1. ?From wanem Jisas i talem se ol man blong hem oli olsem ol sipsip?

JISAS i se frensip blong hem wetem ol man blong hem i olsem hemia blong wan man blong lukaot long ol sipsip wetem ol sipsip blong hem. (Jon 10:14) Hemia i stret nomo from we ol sipsip oli save man we i lukaot long olgeta, mo oli lesin long voes blong hem. Wan turis i luksave samting ya, mo i talem se: “Mifala i wantem tekem foto blong sam sipsip, mo mifala i traem blong mekem oli kam klosap. Be i no gat wan long olgeta i kam, from we oli no harem save voes blong mifala. Biaen wan smol boe we i stap lukaot long ol sipsip i kam, mo taem hem i singaot olgeta, wantaem nomo oli folem hem.”

2-3. (1) ?Olsem wanem ol man blong Jisas oli soem se oli stap lesin long voes blong hem? (2) ?Bambae yumi tokbaot wanem long stadi ya mo long nekis stadi?

² Ekspiriens blong turis ya i mekem yumi tingbaot ol tok blong Jisas long saed blong ol sipsip blong hem, hemia ol disaepol blong hem. Hem i talem se: “Bambae oli lesin long voes blong mi.” (Jon 10:16) Be Jisas i stap long heven, taswe ?olsem wanem yumi save lesin long hem? Beswan rod blong soem se yumi lesin long voes blong Masta blong yumi, hemia taem yumi folem ol tijing blong hem long laef blong yumi.—Mat. 7:24, 25.

³ Long stadi ya mo long nekis stadi, bambae yumi tokbaot sam long ol tijing blong Jisas. Olsem we bambae yumi luk, Jisas i talem se yumi mas stop blong mekem sam samting mo yumi mas mekem sam narafala samting. Be fastaem, bambae yumi tokbaot tu samting we Jisas i talem se yumi mas stop blong mekem.

4. Folem Luk 12:29, ?wanem i save mekem yumi “wari bitim mak”?

⁴ Ridim Luk 12:29. Jisas i talem long ol man blong hem se oli mas “stop blong wari bitim mak” from ol samting we oli nidim long laef. Yumi save se oltaem ol advaes blong Jisas oli  stret mo oli waes. Yumi wantem folem ol advaes ya, be samtaem yumi harem se oli had. ?From wanem?

5. ?Samfala oli wari from wanem samting?

 ⁵ Samfala maet oli wari from ol samting we oli nidim olsem, kakae, klos, mo ples blong slip. Maet oli laef long wan kantri we i pua mo i had blong faenem wok. Maet i had blong oli kasem naf mane blong lukaot long famle blong olgeta. O maet wan we i stap wok blong winim mane blong famle i ded, nao oli faenem i had blong pem ol samting we oli nidim. Mo tu, maet COVID-19 pandemik i mekem se plante oli lusum wok blong olgeta. (Pri. 9:11) Sipos yumi stap fesem sam long ol hadtaem ya, ?olsem wanem yumi save folem ol tok ya blong Jisas se yumi mas stop blong wari?

6. Tokbaot samting we i bin hapen long aposol Pita.

⁶ I gat wan taem we Pita mo ol narafala aposol oli stap long wan bot long Si Blong Galili, taem wan bigfala win i blu mo oli luk we Jisas i wokbaot antap long wota. Pita i talem se: “Masta, sipos i tru se yu, yu talem long mi blong mi wokbaot antap long wota, mi kam long yu.” Taem Jisas i talem long hem se: “!Yu kam!” Pita i kamaot long bot mo i “wokbaot antap long wota, i stap go long Jisas.” Be makem samting we i hapen biaen. “Taem hem i luk we win i strong, hem i fraet. Nao hem i stat blong draon, mo hem i singaot bigwan, i se: ‘!Masta, yu sevem mi!’” Ale Jisas i pusum han blong hem i sevem hem. I gud blong tingbaot se from we Pita i lukluk long Jisas, hem i naf blong wokbaot antap long wota ya we i raf. Be taem hem i stat blong lukluk long bigfala win ya we i blu, hem i fraet mo i stat blong draon.—Mat. 14:24-31.

