1. Ka uagu lariñaga Hesusu ítara haña lan lani disipulugu kei mudún?

ARIÑAGATI Hesusu ítara liña lan lumadagua hama lani disipulugu kei lumadagua aban hóuniri mudún hama lilügüniña mudún (Huan 10:14). Furanguti katei le ladüga subudi hamuti mudún lumalali le óunigirubaliña ani ñǘdüntiña lun. Ariha lumuti aban asariñahati katei le lau lagu guánarügü. Abahüdahati: “Busentiwa yebe lun wadiraaruniña mudún, ani wátiwa yebe houn, gama lumoun, mayarafaduntiña ladüga ibidiñe lan wamalali houn. Ábati lachülaagun nibureinti le óunigirubaliña. Lagumeseruña yebe agúaha houn, aba hasigiruni”.

2, 3. a) Ida liña harufuduni lani Hesusu disipulugu luagu aganba hamani lumalali? b) Kaba wariha lidan aturiahani le?

² Le asuseredubei lun asariñahati ligía haritaguagüda lumutiwa luagu dimurei le lariñagubei Hesusu hadügübei lan lani disipulugu. Ariñagati: “Haganbubadina” (Huan 10:16). Anihein Hesusu sielu. Ligíati, ida luba waganbuni? Aban igaburi lun waganbuni, lau wadügüni le larufudahabei (Mat. 7:24, 25).

³ Lidan aturiahani le luma le lunbei liabin, weteniruba lun fiu lídangiñe katei le larufudahabei Hesusu. Keime warihini, arufudahati Hesusu woun lunti lan wígiruni wadügün ítaga katei ani lunti lan wadügün amu. Furumiñe, akutiha wamá bián katei le lariñagubei hóuniri mudún le buídutimabei moun lumuti lan wadügüni.

4. Según Lúkasi 12:29, ka adügübei lun nidiheri wamá saragu?

⁴ (Aliiha huméi Lúkasi 12:29). Ariñagati Hesusu houn lani  disipulugu lun lan madiheridun hamá saragu luagu libihíniwa le mégeiwabei lun lawinwandúniwa. Subudi wamuti buidu lan ani hu lan adundehani le súnwandan. Íbini busén wamá gaganbadi wamá lun adundehani le, anihein dan hénrengu lan. Ka uagu?

5. Ka uagu añahein lubéi hádangiñe íbirigu hawinwanduña lau saragu idiheri?

 ⁵ Másiñati añahein lan íbirigu hawinwanduña lau saragu idiheri lun hibihin éigini, daüguaü tuma muna. Háfuga anihein lan turobuli lánina seinsu lidan ageiraü le ñein habéi. O gürewei lan houn hagañeirun seinsu nófuti lun hanuriahaniña haduheñu. Másiñati giñe hilá lan le etenirubei houn iduheñu ani ha híbiri rédeihaña sin ni aban gáwanaü. Ani adügaali sandi COVID-19 lun herederun saragu gürigia mawadigimaridunga ani adügati katei le lun mebelurun lan seinsu múnadoun (Apur. 9:11). Anhein sügühadiwa lubéi lídangiñe lénrengunga le o lídangiñe amu, ida luba wafalaruni ladundehan Hesusu lun wígiruni idiheri?

6. Afuranguagüda huméi le asuseredubei lun apostolu Féduru luagu aban dan?

⁶ Luagu aban dan, tídanñein meha aban ugunei apostolu Féduru úara hama ha híbiri apostolugu lidan barana Galiléa lidan aban lanarime liñawan dan dan le harihinbalin Hesusu éibuga ligibuagu duna. Aba lariñagun Féduru lun: “Nabureme, anhein buguya lubéi, éibugagüda bana giñe ligibuagu duna chülǘ le ñein bubéi”. Dan le lariñagunbei Hesusu lun: “Higabuti”, “aba lararirun Féduru tídangiñe ugunei, aba lagumeserun éibuga le ñeinhin lubéi Hesusu ligibuagu duna. Dan le lasandirunbalin lere garabali, aba lanufudedagun, aba lagumeserun abulucha; aba lagúaragun, lariñaga: ‘Sefu bana Nabureme!’ Aba lárügüdüni Hesusu lúhabu”, aba lesefuruni. Arihatiwa éibuga lan Féduru ligibuagu duna lidan aban lanarime liñawan dan lidan  anihán lan aríaguei Hesusu, danti le lagumeserunbei aríaguei liñawan dan, aba lebelurun anufudei lun luma machouruni, ábati lagumeserun abulucha (Mat. 14:24-31).

