1. Kai salah sada alasenna ipeseri Jesus pengikutna ras biri-biri?

IPESERI Jesus hubungenna ras pengikutna bagi sekalak permakan ras biri-birina. (Joh. 10:14) Si ikatakenna e cocok kel. Biri-biri tandaina permakanna ras begikenna sora permakanna. Lit sekalak turis si enggo langsung idahna kerna si e. Bagenda nina, “Foto kami ate kami piga-piga biri-biri, emaka ilebuh kami biri-biri e gelah deherina kami. Tapi, la ia nggit reh perban la tandaina sora kami. Kenca si e, reh me sekalak anak dilaki si kitik denga, ia permakan biri-biri e. Sanga lebuhna biri-biri e, mis ikutkenna ia.”

2-3. (a) Kai buktina pengikut Jesus megiken sora Jesus? (b) Kai kari sibahas bas artikel enda ras artikel seterusna?

² Pengalamen turis ndai ngingetken kita man kata-kata Jesus kerna biri-birina ntah pe murid-muridna. Bagenda nina, ‘Begiken kalak e pagi soraku.’ (Joh. 10:16) Tapi Jesus gundari tading i surga. Emaka uga carata megiken ia? Adi sidalanken kai si ajarkenna, e buktina sibegiken ia.​—Mat. 7:24, 25.

³ Bas artikel enda ras bas artikel seterusna, sibahas kari piga-piga pengajaren Jesus. Sipelajari kari kai si ajarken Jesus man banta kerna kai si ula nai silakoken ras kerna kai si arus silakoken. Gundari, mari sibahas lebe dua perentah arah permakan si mehuli kerna kai si ula nai silakoken.

4. Menurut Lukas 12:29, kai si erban kita “kuatirsa”?

⁴ Baca Lukas 12:29. Iahken Jesus pengikutna gelah ‘ula nai kuatirsa’ kerna keperlun kalak e tiap wari. Siteh maka nasehat Jesus e lalap benar ras erguna. Tapi mon-mon mesera siakap ngelakokenca. Engkai?

5. Engkai maka piga-piga kalak kuatir kerna keperlunna?

 ⁵ Piga-piga kalak banci saja kuatir kerna keperlunna, bagi pangan, paken, ras ingan tading. Banci saja kalak e tading bas negara si susah ekonomina. Banci saja mesera kap kalak e ndatken sen guna ncukupi keperlun keluargana. Ntah enggo mate kalak si cari makan guna keluarga e, emaka lanai bias senna ncukupi keperlun keluargana. Banci saja lanai lit dahinna ntah pe lanai lit uang masukna perban pandemi COVID-19. (Peng. 9:11) Adi bage si terjadi man banta ntah pe lit masalah si debanna, uga nge carata ngikutken nasehat Jesus gelah ula nai kuatirsa?

6. Ceritaken kai si pernah terjadi man Rasul Petrus i Laut Galilea.

⁶ Bas sada wari, sanga Rasul Petrus ras rasul-rasul si debanna sangana i datas perahu bas Laut Galilea, terjadi angin si meter. Paksa si e, idah kalak e Jesus erdalan i datas lau. Bagenda nina Petrus, “O Tuan, adi kam kin e, suruh min aku erdalan i datas lau ndahi kam.” Ngaloi Jesus, nina, “Mari!” Emaka, ndarat Petrus arah perahu nari janah “erdalan ia i datas lau ndahi Jesus.” Kai si terjadi kenca si e? “Sanga nen [Petrus] angin si meter e, mbiar ia. Sanga mulai ia gedap, serko ia,  ‘O Tuan, sampati aku!’” Mis itangkap Jesus tanna janah selamatkenna ia. Penting kel siinget maka sanga terus itatap Petrus Jesus, banci ia erdalan i datas lau. Tapi kenca inen Petrus angin si meter e, dungna mbiar ia janah ragu ia. Emaka mulai ia gedap.​—Mat. 14:24-31.

7. Kai si banci sipelajari arah pengalamen Petrus?

⁷ Banci kita erlajar arah pengalamen Petrus. Sanga ndarat Petrus arah perahu nari ras erdalan ia i datas lau, la isangkana mbiar ia ngenen angin si meter e ras mulai gedap. Situhuna terus nge atena erdalan i datas lau ndahi Jesus. Tapi, perban lanai terus inenna Jesus, dungna mbiar ia ngenen angin si meter e. Perlu Petrus erkiniteken gelah banci ia tetap erdalan i datas lau. Kita pe perlu erkiniteken gelah ngasup ngadapi percuban si nguji kinitekenta. Adi la kita tek man Jahwe ras janji-janjiNa, kinitekenta banci lemah, tempa-tempa gedap kita perban kuatir. La soal uga beratna masalah si sangana siadapi si bali bagi angin si meter, arus tetap kita tek man Jahwe ras tek kita maka ngasup Ia nampati kita. Uga carana kita banci tek?

