1. Ano an sarong dahilan kun taano ta ikinumparar ni Jesus sa mga karnero an saiyang mga parasunod?

IKINUMPARAR ni Jesus an relasyon niya sa saiyang mga parasunod sa relasyon nin sarong pastor asin kan mga karnero kaini. (Juan 10:14) Angay an pagkukumparar na iyan. Midbid kan mga karnero an saindang pastor asin nagdadangog sinda sa saiyang boses. Naeksperyensiyahan mismo ini nin sarong biyahero. Sinabi niya: “Gusto ming ritratuhon an nagkapirang karnero asin pinurbaran ming paranihon sinda. Pero dai sinda nagsunod sa samo ta dai ninda midbid an mga boses mi. Dangan sarong aking lalaking pastor an nag-abot, tapos kan apudon niya sinda, nagsunod tulos sinda.”

2-3. (a) Paano ipinapahiling kan mga parasunod ni Jesus na nagdadangog sinda sa saiyang boses? (b) Ano an pag-uulayan ta sa artikulong ini asin sa masunod?

² An eksperyensiya kan biyaherong iyan nagpapagirumdom sa sato kan mga tataramon ni Jesus manungod sa saiyang mga karnero—an saiyang mga disipulo. Sinabi niya: “Madangog sinda sa sakuyang boses.” (Juan 10:16) Pero nasa langit si Jesus. Paano ta masasabing nagdadangog kita sa saiya? An panginot na paagi na maipapahiling tang nagdadangog kita sa boses kan satong Kagurangnan iyo an pag-aplikar sa satong buhay kan saiyang mga itinukdo.—Mat. 7:24, 25.

³ Sa artikulong ini asin sa masunod, pag-uulayan ta an nagkapira sa mga itinukdo ni Jesus. Arog kan pag-uulayan ta, itinukdo sa sato ni Jesus na dapat kitang magpundo na sa paggibo nin nagkapirang mga bagay asin dapat tang gibuhon an iba pang mga bagay.  Pag-uulayan ta nguna an duwang bagay na itinukdo sa sato kan marahay na pastor na ipundo ta nang gibuhon.

4. Uyon sa Lucas 12:29, ano an puwedeng magin dahilan kan ‘pagparahadit’?

⁴ Basahon an Lucas 12:29. Dinagka ni Jesus an saiyang mga parasunod na ‘magpundo na sa kakahadit’ manungod sa saindang materyal na mga pangangaipo. Aram tang an sadol ni Jesus pirming madunong asin tama. Gusto tang iaplikar iyan, pero kun minsan tibaad madipisilan kitang gibuhon iyan. Taano?

5. Taano ta may mga nahahadit manungod sa saindang materyal na mga pangangaipo?

 ⁵ An nagkapira tibaad nahahadit manungod sa saindang materyal na mga pangangaipo—kakanon, bado, asin istaran. Tibaad nakaistar sinda sa sarong tios na nasyon. Tibaad masakit sainda na makakua nin igong panggastos para sa saindang pamilya. O tibaad nagadan an naghahanapbuhay para sa pamilya kaya mayo nang masustento sa nawalat na pamilya. Asin dahil sa COVID-19 na pandemya, posibleng dakul an nawaran nin trabaho asin income. (Ecl. 9:11) Kun naeksperyensiyahan ta an arin man sa mga ini o an iba pang kadipisilan, paano ta masusunod an pagbuot ni Jesus na magpundo na sa pagparahadit?

6. Sarong beses, ano an nangyari ki apostol Pedro? Iladawan.

⁶ Sarong beses, kan nasa sarong bangka sa Dagat nin Galilea si apostol Pedro asin an iba pang mga apostol, nagkaigwa nin alipuros asin nahiling ninda si Jesus na naglalakaw sa ibabaw kan dagat. Sinabi ni Pedro: “Kagurangnan, kun ika iyan, padiyanon mo ako saimo sa ibabaw kan tubig.” Pagkatapos sabihon ni Jesus na “madya,” nagbaba si Pedro sa bangka saka “naglakaw sa ibabaw kan tubig asin nagpasiring ki Jesus.” Mangnuhon kun ano an sunod na nangyari. “Kan  maghiling siya sa alipuros, natakot siya. Asin kan magpuon siyang maglubog, nagkurahaw siya: ‘Kagurangnan, iligtas mo ako!’” Inunat ni Jesus an saiyang kamot asin ilinigtas siya. Mahalagang mangnuhon na nagibo ni Pedro na maglakaw sa ibabaw kan maalon na dagat kan nagdanay siyang nakahiling ki Jesus. Pero kan maghiling siya sa alipuros, pinangibabawan siya nin takot saka pagduda asin nagpuon siyang maglubog.—Mat. 14:24-31.

