1. Нәјә ҝөрә Иса шаҝирдләри илә мүнасибәтини чобан гојун мүнасибәтинә бәнзәтмишди?

 ИСА МӘСИҺ шаҝирдләри илә арасындакы мүнасибәти чобанла гојун арасындакы мүнасибәтә бәнзәтмишди (Јәһ. 10:14). Бу чох дүзҝүн бәнзәтмәдир. Гојунлар чобанларынын сәсини таныјыр вә онун дедијинә ујғун һәрәкәт едирләр. Бир сәјјаһ буну өз ҝөзләри илә ҝөрмүшдү. О дејир: «Биз гојунларын шәклини чәкмәк истәјирдик. Онлары һа сәсләдик ки, бизә јахынлашсынлар, јахын ҝәлмәдиләр, чүнки сәсимизи танымырдылар. Сонра балаҹа бир чобан ҝәлди. Бу оғлан гојунлары сәсләјән кими дәрһал онун ардынҹа ҝетдиләр».

2, 3. а) Исанын давамчылары онун сәсинә гулаг асдыгларыны неҹә ҝөстәрирләр? б) Бу вә нөвбәти мәгаләдә нә һагда данышаҹағыг?

² Бу сәјјаһын ҝөрдүкләри Исанын шаҝирдләри илә бағлы дедикләрини хатырладыр. Иса демишди: «Онлар сәсимә гулаг асаҹаг» (Јәһ. 10:16). Иса ҝөјдә олдуғу һалда, биз онун сәсинә неҹә гулаг аса биләрик? Ағамызын сәсинә гулаг асдығымызы ҝөстәрмәјин әсас јолу тәлимләринә риајәт етмәкдир (Мәт. 7:24, 25).

³ Бу вә нөвбәти мәгаләдә Исанын бәзи тәлимләрини арашдыраҹағыг. Иса өјрәдирди ки, елә шејләр вар, онлары етмәјә сон гојмалыјыг, елә шејләр вар ки, онлары етмәлијик. Әввәла, ҝәлин ҝөрәк Чобанымыз Иса Мәсиһ һансы ики шеји етмәјә сон гојмағымызы бујурур.

4. Лука 12:29 ајәсинә әсасән, «һәддиндән артыг нараһат олмағы»мыза нә сәбәб ола биләр?

⁴ Лука 12:29 ајәсини охујун. Иса Мәсиһ давамчыларыны  тәшвиг етмишди ки, мадди еһтијаҹларына ҝөрә һәддиндән артыг нараһат олмағы гуртарсынлар. Биз билирик ки, Исанын бүтүн мәсләһәтләри доғру вә һикмәтлидир. Биз онун дедикләринә әмәл етмәк истәјирик. Амма бәзән бу, чәтин олур. Ҝөрәсән, нәјә ҝөрә?

5. Нәјә ҝөрә бәзиләри мадди тәләбатларына ҝөрә нараһат олурлар?

 ⁵ Бәзиләри фикир чәкир ки, нә јејәҹәкләр, нә ҝејинәҹәкләр, һарада галаҹаглар. Ола билсин, онлар касыб өлкәдә јашајырлар, аиләни ҝүҹ-бәла илә доландырырлар. Јахуд да аиләни доландыран шәхс һәјатыны итириб вә аилә мадди сыхынты чәкир. Бәлкә дә, COVID-19 пандемијасы нәтиҹәсиндә кимсә ишини вә ја ҝәлир јерини итириб (Ваиз 9:11). Ола билсин, сиз дә бу вә ја диҝәр чәтинликләрлә үзләширсиниз. Бәс бу һалда Исанын «нараһат олмағы гуртарын» әмринә неҹә риајәт едә биләрсиниз?

6. Бутрусла баш верән бир һадисәни тәсвир един.