7. Ka wafurendeirubei lídangiñe le asuseredubei lun Féduru?

⁷ Furendeitiwa aban katei lídangiñe le asuseredubei lun Féduru. Dan le lan lararirunbei tídangiñe ugunei, gumeseti éibuga ligibuagu duna, masaminarunti yebe ladigirubei lan larihin ani labuluchuba lan. Le labusenrunbei yebe ladügün, lachülürün le ñeinhin lubéi Hesusu, gama lumoun, mibihin lumuti ladüga aba lan ladigiruni larihin luagun liñawan dan. Inarüni siñá lan wéibugun ligibuagu duna, gama lumoun gagibuguatiwa luma turobuli le óuchagubalin wafiñen. Ánhawa mafiñerun luagu Heowá luma luagu le füramase lubéi, lalouguaduba wafiñen kamá hamuga wabuluchuña lidan wadiheri. Meberesenga durumandei le lunbei liabin wawagun, sigí wamá íchigei warihin luagun Heowá luma luagun iyaraani le luágubei lun líderaguniwa. Ida luba wibihini?

8. Kaba íderaguawa lun madiheridun wamá saragu luagu le wemegeirubei?

⁸ Líderagubadiwa wíchuguni wafiñen luagu Heowá lubaragiñe wedererun adiherida. Haritagua waméi füramase lan Wáguchi Bungiu le hínsiñehabubei, anhein lan wíchiga Larúeihan lidan furumiñeti lúgaaru, líchugubei lan le wemegeirubei woun (Mat. 6:32, 33). Súnwandan lagunfuliruni Heowá le füramase lubéi (2 Lur. 8:4, 15, 16; Sal. 37:25). Anhein góunigi lubaliña Heowá dunuru luma burí fuluri, moun lumuti wadiheridun luagu kaba lan weiga o kaba lan wadaüra (Mat. 6:26-30; Fili. 4:6, 7). Ítara kei lánhingichuniña ínsiñeni agübürigu ha beresebaña hau hasaanigu lun líchuguni le hemegeirubei houn, ínchaha lumuti giñe ínsiñeni Wáguchi Bungiu le siélubei lun líchuguni le hemegeirubei lubúeingu houn. Ítara liña, gayaraati wachoururuni lóunigirubadiwa lan Heowá.

9. Ka hafurendeirubei lídangiñe le asuseredubei houn aban feru maríeitiña?

⁹ Ariha wamá aban sügǘ le arufudubalin gayara lan letenirun Heowá lun le wemegeirubei. Aban weyu, aba haweiyasuhan aban feru maríeitiña ha eseriwidubaña lidan dan dayarüti lóugiñe aban oura tidan hakarün lun houdin áluaha fiu íbirigu würiña ha awinwandubaña lidan fulasu le ñein lubéi hawinwanda gürigia ha anurahabaña hageiragiñe lun hanügüniña adamuridagua. Abahüdahati íbiri: “Lárigiñe adamuridaguni, aba wariñagun houn íbirigu ha lun houdin úara wama wábiñoun lun weigin somu katei ñein. Ábati waritagun ua lan ni kata wama lun wíchuguni houn”. Kaba méhati hadüga? Ariñagati íbiri: “Dan le wachülürünbei múnadoun, aba wadarirun bián sagü wéinamutu buin lau lubuña éigini. Ibidiñeti woun ka lan ígirubarun ñein. Góunigi lumutiwa Heowá”. Dan lárigiñe, aba tagünrinchagun hakarün maríeitiña ha. Ani megei hamutu meha lun hani ministeriu, gama lumoun maseinsuntiña meha lun haranseragüdünu. Aba hanügünu lidoun fulasu le ñein lubéi taransehóua karü lun hasubudiruni átiribei lan lebegi taransehóun. Ábati lachülürün aban wügüri álügüdaha ka lan taburemebei. Aba lariñagun íbiri luagu likarün lan ani megei tan taransehóun. Aba lóunabun wügüri ligía: “Úati mégeiti luagu lira. Anuhán tibe karü to tabusenruboun nani weiriou ani libe koloru le. Átiri bamuriahan tuagu?”. Ibihati íbiri ligía saragu seinsu lun lagañeihan amu. Ariñagati: “Ibidiñeti nun ida luba lan nafuranguagüdüni le wasandirubei weyu ligía. Subudi wamuti mama lan ítaraguarügüti katei lira. Heowá adügübei lun ítara lan”.

