1. Yezu waladdanihelini anamafwara aye na mabila?

 YEZU wahiladdaniha mandano aniyena na anamafwara aye na okwela ona mukumbuzi na mabila aye. (Jo. 10:14) Nladdaniho ntti ttofwanyelela. Sabwani nibila ninoziwa deretu lizu na mukumbuzi waye. Dhahene ninga empadduwa na mabila, anamafwara a Yezu anoziwa pama lizu naye. Turista dhahi ohona ejuwene epadduwaga. Iyene ohiloga: “Vaddamelimi wi ddapide foto, mabilaya ahiroma ottawa. Mbwenye mudhile muzombwe dhahi wali mukumbuziya mukuweleliye mabilaya ahidha.”

2-3. (a) Iyo nininvuruwana Yezu modhela okosa eni? (b) Txini enasekeserhihu mwari mwa nsunzo ntti na nindawo?

² Nipadduwo ntti ninonubutxedha mazu a alogile Yezu awaddagana—anamafwara aye. Iyene ohiloga: “Awene anele ovuruwana lizu naga.” (Jo. 10:16) Yezu oli wirimu. Ninawodhe dhavi wiwa lizu naye? Ninowiwa lizu na mukumbuzi wehu Yezu nigewelela vina nigavirihamo esile dhinisunzihiliye.—Mt. 7:24, 25.

³ Nsunzo ntti na ninfwarela, ninele osekeserha dhilobo dhing’onovi dhisunzihile Yezu. Iyene ohiloga dhilobo dhinfwanyelihu okosa na dhilobo dhihinfwanyelihu okosa. Voroma ninele osekeserha dhilobo bili dhisunzihile mukumbuzi wehu Yezu dhihinfwanyelihu okosa.

4. Mowiwanana na Luka 12:29, dhilobo gani “dhiganizuzumihile vaddiddi”?

⁴ Kengesa Luka 12:29. Yezu wahawaddela anamafwara aye wi “ahizuzumeletxe” dhilobo dhomaningoni. Iyo ninoziwa wi malago a Yezu baderetu, nona ninofuna ovirihamo mwigumini mwehu mbwenye mudhidhi mwina enokala yorutxa okosa ejuwene. Sabwaya?

5. Txini enattukulela attu ozuzumeletxa dhilobo dhovikalihanawo?

 ⁵ Attu ena anozuzuma na dhilobo dha labo-labo—ninga dhoja, dhowabala na mburo wokala. Enaya ankala mwilaboni mwiyelegiwe vaddiddi vina munrutxa ofwanya ganyo. Mmakattamihoni ninga aba enorutxa ogumela elobo y’owasapelana anamudhi. Mirala dhina txino muttu wasapela ohikwa, ekalaga yorutxa anamudhiya ogumela yoja ya siku na siku. Sabwa ya ezini eji ya COVID-19 anamudhi enjene ahiyelela ganyo dhawa, yatatamuleli okala muyelegani. (Koh. 9:11) Akala weyo oli mmakattamihoni ninga aba, txini enokamihedhe ofwara nlago na Yezu na ohizuzumeletxa dhilobo dhomaningoni?

6. Katapulelamo epadduwile mudhidhi dhahi na murumiwi Pedro.

⁶ Mudhidhi dhahi murumiwi Pedro na anamafwara ena, aligi mmwaddiyani mu Nyaza y’o Galileya venevo otatamuwa pevo enddimuwa, vasogorhova ahimona Yezu eddaga vadhulu va manje. Venevo Pedro ologa: “Nabuya karumani wi ddufwarelegeni ddeddaga vadhulu va manje.” Yezu omwakula “kadhawuno,” Pedro obudduwa mmwaddiyani “oroma wedda vadhulo va manje adhowaga wali Yezu.” Kona epadduwile vasogorhova. “Vano angʼanaga manebe, oroma wova; muromeliye  obwina, ohikuwa: ‘Nabuya kaddivuneni!’” Yezu omutapulela nlada omuttidda. Noneni wi pedro owodhile wedda vadhulu va manje mudhidhi wamwang’aniye Yezu. Mbwenye mwang’aniliye manebe wahova nanda baroma obwina.—Mt. 14:24-31.

