1. Ni eha nshonga emwe eyatumire Yesu yageranisa abakurasi beye n’entama?

YESU akageranisa obunywani obu yabire ayine n’abakurasi beye n’obunywani obu omurisa ari kuba ayine n’entama zeye. (Yoh 10:14) Oko kugeranisa oku yakozire kuhikire. Entama nizimanya omurisa wazo kandi nizihurira iraka ryeye. Hine omurambuzi omwe owacerebire. Akagamba ati: “Izoba rimwe tukaba nitwenda kukwata ebishushani by’entama, rero twagezaho kuzihika hihi. Konka tiziratukuratire ahabw’okuba zikaba zitari kumanya amaraka gitu. Bwanyima, omwojo omwe muto w’omurisa akazihika hihi; ku yazesire zikamukuratira.”

2-3. (a) Ni bata oku abakurasi ba Yesu bari kwereka ku nibahurira iraka ryeye? (b) Ni enki eki twaza kushwijuma omuri eki kicweka n’omu kiri kukurataho?

² Ebyahikire ahari ogo murambuzi nibitwijusya ebigambo bya Yesu ebi yagambire ah’abegi beye. Akagamba ati: ‘Nibija kuhurira iraka ryange.’ (Yoh 10:16) Konka Yesu ari omu iguru. Mbwenu shi ni bata oku turi kubasa kumuhurira? Oburyo bumwe obu turi kubasa kwerekamu ku nituhurira iraka rya Mukama witu, ni okuta omu nkora enyegesa zeye omu kubaho kwitu.—Mat 7:24, 25.

³ Omuri eki kicweka n’omu kiri kukurataho, nitwija kushwijuma zimwe omu nyegesa za Yesu. Nitwija kureba ku Yesu yatwegesize ngu tureke kukora ebintu bimwe kandi ebindi tubikore. Twaza kubanza turebe ebintu bibiri ebi omurisa witu murungi ari kuturagira kureka kukora.

4. Tukuratize ebiri omuri Luka 12:29, ni enki ekiri kubasa kutuma ‘twayemereza omutima’?

⁴ Shoma omuri Luka 12:29. Yesu akashaba abakurasi beye ngu ‘batariyemereza emitima’ ahabw’eby’okubabisaho. Nitumanya ku obuhabuzi bwa Yesu burijo buri kuba buhikire kandi burimu obwenge. Nituba turi kwenda kubuta omu nkora, konka hine obu biri kuturema. Ahabw’enki?

5. Ahabw’enki abamwe bari kwemereza omutima ahabw’eby’okubabisaho?

 ⁵ Abamwe nibabasa kwemereza omutima ahabw’ebyokurya, ebijwaro, n’ah’okutura. Nibabasa kuba bari kutura omu ihanga eririmu aboro bingi. Nikibasa kubagumira kutunga esente z’okubabisaho, bo n’ab’omu maka gabo. Ninga shi nobasa kushanga owabire ari kubabisaho omu ka yabo yafire, kituma babaho batine akasente. Endwara ya Kovidi-19 eyakwasire ensi yona, nebasa kuba yatumire bamwe babura emirimo n’esente ez’okubabisaho. (Mub 9:11) Mbwenu shi yaba twahikirweho n’emwe omuri ezi mbera ezi twagambaho, ni bata oku turi kubasa kukuratiza obuhabuzi bwa Yesu bw’okutemereza omutima?

6. Shoborora ecabire aha ntumwa Petero izoba rimwe.

⁶ Izoba rimwe, entumwa Petero n’ezindi ntumwa bakaba bari omu bwato omu nyanja ya Galilaya obu habire hariho ihunga ry’amani, rero babona Yesu ari kugenda ah’iguru y’amizi. Petero akamugambira ati: ‘Mukama wange, ku orabe ari iwe, ndagira, nyije aho ningendera aha mizi.’ Bwanyima Yesu akamugambira ngu ‘ayije,’ rero Petero yaruga omu bwato, ‘yagendera aha mizi yashanga Yesu.’ Reba ecabireho bwanyima. ‘Ku yarebire omuyaga gwaba mwingi, yatina. Ku yatandikire kutobera, yataka ati: Mukama wange, njuna.’  Yesu akagorora omukono, yakwata Petero ekiganja, yamukiza. Petero akaba ari kubasa kugendera ah’iguru y’amizi kuri yagumizemu kuhanga Yesu amisho. Konka, Petero ku yahangire amisho ihunga, akemereza omutima, yayitwa obwoba kandi yabanganisa, catuma yatandika kutobera.—Mat 14:24-31.

