1. Mumu liaka Yesu atesele tumbaji twenyi ni mapanga?

YESU katesele usepa uze apwile nawo ni tumbaji twenyi ni usepa uze kafunga akwete hali mapanga jenyi. (Yoa. 10:14) Kutesa chino chinalite. Mumu mapanga kananyingika kafunga ko, nawa kakupanjika liji lienyi. Umwe lunga te unalingi wenyi kamwene chize yino yalingiwile. Yamba ngwenyi: “Te tunakwate foto amwe mapanga, nawa twafupile hanga akundame kuli yetu. Alioze ayo kakejile mumu te kanyingikine maliji jetu. Hazehene, umwe mukweze yoze te wakufunga mapanga jacho yahete, muze aasanyikine ayo yamukaula.”

2-3. (a) Twakupanjika liji lia Yesu ha kulinga yika? (b) Yika mutulilongesa ha mutwe uno ni uze muuhataho?

² Chilweza cha lunga yoze te unalingi wenyi, chinatwiwulula yize Yesu ambile hali mapanga jenyi, chekwamba tumbaji twenyi. Iye kambile ngwenyi: O “kumakevwa liji liami.” (Yoa. 10:16) Alioze Yesu kali mu malilu, mba kuchi mutuhasa kumupanjika? Yetu twakupanjika liji lia kafunga ketu, Yesu, muze twakulinga yuma yize iye akutulongesa.—Mateu 7:24, 25.

³ Ha mutwe uno ni uze muuhataho, mutulilongesa yimwe yuma yize Yesu alongesele. Ngwe chize mutumona, iye kahanjikile hakutwala ku yuma yize twatamba kwecha ni yize twatamba kulinga. Chitangu, mutulilongesa yuma yaali yize Yesu ambile ngwenyi kutwatambile kuyilinga.

4. Kulita ni Luka 12:29, yika muyihasa kututwala hanga tulipikale chinji?

⁴ Tanga Luka 12:29. Yesu katowezele tumbaji twenyi hanga eche ‘kulipikala chinji’ ha yuma yize anafupiwa ku musunya. Tunanyingika ngwetu, yiyulo ya Yesu nihindu yapwa yipema  nawa ya mana. Kwamba pundu, tunazange kuyikaula ku mwono wetu. Alioze ha mashimbu amwe, muchihasa kupwa chikalu kuchilinga. Mumu liaka?

5. Mumu liaka atu anji akulipikala chinji ni yuma yize anafupiwa ku musunya?

 ⁵ Atu anji kakulipikala ha yuma ya tangwa ha tangwa, ngwe kulia, mazalo ni zuwo. Amwe akuli atu jacho, katwama mu yifuchi muze mukwete uswale unji, muze nawa chapwa chikalu kuwana mulimo. Chino chakupwisa chikalu kuwana mbongo ja kukwasa najo asoko jo. Chikwo nawa, hanji mutu yoze wapwile ni kulisa usoko hanafu, chino muchihasa kuneha kapinda wa mbongo mu usoko. Mumu lia musongo wa COVID-19, atu anji katokesa milimo yo, nawa kanapalika mu kapinda wa mbongo. (Chilu. 9:11) Nyi unapalika mu yuma yino, kuchi muhasa kukaula chiyulo cha Yesu hanga weche kulipikala chinji?

6. Lumbununa yize yalingiwile kuli postolo Petulu tangwa limwe.

⁶ Tangwa limwe, postolo Petulu ni apostolo akwo, te kali mu ulungu ha kalunga-lwiji wa Ngalileya mukachi ka umwe kangonga. Hazehene, ayo yamona Yesu kanende helu lia meya. Hachino, Petulu yamba ngwenyi: “Mwene, nyi yenu, ngwambenu ngwize kuli yenu ha meya.” Yesu yamba ngwenyi: “Tweya!” Chocho Petulu yasunuka mu ulungu, “yenda ha meya ni kuya kuli Yesu.” Alioze tutalenu yize yalingiwileko hanyima. Petulu “ha kumona fuji ya ngolo, yevwa woma, nikuputuka kushimbama yateta ngwenyi, Mwene, ngulamwinenu!” Hachino, Yesu yamukwata ku kwoko ni kumulamwina. Chili chilemu kunyingika ngwo, Petulu kahashile wika kwenda helu lia meya muze te anatale kuli Yesu. Alioze muze atalile ku kangonga, yevwa woma, chocho yaputuka kushimbama.—Mateu 14:24-31.