7. Txini ensunzihu na ejile epadduwile na Pedro?

⁷ Iyo ninowodha osunza na yotagiha ya Pedro. Mbudduweli Pedro mmwaddiyani baroma wedda vadhulu va manje iyene kana muyubuweloni wi agahidha obwina. Efunelo yaniyena yali ya wedda vadhulu va manje mpaka onfiyedha Yezu mbwenye wahizuzuma baroma wang’ana Manebe. Na mukalelo wakakene efunile Pedro nroromelo wi edde vadhulu va manje iyo vina ninofuna nroromelo wi niwodhe okwaranya makattamiho ehu. Iyo nigattiya omwang’ana Yehova vina okuluvela mapikirelo aye, ninele oroma obwina mpaddi womuyani. Nona ninofwanyela omukuluvela Yehova vina ororomela mapikirelo aye wi iyene onele onikamihedha. Ninawodhe dhavi okosa ejuwene?

8. Sabwaya jani kaninfwanyela ozuzuma na dhojombeliwa dhehu?

⁸ Kudduwale wi Babihu wokwela Yehova opikirhela wi onele wakwanihedha dhojombeliwa dhehu nigeka dhilobo dhomuyani vamburoni voroma mwigumini mwehu. (Mt. 6:32, 33) Nona kanizuzume na dhojombeliwa dhehu, ottiya ejo nimukuluvele iyene. Yehova onowakwanihedha dhopikirhela dhaye. (Olib. 8:4, 15, 16; Masal. 37:25) Akala Yehova onozuzumela balame na maruwa, nikane ebaribari wi iyene onele onizuzumela anivahaga dhoja na dhowabala, kaninfwanyela ozuzuma venjene na esuwene! (Mt. 6:26-30; Fil. 4:6, 7) Dhahene ninga amambali anasapela aniwa sabwa ya wakwela, Yehova onele ozuzumela dhojombeliwa dhehu sabwani ononikwela venjene. Nona kaninfwanyela waganyedha ejuwene!

9. Txini esunziliwe na yotagiha ya atelani ali apionero?

⁹ Katanalela yotagiha enoniha wi Yehova onozuzumela dhojombeliwa dhehu. Atelani dhahi anlaba mmabasani a mudhidhi wotene ahedda na karo yawa ya wale wora bili adhowelaga arogora akala mburo wattaweliwa koddo wi one matugumano. Mbaliya ologa dhahi: “Mmaleli matugumanoya iyo nahawoba arogora abale wi aje elobo-txilobo vatakulu, venevo iyo wubuwela wi kaninavo elobwene vatakuluva.” Txini egakosile atelani abale? Mbaliya ohiloga dhahi: “Mufiyelihu vatakulu nahifwanya mabuddu mararu vamusuwo mwali dhoja. Mpaka ovanene kanimuziwa bani wattiyilevo. Yehova wela onizuzumela.” Vasogorova karo ya atelani abale yahinyongeya. Awene anfuna karoya wi adhowegena mmabasani a olaleya; mbwenye kana korowa ya osasanyana. Mbaliya ottukula karoya odhowana o ofisina, mufiyiliye mulobwana dhahi ovuza: “Karo eji mwinyaya bani?” Mbaliya wakula wi jaga ddidhilena veneva wi yang’aniwe. Mulobwana oddule ologa: “Mwadhaga onofuna karo ya kore ninga ejene. Miyo ddinofuna karo eji. onaddigulihedhe muttengo gani?” Muttengo ogulihiliye wanakwanela ogula karo yina eswa. Iyene ohimariha alogaga mazu aba: “Kaninwodha ologa mukalelo wagalalile iyo sikunene nttile. Nahinonelamo wi Yehova wela ozuzumela dhojombeliwa dhehu.”