10. Ida liña líderaguniwa le lariñagubei Sálumu 37:5 lun madiheridun wamá luagu le wemegeirubei?

¹⁰ Dan le waganbuni le lariñagubei hóuniri mudún le buídutimabei ani madiheridun wagía saragu luagu le wemegeirubei, gayaraabei wachoururuni líchugubei lan Heowá le wemegeirubei  woun (aliiha huméi Sálumu 37:5; 1 Fe. 5:7). Samina wamá luagun sügǘ hénrenguti le uágubei layanuhóua lidan  párafu 5. Gayaraati darí lan guentó yusu laaña lan Heowá hachügüdina iduheñu o iyubudirigu lun líchuguni le wemegeirubei woun. Ánheinti siñaali lubéi líchuguni hachügüdina tílana muna le hemegeirubei liduheñu houn o rédeihadiwa lan mawadigimaridunga, ladariruba Heowá amu igaburi lun líchuguni le wemegeirubei woun. Chóuruti ladügübei lan. Guentó, akutiha wamá amu katei le lariñagubei hóuniri mudún le buídutimabei moun lumuti lan wadügüni.

11. Según Matéu 7:1, 2, ka lariñagubei Hesusu moun lumuti lan wadügüni ani ka uagu gayara lubéi hénrengu lan?

¹¹ (Aliiha huméi Matéu 7:1, 2). Subudi lumuti meha Hesusu chará wamá ani hechu wamá etenira lun hachara amu. Ligía lariñagunbei: “Míchiga humá hadurun amu”. Íbini áfaagua wamá lun míchugun wamá hadurun wíbirigu, mama súnwandan wibihini. Ka gayaraabei wadügüni lidan kesi le? Waganbuni le lariñagubei Hesusu luma lun wáfaagun lun wígiruni wíchugun hadurun amu.

12, 13. Ida liña líderaguniwa ligaburi Heowá lun míchugun wamá hadurun amu?

¹² Lau wasaminarun hulili luagu ligaburi Heowá, wasagaruba buiti lugundun téniti lun buiti le hawagubei amu. Ítara liña meha lasuseredun lidan likesin urúei Dawidi, le éiguadubei lidoun figóu wéinamuti. Kei hénpulu, agabarahati tuma Betüsawé ani adüga ligía lun lafarún tani weiriei hilagubei (2 Sam. 11:2-4, 14, 15, 24). Ladüga ladügüni katei le, barüti wuribani dandu lúniwagua kei houn liduheñu, ha híbiri lánigu weiriou haganagua (2 Sam. 12:10, 11). Luagu amu dan, marufudunti afiñeni sunsuinagubei luagu Heowá dan le líchugunbei dimurei lun habahüdǘn lisudaranigu Ísüraeli. Másiñati pantaü lan adügübei lun lafiñerun hawagu hiibe lisudaranigu. Ka lanügübei ladügüni lira? Hilaguatiña 70,000 ísüraelina ladüga aban sandi (2 Sam. 24:1-4, 10-15).

¹³ Lun hamuga meha winwan wamá Ísüraeli lidan dan ligía, kaba hamuga wasaminara luagu Dawidi? Wasaminaruña hamuga san wuriba luagu ani ariñaga wagía hamuga madüna lan lun larufudun Bungiu gudemehabu lun? Masaminarungubeiti Heowá ítara. Ábarüga letenirun lun úaraguni le meha larufudubei Dawidi lidan sun libagari luma luagu asakürihaali lan tídangiñe sun lanigi. Ligía feruduna lubalin sun figóu wéiriti le ladügübei Dawidi. Subudi lumuti meha Heowá weiri lan línsiñe lun Dawidi ani busén lan ladügüni le buídubei. Ma inarüni seremei wamani Heowá luagu letenirun lun buiti le wawagubei? (1 Uru. 9:4; 1 Kro. 29:10, 17).

14. Ka íderagubaliña fiu íbirigu lun madimurehan hamá wuriba hawagu amu?

¹⁴ Anhein gunfuranda lubaliña Heowá gürigia gafigountiña, gayaraati giñe gunfuranda wamaniña amu luma lun warihini buiti le hawagubei. Ménrengunti warihini hachara amu luma wayanuhan wuriba hawagu. Gürigia ha áyeihabalin Heowá, buiti hanaagun houngua hama amu íbini subudi hamani chará hamá. Aban déimani le maranserungili, gayaraati genege lan wuriba lan laríawagun, ánheinti gürigia le chubei aau, subudi lumuti wéiribei lan lebegi déimani danme le nadagimeinwaali. Ítara kei Heowá luma Hesusu, lunti warihini le buídubei hawagu amu luma lubuidun hagaburi.

