1. Jesuh nih a zultu pawl kha tuu he a tahchunh hnanak a ruang pakhat cu zeidah a si?

JESUH nih a zultu pawl he an i pehtlaihnak kha tuukhal le a tuu an i pehtlaih ning he a tahchunh. (Johan 10:14) Mah tahchunhnak cu aa tlak tukmi a si. Tuu nih anmah a khaltu kha an hngalh i a bia kha an ngaih. Khualtlawngmi pakhat nih cutin a canmi kha a hmuh. Hitin a ti: “Tuu he hmanthlak kan duh i kan pawng ah kan auh hna. Asinain kan aw kha an hngalh bal lo caah an ra duh lo. Mah tikah tuukhaltu minopa a ra i a auh hna tikah a hnu in an zulh.”

2-3. (a) Jesuh zultu pawl nih a bia an ngaih kha zeitindah an langhter? (b) Hi capar le a hnu capar ah zei kong dah kan i ruah hna lai?

² Mah khualtlawngmi pa hmuhtonnak nih a tuu pawl a simi a zultu hna kong he aa tlaiin Jesuh nih a chimbia kha a kan hngalhter. Hitin a ti: “Ka aw kha an ngaih lai.” (Johan 10:16) Asinain Jesuh cu vancung ah a um. Cucaah a aw kha zeitindah kan ngaih khawh? A kan cawnpiakmi thil kha kan tuah ahcun a aw kan ngaihmi a si lai.—Matt. 7:24, 25.

³ Hi capar le a hnu capar ah Jesuh cawnpiaknak cheukhat kong kha kan i ruah hna lai. Jesuh nih kan tuah tawnmi thil cheukhat ngol awk le a dang thil hna tuah awkah a kan cawnpiakmi kong zong kan i ruah hna lai. Tuukhal ṭha nih kan tuah tawnmi thil cheukhat ngol awkah a kan cawnpiakmi thil pahnih kong kha i ruah hmasa hna u sih.

4. Luka 12:29 ningin zeinihdah ‘lungretheihnak’ a chuahter khawh?

⁴ Luka 12:29 rel. Jesuh nih a zultu pawl kha pumsalei ah an herhmi kong he aa tlaiin “lungrethei in um hlah u” tiah a cawnpiak hna. Jesuh ruahnak cheuhnak cu a zungzal in a ṭha i a hmaanmi a si ti kha kan hngalh. Asinain a caan ah cutin tuah cu a har kho men. Zeicah?

5. Pumsalei an herhmi kong he aa tlaiin mi cheukhat cu zeicah an lungre a theih khawh men?

 ⁵ Mi cheukhat cu pumsalei ah an herhmi eidin, thilpuan le umnak inn ti bantuk kong he aa tlaiin an lungre a thei men lai. Cun chawlehnak a harnak ram ah an um men lai. Cucaah an chungkhar zohkhenh awkah tangka a za in ngeih cu a har kho men. Asiloah an chungkhar caah tangka a kawltu hna nih an thihtak hna caah an herhmi thil cawk awkah tangka an ngei men lai lo. COVID-19 pulrai ruang zongah mi tampi cu rian an ngei lo. (Pct. 9:11) Cu bantuk thil sining asiloah a dang zuamcawhnak hna kan ton ahcun lungrethei in um hlah u timi Jesuh cawnpiaknak kha zeitindah kan zulh khawh?

6. Voikhat cu lamkaltu Peter cungah zeidah a cang ti kha fianter.

⁶ Voikhat cu lamkaltu Peter le a dang lamkaltu pawl thlichia a hran lioah Galilee rili ah tilawng in an kal i mah ah Jesuh ti cungah a kalmi kha an hmuh. Peter nih hitin a ti: “Bawipa, nangmah na si taktak ahcun na sinah ka ke in ti cungin ka ratter tuah.” Jesuh nih “ra ngat” tiah a ti tikah Peter cu lawng in a ṭum i “ti cungah cun a ke in Jesuh lei ah cun a kal.” Zeidah a cang. “Thlitu a fah zia kha a vun hmuh tikah a thin a phang i ti  chungah cun a pil cuahmah i ‘Bawipa, ka khamh tuah’ tiah a au.” Jesuh nih a kut in a hei banh i a khamh. Peter nih Jesuh a zoh chung cu ti cungah a kal kho ti i cinken cu a biapi tukmi a si. Asinain Peter nih thlichia a zoh tikah ṭihnak a hun ngei i ti chungah a pil.—Matt. 14:24-31.

7. Peter kong in zeidah kan cawn khawh?

⁷ Peter kong in kan cawn khawh. Peter nih lawng in a ṭum i rili cungah a kal hnik lioah thlichia ruangah ka thin a phang lai i ti chungah ka pil lai tiah a rak ruat lo. Jesuh sin phanh awkah ti cungah kal peng kha a duhmi a si. Asinain Jesuh kha zoh peng loin thlichia ruang tu ah a thin a rak phang. Tuchan ah, Peter nih ti cungah a kal khawh nakhnga zumhnak a ngeih a hauh bantukin kan tonmi harnak inkhawh awkah zumhnak kan ngeih a hau ve. Jehovah le a biakam cungah lungthin kan pek peng lo ahcun kan zumhnak a der lai i kan lungretheihnak nih a kan tei lai. Cucaah a har tukmi thil kan ton hmanhah a kan bawmh nakhnga Jehovah le a sining cungah lungthin kan pek zungzal a hau. Cutin zeitindah kan tuah khawh?