7. ?Yumi lanem wanem long eksampol blong Pita?

⁷ Yumi save lanem samting long eksampol blong Pita. Taem hem i kamaot long bot, mo i  stat blong wokbaot antap long wota, hem i no ting se bigfala win ya bambae i mekem hem i wari mo i stat blong draon. Pita i wantem wokbaot antap long wota kasem Jisas. Be hem i no putum tingting blong hem i stap strong long mak we hem i wantem kasem. Tede, yumi no save wokbaot antap long wota, be yumi stap fesem ol samting we oli traem bilif blong yumi. Sipos yumi no moa putum tingting blong yumi long Jehova mo ol promes blong hem, bambae yumi stat blong draon long saed blong spirit. Nomata wanem problem yumi kasem long laef, yumi mas gohed blong putum tingting blong yumi long Jehova mo trastem se bambae hem i halpem yumi. ?Olsem wanem yumi save mekem samting ya?

8. ?Wanem i save halpem yumi blong no wari from ol samting we yumi nidim?

⁸ Yumi mas trastem Jehova, i bitim we yumi wari from ol problem blong yumi. Tingbaot se Papa ya we i lavem yumi, Jehova, i promes se bambae hem i givim ol samting we yumi nidim, sipos yumi putum hem fasples. (Mat. 6:32, 33) Mo yumi save se oltaem Jehova i holemtaet ol promes blong hem. (Dut. 8:4, 15, 16; Sam 37:25) Sipos Jehova i stap givim samting we ol pijin mo ol flaoa oli nidim, i sua se bambae hem i givim ol samting we yumi nidim olsem kakae mo klos. (Mat. 6:26-30; Fil. 4:6, 7) Lav nao i pulum wan perens blong i givim samting we ol pikinini blong hem oli nidim. Long sem fasin, lav nao i pulum Papa blong yumi long heven blong i givim ol samting we yumi nidim long saed blong bodi. !Yes, yumi save sua fulwan se Jehova bambae i lukaot gud long yumi!

9. ?Yu yu lanem wanem long ekspiriens blong kapol ya?

⁹ Traem luk wan eksampol we i soem olsem wanem Jehova i naf blong givim samting we yumi nidim. Wan kapol we i mekem wok blong fultaem paenia, i draev bitim wan aoa long olfala trak blong tufala blong go pikimap sam sista we oli laef long ples blong ol refuji, mo tekem olgeta i go long miting. Brata i eksplenem se: “Afta long miting, mitufala i invaetem ol sista ya blong oli kam kakae wetem mitufala, be biaen mitufala i jes tingbaot se mitufala i no gat kakae blong givim long olgeta.” ?Be afta wanem i hapen? Brata i gohed se: “Taem mifala i kamtru long haos, i gat tu bigfala basket blong ol kakae we i stap long fored blong doa blong mitufala. Mitufala i no save se hu i kam putum. Be mitufala i luksave se Jehova i lukaot gud long mitufala.” Samtaem biaen, trak blong kapol ya i brokdaon. Tufala i nidim trak ya blong prij, be tufala i no gat mane blong riperem. Ale, taem tufala i tekem trak ya i go long garaj blong faenemaot se oli nidim hamas mane blong fiksimap, wan man i kam mo i askem se: “?Trak ya i blong hu?” Brata ya i talem se i blong hem, mo i se i nidim blong riperem. Ale man ya i talem se: “I no nid, waef blong mi i wantem kaen trak ya nao, mo hemia nao stret kala we hem i wantem. Bae mi pem, ?be yu salem hamas?” Brata ya i salem trak ya mo hem i kasem naf mane blong pem wan narafala trak. Brata ya i talem se: “Long en blong dei, mitufala i glad bitim mak. Mitufala i save se samting i no jes hapen olsem nomo, hem i Jehova nao we i stap halpem mitufala.”

10. ?Olsem wanem Ol Sam 37:5 i halpem yumi blong no wari?