7. Ni enki eki turi kubasa kwegera aha cokureberaho ca Petero?

⁷ Ebyahikire ahari Petero nitubasa kubyegeraho ishomo ry’omugasho. Petero ku yarugire omu bwato akaza omu nyanja, akaba atari kumanya ngu hine ekiri kubasa kumuhuzya, rero ngu atandike kutobera. Akaba ari kwenda kuguma ah’iguru y’amizi kuhisya obu arahike Omwegesa weye. Konka akaremwa kuguma atire omutima aha ntego yeye. Ni amazima tituri kubasa kugendera ah’iguru y’amizi, konka nitubugana ebintu ebiri kugeza okwikiriza kwitu. Twaremwa kuguma tuhangire Yehova amisho n’ebiraganiso byeye, nitwija kutobera omu buryo bw’omwika. Ihunga ry’akamanyiso ryona eri twakubugana omu kubaho kwitu, tushemerire kuguma tuhangire Yehova amisho kandi tuguma twesigire ku nayija kutukwasa. Eco tukakikora tuta?

8. Ni enki ekiri kubasa kutukwasa kwerinda kuhuga ahabw’ebi turi kwetenga?

⁸ Nitwija kugasirwa twareka kwemereza omutima, tukaba emanzi. Yijuka ku Tata witu ori kutukunda, Yehova, ari kuturaganisa ku arije kutufaho twata eby’Obukama omu mwanya g’okubanza. (Mat 6:32, 33) Hine ebi yakozire omu bwire bwa kare, ebiri kwereka ku ari kuhikiriza eco kiraganiso. (Bir 8:4, 15, 16; Zab 37:25) Yaba Yehova ari kugaburira enyonyi n’ebimuri, mazima titushemerire kwemereza omutima aha bi turije kurya n’ebi turije kujwara! (Mat 6:26-30; Fil 4:6, 7) Nk’oku rukundo eri kutuma omuzire yaha abana beye ebi bari kwetenga, ni ko rukundo eri kutuma Tata witu ow’omu iguru yaha abahereza beye ebi bari kwetenga. Mazima, nitwesiga tutari kubanganisa ku Yehova arije kutufaho!

9. Ni enki eki ori kwegera aha byahikire ahari mwenetata na munyanyazi?

⁹ Reba ecokureberaho ekiri kwereka ku Yehova ari kubasa kutuha ebi turi kwetenga. Mwenetata n’omukazi weye abari omu murimo g’obwire bwona bakavuga emotoka yabo ekuzire eshaha eri kurenga, bari kuza kukwata abanyanyazi ababire batwire omu nkambi ngu babatware omu nterane. Mwenetata akagamba ati: “Bwanyima y’enterane, tuketa abo banyanyazi ngu bije kurya hamwe n’itwe, konka twashanga hatine eki twine c’okubaha.” Mbwenu shi ni enki eki bakozire? Mwenetata akagumizamu nagira ati: “Ku twahikire omu ka, tukashanga aha muryango hariho obudeyi bubiri burimu ebyokurya. Tukaba tutari kumanya owabutaho. Yehova akatufaho.” Bwanyima, emotoka y’ogo mwenetata na munyanyazi ekafa. Kandi bakaba bari kugetenga ngu ebakwase omu murimo g’okuburira; konka, bakaba batine esente z’okugikanikisa. Emotoka yabo ku yabire eri omu gareji, omushija omwe akija yabuza ngu: “Egi motoka ni ey’oha?” Mwenetata akamugarukamu ku eri eyeye kandi ku ari kwenda kugikanikisa. Ogo mushija akamugarukamu ati: “Eco tikiri kwetengesa. Omukazi wange nayenda emotoka nk’egi, kandi eri kushusha batiya. Noyenda ngu tukuhemu zingahe?” Mwenetata akataha ayine esente nyingi z’okugura endijo motoka. Akagamba ati: “Tindi kubasa kushoborora oku nayehurire omu mwebazo. Tukamanya ku eco kitabaho ahabwa butandu. Ogo gukaba guri omukono gwa Yehova.”