7. Ano an manunudan ta sa halimbawa ni Pedro?

⁷ May manunudan kita sa halimbawa ni Pedro. Kan nagbaba si Pedro sa bangka asin naglakaw sa dagat, dai niya inasahan na matatakot siya asin malubog. Gusto niyang magdanay sa ibabaw kan tubig sagkod na makaabot siya sa saiyang Kagurangnan. Pero dai niya nagibong magdanay na nakapokus. Totoo, dai kita makakalakaw sa ibabaw nin tubig pero napapaatubang kita sa mga pagbalo sa pagtubod. Kun mawawara an pokus ta ki Jehova asin sa saiyang mga panuga, malubog kita sa espirituwal. Ano man na garo bagyong mga problema an mag-abot sa satong buhay, dapat na an satong isip magdanay na nakapokus ki Jehova asin sa saiyang kakayahan na tabangan kita. Paano ta magigibo iyan?

8. Ano an makakatabang sa sato na dai magparahadit na marhay sa satong materyal na mga pangangaipo?

⁸ Makikinabang kita kun riribayan ta an paghadit nin pagtitiwala. Tandaan na an satong mamumuton na ama na si Jehova nanunuga na itatao niya an satong materyal na mga pangangaipo kun iinuton ta an espirituwal na mga bagay. (Mat. 6:32, 33) Pirmi niyang inuutob an panuga niyang iyan. (Deu. 8:4, 15, 16; Sal. 37:25) Kun itinatao ni Jehova an mga pangangaipo kan mga gamgam asin burak, dai nanggad kita dapat mahadit sa kun ano an satong kakakanon asin isusulot! (Mat. 6:26-30; Fil. 4:6, 7) Kun paanong pinapahiro nin pagkamuot an mapagmalasakit na mga magurang na itao an materyal na mga pangangaipo kan saindang mga aki, pinapahiro man nin pagkamuot an satong Ama sa langit na itao an materyal na mga pangangaipo kan saiyang mga lingkod. Iyo, makakasigurado kita na aatamanon kita ni Jehova!

9. Ano an manunudan mo sa eksperyensiya kan sarong mag-agom?

⁹ Pag-isipan an sarong eksperyensiya na nagpapahiling kun paano itinatao ni Jehova an satong materyal na mga pangangaipo. Sarong mag-agom na nasa bilog na panahon na paglilingkod an nagmaneho nin labing sarong oras sakay kan saindang lumang awto para sunduon an nagkapirang sister na nakaistar sa sarong refugee center asin darahon sinda sa sarong Kristiyanong pagtiripon. Sinabi kan brother: “Pagkatapos kan pagtiripon, inimbitaran ming magkakan an mga sister, pero narealisar mi na mayo palan kaming ipapakakan sa sainda.” Ano an gigibuhon kan mag-agom? Sinabi pa kan brother: “Pag-abot mi sa harong, igwa nin duwang dakulang shopping bag nin mga kakanon na nasa atubangan kan pinto mi. Dai mi aram kun siisay an nagwalat kaiyan diyan. Inataman kami ni Jehova.” Dai nahaloy, naraot an awto kan mag-agom. Kaipuhan ninda iyan sa saindang ministeryo, pero mayo sindang kuwartang pampahirahay kaiyan. Mantang nasa haraning talyer an awto, sarong lalaki an nag-abot asin naghapot: “Kiisay na awto iyan?” Sinabi kan brother na saiya iyan asin kaipuhan ipahirahay. Sinabi kan lalaki: “Dai mo na pagproblemahon ’yan. Gusto ni agom an arog kaiyan na awto saka an kulor mismong ’yan. Gurano an presyo mo kaiyan?” Kaya an nangyari, nagkaigwa nin igong kuwarta an brother para makabakal nin panibagong awto. Sinabi niya: “Dai ko na kaipuhan na sabihon pa kun ano an namatian mi kan aldaw na iyan. Aram mi na dai idto nagkataon sana. Tinabangan kami ni Jehova.”