7. Yika mutuhasa kulilongesa ha yize yalingiwile kuli Petulu?

 ⁷ Mutuhasa kulilongesa chuma chilemu ha yize yinakalingiwa kuli Petulu. Muze Petulu asunukine mu ulungu ni kuputuka kwenda helu lia meya, kakanyongene ngwenyi mevwa woma wa kangonga ni kushimbama. Iye kazangile kuheta kuli Yesu ha kwenda ha meya, alioze shimbu alihulikile hali Yesu, yalihulikila ha kangonga. Ngwe chizechene Petulu afupiwile ufulielo mba ende ha meya, ni yetu musono tunafupiwa ufulielo mba tuhase kunyongonona mu kapinda. Nyi mutwecha kulihulikila hali Yehova ni ha yilakenyo yenyi, mutuhasa kushimbama, hanji ngwetu, mututokesa ufulielo wetu. Kashika, twatamba kununga ni kulihulikila hali Yehova ni kufuliela ngwetu matukwasa kukumba kapinda wetu. Mba kuchi mutuhasa kuchilinga?

8. Mumu liaka kutwatambile kulipikala ha yize twakufupiwa ku musunya?

⁸ Twiwulukenu ngwetu, Tata yetu wa zango, Yehova, kanalakenya ngwenyi, nyi mutusa yuma ya ku spiritu ha chihela chitangu, iye matwaha yeswayo mutufupiwa ku mwono. Kashika shimbu tulipikale ha kapinda wetu, twatamba kujikijila muli Yehova. (Mateu 6:32, 33) Iye nihindu kakumanununa yilakenyo yenyi. (Shimbi 8:4, 15, 16; Samu 37:25) Nyi Yehova kakufunga tujila ni yitemo, mutuhasa kupwa ni shindakenyo ngwetu, matufunga ha kutwaha kulia ni mazalo. Kutwatambile kulipikala ha yuma yino. (Mateu 6:26-30; Fwili. 4:6, 7) Ngwe chizechene zango liakutwala yisemi hanga ahane kuli ana jo yuma ya ku musunya, zango nelio liakutwala Tata yetu wa mu malilu hanga ahane kuli tuvumbi twenyi yuma yize anafupiwa ku mwono. Ewa, twatamba kupwa ni shindakenyo ngwetu Yehova matufunga.

9. Yika walilongesa ha chilweza cha lunga ni pwo waze ali mu mulimo wa shimbu lieswe?

⁹ Tutalenu chilweza chinasolola chize Yehova akutwaha yize tunafupiwa ku musunya. Umwe ndumbu ni mukwo-pwo waze ali mu mulimo wa shimbu lieswe, kalingile ola yimuwika mu mashinyi jo akulu ha kuya ni kusaka mapangi waze apwile mu chilombo cha yilambala hanga aye ku kukunguluka. Ndumbu yamba ngwenyi: “Hanyima lia kukunguluka, yituya ni mapangi ku zuwo lietu hanga tulie. Alioze yitwiwuluka ngwetu, ku zuwo kukushi nichimwe cha kulia.” Mba yika yalingiwile hanyima? Ndumbu yamba ngwenyi: “Muze twahetele ku zuwo, yituwana njeke jaali ku chikolo ja ndi ni kulia. Kutwanyingikine mutu yoze wahichikile kulia chacho. Kwamba pundu, Yehova katwehele yize te tunafupiwa.” Ha kupalika cha amwe mashimbu, mashinyi jo yafwa. Ayo te kanafupiwa chinji mashinyi hanga aye ni kwambujola, alioze te keshi ni mbongo ja kwaluliekesa. Chocho yaatwala kuze akululiekela mashinyi hanga anyingike mbongo jize mafweta. Koko umwe lunga yeza, yahula ngwenyi: “Mashinyi a aya?” Ndumbu yamba ngwenyi ni enyi, alioze te kanafupu kwalulieka. Hachino, lunga wacho yamba ngwenyi: “Kushi mulonga. Mukwetu-pwo kanafupu mashinyi a mutapu au ni ulombo uwene. Chingahi muhasa kwalanjisa?” Chocho, ndumbwetu yakatukako ni mbongo jinakumbana jakulanda mashinyi akwo. Yamba ngwenyi: “Ku songo lia tangwa liacho twevwile chiseke chinji. Yino kuyakalingiwile chamulingiwila, Yehova mwe watukwashile.”

