1. ¿Chemu Jesu trürümbi tañi pu inaneketu obicha mu?

 TATI pu ufisa quimüñmafingün tañi pastor ñi dungun, feimu inaquefingün. Feimu Jesús trürümfi tañi pu discipulo ufisa meu. Jesús taiñ pastor reque felei, feimu iñchiñ inaquefiyiñ (Juan 10:14). Peaiñ ñi rupan quiñe huentru. Fei feipi: “Quiñe rupa ayüfun ñi entufotoafiel pu ufisa. Ayüfun tañi quisutu fülconpayal iñche meu, huelu femlaingün, quimüñmanoeteu am iñche tañi dungun. Fei acurumei quiñe pichi pastor, fei dungueyu fei inafemfingün”.

2, 3. 1) Jesu tañi pu inaneketu, ¿chumngechi allkütukingün? 2) ¿Chem kimpoaiñ bewla ka küpalechi kimelün mu?

² Ñi rupan feitachi huentru, acordalqueiñmu Jesús tañi feipin. Jesús feipi tañi pu discipulo, ufisa reque felelu, ñi allcütuñmayaeteu tañi dungun (Juan 10:16, TNM). Huelu Jesús mülei huenu mu, ¿chumngechi allcütuñmayafuiñ tañi dungun? Inaniefiel mu iñchiñ taiñ quimeltueteu ta Jesús, allcütuñmaquefiyiñ reque tañi dungun (Mat. 7:24, 25).

³ Feitachi troquiñ mu ca tati cüpalelu mu, peafiyiñ quiñeque dungu taiñ enseñaeteu Jesús. Jesús feipieiñmu chem dungu taiñ femnoal ca chem dungu taiñ femal. Hunelu mu, tüfachi troquiñ mu peaiñ epu dungu taiñ femnoal.

4. Lucas 12:29 tañi eipin, ¿chemu bill rakiduamküleabüiñ?

⁴ (Papeltunge Lucas 12:29). Jesús feipifi tañi pu discipulo ñi rume raquiduamcülenoal tañi duamnieel mu engün. Müna cümei ñi feipin ta Jesús. Inafiliyiñ, rumel quelluafeiñmu. Iñchiñ ayüqueiñ ñi inayafiel Jesús tañi feipin,  huelu quiñeque mu cüdaungeafui. ¿Chemu? Peafiyiñ.

5. ¿Chemu kiñeke peñi ka lamngen bill rakiduamküleki?

 ⁵ Quiñeque taiñ pu peñi, pu lamngen rume raquiduamcülequei chem tañi iyal, chem tañi tucual, ca ñi nieal quiñe ruca. Quiñeque engün chi tañi pais mu, rume pofrelei ta che ca cüdautuqueingün chi ñi peal cüdau. Quiñeque engün cüdauqueingün, huelu pichin plata cullingequei tañi cüdau mu. Feimu cüdautuqueingün ñi eluafiel tañi pu che ñi duamnieel. Cafei quiñeque familia mu lai chi ti ngen ruca, feimu nielaingün inei tañi eluaeteu ñi duamnieel. Ca ti COVID-19 ñi duam mu, quiñeque taiñ pu peñi pu lamngen niehuelaingün chi cüdau (Ecl. 9:11). Femngechi dungu mu rupaliyiñ, ¿chumafuiñ taiñ rume raquiduamcülenoal? Peafiyiñ.

6. Ngütrambinge Pedro ñi upan.

⁶ Quiñe rupa amulelu engün quiñe farcu meu Pedro ca caquelu apostol, quiñe cürüftucu mahun ruparumei. Fei perumefingün ta Jesús ñi trecalen huente co meu. Fei Pedro feipifi ta Jesús: ‘Ñidol, rüf eimingelmi, huercünge iñche ñi trecalen amual huente co tañi puhual ta eimi meu’. “Cüpange mai” pieyu ta Jesús. Fei Pedro tripai ti farcu meu ca eluhui “ñi trecayal huente co ñi puhual ta Jesús meu”. Fei, ¿chem rupai? Pedro leliniehuelafi ta Jesús. Raquiduamcülequefui ti cürüftucu mahun mu müten, feimu llicai. Petu ñamnaglu ti co meu, huirari: “Ñidol montulen”. Fei “Jesús nüñmafi ñi cuhu ta Pedro” ca montulfi. Loncontucuaiñ: Pedro puquintuniefilu ta Jesús, amulefui ta huente co meu. Huelu puquintuniefilu ti cürüftucu mahun,  llicai, quimlafui tañi chumal. Fei ñamnagi co meu (Mat. 14:24-31).

