1. Иисус ӱренчиктерин нениҥ учун койлорго тӱҥдештирген?

 ИИСУС бойын койчыга тӱҥдештирген, а ӱренчиктерин дезе койлорго (Иоанн 10:14). Бу сӱреен јакшы тӱҥдештирӱ. Нениҥ учун дезе койлор кабырып турган кижиниҥ ӱнин танып ийзе, оныҥ кийнинеҥ барып јат. Бир јорыкчы кижи мынайып куучындаган: «Бис койлорды фотого согуп аларга, олорды јууктап келзин деп кыйгырыжып ийеристе, олор бистӧӧн кӧрбӧди де. Нениҥ учун дезе бистиҥ ӱндерис койлорго таныш эмес болгон. Је оноҥ койчы бала базып келеле, кыйгырып ла ийерде, олор оныҥ јанындӧӧн маҥтажып келген».

2, 3. а) Бис Иисустыҥ ӱнин канайып угадыс? б) Бу јӧрмӧлдӧ лӧ келер јӧрмӧлдӧ нени шӱӱжерис?

² Бу јорыкчыла болгон учуралдаҥ Иисустыҥ: «[Койлорым] Менин ӱнимди угар» — деген сӧстӧрин јакшы оҥдоп јадыс (Иоанн 10:16). Айдарда, Иисустыҥ ӱренчиктери оныҥ айткан сӧстӧрин угар учурлу. Је мындый сурак чыгат: Иисус эмди теҥериде болордо, бис оныҥ ӱнин канайып угарыс? Иисус неге ӱреткенин Агару Бичиктеҥ кычырып, оны јӱрӱмде тузаланып турзаас, угуп јадыс (Матф. 7:24, 25).

³ Бу јӧрмӧлдӧҥ лӧ келер јӧрмӧлдӧҥ Иисус ӱренчиктерин неге ӱреткен деп билип аларыс. Ол ӱренчиктерин ӱредип турала, нени эдерин, нени этпезин јартап  берген. Бу јӧрмӧлдӧ кандый эки немени этпес керек деп шӱӱжип ийерис.

4. Лука 12:29-ла болзо, кижи недеҥ улам санааркай берет?

⁴ Лука 12:29 кычырыгар. Иисус ӱренчиктерине јадын-јӱрӱмге керектӱ не-немеге санааркабазын деген. Бис оҥдоп јадыс, Иисустыҥ берген јӧптӧри тузалу деп, бӱдӱрерге де албаданып јадыс. Је кезикте кӱч болуп турган. Нениҥ учун?

5. Кезик улус недеҥ улам санааркап јат?

 ⁵ Кезик улус нени кийер, нени ичер, нени јиир деп санааркап јат. Нениҥ учун дезе јокту ороондордо јадып турган, COVID-19 улам иш јок арткан, ол эмезе билезин јеткилдеп, азырап турган кижизи божоп калган болордоҥ айабас (Эккл. 9:11). Мындый айалгада болуп калган болзоос, Иисустыҥ: «Санааркабагар» — деген сӧстӧрин канайып бӱдӱрерис?

6. Апостол Пётрла не болгон?

⁶ Бир катап апостол Пётр ла ӧскӧ дӧ апостолдор талайда тыҥ јотконго табарткан. Је кенете олор сууныҥ ӱстиле Иисустыҥ базып келеткенин кӧрӱп ийген. Пётр дезе ого айтты: «Кайракан! Бу Сен болзоҥ, Сеге сууныҥ ӱстиле базып барзын деп, меге јакар». Иисус: «Кел» — деди. Пётр «кемедеҥ чыгып... сууныҥ ӱстиле базып ийди». Оноҥ ары не болгон? «Пётр тыҥ салкын согуп турганын кӧрӧлӧ, коркый берди, сууга чӧҥӱп, кыйгырды: — „Кайракан, мени аргадазаҥ!“». Бу ла ӧйдӧ Иисус оны суунаҥ чыгара  тартып алган. Ајардаар ба, Пётр Иисустӧӧн кӧрӧлӧ, сууныҥ ӱстиле базып барадала канайтпаган да. Је тура кӧрӱп ле ийерде, коркый береле, чӧҥӱп баштаган (Матф. 14:24—31).

