1. Boasa dipatudos Jesus akka siseanna songon biru-biru?

DIPATUDOS Jesus do hubunganna tu akka siseanna songon hubungan ni sahalak parmahan tu biru-biruna. (Joh. 10:14) Cocok do gambaran on. Alana, ditanda biru-biru do parmahanna jala ditanda do soara ni parmahanna i. Hea do sahalak turis mangida on. Didok ibana, “Tikki naeng difoto hami akka biru-biru i, lari do akka biru-biru i ala dang ditanda soaranami. Dung i ro ma parmahan ni biru-biru i, i ma sahalak dakdanak bawa. Disi dijou ibana akka biru-biru i, pittor diihutton do ibana.”

2-3. (a) Boha do cara ni akka halak na mangihutton Jesus manangihon soarana? (b) Aha do na lao tabahas di artikel on dohot di artikel berikutna?

² Pengalaman ni turis on pasti paingotton hita tu hata ni Jesus taringot akka siseanna. Didok ibana do, “Tangihonon ni nasida ma soarakku.” (Joh. 10:16) Alai di surgo do Jesus saonari. Attong, boha do caratta manangihon soarana? Cara utama lao manangihon soarana, i ma mangulahon na diajarhon ibana.​—Mat. 7:24, 25.

³ Di artikel on dohot di artikel berikutna, lao tabahas ma taringot piga-piga ajaran ni Jesus. Didok Jesus, adong do ulaon na ikkon taulahon, alai adong do ulaon na so boi be taulahon. Na parjolo, tabahas ma aha do na so boi be taulahon.

4. Menurut Lukas 12:29, aha do na mambahen hita gabe ‘holsoan’?

⁴ Jaha Lukas 12:29. Didok Jesus do tu akka siseanna asa “unang be paholsohu” mamikkiri akka na porlu di nasida. Taboto do, denggan jala sittong nasehat ni Jesus on jala lomo rohatta naeng menerappon i. Alai olo do ra maol tahilala mangulahon i. Boasa?

5. Aha do na mambahen piga-piga halak gabe marsak mamikkiri na porlu di nasida?

 ⁵ Adong do ra piga-piga halak na marsak ala mamikkiri aha allangonna, pakkeonna, dohot tempat tinggalna. Mungkin maol do di negara ni nasida mangalului hepeng. Gabe maol ma manuhor kebutuhan ni keluargana. Manang adong do ra na mate sian keluarga i. Hape ibana do saleleng on na massari di keluarga i. Alani i, gabe dang boi be keluarga i manuhor akka na porlu di nasida. Jala godang do ra na gabe pengangguran alani pandemi COVID-19 on. (Pjm. 9:11) Molo songon i na masa tu hita manang adong masalah na asing, boha ma caratta menerappon nasehat ni Jesus asa unang be paholsohu?

6. Aha do na masa tu Apostel Petrus? Ceritahon ma.

⁶ Di sada tikki, marparau ma Apostel Petrus dohot akka apostel na asing di Laut Galilea. Dung i ro ma badai. Jala diida nasida ma Jesus mardalan di ginjang ni aek. Jadi didok si Petrus ma, “Tuan, molo tutu do ho i, suru ma au ro mandapotton ho. Suru ma au mardalan di atas ni aek.” Didok Jesus ma, “Ro ma ho!” Kaluar ma si Petrus sian parau i jala “mardalan ma ibana di atas ni aek mandapotton Jesus”. Dung i aha ma na terjadi? “Dung diida ibana ro galumbang na balga, mabiar ma ibana. Tikki naeng lonong ibana, marsurak ma ibana. Didok ma, ‘Tuan, tolong jo au!’” Pittor dilehon Jesus ma tanganna lao maniop tangan ni  si Petrus. Molo taparrohahon, boi do si Petrus mardalan di ginjang ni aek ala torus diida ibana Jesus. Alai dung diida ibana galumbang na balga i, gabe mabiar ma ibana. Dung i gabe naeng lonong ma ibana.​—Mat. 14:24-31.