10. Mowiwanana na Masalmo 37:5 nikuluvelo gani ninfwanyelela iyo okana?

¹⁰ Iyo nigewelela elogile Yezu mwaha wa ohizuzumela dhilobo dhomaningoni, iyo ninele okuluvela wi Yehova onela wakwaniha dhojombeliwa dhehu. (Kengesa Masalmo 37:5; 1 Ped. 5:7) Kobuwela makattamiho onilihu   ddima 5. Yehova onowodha wulabihedha wi osapelege ntakuluna obe onele omulabihedha muttu mwina. Akala weyo wile oyelela ganyo yawo, obe muttu wasapela murala kanwodha osapela, Yehova onele wona mukalelo wowusapelani. Weyo onofwanyela omukuluvela. Ovano ndowe none elobo yina elogile Yezu ehinfwanyelela iyo okosa.

11. Mowiwanana na Mateu 7:1, 2, Yezu ologile nittiye okosa eni, nanda ekalelini elobo yorutxa?

¹¹ Kengesa Mateu 7:1, 2. Yezu wanziwa wi nili attu ohiligana nona ninozuzumela dhovonya dha attu ena. Iyene ohiloga: “Kammuttonge muttu.” Iyo ninovilibihedha wi nihang’anetxe dhovonya dha abalihu. Mbwenye ejo kiwodheya sabwani nili attu ohiligana. Txini enfwanyelela iyo okosa nigona wi nikana elemelelo ya wattonga abalihu? Ninofwanyelela onvuruwana Yezu vina ovilibihedha ohattonga attu ena.

12-13. Mukalelo wamona Yehova Mwene Davidi onanikamihedhe dhavi ohattonga attu ena?

¹² Ninosunza venjene na yotagiha ya Yehova. Iyene onzuzumela dhilobo dhapama dhinkosa muttu. Iyo ninowona ejuwene na mukalelo omweddihiliye Mwene Davidi, mulobwana okosile dhottega dhinjene dhowopiha. Motagiha, iyene okosa mararuwo na Bate-seba vina ompiha mamunaye. (2 Sam. 11:2-4, 14, 15, 24) Yodhelavoya, iyene wahigweliwa ntowa vamodha na anamudhi aye vina awadhiye ena. (2 Sam. 12:10, 11) Dila yina, Davidi ohittiya omukuluvela Yehova sabwa ya olamula wi elegiwe anyakoddo etene a mu Izrayel. Iyene txino wakoseli ejuwene sabwa ya ovittukulela vina okuluvela winjiva wa anyakoddoya. Yodhelavoya? Ana Izrayel owakwana 70.000 ahikwa na dhiredda!—2 Sam. 24:1-4, 10-15.

¹³ Weyo kokala nsakanene nttile wona dhotene dhipadduwaga ogobuwelile dhavi sabwa ya Davidi? Ogahiloga wi iyene wanfwanyelela otxinutxiwa? Yehova konamo dhawene. Yehova wahitanalela dhotene dhapadduwile mwigumini mwa Davidi vina wahona wi iyene wahimala otxinuwa. Davidi wanimukwela venjene Yehova vina wantamela okosa ejile eli yapama, nona Yehova asakula omulevelela. Ninotamalela oziwa wi Yehova onona dhilobo dhapama dhinkosihu.—1 Amwe. 9:4; 1 Map. 29:10, 17.

14. Txini enanikamihedhe ohattonga attu ena?

¹⁴ Akala Yehova kanjedhela wi iyo nikale oligana, iyo vina kanajedhelena oligana attu ena. Kinrutxa wona dhovonya dha attu ena mbwenye muttu onimutagiha Yehova onovilibihedha waweddiha attu ena na oderetu. Diamanti agakala na mattakaya kankoddela onodhaga woniwa ninga kina ttima. Mbwenye muttu onimuziwa pama diamanti onoziwa wi agamala otxittikiwa onokana ttima enddimuwa. Iyo ninofwanyela omutagiha Yehova vina Yezu, nihimwang’anege muttu otakuluvi ottiya ejo nizuzumelege mikalelo dhaye dhapama.