10. Paano kita dinadagka kan Salmo 37:5 na dai magparahadit manungod sa satong materyal na mga pangangaipo?

¹⁰ Kun madangog kita sa marahay na pastor asin mapundo na sa sobrang pagparahadit manungod sa materyal na mga pangangaipo, makakasigurado  kita na itatao sa sato ni Jehova an mga pangangaipo ta. (Basahon an Salmo 37:5; 1 Ped. 5:7) Pag-isipan an mga sitwasyon na sinambit sa  parapo 5. Sagkod ngunyan, puwedeng ginagamit ni Jehova an sarong payo nin pamilya o sarong employer tanganing tabangan kita para sa mga pangangaipo ta sa aroaldaw. Kun dai na iyan nagigibo kan payo nin pamilya o kun nawaran kita nin trabaho, itatao ni Jehova sa sato an satong mga pangangaipo sa ibang paagi. Makakasigurado kita kaiyan. Pag-ulayan ta ngunyan an saro pang bagay na sinasadol sato kan marahay na pastor na ipundo ta nang gibuhon.

11. Sigun sa Mateo 7:1, 2, ano an sinabi ni Jesus na ipundo ta nang gibuhon, asin taano ta puwedeng magin dipisil ini?

¹¹ Basahon an Mateo 7:1, 2. Aram ni Jesus na an saiyang bakong perpektong mga paradangog may tendensiya na magin mapagkritika sa iba. Kaya sinabi niya: “Magpundo na kamo sa paghusgar.” Puwedeng naghihinguwa kitang marhay na dai magin mapaghusgar sa satong mga kapagtubod. Pero, gabos kita bakong perpekto. Kun naririsa ta na nagigin mapagkritika na kita kun minsan, ano an dapat tang gibuhon? Magdangog ki Jesus, asin magmaigot na magpundo na sa paghusgar.

12-13. Paano an paghurop-hurop sa pagmansay ni Jehova ki David makakatabang sa sato na magpundo na sa paghusgar sa iba?

¹² Makikinabang kita sa paghurop-hurop sa halimbawa ni Jehova. Nagpopokus siya sa marahay na mga kuwalidad nin mga tawo. Mahihiling ta ini sa pagtratar niya ki Hading David, sarong tawo na nakagibo nin magabat na mga pagkakasala. Halimbawa, nakakomiter siya nin pagsambay ki Bat-seba asin ipinagadan pa ngani niya an agom kaini. (2 Sam. 11:2-4, 14, 15, 24) Bilang resulta, nakulgan ni David bako sana an sadiri niya kundi pati man an saiyang pamilya, kaiba na an iba pa niyang mga agom. (2 Sam. 12:10, 11) Sa saro pang pangyayari, dai si David nakapahiling nin lubos na pagtitiwala ki Jehova kan ipagbuot niya na irehistro an hukbo kan Israel na dai man ipinagbuot ni Jehova na gibuhon niya. Posibleng ginibo niya ini huli sa pag-orgulyo asin pagtitiwala sa kadakulaan kan saiyang hukbo. Ano an nagin resulta kaiyan? Mga 70,000 na Israelita an nagadan huli sa damat!—2 Sam. 24:1-4, 10-15.

¹³ Kun nakaistar ka sa Israel kan panahon na idto, ano an magigin pagmansay mo ki David? Huhusgaran mo daw siya na bako siyang maninigo sa pagkahirak ni Jehova? Bakong arog kaiyan an nagin pagmansay ni Jehova. Nagpokus siya sa kaimbudan ni David sa bilog kaining buhay asin sa sinserong pagsulsol kaini. Bilang resulta, pinatawad ni Jehova si David sa magabat na mga pagkakasalang ini. Aram ni Jehova na namumutan siyang marhay ni David asin na gusto kaining gibuhon kun ano an tama. Dai ka daw nagpapasalamat na an satong Diyos hinihiling an marahay na mga kuwalidad niyato?—1 Ha. 9:4; 1 Cron. 29:10, 17.

14. Ano an nakatabang sa mga Kristiyano na magpundo na sa paghusgar sa iba?

¹⁴ Kun si Jehova nagpapasensiya sa bakong perpektong mga tawo, siguradong kaya ta man na pagpasensiyahan an lambang saro asin hilingon an marahay na mga kuwalidad kan iba. Sa parati, mas madali na mahiling an pagkabakong perpekto kan iba asin magin mapagkritika. Minsan siring, an sarong tawong espirituwal marahay pa man giraray an pakikiiba-iba sa iba dawa nahihiling niya an pagkabakong perpekto ninda. An sarong dai pa natabas na diyamante tibaad bakong magayon paghilingon, pero aram nin sarong madunong na tawo na magigin magayunon iyan asin mahalagang marhay pag natabas na iyan asin napakintab. Arog ni Jehova asin ni Jesus, dapat na magpokus kita bako sa nahihiling ta sa mga tawo kundi sa marahay na mga kuwalidad ninda.