7. Pedro ñi upan, ¿chem kimelelkeiñmu?

⁷ ¿Chem quimeltueiñmu ñi rupan ta Pedro? Ellaca mu Pedro tripalu ti farcu meu, raquiduamlafui rume tañi llicalcayaeteu ti cürüftucu mahun. Trecalefui müten huente co meu, ayüquefui ñi puhual ta Jesús meu. Huelu, ¿chumi Pedro? Leliniehuelafi ta Jesús. Re raquiduamcülequefui tañi huesa rupayal ti cürüftucu mahun mu. Pedro duamniefui ñi maneluhual Jesús mu ñi trecayal huente co meu. Famülque mu, iñchiñ miyaulayaiñ huente co meu, huelu ca duamnieiñ taiñ maneluhual Jehová mu taiñ chaftuafiel chem huesaque dungu rume. Huelu re raquiduamcüleliyiñ müten taiñ huesa rupan mu ca famentufiliyiñ ta Jehová ca taiñ feipicünueteu, maneluuhuelayafuiñ quisu meu. Loncontucuaiñ: chem huesaque dungu rume rupafuliyiñ, raquiduamcüleaiñ Jehová taiñ quelluaeteu. ¿Chumngechi femafuiñ tüfa? Peafiyiñ.

8. Newe nienoliiñ taiñ duamnel, ¿chem kelluabeiñmu (ingkaabeiñmu) taiñ bill rakiduamkülenool?

⁸ Raquiduamcülelayaiñ taiñ huesa rupaquen, doi mai maneluhuaiñ Jehová mu. Loncontucuaiñ: Jehová feipicünui doyümniefiliyiñ taiñ mongen mu, eluaiñmu com taiñ duamnieel (Mat. 6:32, 33). Jehová rumel eluqueiñmu taiñ duamnieel (Deut. 8:4, 15, 16; Sal. 37:25). Jehová cuidaniequefi pu pichique üñüm ca ti rayülechi flor, ¿chemu am cuidanoafeteu iñchiñ? Maneluucüleafuiñ llemai Jehová mu taiñ eluaeteu iyael ca tacun (Mat. 6:26-30; Filip. 4:6, 7). Chumngechi quiñe cüme chau fente tañi piuqueyefiel mu tañi pichiqueche eluquefi tañi duamnieel, ca femngechi taiñ huenu Chau Jehová fente taiñ piuqueyenieteu mu, cuidaqueiñmu. Felei llemai, piuquentucuaiñ Jehová taiñ quisucünunoaeteu.

9. Kiñe kurewen ñi upan, ¿chem kimeltueiñmu?

⁹ Peaiñ ñi rupan quiñe curehuen precursorngelu. Tañi rupan pengeli Jehová eluqueiñmu taiñ duamnieel. Feitachi curehuen doi quiñe hora mu amuingu tañi auto mu ñi yemeafiel quiñeque lamngen, fei ñi yeafiel ta trahun mu. Ti peñi feipi: “Deulu ti trahun, mangelfiyu feichi pu lamngen ñi amual tayu ruca mu. Fei inaduamiyu tayu nienon chem no rume tayu eluafiel”. Fei ¿chem rupai? Ti peñi feipi: “Puutulu iñchiu tayu ruca mu, inafül puerta mu epu fütraque carpa iyael mülerquei. Quimlafuyu inei tayu eleleteu. Feimu feipiafuyu Jehová tayu cuidaqueteu”. Rupachi antü mu, feichi curehuen ñi auto huesañmahui. Tañi auto rume quelluquefeyu engu ñi amuldungual, huelu nielafuingu plata engu ñi cüme eltuafiel. Fei engu yefingu tañi auto quiñe taller mu, tañi ramtual engu chumten plata tañi cofrangeal. Fei acui quiñe huentru ca feipi: “¿Inei am tañi auto chi?”. Fei ti peñi feipi: “Iñche tañi auto, huelu huesañmahui”. Tati huentru feipieyu: “¿Chumte fali am chi? Iñche ngillañmayayu. Tañi domo ayüfi tüfachi auto ca ayüfi ti color”. Feitachi peñi fendelfi tañi auto tati huentru. Rume cüme cullingei ñi ca auto ñi ngillatual. Ti peñi feipi: “Afchi antü mu, rume ayüucülefuyu. Quisu ngünehun mu femngechi dungu rupalayafuyu. Jehová mai quellueiñmu”.