15. Oziwa empadduwa mwigumini mwa muttuya enawukamihedhe dhavi ohimuttonga?

¹⁵ Elobo gani yina enanikamihedhe ohattonga vina ohasumulela attu ena? Katamela oziwa empadduwa mwigumini mwa muttuya. Katanalela yotagiha eji. Siku dhahi Yezu bali mumparani, wahimona mamukwela wa muhawi ekaga korowa bili dha muttengo mung’onovi mu yoboni ya mumparani. Yezu kavuzile dhahi: “Sabwaya jani iyene kekilemo korowa yaderetu-wene?” Yezu watanaleli ejile yali mmirimani mwaye na ejile yakosiliye vina wahimutamalela.—Lk. 21:1-4.

16. Txini esunziliwe na nipadduwo na murogora Veronica?

 ¹⁶ Nipadduwo na murogora veronica ninowoniha ttima elivo yowona dhimpadduwa mwigumini mwa muttuya. Iyene wali mulogo mwali murogora dhahi wa muziye wamulela mwanaye yeka. Veronica ohiloga dhahi: “Miyo ddawona ninga awene kadhowetxa venjene mmabasani a olaleya vina mmatugumanoni. Sabwa ya ejuwene, miyo kaddawang’ana na mukalelo waderetu. Mbwenye mumobilemi wi nidhowe mmabasani olaleya venevo iyene oroma oddaddela makattamiho agumaniyena sabwa ya oredda wa mwanaye. Iyene wankosa guru yotene yokana dhoja mpaddi womuyani vina womaningoni. Mwaha wa oredda wa mwanaye masiku mena adhowa wona matugumano mulogo mwina.” Veronica ohimariha alogaga dhahi: “Miyo txipo kaddanonelamo makattamiho otene agumaniyena. Ovano ddinomuriha vina ddinomutamalela guru yotene enkosiye ya omulabela Yehova.”

17. Txini ennaddela nlebo na Tiago 2:8 wi nikose, nanda sabwaya jani?

¹⁷ Txini enfwanyeliwe okosa ogazinddiyela wi ohimuttonga muttu? Nimukumbire Yehova wi anikamihedhe otxelela wattonga attu. (Kengesa Tiago 2:8.) Iyo ninofwanyela wakwela abalihu, vina enofuneya wi nikose mpaddi wehu. Nitamelege mudhidhi wa okala na muttuya omusumulelihu, nigakosa dhahene  ninele omuziwa pama. Txino nimuwobe wi nidhowe vamodha mmabasani a olaleya obe nije elobo-txilobo oku nitamelaga omuziwa pama ninofwanyela omutagiha Yehova vina Yezu. Nitamelege mikalelo dhaye dhapama. Nigakosa dhawene panwodhihu wiwa lizu na mukumbuzi wehu wa pama Yezu, ologile wi kamwattonge attu.

18. Ninonihe dhavi wi ninovuruwana lizu na mukumbuzi wehu wapama?

¹⁸ Dhahene ninga mabila anvuruwana lizu na mukumbuzi wawa, anamafwara a Yezu anovuruwana lizu naye. Nigattiya wattonga attu vina ozuzumela dhilobo dhomaningoni Yehova na Yezu anele oruriha guru dhehu. Otene ankosa mpaddi wa ‘nikuru ning’ono’ vina ‘mabila menagu’ anofwanyela odhowavi anvuruwanaga vina amwiwelelaga mukumbuzi wapama Yezu. (Lk. 13:32; Jo. 10:11, 14, 16) Nsunzo nindawo ninele osekeserha dhilobo bili dhawaddeli Yezu anamafwara aye dhafwanyelani okosa.