1. Wat da wan reezn wai Jeezas mi kompyaa ih falowaz tu sheep?

JEEZAS mi kompyaa ih rilayshanship wid ih falowaz tu di kloas rilayshanship bitween wahn shepad an ih sheep dehn. (Jan 10:14) Dat da wahn gud way fi kompyaa dis kaina rilayshanship. Di sheep dehn noa dehn shepad an dehn onli lisn tu fi hihn vais. Wahn man weh mi-di chravl wid wahn groop a peepl mi si how dis hapm. Hihn seh: “Wi mi waahn tek sohn picha a sohn sheep ahn wi mi-di chrai get dehn fi kohn kloasa tu wi. Bot dehn neva kohn tuwaadz wi bikaaz dehn noh noa fi wee vais. Den wahn lee shepad bwai mi kohn, an az soon az hihn kaal owt fi dehn, dehn staat fala hihn.”

2-3. (a) How Jeezas falowaz shoa dat dehn di lisn tu fi hihn vais? (b) Weh wi wahn kansida eena dis aatikl ahn di neks wan?

² Di ekspeeryens a da man weh mi-di chravl rimain wi a weh Jeezas mi seh bowt ih sheep, hoo da ih disaipl dehn. Hihn mi seh: “Dehn wahn lisn tu mi vais.” (Jan 10:16) Bot Jeezas deh da hevn. Soh how wi ku lisn tu hihn? Wan way wi lisn tu hihn da wen wi du di tingz weh hihn teech wi fi du.—Mach. 7:24, 25.

³ Eena dis aatikl ahn di neks wan, wi wahn kansida som a Jeezas teechinz. Wi wahn si how Jeezas mi teech wi dat wi shuda stap du sertn tingz ahn wi shuda du ada tingz insted. Fers, wi wahn kansida too spesifik tingz weh Jeezas seh wi shuda stap du.

4. Akaadn tu Look 12:29, weh ku mek wi feel “schres owt”?

⁴ Reed Look 12:29. Jeezas mi tel ih falowaz fi “stap schres owt” bowt di tingz weh dehn need fi liv. Wi noa dat eni kongsl fahn Jeezas aalwayz waiz ahn rait. Wi waahn put dehn eena praktis, bot sohntaim ih ku bee haad. Wai?

5. Wai wi mait schres owt bowt di tingz weh wi need fi liv?

 ⁵ Sohn peepl mait schres owt bowt di tingz weh dehn need laik food, kloaz, ahn wahn plays fi liv. Dehn mait liv eena wahn konchri wehpaat lata peepl poa ahn jab haad fi fain. Ih mait bee haad fi mek dehn bring een moni fi tek kayr a dehn famili. Er di persn weh yoostu bring een moni fi di famili ded, soh now di famili noh ga moni fi di tingz weh dehn need. Aalso, lata peepl looz dehn jab bikaaz a di COVID-19 pandemik. (Eccl. 9:11) If eni wan a wi ekspeeryens dehnya tingz er eni ada chalenjiz, how wi ku fala Jeezas advais fi stap schres owt?

6. Wahn taim, weh mi hapm tu di apasl Peeta?

⁶ Wahn taim, Peeta ahn di ada apasl dehn mi deh eena wahn boat pahn di See a Gyalilee joorin wahn staam ahn dehn mi si Jeezas di waak pahn tap a di waata. Peeta mi seh: “Laad, if da yoo dat, den mek Ah waak tuwaadz yu pahn tap a di waata.” Afta Jeezas mi tel ahn fi “kom,” Peeta kom owta di boat ahn “waak pahn tap a di waata tuwaadz Jeezas.” Noatis weh hapm neks. “Wen Peeta si di staam, ih geh frayd. Ahn wen ih staat tu sink ih hala owt: ‘Laad, kohn sayv mi!ʼ” Jeezas  mi schrech owt ih han ahn sayv ahn. Ih impoatant fi memba dat Peeta kuda mi waak pahn waata az lang az ih mi kip di luk pahn Jeezas. Bot wen Peeta mi luk pahn di staam, ih mi geh frayd ahn staat dowt an ih staat tu sink.—Mach. 14:24-31.