10. Salmo 37:5 tañi eipin, ¿chumngechi kellukeiñmu taiñ maneluwkebel Jewba mu?

¹⁰ Allcütufiliyiñ Jesús tañi feipin ca  fente raquiduamcülenoliyiñ taiñ duamnieel mu, maneluucüleafuiñ Jehová taiñ cuidayaeteu (papeltunge Salmo 37:5; 1 Ped. 5:7). Chumngechi taiñ ngüneduampeel  parrafo quechu mu, rupayafuiñ huesaque dungu. Fachantü nieiñ chi quiñe cüdau cam inei taiñ eluaeteu taiñ duamnieel, femngechi cuidaqueiñmu Jehová. Huelu cüpalechi antü meu, niehuenoliyiñ rume cüdau cam ti ngen ruca pepi cüdauhuenole, Jehová chumai rume taiñ eluaeteu taiñ duamnieel. Quelluaiñmu llemai. Feula ca peaiñ ca dungu taiñ feipieteu Jesús taiñ femnoal.

11. ¿Chem eipi Jesu, Mateo 7:1, 2 mu? ¿Chemu küdawngeabüi?

¹¹ (Papeltunge Mateo 7:1, 2, TNM). Jesús quimniefui taiñ culpafe chengen, feimu inaduamnieñmaquefiyiñ caquelu che ñi huelulcauquen. Feimu Jesús feipieiñmu taiñ juzgachenoal. Huelu eluucüleliyiñ rume taiñ juzganoafiel taiñ pu peñi ca pu lamngen, quiñeque mu cüdautuafuiñ taiñ femnoal. Fei, ¿chumafuiñ? Allcütuafiyiñ ta Jesús ca eluucüleaiñ taiñ juzgachenoal.

12, 13. Jewba bill kintukaduamchekelai, ¿chumngechi inayentuabüiñ?

¹² Raquiduamliyiñ Jehová tañi cüme femqueel mu, müna quelluafeiñmu. Jehová ngüneduamquefi pu che tañi cüme piuquengen ca tañi cüme femquen. Femngechi raquiduamfui ta David mu, huesa culpalu rume. ¿Chem huesaque dungu femi ta David? Cudumfi ta Bat-Seba ca langümfalfi tañi füta (2 Sam. 11:2-4, 14, 15, 24). Tañi huesa femün mu ta David, quisutu huesalcahui, ca huesalcafi tañi pu che ca tañi pu domo (2 Sam. 12:10, 11). Ca rupa David raquifalfi tati pu soltau, huelu Jehová feipilaeyu tañi femal. David maneluufui chi tañi fentren soltau tañi niefel mu, huelu mai maneluulai ta Jehová mu. ¿Chum tripai ñi femün ta David? 70 mil israelche peno lai quiñe huesa cutran mu (2 Sam. 24:1-4, 10-15).

¹³ Iñchiñ mülefuliyiñ David ñi antü meu, ¿chem raquiduamafuiñ quisu meu? ¿Juzgayafuiñ? “Jehová ngelai tañi perdonayaeteu” piafuiñ. Huelu femngechi raquiduamlai Jehová. Jehová raquiduami ta David mu tañi serfiqueteu com tañi mongen mu, ca quimniefui David ñi repentiutun. Feimu perdonafi tañi huesa femfel. Jehová ca quimniefui David tañi piuqueyenieteu, ca ñi eluucülequen ñi femal Jehová tañi ayüqueel. Jehová ngüneduamqueiñmu taiñ cüme piuquengen mu ca taiñ cüme femquen mu. ¿Mañumcülenoafulu am iñchiñ? (1 Rey. 9:4; 1 Crón. 29:10, 17).

14. ¿Chumabüiñ taiñ kintukaduamchenoal?

¹⁴ Jehová raquiduamquelai taiñ huelulcaunoal. Fei ca femngechi iñchiñ raquiduamlayaiñ ñi huelulcaunoal taiñ pu peñi ca pu lamngen. Doi mai raquiduamaiñ tañi cüme piuquengen ca tañi cüme femquen. Iñchiñ cüdautuquelaiñ taiñ peñmayafiel ñi huesa femün taiñ pu peñi ca pu lamngen, feimu juzgafemquefiyiñ. Huelu inayentufiliyiñ Jehová tañi cüme femqueel, cüme yehuaiñ llemai taiñ pu peñi ca pu lamngen, huelulcaule rume engün. Raquiduamnge tüfa. Quiñe diamante petu catrüngenole ca liftungenole, müte adcülelayafui. Huelu ti quim chengelu raquiduamquelai ñi müte adcülenon. Doi mai raquiduamcülei liftungele chi diamante, huilüfcülehueai. Fei ca femngechi iñchiñ Jehová ca Jesús reque, raquiduamlayaiñ ñi  huelulcauquen caquelu che. Doi mai raquiduamcüleaiñ ñi cüme piuquengen engün ca tañi cüme femquen meu.