10. Kuchi Samu 37:5, yinatukolweza hanga tweche kulipikala chinji ha yuma yize tunafupiwa ku musunya?

¹⁰ Yesu kambile ngwenyi, kutwatambile kulipikala chinji ha yuma yize tunafupiwa ku musunya. Nawa nyi twasa tachi hanga twononokene maliji wano, mutuhasa kupwa ni shindakenyo ngwetu, Yehova matwaha yuma yeswe yize tunafupiwa. (Tanga Samu 37:5; 1 Petu. 5:7) Tuchinyongenu ha yipikalo yize  twamona ha  paragrafu 5. Ha mashimbu wano, Yehova hanji kanazachisa umwe mu usoko hanga atunehene kulia ku zuwo, hanji tuli ni mulimo uze wakutukwasa kulisa asoko jetu. Alioze, nyi mwata wa mu usoko keshi kuhasa nawa kulisa asoko jenyi, hanji twatokesa mulimo, nihindu Yehova manunga ni kutufunga mu majila akwo. Pundu, iye matwaha yize tunafupiwa. Alioze, haliapwila tutalenu chuma chikwo Yesu ambile chize kutwatambile kulinga.

11. Kulita ni Mateu 7:1, 2, yika Yesu anatukanjisa, nawa mumu liaka chili chikalu?

¹¹ Tanga Mateu 7:1, 2. Yesu kanyingikine ngwenyi mumu lia uhenge, atu kakulihulikila wika ha tupalia twa akwo. Kashika ambile ngwenyi: “Kanda nupatwila akwenu.” Yetu twakusa tachi hanga tuchine kupatwila mandumbu jetu. Alioze ha mashimbu amwe, kutushi kuhasa kuchilinga mumu tuli yihenge. Mba yika twatamba kulinga nyi tuli ni chako chakwambila akwetu yuma yipi? Tunafupiwa kupanjika liji lia Yesu ni kusa tachi hanga tuchine kupatwila akwetu.

12-13. Kuchi kupukuna ha chize Yehova amwene Ndawichi muchitukwasa tweche kupatwila akwetu?

¹² Mutuhasa kulilongesa yuma yinji ha kupukuna ha chilweza cha Yehova. Iye kakulihulikila ha yitanga yipema ya atu. Mutuhasa kuchimona ha yize alingile hali Ndawichi, yoze walingile shili yinene. Chakutalilaho, iye kalingile utanji ni Mbate-Shipa nawa yatuma kushiha mukwo-lunga. (2 Samue. 11:2-4, 14, 15, 24) Hachino, Ndawichi ni asoko jenyi yachimwena lamba, kuchingako ni mapwo jenyi akwo. (2 Samue. 12:10, 11) Ha chisuho chikwo, Ndawichi kalingile chuma chize Yehova kakamutumine kulinga. Iye katumine kwalula malunga waze apwile mu chilombo cha tujita twa A-Izalele. Kulinga chino, chasolwele kuhona kujikijila muli Yehova. Iye kota kachilingile mumu lia kulizata ha kupwa ni chilombo chinene cha tujita, nawa te kakujikijila ha ukwaso wa tujita twacho. Hachino, Yehova yatuma chilungo chize chashihile A-Izalele 70,000!—2 Samue. 24:1-4, 10-15.

¹³ Nyi wapwile mu Izalele ha mashimbu jacho, kachi yika wanyongene hali Ndawichi? Kachi wanyongene ngwo, Yehova kechi kumukonekena? Yehova kakanyongene chocho. Iye kanyongene ha yuma yipema yize Ndawichi alingile ni chize alikonyekene. Chocho yamukonekena ha shili yize alingile. Yehova kanyingikine ngwenyi, Ndawichi kakumuzanga chinji nawa te kanazange kulinga yuma yalita. Cho kuwaha ha kunyingika ngwo, Yehova kakulihulikila ha yitanga yetu yipema.—1 Mia. 9:4; 1 Sango 29:10, 17.

14. Yika muyitukwasa mba tuchine kupatwila akwetu?

¹⁴ Nyi Yehova keshi kushimbwila hanga tupwe angunu, ni yetu kutwatambile kushimbwila akwetu hanga apwe angunu. Chakupwa chashi kumona uhenge wa akwetu ni kwamba yuma yipi. Alioze mutu yoze wakwimbulula Yehova, kakusa tachi hanga atwame kanawa ni akwo, chipwe ngwe kakumona uhenge wo. Kamanga wa chafu mahasa kusoloka ngwe hi mupema ko. Alioze mutu yoze unanyingika kanawa kamanga, kananyingika ngwo hanyima lia kumukosa kakupwa ni ndando yinji. Twatamba kupwa ngwe Yehova ni Yesu, ha kulihulikila ha yitanga yipema ya akwetu chakuhona kulihulikila ha uhenge wo.