7. Aha do na boi taparsiajari sian na masa tu si Petrus?

⁷ Adong do parsiajaran ni i tu hita. Tikki kaluar si Petrus sian parau jala mulai mardalan di ginjang ni aek, dang mabiar dope ibana tu galumbang na balga. Jadi boi ma ibana torus mardalan mandapotton Jesus. Alai tikki mulai diparrohahon ibana galumbang na balga i, gabe dang fokus be ibana tu Jesus. Memang dang boi hita mardalan di ginjang ni aek. Alai olo do ra adong masalahta na manguji haporseaotta, na dos songon galumbang na balga. Molo dang pos be rohatta tu Jahowa dohot tu janjina tikki adong masalahta, boi ma gabe sega haporseaotta jala gabe holan masalahta i ma na tapikkirhon. Jadi nang pe balga masalahta, ikkon torus do hita marpos ni roha tu Jahowa jala taingot ma boi do Ibana mangurupi hita. Boha do carana asa boi taulahon i?

8. Boha do carana asa unang pamarsakhu hita mamikkiri akka na porlu di hita?

⁸ Jadi daripada pamarsakhu hita mamikkiri akka na tahaporluhon, tumagon ma hita marpos ni roha tu Jahowa. Taingot ma, dihaholongi Jahowa do hita. Jala marjanji do Ibana, pasti lehononna do na porlu di hita molo tautamahon Ibana di ngolutta. (Mat. 6:32, 33) Sai ditepati Ibana do janjina. (5 Mus. 8:4, 15, 16; Ps. 37:25) Haru akka pidong dohot akka bunga pe diparrohahon Jahowa do. Jadi unang ma pamarsakhu hita mamikkiri aha na lao allangotta dohot pakkeotta! (Mat. 6:26-30; Plp. 4:6, 7) Molo holong roha ni natua-tua tu gellengna, pasti berusaha do nasida paradehon na porlu tu akka gellengna i. Dos songon i ma Jahowa, ala holong do rohana tu hita pasti dilehon Ibana do akka na porlu tu hita. Jadi pos ma rohatta sai diparrohahon Jahowa do hita!

9. Aha ma na boi diparsiajari hamu sian pengalaman ni suami istri on?

⁹ Taida ma jo pengalaman ni donganta sapasang suami istri na merintis. Sada tikki, dialap nasida ma akka saudari sian inganan pengungsian asa dohot tu parpunguan. Ikkon sajom ma nasida marmobil mangalap akka saudari i. Diceritahon saudara i ma, “Dung sae marpungu, diundang hami ma akka saudari i asa mangan tu jabunami. Alai dukkon i huingot ma, dang adong be hape manang aha di jabunami na lao allangonnami.” Alai didok saudara i ma muse, “Dung sahat hami di jabu, huida hami ma di jolo ni pintu adong dua palastik na balga na marisi bahan makanan. Dang huboto hami ise na mambahen i disi. Gabe pos ma rohanami, sai diparade Jahowa do kebutuhannami.” Dang leleng dukkon i, sega ma mobil ni nasida. Hape porlu do mobil i di nasida, alai dang adong hepeng ni nasida lao padenggatton i. Nang pe songon i, diboan nasida ma mobil i tu bengkel lao mamboto sadia biaya padenggatton i. Dung sahat di bengkel i, adong ma sahalak bawa manukkun, “Mobil ni ise do on?” Didok saudara i ma, “Mobilhu do i na ikkon dipadenggan.” Didok bawa i ma muse, “Unang pola padenggan. Olo do ho manggadis i tu au? Lomo roha ni istrikku tu mobil songon on jala pas muse warnana. Sadia ma arga ni on?” Digadis saudara i ma mobilna i jala cukkup do hepengna lao manuhor mobil na asing. Didok ibana ma, “Las hian rohakku tikki i! Huboto do dang mungkin kebetulan on. Pasti na diurupi Jahowa do hami.”