15. ¿Chemu kümi taiñ rakiduamtuneal pu peñi ka pu lamngen ñi upan mu?

¹⁵ ¿Ca chem femafuiñ taiñ juzganoafiel taiñ pu peñi ca pu lamngen? Raquiduamafuiñ chem ñi rupaquen tañi mongen mu engün. Raquiduamaiñ ñi femün ta Jesús. Quiñe antü mülefulu ti ngillatuhue ruca mu, pefi quiñe pofre lantu domo tucufilu epu pichique moneda cheu ñi elngequem plata. Jesús ramtuulai rume: “¿Chumngelu am doi plata tucul-lai ti lantu domo?”. Doi mai raquiduami chemu tañi femün ca chem tañi rupaquen tañi mongen mu. Feimu saquifi tañi hulün mu com tañi niefel (Luc. 21:1-4).

16. ¿Chem kimelelkeiñmu Veronica ñi upan?

¹⁶ Rume falin-ngei taiñ raquiduamal chem ñi rupaquen caquelu pu che ñi mongen mu. Peafiyiñ ñi rupan taiñ lamngen Verónica. Tañi trahunche mu, mülefui quiñe lamngen quisutu tremümniefui tañi huentru püñeñ. Verónica feipi: “Quisu engu nehue amuquelafui ta trahun mu, ca nehue tripaquelafui tañi amuldungual engu. Feimu huesa raquiduamaquefiñ. Huelu quiñe antü, tripayu  tayu amuldungual ti lamngen iñchiu. Fütra nütramcayu. Fei nütramcaeneu tañi autismo cutran ñi nieel tañi huentru püñeñ. Rume cüdauquefui ñi eluafiel tañi duamnieel tañi püñeñ, ca ñi quelluafiel tañi cüme hueniyeafiel Jehová. Quiñeque mu tañi cutrancülen mu tañi püñeñ, mülefui ñi amual ca trahun mu. Raquiduamquelafun rume fente tañi huesa rupamequen tañi lamngen. Tañi lamngen chumquei rume ñi poyenieafiel Jehová. Feimu doi yamnierpufiñ ca piuqueyerpufiñ”.

17. Santiago 2:8, ¿chem eipieiñmu ka chumngechi mupituabüiñ?

¹⁷ ¿Chumafuiñ ngüneduamliyiñ taiñ juzgamequefiel quiñeque peñi ca lamngen? Ngoimanentulayaiñ taiñ piuqueyeafiel taiñ pu peñi ca pu lamngen (papeltunge Santiago 2:8). ¿Ca chumafuiñ? Llellipuafiyiñ Jehová taiñ quelluaeteu, femngechi taiñ juzgahuenoafiel taiñ pu peñi ca pu lamngen. Ca eluhuaiñ taiñ fülcontuafiel ca nütramcayafiel engün. Femliyiñ, doi cüme quimürpuafiyiñ. Cafei compañtuafuiñ taiñ amuldungual, ca mangelafuiñ tañi imeal taiñ ruca mu. Doi quimnierpufiliyiñ taiñ pu peñi ca pu lamngen, inaduamüñmayafiyiñ tañi cüme chengen engün ca tañi cüme serfiquefiel ta Jehová. Femngechi inayentuafiyiñ Jehová ca Jesús tañi femün. Cafei inayafiyiñ taiñ feipieteu Jesús taiñ juzgachenoal.

18. ¿Chumabüiñ taiñ allkütuabel Jesu?

¹⁸ Chumngechi pu ufisa allcüñmafingün tañi pastor ñi dungun, iñchiñ ca femngechi allcüñmaquefiyiñ Jesús tañi dungun. Fente raquiduamcülenoliyiñ taiñ duamnieel mu ca juzgachenoliyiñ, Jehová ca Jesús cümelcayaiñmu. Coneltuliyiñ ti “pichi quechan ufisa” mu cam coneltuliyiñ ti pu “caquelu ufisa” mu, com iñchiñ allcütuñmayafiyiñ ca inayafiyiñ Jesús tañi dungun (Luc. 12:32; Juan 10:11, 14, 16). Cüpalechi troquiñ mu, peaiñ epu dungu taiñ feipieteu Jesús taiñ femal.