¹⁰ Taem yumi lesin long Jisas mo yumi stop blong wari bitim mak from ol samting we yumi nidim, yumi save sua se Jehova nao bambae i givim samting we yumi nidim. (Ridim Sam 37:5; 1 Pita 5:7) Traem tingbaot ol defren hadtaem ya we yumi bin tokbaot long  paragraf faef. Kam kasem tede, maet Jehova i yusum hed blong famle o bos blong yumi blong halpem yumi blong kasem samting we yumi nidim evri dei. Sipos hed blong  famle i no moa naf blong mekem olsem, o yumi lusum wok blong yumi, Jehova bambae i yusum wan narafala rod blong lukaot gud long yumi mo givim samting we yumi nidim. Mo yumi sua se bambae hem i mekem. Naoia bambae yumi luk wan narafala samting we Jisas i talem se yumi mas stop blong mekem.

11. Folem Matiu 7:1, 2, ?Jisas i talem se yumi mas stop blong mekem wanem, mo from wanem hemia i had?

¹¹ Ridim Matiu 7:1, 2. Jisas i save se ol man blong hem oli no stretgud mo plante taem oli makem rong long ol narafala. Taswe hem i talem se: “Yufala i stop blong jajem ol narafala.” Maet yumi stap traehad blong no jajem ol narafala Kristin, be from we yumi sinman, samtaem yumi mestem. Sipos yumi makem se samtaem yumi stap toktok smosmol agensem narafala, ?yumi mas mekem wanem? Lesin long Jisas mo wok had blong stop blong jajem narafala.

12-13. ?Olsem wanem eksampol blong Jehova i save halpem yumi blong stop blong jajem ol narafala?

¹² Yumi save lanem gudfala samting taem yumi tingting dip long eksampol blong Jehova. Hem i tingbaot nomo ol gudfala samting long saed blong ol man. Yumi luksave samting ya long fasin blong hem blong dil wetem King Deved we i bin mekem ol bigfala sin. Eksampol, hem i mekem adaltri wetem Batseba, mo i mekem se oli kilim ded hasban blong hem. (2 Saml. 11:2-4, 14, 15, 24) Samting we Deved i mekem, i no spolem hem wan nomo. Be i spolem famle blong hem tu, inkludum ol narafala waef blong hem. (2 Saml. 12:10, 11) Long wan narafala taem, Deved i soemaot se hem i no trastem Jehova, taem hem i givim oda blong oli go rejistarem ol ami blong Isrel. Maet hem i mekem olsem from we hem i praod, mo i trastem bigfala ami blong hem. ?Wanem i kamaot from? !Samwe long 70,000 man Isrel oli ded from wan strong sik!—2 Saml. 24:1-4, 10-15.

¹³ Sipos yu yu bin laef long Isrel long taem ya, ?bambae yu gat wanem tingting long Deved? ?Bambae yu jajem hem se i no stret blong Jehova i fogivim hem? Jehova i no gat tingting ya, hem i tingbaot se Deved i bin holemstrong long hem long olgeta laef blong hem, mo hem i rili tanem tingting blong hem. From samting ya, Jehova i fogivim Deved. Hem i save we Deved i lavem hem tumas, mo i wantem mekem samting we i stret. Yumi glad tumas blong save se Jehova i stap tingbaot nomo ol gudfala fasin blong yumi.—1 King 9:4; 1 Kron. 29:10, 17.

14. ?Wanem i save halpem ol Kristin blong oli stop blong jajem ol narafala?

¹⁴ From we Jehova i no ekspektem yumi blong mekem samting we i stret gud olgeta, yumi tu yumi no mas ekspektem ol narafala blong mekem samting we i stret gud, mo yumi mas luk ol gudfala fasin blong olgeta. I isi blong luk ol slak fasin blong ol narafala mo toktok smosmol agensem olgeta. Be wan man we i folem fasin blong Jehova, bambae i wok gud nomo wetem ol narafala, nating se hem i save ol slak fasin blong olgeta. Wan daemon we oli no katem yet, hem i no luk naes. Be wan man we i waes, bambae i no lukluk samting ya nomo, be hem i tingbaot se taem oli katem mo oli polisim gud, bambae i kam wan naesfala sas ston. Olsem Jehova mo Jisas, yumi wantem tingbaot nomo ol gudfala fasin blong ol narafala, be i no ol slak fasin blong olgeta.