10. Boha do Psalmen 37:5 mangurupi hita asa unang paholsohu mamikkiri akka na porlu di hita?

¹⁰ Molo tatangihon hata ni Jesus parmahanta i jala dang paholsohu hita mamikkiri akka na tahaporluhon, boi do pos rohatta pasti  lehonon ni Jahowa do na porlu di hita. (Jaha Psalmen 37:5; 1 Ptr. 5:7) Pikkirhon ma muse akka situasi na dipaboa di  paragraf 5. Sahat tu saonari, olo dope ra dipakke Jahowa kepala keluarga manang majikanta lao paradehon na porlu di hita. Alai molo dang karejo be kepala keluargamuna manang dang karejo be hamu, pasti bahenon ni Jahowa do cara na asing lao paradehon akka na porlu di hamu. Jadi ikkon pos do rohamuna. Saonari taida ma muse aha dope na didok Jesus na so boi be taulahon.

11. Songon na didok di Mateus 7:1, 2, aha do na so boi be taulahon didok Jesus? Jala boasa sipata maol mangulahon i?

¹¹ Jaha Mateus 7:1, 2. Diboto Jesus do, ala dang sempurna akka siseanna gabe sering ma nasida mangida kesalahan ni na asing. Hita pe, olo do ra ikkon berjuang asa dang manguhumi na asing. Alani i ma didok Jesus, “Unang be uhumi hamu halak na asing.” Alai ala dang sempurna hita, olo dope ra hita manguhumi akka donganta. Molo songon i na masa, aha ma na ikkon taulahon? Taihutton ma hata ni Jesus jala unang be tauhumi akka donganta.

12-13. Boasa olo Jahowa mangampuni si Daud? Jala aha do na taparsiajari sian i?

¹² Pikkirhon ma sitiruon na dibahen Jahowa. Akka na denggan i do na diida Ibana sian jolma. Boi do taida i sian na masa tu Raja Daud. Hea do ibana piga-piga hali mangulahon dosa na balga. Misalna, hea do ibana mangalakkup dohot si Bat-seba jala dipamate ibana si Uria. (2 Sam. 11:2-4, 14, 15, 24) Akibatna gabe susa ma ibana dohot keluargana, termasuk ma i akka istrina na asing. (2 Sam. 12:10, 11) Di tikki na asing, hea do si Daud patuduhon na so pos be rohana tu Jahowa. Disuru ibana ma asa dietong sadia godang tentara ni Israel, hape dang disuru Jahowa ibana mangulahon i. Olo do ra alani ginjang ni rohana makana dibahen songon i jala mulai ibana mangandalhon tentarana na godang. Aha ma akibatna? Gabe mate ma 70.000 halak Israel ala marsahit dibahen Jahowa!​—2 Sam. 24:1-4, 10-15.

¹³ Molo tinggal di Israel hamu tikki i, boha ma perasaanmuna mangida si Daud? Dokkononmuna do dang pantas asi roha ni Jahowa tu si Daud? Alai dang songon i pikkiran ni Jahowa. Diingot Ibana do akka na denggan naung dibahen si Daud. Setia do si Daud tu Jahowa jala olo do ibana muba sian ias ni rohana. Alani i ma diampuni Jahowa dosa ni si Daud na balga i. Diboto Jahowa do, holong hian roha ni si Daud tu Jahowa jala berusaha do ibana mangulahon na sittong. Pasti mandok mauliate do hita tu Jahowa, ala akka na denggan i na diida Ibana sian hita.​—1 Raj. 9:4; 1 Kron. 29:10, 17.

14. Boha do carana asa dang tauhumi be donganta na asing?

¹⁴ Nang pe sempurna Jahowa, dang diharappon Ibana hita ikkon sempurna. Alani i hita pe, unang ma taharappon akka donganta ikkon sempurna. Memang mura do mangida hahurangan ni akka donganta jala manguhumi nasida. Alai molo togu do haporseaotta, pasti dang hahuranganna i na sai taida. Sarupa ma i songon sada berlian. Pasti sai adong do cacat ni sada berlian. Alai molo halak na malo, diboto ibana do boi gabe bagak jala berharga berlian i molo nungnga dipoles. Jadi songon Jahowa dohot Jesus, unang ma holan hahurangan ni donganta na taingot. Alai taingot ma akka sifat ni nasida na denggan.