⁶ Бир дәфә Бутрус вә диҝәр һәвариләр Ҹәлилә дәнизиндә гајыгда оларкән фыртына гопмушду. Бирдән онлар сујун үстү илә јеријән Исаны ҝөрдүләр. Бутрус она деди: «Аға, әҝәр сәнсәнсә, мәнә әмр ет сујун үстү илә јанына ҝәлим». Иса она «ҝәл» деди. Бутрус гајыгдан чыхыб сујун үстү илә Исаја тәрәф ҝетди. Амма ҝөрүн нә баш верир: «[О,] фыртынаја баханда горхуб батмаға башлады вә: “Аға, мәни хилас ет!” — дејә гышгырды». Иса әлини узадыб ону хилас етди. Мараглыдыр ки, Бутрус диггәтини Исаја ҹәмләдији мүддәтдә ҹошгун дәнизин үзәри илә ҝәзә билирди, амма Бутрус диггәтини фыртынаја ҹәмләјәндә горхуја  вә шүбһәјә гапылды вә батмаға башлады (Мәт. 14:24—31).

7. Һәвари Бутрусла баш верәнләрдән һансы дәрси ҝөтүрә биләрик?

⁷ Бутрусла баш верәнләрдән өзүмүзә дәрс ҝөтүрә биләрик. Бутрус гајыгдан чыхыб дәнизә ајағыны гојанда онун мәгсәди Ағасынын јанына гәдәр сујун үстү илә јеримәк иди. О дүшүнмүрдү ки, диггәти јајынаҹаг вә батмаға башлајаҹаг. Амма әфсуслар олсун ки, фыртына ону мәгсәдиндән јајындырды. Дүздүр, биз бу ҝүн сујун үзәри илә ҝәзә билмирик, амма иман сынаглары илә үзләширик. Әҝәр диггәтимиз Јеһовадан вә Онун вәдләриндән јајынса, биз руһани ҹәһәтдән батмаға башлајаҹағыг. Һәјатымызда нә ҹүр фыртына гопурса гопсун, даима ағлымызда Јеһова олмалыдыр вә Онун бизә көмәк етмәјә гадир олдуғуну унутмамалыјыг. Бунун үчүн нә едә биләрик?

8. Мадди шејләрә ҝөрә һәддән артыг нараһат олмамаға бизә нә көмәк едәҹәк?

⁸ Нараһатчылығымызы Јеһоваја етибарла әвәз етмәлијик. Гајғыкеш Атамыз Јеһова вәд едир ки, руһани шејләри һәјатымызда һәр шејдән үстүн тутсаг, мадди еһтијаҹларымызы тәмин едәҹәк (Мәт. 6:32, 33). Јеһова бу вәдини һәмишә јеринә јетириб (Ган. 8:4, 15, 16; Зәб. 37:25). Јеһованын нәзәриндән һеч гушлар, ҝүлләр белә јајынмыр, о ки галды биз. Буна ҝөрә дә нә јејәҹәјимизә, нә ҝејинәҹәјимизә ҝөрә биз гәтијјән нараһат олмамалыјыг! (Мәт. 6:26—30; Филип. 4:6, 7). Өвладыны севдији үчүн валидејн чалышыр ки, ушағынын башынын үстүндә дамы олсун, аҹ-сусуз, әјин-башсыз галмасын. Ејнилә, Јеһова да халгына севҝисиндән ирәли ҝәләрәк онларын мадди тәләбатларыны тәмин едир. Бәли, әмин ола биләрик ки, Јеһова әлини үстүмүздән чәкмәјәҹәк!

9. Бир әр-арвадын һадисәсиндән нә өјрәндиниз?

