma watye kwede, myero wagen Jehovah. Wi myero opo ni, Wonwa ma lamar Jehovah, ocikke ni ebikonyowa me nongo jami me kom ma mitte ka waketo En mukwongo i kwowa. (Mat. 6:32, 33) Kare ducu en cobo cikkene meno. (Nwo. 8:4, 15, 16; Jab. 37:25) Ka Jehovah gwoko winyi ki ature, ci ada pe mitte ni wabed ki par mukato kare i kom gin ma wabicamo nyo wabiruko! (Mat. 6:26-30; Pil. 4:6, 7) Kit macalo mar tugo cwiny lunyodo me miyo jami me kom ma mitte pi lutinogi, mar tugo cwiny Wonwa me polo me miyo jami me kom ma mitte pi jone. Ada, watwero bedo labongo akalakala mo keken ni Jehovah bigwokowa!

9. Ngo ma itwero pwonyone ki i gin mutimme i kwo pa luot mo?

⁹ Nen kong gin mutimme i kwo ma nyuto kit ma Jehovah miniwa kwede jami me kom ma mitte. Omego mo ki dakone ma gitye lupainia gudwoyo mutokagi mutii-ni pi cawa makato acel me gamo lumege mogo ma gibedo i kam pa luring ayela me terogi i cokke. Omego-ni otito ni: “I nge cokke, walwongo lumege-ni me bino gangwa ka cam, ento dok wiwa opo ni pe watye ki cam mo ma watwero miyogi.” Ngo ma onongo dong luot man gitwero timo? Omego-ni omedde ni: “I kare ma wao gang, wanongo kicaa aryo madongo ma opong ki cam i nyim doggolawa. Onongo pe wangeyo anga ma owekogi kenyo. Jehovah ogwokowa.” I nge kare mo, mutoka pa lupainia-ni oballe woko. Onongo gimito mutokagi me cito i tic me pwony; ento, onongo gipe ki cente me yubone. Gutero mutoka-ni i garej me yubo mutoka wek kiwacigi wel cente ma mitte me yubone. I cawa meno laco mo obino i garej ci openyo ni: “Meno mutoka pa anga?” Omego-ni owaco ni meno mutokane dok ni mito ayuba. Laco-ni ogamo ni: “Meno pire pe tek. Dakona tye ka mito kodi mutoka-ni dok i kala man kikome. Imito cente marom mene pi mutoka-ni?” Omego-ni ocato mutokane bot laco-ni, ma oculle cente ma romo wilo mutoka mukene. Omego-ni omoko ni: “Pe mitte ni atittiwu kit ma wawinyo kwede i agikki me nino meno. Waniang ni man pe obedo gin mutimme pire kene. Man obedo cing Jehovah.”

10. Jabuli 37:5 cuko cwinywa nining pe me bedo ki par mukato kare woko pi jami me kom?

¹⁰ Ka wawinyo dwan lakwat maber-ri dok wajuko bedo ki par mukato kare woko pi jami me kom, watwero bedo ki gen ni Jehovah biminiwa. (Kwan Jabuli 37:5; 1 Pet. 5:7) Tam kong i kom pekki ma kiloko i komgi i  paragraf me 5. Twero bedo ni nio wa i kare-ni Jehovah otiyo ki lawi ot nyo ladit tic me konyowa nongo jami ma mitte nino ducu. Ka lawi ot dong  pe twero timo meno nyo warwenyo ticwa woko, Jehovah bigwokowa i yo mukene. Watwero bedo ki gen ni en bigwokowa. Kong dok wanenu gin mukene ma lakwat maber-ri cuko cwinywa me juko timone.

11. Ma lubbe ki Matayo 7:1, 2, Yecu owaco ni wajuk timo gin ango, dok pingo timo meno twero bedo tek?

¹¹ Kwan Matayo 7:1, 2. Yecu onongo ngeyo ni dano gitye ki roc dok pol kare giketo tamgi i kom goro pa luwotgi. Meno aye gin mumiyo en owaco ni: ‘Pe wungol kop i kom jo mukene.’ Waromo tute pe me ngolo kop i kom luye luwotwa. Ento, i kare mukene wanongo ni watimo. Ka wanongo ni i kare mukene wangolo kop i kom jo mukene, gin ango ma omyero watim? Winy dwan Yecu, dok iti matek me juko ngolo kop i kom jo mukene.

12-13. Lwodo lok i kom kit ma Jehovah oneno kwede Kabaka Daudi twero konyowa nining me juko ngolo kop i kom jo mukene?

¹² Watwero nongo adwogi maber ki i lwodo lok i kom lanen pa Jehovah. En keto cwinye i kom jami mabeco ma dano timo. Tam kong i kom gin ma en otimo i kare ma Kabaka Daudi otimo bal madongo. Me labolle, Daudi otimo abor ki Bat-ceba, dok oweko kineko cware woko. (2 Cam. 11:2-4, 14, 15, 24) Macalo adwogine, Daudi kacel ki jo gange gudeno cen, kadi wa monne mukene-ni. (2 Cam. 12:10, 11) I kare mukene doki, Daudi pe onyuto gen i kom Jehovah i kare ma en okwano wel co ma gitye i mony me Icrael, kun onongo Jehovah pe owacce ni otim. Twero bedo ni Daudi otimo man pien onongo tye ki awaka pi dit pa monnye dok pien en onongo geno monnye me gwokke. Adwogine obedo ningo? Luicrael ma welgi romo 70,000 kulu guto ki i two gemo ma opoto!—2 Cam. 24:2-4, 10-15.