10. Ni bata oku omuri Zaaburi ya 37:5 hari kutuhiga okutemereza omutima ahabw’eby’okutubisaho?

¹⁰ Twahurikiza omurisa murungi kandi tukerinda kwemereza omutima ahabw’eby’okutubisaho,  nitwesiga tutari kubanganisa ku Yehova arije kutuha ebi turi kwetenga. (Shoma omuri Zaaburi ya 37:5; 1 Pet 5:7) Reba embera eziri kugambwaho omuri  paragurafu ya 5. Nobasa kushanga na hati, Yehova ari kukoresa omwebembezi w’eka ninga shi omukoresa owatuhire emirimo ngu batukwase kubona ebi turi kwetenga bya burizoba. Konka ogo mwebembezi w’eka n’obu yakuba atacabasa kutuha ebi turi kwetenga ninga shi tukaferwa omurimo, Yehova nayija kutuha ebi turi kwetenga omu bundi buryo. Konka ekikuru, nayija kugumizamu kubituha. Hati reka turebe ekindi kintu eki Yehova ari kutushaba ngu twerinde kukora.

11. Tukuratize ebiri omuri Matayo 7:1, 2, ni enki eki Yesu yatugambire ngu tureke kukora, kandi ahabw’enki kigumire?

¹¹ Shoma omuri Matayo 7:1, 2. Yesu akaba namanya ngu ababire bamuhurikize tibahikirire, kandi eco kikaba nikibasa kutuma bacwera abandi orubanja. Akagamba ati: ‘Mutaricwa orubanja.’ Nitubasa kugezaho okutacwera Abakristo bagenzi bitu emanja. Konka, twena tituhikirire. Mbwenu shi ku twakushanga hine obu turi kucwera abandi emanja, ni enki eki tushemerire kukora? Tushemerire kuhurikiza Yesu, tukatamu amani kugira ngu twerinde okucwera abandi emanja.

12-13. Ni bata oku okutekateka aha ku Yehova yatwarize Omugabe Dawudi kiri kutukwasa kureka kucwera abandi emanja?

¹² Nitubasa kugasirwa twatekateka aha cokureberaho ca Yehova. Nata omutima aha birungi ebiri omu bantu. Eco nitukirebera aha ku yatwarize Omugabe Dawudi, omushija owakozire enshobe z’amani. Ecokureberaho: Dawudi akashambana na Batisheba, kandi yayitisa n’omushija weye. (2 Sam 11:2-4, 14, 15, 24) Eco kikatuma Dawudi yayeshasha, yashasha ab’omu ka yeye, harimu n’abandi bakazi beye. (2 Sam 12:10, 11) Erindi izoba, Dawudi akaremwa kwesiga Yehova obu yaragire ngu amahe g’Abisirayeli gahandikisibwe, kandi cabire kitikirizibwe. Nabasa kuba yakikozire ahabw’okwetungura n’okwesiga omubaro gw’amahe geye. Ni enki ecarugiremu? Amahe g’Abisirayeli 70,000 gagitwa ahabw’ecorezo!—2 Sam 24:1-4, 10-15.

¹³ Kuri wabire oriho omuri obwo bwire bw’Abisirayeli, okaba noyija kureba ota Dawudi? Mbehi okaba noza kumucwera orubanja, ori kutekateka ngu Yehova tashemerire kumusaasira? Yehova we tico eki yakozire. Akata omutima aha ku Dawudi yamazire emyaka myingi ari omwesigwa, n’oku yabire ari kwehana abyihire aha mutima. Eco kikatuma Yehova yasaasira Dawudi ebibi by’amani ebi yabire akozire. Yehova akaba namanya ku Dawudi ari kumukunda munonga kandi ku yabire ari kwenda kukora ebihikire. Mbehi tikiri kukushemeza kuba Ruhanga ari kuturebamu ebirungi?—1 Bag 9:4; 1 Bus 29:10, 17.

14. Ni enki ecakwasize Abakristo okureka kucwera abandi emanja?

¹⁴ Yaba Yehova ari kubasa kusaasira abantu abatahikirire, mazima n’itwe tushemerire kusaasira abandi kandi tukabarebamu ebirungi. Corobi okuta omutima aha kutahikirira kw’abandi kandi tukabacwera emanja. Konka, omuntu okuzire omu by’omwika nabasa kureba oko kutahikirira kwabo, konka nabwo agumizamu kukorengana na bo omu businge. Ibare ery’obuguzi bwingi (dayamondi) niribasa kutarebeka ge, konka omuntu oyine obwenge nabasa kwetegereza ebeyi yaryo, yaritema kandi akariboneza. Nka Yehova na Yesu, tushemerire kureba aha bi amisho gatari kureba, tukareba emitwarize mirungi eyi abandi bine.