⁹ Ҝәлин бир һадисәјә бахаг вә ҝөрәк Јеһова бизим еһтијаҹларымызы неҹә өдәјир. Тамвахтлы хидмәтдә олан бир әр-арвад көһнә машынлары илә бир саатдан чох јол ҝетмишдиләр ки, гачгын дүшәрҝәсиндә јашајан бир нечә баҹыны ҝөтүрүб јығынҹаға ҝәтирсинләр. Гардаш дејир: «Јығынҹагдан сонра бу баҹылары евә јемәјә дәвәт етдик. Амма сонра јадымыза дүшдү ки, евдә сүфрәјә гојмаға һеч нәјимиз јохдур». Бәс бу әр-арвад нә етди? Гардаш дејир: «Евә ҝәләндә гапынын ағзында ики пакет әрзаг ҝөрдүк. Биз билмирдик, онлары ора ким гојуб. Јеһова бизим гајғымыза галды». Бир мүддәтдән сонра бу әр-арвадын машынлары хараб олду. Бу машын онларын хидмәтләри үчүн зәрури иди. Амма машыны тәмир етмәк үчүн пуллары јох иди. Нә гәдәр хәрҹләри чыхаҹағыны өјрәнмәк үчүн машыны јахынлыгдакы устанын јанына апардылар. Елә орадаҹа бир киши ҝәлиб сорушду: «Бу кимин машыныдыр?» Гардаш деди ки, онундур вә тәмирә еһтијаҹы вар. Киши исә белә деди: «Бу, дүзәлән шејдир. Арвадым елә белә бир машын ахтарырды, өзү дә бу рәнҝдә. Нечәјә сатарсыныз?» Онлар разылыға ҝәлдиләр. Артыг гардашын әлиндә башга машын алмаг үчүн кифајәт гәдәр пул вар иди. Гардаш сөзүнә белә јекун вурур: «Јәгин, тәсәввүр едирсиниз, һәмин ҝүнүн сонунда һансы һиссләри кечирмишдик. Биз билирдик ки, бу, тәсадүф дејилди, бу, Јеһованын гајғысы иди».

10. Зәбур 37:5 ајәси мадди еһтијаҹларымыза ҝөрә нараһат олмамаға бизи неҹә тәшвиг едир?

¹⁰ Әҝәр јахшы Чобанымыз Исаја гулаг асырыгса вә мадди еһтијаҹларымыза ҝөрә  даһа һәддән артыг нараһат олмуругса, әмин ола биләрик ки, Јеһова бизи еһтијаҹ дујдуғумуз шејләрлә тәмин едәҹәк.  Бешинҹи абзасда садаланан чәтинликләр һаггында дүшүнүн. (Зәбур 37:5 ајәсини охујун; 1 Бут. 5:7.) Јеһова бу ҝүнә гәдәр аилә башчыныз вә ја мүдириниз васитәсилә сизин ҝүндәлик рузинизи јетирирди. Ола билсин, аилә башчысы даһа аиләни тәмин едә билмир вә ја биз ишимизи итирмишик. Јеһова бизим гејдимизә башга јолнан галаҹаг, бундан архајын ола биләрик. Инди исә ҝәлин ҝөрәк гајғыкеш Чобанымыз башга нәји етмәмәјимизи бујуруб.

11. Мәтта 7:1, 2 ајәләринә әсасән, Иса нә етмәмәји бујурмушду вә нәјә ҝөрә бу бизә чәтин ҝәлә биләр?

¹¹ Мәтта 7:1, 2 ајәләрини охујун. Иса билирди ки, ону динләјән инсанлар гејри-камилдирләр вә әксәр һалларда башгаларынын мәнфи ҹәһәтләринә диггәт јетирирләр. Буна ҝөрә дә белә демишди: «Мүһакимә етмәјин». Ола биләр, биз чалышырыг ки, диндашымызы мүһакимә етмәјәк, амма һамымыз гејри-камилик. Әҝәр ҝөрсәк ки, биздә инсанлара тәнгиди јанашмаг мејли вар, онда нә етмәлијик? Исаја гулаг асмалыјыг вә вар ҝүҹүмүзлә чалышмалыјыг ки, даһа башгаларыны мүһакимә етмәјәк.