8. Kai si banci nampati kita gelah ula kuatirsa kerna keperlunta?

⁸ Arus kita tek man Jahwe gelah ula kita kuatirsa perban masalahta. Arus siinget maka Jahwe, Bapakta si perkeleng, enggo erjanji maka pasti berekenNa keperlunta adi sipelebe ngelayani Ia. (Mat. 6:32, 33) Enggo lalap itepatiNa janjiNa e. (Ul. 8:4, 15, 16; Ms. 37:25) Adi perik-perik ras bunga-bunga saja pe perdiateken Jahwe, pasti kita pe perdiatekenNa! La perlu kita kuatirsa kerna kai kari sipan ras sipake. (Mat. 6:26-30; Pil. 4:6, 7) Bali bagi orang tua si perkeleng si nikapken keperlun anak-anakna, Bapakta si i surga pe keleng ateNa umatNa. Emaka pasti berekenNa keperlun kalak e. Ula kita sitik pe ragu maka pasti nge bereken Jahwe keperlunta!

9. Kai si banci sipelajari arah sekalak turang seninata ras diberuna?

⁹ Cuba ukuri sada pengalamen si mbuktiken maka pasti ibereken Jahwe keperlunta. Sekalak turang seninata ras diberuna ngelayani jadi perintis. Legi kalak e atena piga-piga turang senina si tading bas ingan ngongsi gelahna banci ikut perpulungen. Arus ibaba kalak e motorna si enggo metua sada jam lebih gelah banci seh bas ingan ngongsi e. Nina turang seninata e, “Kenca dung perpulungen, undang kami kalak e man ras kami. Tapi dungna sadar kami, kepeken lanai lit pangan kami i rumah.” Emaka, kai si terjadi kenca si e? Nina turang senina e, “Kenca seh kami rumah, idah kami lit pangan bas dua kantong plastik si galang i lebe-lebe pintu kami. La teh kami ise si namakenca i je. Tuhu-tuhu bereken Jahwe keperlun kami.” La ndekah kenca si e, ceda motor kalak e. Padahal motor e me si pake kalak e guna erberita. Tapi la bias sen kalak e mpekenasa. Sanga baba kalak e motorna e ku bengkel guna meteh asa kai kari biaya mpekenasa, reh sekalak dilaki, nce sungkunna ia, “Motor ise enda?” Ikataken turang seninata e maka e motorna janah perlu ipekena. Nina dilaki e, “Labo dalih. Merhat diberuku motor si bagenda ras mejile kapna warna motor enda. Sekai nge banci kutukur motorndu enda?” Emaka idayaken turang senina e motorna ndai, janah senna bias nukur motor si deban. Bagenda nina turang seninata e, “La terturiken uga riahna ukur kami bas  wari e! Teh kami enda labo rembang terjadi. Enda pasti penampat Jahwe.”

10. Uga Masmur 37:5 nampati kita gelah la kuatirsa kerna keperlunta?

¹⁰ Adi sibegiken permakan si mehuli ras lanai kita kuatirsa kerna keperlunta tiap wari, banci kita tek maka pasti sikapken Jahwe keperlunta. (Baca Masmur 37:5; 1 Pet. 5:7) Ukurilah masalah-masalah si ituriken bas  paragrap 5 ndai. Seh asa gundari banci gunaken Jahwe kepala keluarga ntah pe kalak si mere kita dahin guna nikapken keperlunta tiap wari. Adi sekalak kepala keluarga lanai ngasup ngelakoken si e ntah pe adi lanai lit dahinta, pasti sikapken Jahwe keperlunta alu cara-cara si deban. Tek kel kita kerna si e. Gundari, mari sibahas kai ka nasehat arah permakan si mehuli kerna kai si ula nai silakoken.

11. Bagi si ikataken bas Matius 7:1, 2, kai si ikataken Jesus si ula nai silakoken, janah engkai maka mesera ndalankenca?

¹¹ Baca Matius 7:1, 2. Iteh Jesus maka jelma la sempurna janah kesalahen kalak si rusur inenna. E me sebapna maka bagenda nina, “Ula nai kena ngakimi.” Banci saja enggo siusahaken kel lanai ngakimi turang seninata. Tapi mon-mon gagal denga kita. Adi turah bas pusuhta guna ngakimi kalak, kai nge si arus silakoken? Begikenlah Jesus ras usahakenlah asa ngasupta gelah ula nai ngakimi.

12-13. Uga usihen Jahwe nampati kita gelah lanai ngakimi kalak si deban?

¹² Banci kita tersampati alu ngukuri usihen arah Jahwe. Si nen Jahwe arah kita eme kai si mehuli. Banci siteh kerna si e arah perbahanenNa man Raja Daud si enggo ngelakoken kesalahen si serius. Contohna, erlua-lua Daud ras Batseba janah aturkenna gelah dilaki Batseba terbunuh bas perang. (2 Sam. 11:2-4, 14, 15, 24) Akibatna susah akap Daud ras keluargana, termasuk diberu-diberuna si deban. (2 Sam. 12:10, 11) Selain si e, bas sada wari, la andalkenna Jahwe janah kirana jumlah pasukenna, padahal labo pernah suruh Jahwe lakokenna bage. Banci saja lakokenna bage perban bangga ia man pasukenna si enterem ras tek ia maka pasukenna e banci ngelindungi bangsana. Kai akibatna? Lit kira-kira 70.000 kalak Israel si mate perban wabah penakit!​—2 Sam. 24:1-4, 10-15.