7. Бис Пётрдыҥ учуралынаҥ неге ӱренер аргалу?

⁷ Бу учуралдаҥ бис неге ӱренер аргалу? Пётр кеменеҥ тӱжеле, сууныҥ ӱстиле барып јадала, јотконноҥ коркыйла чӧҥӱп баштаар деп сананбаган да. Бӱгӱнги кӱнде бисти сууныҥ ӱстиле бассын деп, кем де айтпас болбой. Је кезикте бистиҥ кажыбыста ла јоткондый уур-кӱчтер болордоҥ айабас. Андый ӧйдӧ, бис Иегова ла оныҥ Сӧзин туураладып ийзеес, Пётр чилеп коркый береле, кӧгӱс јанынаҥ чӧҥӱп баштаарыс. Айдарда, бӱткенис ченелетен кандый да кӱчтер боло берзе, Иегова болужар деп ундыбас керек. Оныҥ учун мындый сурак чыгат: кӧгӱс јанынаҥ чӧҥӧ бербеске нени эдер керек?

8. Ӧйинеҥ ӧткӱре кӧп санааркабаска биске не болужар?

⁸ Бис Иеговага иженип турзаас, ӧйинеҥ ӧткӱре санааркабай јадыс. Иеговага иженип, Каандыктыҥ ижин баштапкы јерге тургузып турзаас, Иегова бисти керектӱ немеле јеткилдеер деп, Агару Бичикте айдылат (Матф. 6:32, 33). Ол берген сӧзин јаантайын бӱдӱрип јат (Јаҥ. т. 8:4, 15, 16; Сар. 37:25). Кудай куштарды да азырап турарда, «јалаҥныҥ ӧлӧҥин» де јӱзӱн-јӱӱр кийиндирип турарда, бисти де курсак-тамак, кийим-тудум јок артыргыспас (Матф. 6:26—30; Флп. 4:6, 7). Канайып ада-энелер балдарын сӱӱп кичееп јат, анайып ла теҥериде Адабыс ишчилерин сӱӱп, олорго бастыра јанынаҥ болужып јат. Айдарда, Иегова бисти бир де артыргыспас деп алаҥзыбактар.

9. Бир эш-нӧкӧрлӧрдӧ кандый учуралдар болгон?

⁹ Бир катап пионерлер болуп турган эш-нӧкӧрлӧрдӧ мындый учурал болгон. Олор эски машиназыла јуунга барып јадала, эки эјени отургызып алган. А ол экӱ дезе ӧскӧ јердеҥ качып келген улустыҥ лагеринде јадып турган болгон. Јуунныҥ кийнинеҥ бу эш-нӧкӧрлӧр байагы эки эјени чайладарга айылына кычырган. Је јолой барып јадала, айылда курсак јок болгоны санаазына кирип келген. Андый да болзо, олор айылына једип келерде, курсакту эки јаан пакет турган. Ол ака айткан: «Бу курсакты кем экелгенин бис билбезис, је мында јарт ла Иегованыҥ болужын кӧрдис». Кийнинде бу эш-нӧкӧрлӧрдӧ база бир кайкамчылу учурал болгон. Олордыҥ машиназы ӱрелип каларда, оны јазаарга, канча кире акча чыгарын билбей турала, олор байа эски машиназын машина јазап турган јерге апаргандар. Олор ондо турганча ла бир кижи базып келеле: «Бу кемниҥ машиназы?» — деп сураган. А мен дезе: «Мениҥ. Мен оны јазадып аларга тургам» — дееримде,— ол: «Меге башказы јок. Мениҥ ӱйиме мындый ла ӧҥдӱ, шак ла мындый машина керек» — деген. Анайып олор эски машиназын садып ийеле, ӧскӧ машина алган. Бу ака айткан: «Биске бу сыйды Иегова этти деп, бир де алаҥзу болбогон».