12, 13. Јеһованын Давудла рәфтары барәдә дүшүнмәк бизә башгаларыны даһа мүһакимә етмәмәјә неҹә көмәк едәҹәк?

¹² Бу саһәдә Јеһовадан өрнәк ҝөтүрә биләрик. О, инсанын јахшы ҹәһәтинә диггәт јетирир. Буну Давуд падшаһ ҹидди ҝүнаһ едәндә онунла рәфтарындан ајдын ҝөрүрүк. Мәсәлән, Давуд Бадсәба илә зина етмишди вә онун әрини өлдүртмүшдү (2 Ишм. 11:2—4, 14, 15, 24). Нәтиҹәдә, Давуд нәинки өзүнү, арвадлары да ичиндә олмагла, бүтүн аиләсини бәлаја салмышды (2 Ишм. 12:10, 11). Башга бир вахт исә Давуд Јеһоваја там етибар етмәмишди. Јеһованын әмринә зидд олараг Исраил ордусуну сијаһыја алмышды. Ола билсин, ону буна вадар едән гүрур вә ордусунун сајына ҝүвәнмәси иди. Бәс бунун агибәти нә олду? Тәхминән 70 000 исраилли хәстәликдән өлдү! (2 Ишм. 24:1—4, 10—15).

¹³ Әҝәр сиз һәмин дөврдә Исраилдә јашасајдыныз, Давуда неҹә јанашардыныз? Јеһованын мәрһәмәтинә лајиг олмадығыны дүшүнүб ону мүһакимә едәрдиниз? Јеһова белә етмәди. О, диггәтини Давудун һәјаты боју неҹә садиг олдуғуна вә үрәкдән төвбә етдијинә ҹәмләди. Беләҹә, Јеһова Давудун ҹидди ҝүнаһларыны бағышлады. Јеһова билирди ки, Давуд Ону севир вә әмрләринә риајәт етмәк истәјир. Нә јахшы ки, Јеһова биздә ҝөзәл хүсусијјәтләрә фикир верир (1 Пад. 9:4; 1 Салн. 29:10, 17).

14. Мәсиһиләрә башгаларыны мүһакимә етмәјә сон гојмаға нә көмәк едир?

¹⁴ Јеһова инсанлардан камиллик ҝөзләмирсә, биз дә белә давранмалыјыг, инсанларда јахшы шејләрә диггәт јетирмәлијик. Инсанларын нөгсанларыны ҝөрмәк, онлары тәнгид етмәк асандыр. Руһани дүшүнҹәли мәсиһи башгаларынын нөгсанларыны ҝөрсә дә, онларла јахшы мүнасибәтдә олур. Ҹилаланмамыш алмазын ҝөрүнүшү ҝөзәл олмаја биләр. Амма ағыллы адам билир ки, алмазы ҹилалајандан сонра о, чох ҝөзәл вә гијмәтли олаҹаг. Ејнилә гејри-камил инсан да, бир нөв, ҹилаланмамыш алмаза бәнзәјир. Јеһова Аллаһ вә Иса Мәсиһ кими, биз дә инсанларын гејри-камиллијинә јох, јахшы хүсусијјәтләринә диггәтимизи ҹәмләмәлијик.

15. Инсанларын вәзијјәтини нәзәрә алмаг онлара тәнгиди јанашмамаға неҹә көмәк едәҹәк?

 ¹⁵ Инсанлары мүһакимә етмәмәјә онларын јахшы хүсусијјәтләрини ҝөрмәклә јанашы, башга нә көмәк едә биләр? Онларын һәјат шәраитини тәсәввүр етмәјә чалышын. Ҝәлин белә бир һадисәјә бахаг. Бир дәфә Иса мәбәддә оларкән касыб дул гадынын хәзинә габына ики хырда пул атдығыны ҝөрмүшдү. Иса сорушмады: «Нәјә ҝөрә бу гадын белә аз пул атыр?» О, диггәтини гадынын нә гәдәр ианә етдијинә јох, нијјәтинә вә шәраитинә ҹәмләди вә әлиндән ҝәләни етдијинә ҝөрә ону тәрифләди (Лука 21:1—4).