7. Weh wi ku laan fahn Peeta egzampl?

⁷ Wee ku laan fahn Peeta egzampl. Wen Peeta mi step owta di boat fi waak pahn waata, hihn neva tink ih mi wahn wori bowt di staam. Hihn mi waahn kip di waak pahn tap a di waata til ih reech Jeezas. Bot insteda foakos pahn Jeezas, hihn mi staat tu wori bowt di staam. Tudeh day, wi need fi ga fayt soh dat wi ku fays di prablemz weh wi goh chroo, jos laik how Peeta mi need fi ga fayt fi waak pahn waata. If wi noh kip di foakos pahn Jehoava ahn fi hihn pramis dehn, wi fayt wahn geh week, ahn wi wahn staat sink eena aala wi woriz. Soh eevn if wi di fays sohn big prablemz, wi haftu kip di foakos pahn Jehoava ahn chros dat hihn wahn help wi. How wi ku du dat?

8. Weh ku help wi fi noh schres owt bowt weh wi need?

⁸ Insteda di schres owt bowt wi prablemz, wi need fi chros eena Jehoava. Memba dat wi lovin Faada, Jehoava, pramis fi gi wi weh wi need if wi put spirichwal tingz fers eena wi laif. (Mach. 6:32, 33) Wi ku chros hihn bikaaz hihn aalwayz kip ih pramis dehn. (Deut. 8:4, 15, 16; Ps. 37:25) If Jehoava tek kayr a di berdz ahn di flowaz, den fi shoar hihn wahn gi wi food fi eet ahn kloaz fi wayr! (Mach. 6:26-30; Fil. 4:6, 7) Jos laik how payrents gi dehn chiljren weh dehn need bikaaz dehn lov dehn, Jehoava giv ih peepl weh dehn need bikaaz hihn lov dehn tu. Soh, wee ku bee shoar dat Jehoava wahn tek kayr a wi!

9. Weh yu ku laan fahn di ekspeeryens a di kopl?

⁹ Mek wi luk pahn wahn ekspeeryens weh proov tu wi dat Jehoava ku gi wi weh wi need. Wahn kopl weh deh eena ful-taim servis mi jraiv fi moa dan wahn owa fi pik op sohn sistaz weh mi-di liv da wahn plays fi refyujee ahn kehr dehn da wahn Kristyan meetin. Di brada seh: “Afta di meetin, wi mi invait di sistaz da wi hows fi eet, bot den wi riyalaiz dat wi neva ga food fi gi dehn.” Soh weh di kopl mi du? Di brada seh: “Wen wi reech hoam, wi noatis too big bag a food fronta wi doa. Wi neva noa hoo lef it deh bot wi mi noa dat Jehoava mi-di tek kayr a wi.” Sohn taim afta dat, di kopl kaar mi brok dong. Dehn mi need dehn kaar fi di minischri, bot dehn neva ga moni fi fiks it. Dehn mi kehr it da wahn mekyanik shap fi si humoch ih wuda kaas fi fiks it, sayhn taim wahn man kom eena di shap an aks: “Fi hoo kaar dis?” Di brada seh dat da fi hihn bot ih need fi geh fiks. Di man tel ahn: “Dat aarait, mai waif waahn disya sayhn kaina kaar an eena dis sayhn kala tu. Humoch yu waahn far it?” Di brada sel ih kaar an ih mi geh inof moni fi bai wahn neks wan. Hihn en aaf di seh: “Dis neva jos hapm rait soh, wee noa dat da mi Jehoava hoo help wi. Wee mi veri hapi!”