10. Сарын 37:5-теги сӧстӧр кӱч айалгада санааркабаска биске канайып болужар?

¹⁰ Иисустыҥ: «Санааркабагар» — деген јакарузын ундыбай турзаас, кӱч  айалгада Иегова бистерге болужып ийер деп, бир де алаҥзыбазыс (Сарын 37:5 кычырыгар; 1 Пётр 5:7). Мындый айалгалардыҥ кезиги бу јӧрмӧлдиҥ  5-чи абзацында айдылган. Темдектезе слер канай азыранар, ишти кайдаҥ табар деп сананып турган болзоор, Иегова слерге кандый ла арганы тӱҥей ле табып берер. Ол слерди бир де артыргыспас. Је эмди Иисус база нени этпезин дегенин кӧрӱп ийектер.

11. Матфей 7:1, 2-де айдылганыла, биске база нени этпес керек? Бу јӧпти бӱдӱрерге биске нениҥ учун кӱч болордоҥ айабас?

¹¹ Матфей 7:1, 2 кычырыгар. Иисус улусты бийик кеминде эмезинеҥ улам бой-бойыныҥ јӱк ле јаманын кӧрӱп турган деп билер болгон. Оныҥ да учун ол улуска: «Јаргылабагар» — деп јакылта берген. Биске бой-бойысты јамандабас керек деп оҥдоп јадыс, је кезикте мындый јаман кылык тӱҥей ле чыгып келет. Андый айалгалар боло берзе, Иисустыҥ јӧбин ундыбай, бой-бойысты јаргылабаска албаданарыс.

12, 13. Давидке Иегованыҥ кӧрӱми кандый болгон, бис мынаҥ неге ӱренедис?

¹² Бис Иегованаҥ кӧп немеге ӱренер аргалу. Иегова озо ло баштап бистиҥ јакшы кылык-јаҥдарысты ајаруга алып јат. Мыны бис Давид каанла болгон учуралдаҥ кӧрӱп јадыс. Ол коркышту јаман кинчектер эткен: Вирсавияла кожо конгон, оныҥ обӧӧниниҥ, Урияныҥ, ӧлӱминде бурулу болгон (2 Сам. 11:2—4, 14, 15, 24). Мынаҥ улам оныҥ бойына да, билезине де јаан каршу јеткен (2 Сам. 12:10, 11). А база бир тушта, Давид Иегованаҥ сурабай ла јадып, Израильдиҥ черӱзиниҥ тоозын алган. Мыны ол бойыныҥ черӱзиниҥ кӱчтӱзин кӧрӱп, бийиркене береле эткен болор. Давидтиҥ бу јаан јастыразынаҥ улам 70000 кижи божогон! (2 Сам. 24:1—4, 10—15).

¹³ Слер ол ӧйдӧ јаткан болзоор, Давид керегинде нени сананар эдеер? Иегова оныҥ јаманын таштабас деп сананараар ба? Је Иегова анайда сананбаган. Карын оныҥ јаманын таштаган. Нениҥ учун дезе Давидтиҥ мынаҥ озо эткен јакшы керектерин ундыбаган. Анайда ок Давид кинчегин акту јӱрегинеҥ алынган. Кудай оныҥ сӱӱжин, оны бир де ачындырбай јӱрерге турганын билген. Иегова озо ло баштап бистиҥ јакшы кылык-јаҥдарысты ајаруга алып турганы кандый јакшы! (1 Каан. 9:4; 1 Лет. 29:10, 17).

14. Улусты јаргылабаска биске не болужар?

¹⁴ Иегова бисти јастыразы јок јӱрӱп болбос деп, оҥдоп јат. Айдарда, биске де улустыҥ јакшы кылык-јаҥдарын кӧрӧргӧ албаданар керек. Нениҥ учун дезе улустыҥ јаманын кӧрӧргӧ албаданбазаҥ да, ол бойы ла кӧрӱнип келер. Је кӧгӱзи тереҥ кижи улустыҥ јакшы јандарын кӧрӱп, олорло эптӱ-јӧптӱ јӱрет. Аруталбаган алмазты тегин кижи таныбай јат. Је оныла иштенип турган кижи оноҥ кандый бриллиант болорын оҥдоп ийет. Ол оны тоозын-тобрагынаҥ арутап, јараштыра јылтырап турар баалу-чуулу бриллиант эдип салат. Анайып ла биске Иегова ла Иисустаҥ тем алып, улустыҥ јастыраларын кӧрӱп, олорды јаргылаардыҥ ордына, карын  јакшы кылык-јаҥдарын кӧрӱп турарга албаданар керек.