16. Верониканын һадисәсиндән нә өјрәндиниз?

¹⁶ Вероника адлы бир баҹынын һадисәси башгаларынын вәзијјәтини нәзәрә алмағын нә гәдәр ваҹиб олдуғуну ҝөстәрир. Онун олдуғу јығынҹагда бир ана-бала вар иди. Вероника дејир: «Мәнә елә ҝәләрди ки, онлар јығынҹаг ишләриндә елә дә фәал дејилләр. Буна ҝөрә дә онлара тәнгиди јанашырдым. Сонра баҹы илә хидмәтдә әмәкдашлыг етдим. О мәнә оғлунда аутизм хәстәлији олдуғундан, она бахмағын чәтинликләриндән данышды. Баҹы өзләрини доландырмаг, руһани еһтијаҹларыны өдәмәк үчүн әлиндән ҝәләни едирди. Бәзән оғлунун сәһһәти илә бағлы баҹы башга јығынҹаға ҝетмәли олурду. Ағлыма һеч ҝәлмәзди ки, онун белә чәтинликләри вар. Инди бу баҹыны Јеһоваја хидмәт етмәк үчүн әлиндән  ҝәләни етдијинә ҝөрә чох гијмәтләндирирәм. Она бөјүк һөрмәтим вар».

17. Јагуб 2:8 ајәсиндә бизә нә бујрулур вә биз буна неҹә әмәл едә биләрик?

¹⁷ Әҝәр ҝөрсәк ки, диндашымызы мүһакимә едирик, нә етмәлијик? Әввәла, унутмамалыјыг ки, баҹы-гардашларымызы севмәлијик. (Јагуб 2:8 ајәсини охујун.) Һәмчинин Јеһоваја дуа едиб јалвармалыјыг ки, бизә онлары даһа мүһакимә етмәмәјә көмәк етсин. Дуамыза ујғун давранараг өзүмүз тәшәббүс ҝөстәриб, тәнгиди јанашдығымыз инсанла үнсијјәт етмәлијик. Онунла бирҝә хидмәтә чыха биләрик, јахуд јемәк сүфрәсинә дәвәт едә биләрик. Бу, ону јахындан танымағымыза көмәк едә биләр. Бу заман чалышмалыјыг ки, Јеһовадан вә Исадан өрнәк ҝөтүрүб фикримизи ондакы јахшы хүсусијјәтләрә ҹәмләјәк. Беләҹә, ҝөстәрәҹәјик ки, јахшы Чобанымызын «мүһакимә етмәјин» әмринә гулаг асырыг.

18. Јахшы Чобанын сәсинә гулаг асдығымызы неҹә ҝөстәрә биләрик?

¹⁸ Гојунлар чобанын сәсинә гулаг асдығы кими, Исанын давамчылары да онун сәсинә гулаг асыр. Әҝәр биз мадди еһтијаҹларымыза ҝөрә һәддиндән артыг нараһат олмаға сон гојмаг үчүн вә башгаларыны даһа мүһакимә етмәмәк үчүн вар ҝүҹүмүзлә чалышырыгса, Јеһованын вә Исанын көмәји сајәсиндә бу биздә алынаҹаг. Одур ки, ҝәлин кичик сүрүјә вә ја башга гојунлара аид олмағымыздан асылы олмајараг, даима јахшы Чобанымызын сәсинә гулаг асаг (Лука 12:32; Јәһ. 10:11, 14, 16). Бәс Исанын давамчылары һансы ики шеји етмәлидир? Нөвбәти мәгаләдә буну өјрәнәҹәјик.