10. How Psalm 37:5 inkorij wi fi noh schres owt bowt di tingz weh wi need?

¹⁰ Wen wi lisn tu Jeezas ahn stap schres bowt di tingz weh wi need, wi ku bee shoar dat Jehoava wahn provaid fi  wi. (Reed Psalm 37:5; 1 Peet. 5:7) * Tink bowt di difrent chalenjiz weh geh menshan eena  paragraaf 5. Til now, Jehoava mi praabli yooz wahn famili hed er wi baas fi help wi geh weh wi need. If di hed a wahn famili kyaahn tek kayr a ih famili agen er if wi looz wi jab, Jehoava wahn tek kayr a wi eena som ada way. Wee ku bee shoar a dat. Mek wi kansida sohnting els weh Jeezas tel wi fi stap du.

11. Akaadn tu Machyu 7:1, 2, weh Jeezas tel wi fi stap du ahn wai dat ku bee haad?

¹¹ Reed Machyu 7:1, 2. Jeezas mi noa dat hyoomanz noh perfek, soh ih eezi fi mek dehn foakos pahn di mistayk a adaz. Dat da wai hihn mi seh: “Stap joj adaz.” Wi praabli chrai haad noh fi joj wi bradaz ahn sistaz. Bot, sohntaim wi mait stil en op di joj dehn. If wi noatis dat sohntaim wee da di wan weh di foakos pahn di mistayk a adaz, weh wi shuda du? Lisn tu Jeezas ahn chrai haad fi stap joj adaz.

12-13. How Jehoava egzampl ku help wi fi stap joj adaz?

¹² Wi ku benifit wen wi tink bowt Jehoava egzampl. Hihn foakos pahn di gud eena peepl. Tink bowt weh hihn mi du wen King Dayvid mi komit sohn seeryos sin. Dayvid mi komit adolchri wid Bat-sheeba, an ih mi eevn mek dehn kil fi shee hozban. (2 Sam. 11:2-4, 14, 15, 24) Bikaaz a dat, hihn an ih hoal famili mi sofa, inkloodin ih ada waif dehn. (2 Sam. 12:10, 11) Wahn nada taim, Dayvid neva shoa ful chros eena Jehoava wen hihn mi konk humoch soaljaz mi deh eena Izrel aami, sohnting weh Jehoava neva koman ahn fi du. Dayvid mi praabli du dat bikaaz ih mi prowd a how big ih aami ahn bikaaz a dat, ih mi chros eena ih aami fi protekshan. Wat da-mi di rizolt? Bowt 70,000 Izrelaits mi ded fahn wahn dizeez!—2 Sam. 24:1-4, 10-15.

¹³ If yoo mi liv bak den, weh yoo wuda mi tink bowt Dayvid? Yu wuda mi tink dat Jehoava shudn fergiv ahn? Jehoava neva tink laik dat. Hihn mi foakos pahn how Dayvid mi faytful aal ih laif ahn pahn di fak dat hihn mi ripent. Soh, Jehoava mi fergiv Dayvid fi di seeryos sin dehn weh ih mi komit. Jehoava mi noa dat Dayvid mi lov ahn wahn lat ahn dat hihn mi waahn du weh rait. Wee soh tankful dat Jehoava foakos pahn wi gud kwalitiz ahn di gud tingz weh wi du.—1 Ki. 9:4; 1 Chron. 29:10, 17.

14. Weh ku help Kristyanz fi stap joj adaz?

¹⁴ Bikaaz Jehoava noh ekspek wi fi bee perfek, wee shudn ekspek adaz fi bee perfek eeda. Wi shuda luk fi di gud eena dehn. Ih eeziya fi si di imperfekshanz a adaz ahn kritisaiz dehn. Bot sohnbadi weh waahn bee laik Jehoava wahn werk gud wid adaz eevn wen dehn noatis ada peepl imperfekshanz. Wahn daimon weh noh kot ahn palish noh luk priti, bot wahn waiz persn noa dat ih wahn luk byootiful afta dehn kot it ahn shayp it owt. Laik Jehoava ahn Jeezas, wi shudn foakos pahn di imperfekshanz a adaz bot pahn dehn gud kwalitiz.