15. Aha ma muse na porlu dipikkirhon halak Kristen asa unang diuhumi be donganna?

¹⁵ Asing ni i, aha ma muse na boi taulahon asa dang tauhumi be akka donganta? Pikkirhon ma songon dia ngolu ni nasida. Taida ma sada contoh. Tikki di bagas joro Jesus, diida ibana ma sahalak ina na mabalu mandabuhon  dua hepeng logam na otik argana tu poti na adong disi. Dang didok roha ni Jesus paotikhu na didabuhon ina na mabalu i. Ala diboto Jesus do, dang godang ni sumbanganna i na paling penting, alai alasan ni ibana mangalean i do. Asing ni i, diboto Jesus do susa ngolu ni ina na mabalu i. Alani i ma, dipuji Jesus do ina na mabalu i ala berusaha ibana sian nasa tolapna asa boi mangalehon tu Jahowa.​—Luk. 21:1-4.

16. Aha ma na boi diparsiajari hamu sian pengalaman ni si Veronica?

¹⁶ Godang do manfaatna molo tapikkirhon parngoluon ni akka donganta. Songon i ma na dihilala sahalak saudari na margoar si Veronica. Di huria tempatna bergabung, adong ma sahalak saudari naung mabalu jala sada ma anakna. Didok si Veronica, “Ala huida dang taratur nasida marpungu jala marbarita, gabe negatif ma pandanganku tu nasida. Alai sada tikki, rap marbarita ma au dohot saudari i. Dipaboa ibana ma, na marsahit autis do hape anakna i. Jala ikkon kerja keras do ibana asa boi adong allangonna jala asa tetap jonok hubunganna tu Jahowa. Sipata ala hurang sehat anakna i, gabe tu huria na asing ma nasida marpungu.” Didok si Veronica ma muse, “Dang hea huboto songon i do hape tantangan na diadopi ibana. Saonari, gabe muba ma pandanganku tu ibana. Nga holong hian be rohakku tu ibana jala huargai do sude na diulahon ibana asa boi tetap melayani Jahowa.”

17. Aha do na ikkon taulahon menurut Jakobus 2:8, jala boha do caratta mangulahon i?

 ¹⁷ Asa unang tauhumi be akka donganta na asing, ikkon tahaholongi do nasida. (Jaha Jakobus 2:8.) Asing ni i, martangiang ma hita tu Jahowa asa diurupi hita mambolokkon kebiasaan manguhumi na asing. Molo negatif pandanganta tu sahalak donganta, berupaya ma hita mananda ibana. Taajak ma ibana rap marbarita manang rap mangan. Molo nungnga tatanda akka donganta, boi ma taida akka na denggan sian nasida jala boi ma tatiru Jahowa dohot Jesus. Molo taulahon i sude, on patuduhon na tatangihon do hata ni Jesus parmahanta i asa unang be manguhumi na asing.

18. Boha do carana patuduhon na tatangihon do soara ni parmahanta?

¹⁸ Ditangihon biru-biru do soara ni parmahanna. Dos songon i ma, ditangihon akka halak na mangihutton Jesus do soarana. Molo berusaha hita asa unang paholsohu be mamikkiri kebutuhanta jala asa unang tauhumi be dongan na asing, pasti dilehon Jahowa dohot Jesus do pasu-pasu di hita. Jadi torus ma taoloi hata ni Jesus parmahanta i, dang soal bagian ni “punguan na metmet” do hita manang bagian ni ‘biru-biru na asing’. (Luk. 12:32; Joh. 10:11, 14, 16) Di artikel berikutna, tabahas ma aha na ikkon diulahon akka halak na mangihutton Jesus.