15. Ka uagu líderagubadiwa lubéi wasaminarun luagu le gádanbaliña amu lun masaminarun wamá wuriba hawagu ni lun wíchugun hadurun?

¹⁵ Amu luéi wetenirun lun lubuidun hagaburi amu, kaba íderaguawa lun masaminarun wamá wuriba hawagu ni lun wíchugun hadurun? Áfaagua wamá lun wasaminarun ida liña lan habagari. Ariha wamá aban sügǘ luagu katei le. Aban weyu, ñun liña Hesusu ténpulurugu, aba larihin  aban würi gudemetu to hilaali tani weiriei íchiga bián gáwanaü le lóuguabei ebegi tidoun gafu to ñein lubéi lichaahóua seinsu. Málügüdahanti Hesusu ka lan uéigiñe lougua lubéi tíchugun. Lubaragiñe letenirun lun átiriñein lan tíchugun, aba larihini lébuna tadügüni luma le gádanbarun, ani aba layanuhan buidu luagu le tadügübei, luagu adüga tani sun tiyaraati (Luk. 21:1-4).

16. Ka larufudahabei le tabahüdahabei Verónica woun?

¹⁶ Arufudahati sügǘ le tabahüdahabei Verónica súdini lan lun wasaminarun luagun ida liña lan habagari amu. Lidan damuriguaü le ñein tubéi, anuhein aban úguchuru tábuguarügüñoun lau tisaani. Ariñagatu Verónica: “Genegeti meha nun madügün hamá saragu lidan damuriguaü, ligía meha wuriba lubéi nisaminan hawagun. Aban weyu, aba náfuridun apurichiha tuma úguchuru. Aba tabahüdahani sun titurobulin nun ladüga gasaani tan aban irahü lau sandi le gíribei autista. Sügütu úguchuru to saragu dan etenira lun tisaani luma lun lumadagua luma Bungiu. Anihein burí dan, ladüga lisandi tisaani, mosu burí tidin adamuridagua lidan amu damuriguaü”. Ariñagatu Verónica: “Masaminarungubeitina meha luagu lidere tibagari. Ani guenlé, gebegiharu nun saragu ladüga sun áfaaguni le tadügübei lun teseriwidun lun Heowá”.

17. Ka gumadi líchugubei Santiagu 2:8, ani ida luba gaganbadi wamá lun?

¹⁷ Ka lunbei wadügüni ánhawa íchiga fe wuriba lan wasaminarun luagu somu íbiri? Haritagua  waméi lunti lan hínsiñe hamá wábirigu woun (aliiha huméi Santiagu 2:8). Lau sun lira, mosu giñe wafurieidun lun Heowá ani ayumuragua wagíame lun lun líderaguniwa lun wígiruni wasaminarun wuriba hawagun amu. Gayaraati wadügüni le wamuriahabei lidan furíei lau wayanuhan luma íbiri ligía. Gayaraati ladügün katei le lun wasubudiruni íbiri ligía buidu. Gayaraati giñe wagunbirahani lun lapurichihan úara wama o lun weigin úara. Éibume wasubudiruni wábiri buidu, gayaraabei wáfaagun lun wáyeihani ligaburi Heowá luma ligaburi Hesusu lau wáluahani buiti le hawagubei amu. Ítarati, warufudubei waganbuñein lan gumadi le líchugubei hóuniri mudún le buídutimabei lun míchugun wamá hadurun amu.

18. Ida liña warufuduni waganbuñein lan hóuniri mudún le buídutimabei?

¹⁸ Ítara kei haganbuni mudún lumalali le óunigirubaliña, aganba hamuti lani Hesusu disipulugu lumalali. Ánhawa áfaagua lun madiheridun wamá luagu umegeguni ani áfaagua wagíame lun masaminarun wamá wuriba hawagu amu, labinirubadiwa Heowá luma Hesusu. Hádangiñetiwa lan yebe “mudún ha míbebaña” o hádangiñe wamá “amu mudún”, sun wagía lunti wafalaruni ani gaganbadi wagíame lun lumalali hóuniri mudún le buídutimabei (Luk. 12:32; Huan 10:11, 14, 16). Lidan leweñegua aturiahani warihiba bián katei le lariñagubei Hesusu lunti lan hadügüni lani disipulugu.