15. Paano an pagkonsiderar sa kamugtakan kan mga tawo makakatabang sa sato na dai magin mapaghusgar sa sainda?

¹⁵ Apuwera sa pagpokus sa marahay na mga kuwalidad kan iba, ano an makakatabang sa sato  na dai magin mapaghusgar sa sainda? Imahinara an kamugtakan ninda sa buhay. Pag-isipan an halimbawang ini. Sarong aldaw mantang nasa templo si Jesus, nahiling niya an sarong dukha na babaying balo na naghulog sa lalagan nin kontribusyon nin duwang sadit na sinsilyo na hababaon an kantidad. Dai niya sinabi: “Taano ta dai niya dinagdagan an hinulog niya?” Imbes na magpokus sa kantidad na itinao kan balo, hiniling ni Jesus an motibo asin kamugtakan kaini saka inumaw ini huli sa paggibo kan pinakamakakaya kaini.—Luc. 21:1-4.

16. Ano an manunudan mo sa eksperyensiya ni Veronica?

¹⁶ Mahihiling ta sa eksperyensiya ni Veronica kun gurano kahalaga an pagkonsiderar sa kamugtakan kan iba. Igwa siya nin kakongregasyon na nagsosolong ina na may sarong aking lalaki. Sinabi ni Veronica: “Sa hiling ko, dai sinda gayong aktibo sa mga aktibidad sa kongregasyon. Kaya nagin negatibo an paghiling ko sa sainda. Pero kan makapartner ko sa ministeryo an ina, inistorya niya an kadipisilan na inaagihan niya dahil sa autistic niyang aki. Ginigibo niya an pinakamakakaya niya tanganing maasikaso an saindang pisikal asin espirituwal na pangangaipo. Kun minsan, dahil sa kamugtakan kan saiyang aki, kinakaipuhan niyang mag-atender sa ibang kongregasyon.” Kaya nakapagsabi si Veronica: “Dai ko lamang aram na arog kaidto kasakit an kamugtakan niya. Ngunyan, pinapahalagahan ko nang marhay asin irinerespeto an sister na ini dahil sa gabos na ginigibo niya para paglingkudan si Jehova.”

17. Ano an ipinagbubuot satong gibuhon kan Santiago 2:8, asin paano ta iyan magigibo?

 ¹⁷ Ano an dapat tang gibuhon kun marealisar ta na hinusgaran ta na an sarong kapagtubod? Dapat tang girumdumon na kaipuhan tang kamutan an satong mga tugang. (Basahon an Santiago 2:8.) Dapat man na udok kitang mamibi ki Jehova, na nakikimahirak sa saiya na tabangan kitang magpundo na sa paghusgar. Puwede kitang humiro kauyon kan satong mga pamibi paagi sa paggibo nin paagi na makaulay-ulay an tawong pigkikritika ta. Paagi kaiyan, mas mamimidbid ta siya. Puwede ta siyang agdahon na ibanan kita sa ministeryo o na magkakan kaiba ta. Mantang mas namimidbid ta an satong tugang, maaarog ta an halimbawa ni Jehova asin ni Jesus paagi sa pagpokus sa marahay na mga kuwalidad niya. Sa paaging ini, ipinapahiling ta na nagdadangog kita sa pagbuot kan marahay na pastor na magpundo na sa paghusgar.

18. Paano ta maipapahiling na nagdadangog kita sa boses kan marahay na pastor?

¹⁸ Kun paanong an literal na mga karnero nagdadangog sa boses kan saindang pastor, an mga parasunod ni Jesus nagdadangog man sa saiyang boses. Kun nagmamaigot kita na magpundo na sa pagparahadit manungod sa satong materyal na mga pangangaipo asin magpundo na sa paghusgar sa iba, bebendisyunan ni Jehova asin ni Jesus an satong mga paghihinguwa. Kabilang man kita sa “sadit na aripumpon” o sa “ibang mga karnero,” lugod na padagos kitang magdangog asin magsunod sa boses kan marahay na pastor. (Luc. 12:32; Juan 10:11, 14, 16) Sa masunod na artikulo, pag-uulayan ta an duwang bagay na sinabi ni Jesus sa saiyang mga parasunod na dapat nindang gibuhon.