15. ?Wanem wan narafala samting we i save halpem yumi blong no jajem nogud ol narafala?

¹⁵ ?Wanem wan narafala samting we i save halpem yumi blong no jajem nogud ol narafala? I gud blong tingbaot se laef blong olgeta i olsem wanem? Traem tingbaot eksampol ya. Wan dei, Jisas i stap long tempol mo i luk wan  pua wido i kam dropem tu smol koin we valiu blong hem i smol, i go long bokis blong presen mane. Jisas i no gat tingting ya se: “?From wanem hem i no save putum moa?” Jisas i no lukluk nomo tufala smol koin we wido ya i putum, be hem i tingbaot samting we i pulum hem blong putum mane ya mo situesen blong laef blong hem, nao i presem hem from we i mekem bes blong hem.—Luk 21:1-4.

16. ?Yu lanem wanem long ekspiriens blong Veronica?

¹⁶ Ekspiriens blong Veronica i soemaot long yumi from wanem i impoten blong tingbaot situesen blong laef blong ol narafala. Long kongregesen blong hem, i gat wan singel mama wetem boe blong hem. Veronica i talem se: “I luk olsem se tufala i no stap joen oltaem long ol miting mo wok blong prij. Mo hemia i mekem i gat rong tingting long saed blong tufala. Be biaen, mi prij wetem mama ya, nao hem i eksplenem long mi ol hadtaem we hem i stap fesem wetem boe blong hem we i gat sik long bren. Hem i mekem bes blong hem blong lukaot long tufala long saed blong bodi mo spirit. Samtaem from we boe blong hem i sik, hem i joen long miting blong narafala kongregesen. Mi neva tingbaot se laef blong hem i had olsem. Naoia mi tinghae moa long sista ya, mo mi respektem hem from we hem i mekem bes blong hem blong wosipim Jehova.”

17. ?Jemes 2:8 i talem se yumi mas mekem wanem, mo olsem wanem yumi save mekem samting ya?

¹⁷ ?Yumi mas mekem wanem sipos yumi luksave  se yumi stap jajem wan narafala Kristin? Yumi mas tingbaot se yumi mas lavem ol brata blong yumi. (Ridim Jemes 2:8.) Mo tu, yumi mas prea long Jehova, yumi plis long hem blong i halpem yumi blong stop blong jajem narafala. Yumi save wok folem ol prea blong yumi, taem yumi tekem janis blong toktok wetem narafala ya we yumi stap jajem hem. Maet yumi save askem hem blong i prij wetem yumi, o i joen wetem yumi long wan kakae. Hemia bambae i givhan long yumi blong save gud hem moa. Mo taem yumi stap traehad blong save gud ol brata mo sista, yumi save folem eksampol blong Jehova mo Jisas blong luk ol gudfala fasin blong olgeta. Long rod ya, yumi soem se yumi stap lesin long oda ya blong Jisas blong stop blong jajem ol narafala.

18. ?Olsem wanem yumi save soemaot se yumi stap lesin long voes blong Jisas?

¹⁸ Wan sipsip i lesin long voes blong man we i lukaot long hem. Long sem fasin, ol man blong Jisas oli lesin long voes blong hem. Sipos yumi traehad blong stop blong wari bitim mak from ol samting we yumi nidim, mo yumi stop blong jajem ol narafala, Jehova mo Jisas bambae oli blesem ol traehad blong yumi. Nating se yumi pat blong “smol grup blong ol sipsip” o blong “ol narafala sipsip,” be yumi mas gohed blong lesin mo obei long voes blong Jisas. (Luk 12:32; Jon 10:11, 14, 16) Long nekis stadi bambae yumi tokbaot tu samting we Jisas i talem long ol man blong hem se yumi mas mekem.