15. Ni bata oku okuta omutima aha mbera ezi abantu barimu kiri kubasa kutukwasa kutabacwera orubanja?

 ¹⁵ Mbehi oyihireho okuta omutima aha mitwarize mirungi y’abandi, ni enki ekindi ekiri kubasa kutukwasa kutabacwera orubanja? Gezaho kutekateka aha mbera ezi barimu. Reba eki cokureberaho. Izoba rimwe Yesu ku yabire ari omuri hekalu, akareba omufakazi w’omworo ari kuta obusente bubiri obwine omugasho muce omu kashanduku k’ebiconco. Taraburize ngu “ahabw’enki atatamu nyingi.” Omu mwanya g’okata omutima aha bi ogo mufakazi yatanga, Yesu akata omutima aha nshonga eyatuma yahayo n’embera ezi arimu, kandi yamusiima ahabw’okukora cona eki yaba ari kubasa.—Luk 21:1-4.

16. Ni enki eki ori kubasa kwegera aha byahikire ahari Veronica?

¹⁶ Nitubasa kumanya omugasho g’okuta omutima aha mbera ezi abandi barimu turi kushwijuma ebyahikire aha munyanyazi ori kwetwa Veronica. Omu kibina eki yabire arimu hakaba harimu omukazi owabire atine mushija na mutabani weye. Veronica akagamba ati: “Nyowe nkaba nindeba batari kwekwatanisa omu mirimo y’ekibina. Eco kikaba nikituma nabareba kubi. Konka izoba rimwe, nkekwatanisa n’ogo mukazi omu murimo g’okuburira. Akangambira ebizibu ebi bine we na mutabani weye. Akaba nakora cona eki ari kubasa ngu ayefeho afe n’ahari mutabani weye omu by’omubiri n’omu by’omwika. Hine obu mutabani weye yabire narwara kituma yaza  omu nterane z’omu kindi kibina.” Veronica akahendera ari kugamba ati: “Nkaba ntari kumanya ngu ni byo ebizibu ebi ari kurabamu. Hati ninsiima ogo munyanyazi kandi nimuha ekitinisa munonga ahabw’ebi ari kukora ngu ahereze Yehova.”

17. Ebiri omuri Yakobo 2:8 nibituragira kukora ki, kandi shi ni bata oku turi kubasa kukikora?

¹⁷ Ni enki eki turi kubasa kukora twashanga turi kucwera Abakristo bagenzi bitu orubanja? Tushemerire kwijuka ku twine ibanja ry’okukunda benetata. (Shoma omuri Yakobo 2:8.) Nambwenu, tushemerire kushaba Yehova turi kumweshengereza ngu atukwase kwerinda kucwera abandi emanja. Nitubasa kukora ebi twagamba omu shara, turi kuba ari itwe twabanza kuganira n’ogo muntu owu twabire turi kucwera orubanja. Eco nikibasa kutuma twamumanya ge. Nitubasa kumushaba ngu tuburire hamwe ninga shi ngu turye hamwe. Ku turamanye ge mwenetata, nitubasa kugezaho kutoreza ecokureberaho ca Yehova na Yesu turi kumurebamu ebirungi. Omuri obwo buryo, nituba twayereka ku nitworobera ekiragiro c’omurisa murungi c’okureka kucwera abandi emanja.

18. Ni bata oku turi kubasa kwereka ku nituhurira iraka ry’omurisa murungi?

¹⁸ Nk’oku entama ziri kuhurikiza iraka ry’omurisa wazo, abakurasi ba Yesu na bo nibahurikiza iraka ryeye. Twatamu amani ngu twerinde okwemereza omutima ahabw’eby’okutubisaho kandi tukerinda okucwera abandi emanja, Yehova na Yesu nibija kutuha emigisha. Yaba turi ab’omu ‘busyo obuce’ ninga shi turi ab’omu ‘zindi ntama,’ nimureke tugumizemu kuhurikiza iraka ry’omurisa murungi kandi tumworobere. (Luk 12:32; Yoh 10:11, 14, 16) Omu kicweka ekiri kukurataho, nitwija kushwijuma ebintu bibiri ebi Yesu yagambiire abakurasi beye ngu bakore.