¹³ Adi nggeluh kam bas Israel paksa si e, uga nge pendapatndu kerna Daud? La nge kapndu cocok ia iampuni Jahwe? Jahwe labo bage perukurenNa. InenNa maka Daud e setia segedang geluhna janah tuhu-tuhu ia robah. Emaka, ampuni Jahwe kesalahen Daud si serius e. Teh Jahwe maka keleng kel ate Daud Ia ras lakokenna atena si benar. Pasti ngata bujur kel kita perban si rusur inen Jahwe bas kita eme sipat-sipatta ras perbahanenta si mehuli.​—1 Raj. 9:4; 1 Kro. 29:10, 17.

14. Kai si perlu ilakoken kalak Kristen gelah ula nai hakimina kalak si deban?

¹⁴ Labo arapken Jahwe gelah kita sempurna, emaka arusna kita pe labo siarapken kalak si deban sempurna janah sinenlah kai si mehuli arah kalak si deban. Memang menukah ngenen kekurangen kalak ras mandangi kalak. Tapi, adi siusih Jahwe, banci kita kerja sama alu mehuli ras kalak si deban amin pe siteh kekurangenna. Berlian si lenga ibentuk, banci saja la mejile man tatapen. Tapi kalak si pentar, tehna adi enggo ibentuk berlian e, banci kari seh kel jilena  ras meherga. Bali bagi Jahwe ras Jesus, ula lalap sinen kekurangen kalak tapi sinenlah sipat-sipatna si mehuli.

15. Kai deba nari si banci nampati kita gelah ula nai sihakimi kalak?

¹⁵ Selain sinen sipat-sipat si mehuli arah kalak, kai deba nari si banci nampati kita gelah ula nai ngakimi kalak? Cuba siukuri uga situasi kalak e. Perdiatekenlah usihen Jesus enda. Bas sada wari i rumah pertoton, idah Jesus sekalak janda si mesera pergeluhna namaken dua sen logam si kitik kel ergana ku kotak persembahen. Labo tersungkun-sungkun Jesus, “Engkai maka la terbuen itamaken diberu e?” Si inen Jesus labo uga buena si bereken janda e, tapi si ukurina eme engkai maka lakokenna bage ras uga situasina. Puji Jesus ka diberu e perban enggo berekenna si mehulina.​—Luk. 21:1-4.

16. Kai si banci pelajarindu arah pengalamen Veronica?

¹⁶ Banci kita erlajar uga pentingna ngukuri situasi kalak arah pengalamen Veronica. Bas runggun inganna ngelayani, lit sekalak pernanden ras anakna dilaki. Bagenda nina Veronica, “Si kuidah kalak e la ratur reh ku perpulungen ras erberita. Perban si e, negatip perukurenku man kalak e. Tapi bas sada wari erberita aku ras pernanden e. Ceritakenna uga beratna masalah si adapina perban lit penakit  mental anakna. Usahakenna asa ngasupna guna ndatken keperlun kalak e ras usahakenna gelah tetap kalak e rembak ras Jahwe. Perban penakit anakna e, mon-mon arus ia pulung ku runggun si deban.” Emaka, bagenda nina Veronica, “La kusangka mberat kel masalah si adapina. Gundari, keleng ateku ia ras kuergai kel kerina si lakokenna bas ngelayani Jahwe.”

17. Perentah kai si lit bas Jakup 2:8 si arus silakoken, janah uga carata ngelakokenca?

¹⁷ Kai si arus silakoken adi siteh maka enggo sihakimi turang seninata? Siingetlah maka arus sikelengi turang seninata. (Baca Jakup 2:8.) Selain si e, arus tutus ateta ertoto man Jahwe gelah sampatiNa kita ula nai ngakimi turang seninata e. Gelah sesuai perbahanenta ras totota e, arus siusahaken ercakap-cakap ras ia gelah banci sitandai ia terdauhen. Banci siajak ia erberita ras kita ntah pe man ras kita. Adi enggo sitandai turang seninata terdauhen, banci siusih Jahwe ras Jesus eme ngenen kai si mehuli bas ia. Alu bage, sibuktiken maka sibegiken perentah permakan si mehuli eme lanai ngakimi kalak.

18. Kai buktina sibegiken sora permakan si mehuli?

¹⁸ Bali bagi biri-biri si begikenna permakanna, pengikut Jesus pe begikenna sora Jesus. Adi siusahaken gelah lanai kuatir kerna keperlunta ras lanai sihakimi kalak si deban, pasti pasu-pasu Jahwe ras Jesus kita. La soal kita bagin arah “rarasen si kitik” ntah pe ‘biri-biri si deban,’ banci terus sibegiken ras sipatuhi sora permakan si mehuli. (Luk. 12:32; Joh. 10:11, 14, 16) Bas artikel berikutna, sipelajari kari dua nasehat Jesus man pengikutna si arus idalanken kalak e.