¹³ Ka onongo in ibedo i lobo Icrael i kare meno, onongo ibineno Daudi nining? Tika onongo ibitamo ni Jehovah myero pe otimme kica? Jehovah pe otamo kit meno. En oketo cwinye i kom kit ma Daudi obedo lagen pi kare me kwone ducu dok pien ni Daudi ongut i kom balle. Macalo adwogine, Jehovah otimo kica ki Daudi pi bal madongo ma en otimo. Jehovah onongo ngeyo ni Daudi marre matek adada dok mito timo gin ma atir. Cwinyi pe yom ni Lubangawa keto cwinye i kom jami mabeco ma watimo?—1 Luker 9:4; 1 Tekwaro 29:10, 17.

14. Gin ango ma twero konyo Lukricitayo me juko ngolo kop i kom jo mukene?

¹⁴ Kit macalo Jehovah pe keto gingi ni omyero wabed labongo roc, wan bene omyero pe waket gingi i kom jo mukene ni gubed labongo roc dok omyero wanen jami mabeco ma gitimo. Pol kare yot adada me neno goro pa jo mukene ki me ngolo kop i komgi. Ento ngat ma lubo lanen pa Jehovah tiyo maber ki jo mukene kadi bed en ngeyo gorogi. Kidi dayaman ma peya kirudo pe nen maleng, ento ngat maryek ngeyo ni bibedo maleng dok ma welle tek ka kingolo dok kirudo maber. Calo Jehovah ki Yecu, pe myero waket cwinywa i kom roc pa omegiwa ki lumegiwa, ento i kom kitgi mabeco.

15. Pingo tamo i kom kwo ma dano tye ka kato ki iye bikonyowa pe me ngolo kop i komgi?

¹⁵ Medo i kom keto tamwa i kom kit mabeco pa jo mukene, ngo mukene ma twero konyowa pe me ngolo kop i komgi? Tem goyo i wi kit ma kwogi tye kwede. Nen kong labol man. I nino mo acel i ot  pa Lubanga, Yecu oneno dato mo ma lacan ma obolo cente aryo matino i canduk lim. En pe openyo ni: “Pingo dato-ni pe obolo cente makato meno?” Me ka keto cwinye i kom wel cente ma dato-ni omiyo, Yecu otamo i kom tyen lok ma oweko en omiyo ki kit ma kwone tye kwede dok opake pi timo gin maber loyo ma en twero.—Luka 21:1-4.

16. Pwony ango ma itwero nongo ki i gin mutimme i kom Veronica?

¹⁶ Gin mutimme i kom laminwa mo ma nyinge Veronica nyutiwa pingo pire tek adada me tam i kom kit ma kwo pa jo mukene tye kwede. I kacokkegi, onongo tye iye lamego mo ma tye ka gwoko wode macalo lanywal kene. Veronica oye ni: “Ki tung bota, onongo nen calo pe gibedo tye i cokke ki tic me tito kwena kare ducu. Pi tyen lok man, onongo anenogi ki cwiny marac. Ento i nino mo acito i tic me pwony kacel ki lamego-ni. En otitta ni wode tye ki two wic mo manok. En onongo tye ka yelle ki tekke ducu me neno ni gitye ki jami me kom ma mitte dok watgi ki Jehovah tye maber. Pi peko me two pa wode, i kare mogo en onongo cito i cokke pa kacokke mukene.” Veronica owaco ni: “Onongo pe angeyo ni kwone tye matek kit meno. I kare-ni dong amaro dok aworo laminwa-ni matek adada pi tutene me tic pi Jehovah.”

17. Gin ango ma Yakobo 2:8 cuko cwinywa me timone, dok watwero timo meno nining?

 ¹⁷ Gin ango ma omyero watim ka waniang ni wangolo kop i kom laworo lawotwa mo? Wiwa myero opo ni omyero wamar omegiwa. (Kwan Yakobo 2:8.) Mitte bene ni waleg ki cwinywa ducu bot Jehovah, kun wakwaye ni okonywa me juko ngolo kop i kom jo mukene. Waromo tic ma lubbe ki legawa ka wakwanyo kare me lok ki ngat ma wangolo kop i kome-ni. Man twero konyowa me ngeye maber. Watwero penye me tic kacel kwedwa i tic me pwony nyo me bino i pacowa ka cam. Ka wawoto ki ngeyo ominwa maber, waromo tute me lubo lanen pa Jehovah ki Yecu me neno kit mabeco ma en tye kwede. I yo meno, wanyuto ni watye ka winyo dwan lakwat maber me juko ngolo kop i wi dano.

18. Watwero nyuto nining ni watye ka winyo dwan lakwat maber-ri?

¹⁸ Kit macalo romi winyo kwede dwan lakwatgi, lulub kor Yecu giwinyo dwanne. Ka watute pe me bedo ki par mukato kare pi jami me kom dok wajuko ngolo kop i kom jo mukene, Jehovah gin ki Yecu gibigoyo laa i kom tutewa. Kadi bed watye i kin “romi manok” nyo “romi mukene,” omyero wamedde ki winyo dwan lakwat maber. (Luka 12:32; Jon 10:11, 14, 16) I pwony ma lubo man, wabinyamo jami aryo ma Yecu owaco ki lulub kore ni gutim.