15. Mumu liaka kunyingika yize yinalingiwa ku mwono wa atu muchitukwasa tuchine kwapatwila ni kwamba yuma yipi?

¹⁵ Yika nawa muyihasa kutukwasa hanga tuchine kupatwila akwetu ni kwamba yuma yipi? Twesekenu kunyonga yize yinalingiwa ku mwono wo. Tunyongenu ha chilweza chino. Tangwa limwe mu tembele, Yesu yamona  umwe pwo tuliwa yoze te unase tumbongo twaali twa ndando yikehe mu mushete wa milambu. Iye kakambile ngwenyi: “Mumu liaka kasele mbongo jinji?” Alioze, shimbu alihulikile ha unji wa mbongo jize pwo wacho asele, Yesu yalihulikila ha yize yamutwalile kuhana mulambu wacho ni chize mwono wenyi te uli. Chocho, yamuchichimieka ha kuchilinga.—Luka 21:1-4.

16. Yika mutuhasa kulilongesa ha chilweza cha pangi Veronica?

¹⁶ Chilweza cha pangi Veronica, chinatukwase kumona ulemu wa kunyingika yize yinalingiwa ku mwono wa akwetu. Iye kapwile mu chikungulwila muze mwapwile umwe pangi yoze te wakulela mwana ukawenyi. Veronica yamba ngwenyi: “Chapwile ni kusoloka ngwe ayo te keshi kukunguluka chinji ni kwambujola. Hachino, yinguputuka kwanyongena yuma yipi. Alioze, tangwa limwe yingutuhuka ni pangi wacho mu munda, chocho iye yaputuka kungulweza ukalu wa kulela mwana yoze uli ni musongo wa mahesu-hesu. Pangi yetu kapwile ni kusa tachi jinji hanga iye ni mwanenyi apwe kanawa ku musunya ni ku spiritu. Nawa ha mashimbu amwe, mumu lia musongo wa mwanenyi, ayo te kakuya ni kukunguluka mu chikungulwila cheka.” Veronica yahwisa ni maliji anambe ngwo: “Yami te kanda nguchinyingika kama mwono ukalu uze apwile nawo. Haliapwila nakumuzanga ni kumuvumbika chinji ha tachi jize akusa hanga alingile Yehova.”

17. Yika Tiangu 2:8 unatukolweza kulinga, nawa kuchi mutuhasa kuchilinga?

 ¹⁷ Yika twatamba kulinga nyi twanyingika ngwetu, twakunyongene umwe ndumbu yuma yipi? Twiwulukenu ngwetu, twatamba kuzanga mandumbu jetu. (Tanga Tiangu 2:8.) Chikwo nawa, twatamba kulemba ni mbunge yeswe kuli Yehova hanga atukwase tweche kuchilinga. Mutuhasa kulinga yuma kulita ni yize tweta mu yilemba ha kuhanjika ni ndumbu yoze twakwambila yuma yipi. Nyi twachilinga, mutuhasa kunyingika kanawa ndumbwetu. Mutuhasa kumusanyika hanga twambujole chimuwika hanji kulia yimwe. Nawa nyi twanyingika kanawa ndumbwetu ni yize yinalingiwa ku mwono wenyi, mutuhasa kwimbulula chilweza cha Yehova ni Yesu ha kulihulikila ha yitanga yenyi yipema. Nyi twachilinga, mutupanjika liji lia kafunga ketu, Yesu, yoze unatulweze hanga tweche kupatwila akwetu.

18. Kuchi mutuhasa kusolola ngwetu tunapanjika liji lia kafunga ketu, Yesu?

¹⁸ Chizechene ngwe mapanga akupanjika liji lia kafunga ko, ni yetu twakupanjika liji lia Yesu. Nyi twasa tachi hanga tuchine kulipikala chinji ha yize tunafupiwa ku musunya ni kwecha kupatwila akwetu, Yehova ni Yesu matuwahisa ha tachi jize mutusa. Chipwe ngwe tuli a ku “mbunga yikepe” hanji a ku “mapanga akwo,” nihindu tunafupiwa kununga ni kupanjika ni kwononokena liji lia kafunga ketu. (Luka 12:32; Yoa. 10:11, 14, 16) Ha mutwe uze muuhataho, mutulilongesa yuma yaali yize Yesu anatulweza hanga tulinge.