15. Улусты јаргылабаска биске база не болужар?

¹⁵ Улусты јаргылабаска биске база не болужар? Кажы ла кижиниҥ айалгазы башка деп, ундыбай турактар. Бир катап Иисус јокту тул ӱй кижиниҥ кайырчакка эки болчок акча салганына ајару эткен. Иисус ол ӱй кижинеҥ: «Не ас салдыҥ?» — деп сурабаган. Ол бу ӱй кижиниҥ канча кире акча салганына эмес, је акчаны кандый кӱӱниле салганына ајару эткен. Нениҥ учун дезе ол бу ӱй кижиниҥ айалгазын оҥдоп турган болгон. Анайып, ол оны ончо улустаҥ кӧп салды деп мактаган (Лука 21:1—4).

16. Вероника эјениҥ учуралынаҥ бис неге ӱренедис?

¹⁶ Вероника эјеле болгон учуралды кӧрӱп ийектер. Ол јуунда бир эјени јуундарды божодып турган ла јарлаар ишке каа-јаада туружып турган деп санаган. Је бир катап ол экӱ јарлап баргылаган. Кӧрӧр болзо, оныҥ уулы аутизмле ооруп турган. Мынаҥ улам олор кезикте ӧскӧ јуундӧӧн баргылап турган болтыр. «Бу эјениҥ айалгазын билип алган кийнинде, мен оны баалап ла тооп баштагам. Нениҥ учун дезе ол Иеговага иштеерге, уулына Иегованы  сӱӱрге болужарга, ондый тыҥ албаданып јат» — деп, Вероника эје айдат.

17. Иаков 2:8-те кандый јасак бичилген? Бис оны канайып бӱдӱрерис?

¹⁷ Бис улус керегинде јаман сананып турганысты бойыстаҥ кӧрӱп ийзеес нени эдерис? Агару Бичиктеги «бойыҥды сӱӱгеҥдий, јуугыҥды сӱӱп јӱр» деген јасакты ундыбас керек. (Иаков 2:8 кычырыгар.) Мындый кылык-јаҥнаҥ айрыларга, Иегованаҥ болуш сураарыс. Анайда ок ол кижиле јууктада таныжарга албаданзаас јакшы болор. Темдектезе, оныла кожо јарлаар ишке барарыс эмезе айылыстӧӧн чайга кычырарыс. Анайып, бис Иегова ла Иисус чылап, кижиниҥ јакшы кылык-јаҥына ајару эдерис. Мынаҥ дезе Иисустыҥ: «Јаргылабагар» — деген јакылтазын бӱдӱрип турганыс кӧрӱнер.

18. Иисустыҥ сӧзин угуп турганыс деп недеҥ кӧрӱнет?

¹⁸ Канайып койлор кӱдӱчизиниҥ ӱнин танып ийет, анайып ла бис Иисустыҥ ӱнин угуп јадыс. Ол бисти «санааркабазын» ла «јаргылабазын» деп айткан. Биске бу јакылталарды бӱдӱрерге албаданар керек. Ол тушта бис Иегованыҥ ла Иисустыҥ болужыла бу јакылталарды бӱдӱрип ийерис. Бис «ас ӱӱрде» бе, эмезе ӧскӧ койлордыҥ тоозында ба, оноҥ ло ары Иисустыҥ сӧзин угуп јӱректер (Лука 12:32; Иоанн 10:11, 14, 16). А келер јӧрмӧлдӧ дезе Иисус ӱренчиктерине нени этсин деп айтканын кӧрӧрис.