15. Wen wi tink bowt ada peepl sichuwayshan eena laif, how dat ku help wi fi noh joj dehn?

¹⁵ Wen wi foakos pahn di gud kwalitiz a adaz, ih help wi fi noh joj dehn. Bot wat els ku help wi? Wi fi put wiself  eena fi dehn sichuwayshan. Kansida dis egzampl. Wahn day wen Jeezas mi deh da di templ, ih si wahn poa wido jrap een too smaal koin eena di kanchribyooshan baks. Dehndeh koin mi bayli wert eniting. Bot Jeezas neva aks: “Wai shee neva put een moa moni?” Insteda foakos pahn di amonk a moni weh di wido mi giv, Jeezas mi tink bowt fi shee sichuwayshan eena laif an ih mi foakos pahn di reezn wai shee mi-di giv.—Look 21:1-4.

16. Weh yoo ku laan fahn Sista Veronica ekspeeryens?

¹⁶ Mek wi si kansida di ekspeeryens a wahn sista weh naym Veronica. Fi shee ekspeeryens wahn shoa wi wai ih impoatant fi tink bowt how ada peepl sichuwayshan eena laif stan. Wahn singl ma an ih son mi deh eena di sayhn kangrigayshan weh Veronica mi deh. Veronica seh: “Tu mee, ih mi luk laik dehn mi bayli deh da di meetin dehn er eena feel servis, an Ai mi joj dehn bikaaz a dat. Bot den Ah gaahn preech wid di ma ahn shee mi tel mi bowt di haad taim weh shee mi-di goh chroo wid ih son weh ga wahn mental disabiliti. Shee mi-di du ih bes fi tek kayr a dehn fizikal ahn spirichwal needz. Bikaaz a di kaina disabiliti weh ih son gat, sohntaim ih werk beta fi mek dehn goh da wahn nada kangrigayshan  meetin.” Veronica en aaf di seh: “Ah neva noa dat fi shee laif mi soh haad. Now Ah reeli lov ahn rispek dis sista fi aal weh shee du fi serv Jehoava.”

17. Weh Jaymz 2:8 tel wi fi du, ahn how wi ku du dat?

¹⁷ Weh wi shuda du if wi riyalaiz dat wi mi joj wan a wi brada er sista? Wi need fi memba dat wi fi lov dehn. (Reed Jaymz 2:8.) Wi shuda aalso pray tu Jehoava ahn bayg ahn fi help wi stap joj adaz. Wi ku werk lang wid wi pryaaz wen wi spen taim wid di persn weh wi joj. Dat wahn help wi fi geh fi noa ahn beta. Wi ku aks ahn fi preech wid wi er jain wi fi wahn meel. Az wi geh fi noa wi brada er sista beta, wi ku chrai wi bes fi bee laik Jehoava ahn Jeezas ahn luk fi di gud eena dehn. Wen wi du dis, wi shoa dat wi di fala Jeezas koman fi stap joj adaz.

18. How wi ku shoa dat wi di lisn tu Jeezas vais?

¹⁸ Jos laik how wahn sheep lisn tu di vais a ih shepad, Jeezas falowaz lisn tu fi hihn vais. If wi chrai haad fi noh schres owt bowt di tingz weh wi need ahn stap joj adaz, Jehoava ahn Jeezas wahn bles wi. Weda wi da paat a di “lee flak” er di “ada sheep,” mek wi kantinyu lisn an obay di vais a fi wee shepad, Jeezas. (Look 12:32; Jan 10:11, 14, 16) Eena di neks aatikl, wi wahn kansida too tingz weh Jeezas mi tel ih falowaz fi du.