8. Pumsalei kan herhmi kong ah lungretheih tuk lo awkah zeinihdah a kan bawmh khawh?

⁸ Kan tonmi harnak kong ah lungretheih canah Jehovah tu kha kan i bochan a hau. Dawtnak a ngeimi kan Pa Jehovah nih thlaraulei thil kha hmasa bik ah kan chiah ahcun pumsalei kan herhmi kha kaan pek hna lai tiah bia a kan kamh. (Matt. 6:32, 33) Anih cu a biakam ningin a tuah zungzalmi a si. (Deut. 8:4, 15, 16; Salm 37:25) Jehovah nih vate le pangpar hna hmanh a zohkhenh hna ahcun zeidah kan ei lai i zeidah kan i hruk lai timi kong ah kan lungre a theih awk a si lo. (Matt. 6:26-30; Fil. 4:6, 7) Dawtnak nih nulepa kha an fale zohkhenh awkah a forh hna bantukin dawtnak nih vancung kan Pa kha a miphun pawl pumsalei an herhmi zohkhenh awkah a forh. Jehovah nih a kan zohkhenh hrimhrim lai ti kha kan zumh khawh.

9. Nuva tuahkhat hmuhtonnak in zeidah na cawn khawh?

⁹ Jehovah nih pumsalei kan herhmi a kan zohkhenh ti a langhtermi hmuhtonnak hi ruathmanh. Caantling rian a ṭuanmi nuva tuahkhat cu ralzam pawl umnak hmun ah a ummi unaunu pawl an i pumh khawh nakhnga don awkah a hlun ngaimi an mawṭaw in suimilam pakhat leng an kal. Unaupa nih hitin a ti: “Pumh a dih hnuah unaunu pawl kha rawl ei kan sawm hna. Asinain an caah ei awk zei hmanh kan ngei lo.” Mah tikah zeidah a rak cang? Unaupa nih hitin a ti chap: “Inn kan phanh tikah kan innka hram ah eidin bawm nganpi pahnih a rak um. Ahonih dah an chiah ti cu kan hngal lo. Jehovah nih a kan zohkhenhmi a si.” A hnuah mah nuva hna i an mawṭaw cu a rawk. Phungchim rianṭuannak caah an herh ko nain remhnak tangka an ngei lo. Zeizat dah a dih lai ti hngalh awkah mawṭaw remhnak dawr ah an kal. Mah tikah pa pakhat a ra i hitin a hal hna: “Aho mawṭaw dah a si?” Unaupa nih a mawṭaw a si i remh a hau tiah a ti. Mah pa nih “a poi lo. Ka nupi nih mah bantuk mawṭaw phun le a rong hi a duh. Zeizat dah nan hauh lai?” tiah a ti hna. Mah pa nih a pekmi tangka in unaupa nih a dang mawṭaw aa cawk khawh. A donghnak ah hitin a ti: “Mah ni zanlei cu kan i nuam tuk. Mah cu aa tong sualmi a si lo ti kha kan hngalh. Jehovah nih a kan bawmhmi a si.”

10. Pumsalei kan herhmi kong he aa tlaiin Salm 37:5 nih lungretheih lo awkah zeitindah tha a kan pek?

¹⁰ Tuukhal ṭha aw kha kan ngaih i pumsalei kan herhmi kong ah kan lungre a theih tuk lo ahcun Jehovah nih a kan bawmh lai ti kha kan zumh khawh. (Salm 37:5 rel; 1 Pet. 5:7)   Catlangbu 5 ah a langhtermi harnak kong hna kha ruathmanh. Atu caan tiangah Jehovah nih chungkhar lu asiloah rianngeitu hna kha nifatin kan herhmi zohkhenh awkah a hman men hna lai. Chungkhar lu nih cutin a tuah khawh lo asiloah kan rian kan sungh ahcun Jehovah nih a dang lam in a kan zohkhenh lai i a kan bawmh lai. Atu tuukhal ṭha nih tuah lo awkah a kan fialmi thil cheukhat kong kha i ruah hna u sih.

11. Matthai 7:1, 2 ningin Jesuh nih zei tuah lo awkah dah a kan fial, mah cu zeicah a har khawh?

¹¹ Matthai 7:1, 2 rel. Jesuh nih minung cu mitlinglo an si i midang palhnak ah lungthin an pek tawn ti kha a hngalh. Mah ruangah hitin a ti: ‘Midang kha va soi hna hlah u.’ Zumtukhat unau pawl soi lo awkah fakpi in kan i zuam men ko lai. Asinain kannih cu mitling lo kan si. Cucaah a caan ah mi kan soi hna ahcun zeidah kan tuah awk a si? Jesuh bia kha ngaih in mi soi lo awkah fakpi in kan i zuam awk a si.

12-13. Jehovah nih Siangpahrang David a hmuh ning kong ruahnak nih midang soi lo awkah zeitindah a kan bawmh khawh?

¹² Jehovah kong ruahnak in ṭhatnak kan hmu kho. Pathian nih mi pawl ṭhatnak cungah lungthin a pek. Mah kha sualnak ngan a tuahmi Siangpahrang David a pehtlaih ningin kan hmuh khawh. Tahchunhnak ah, Bathsheba he nupa sualnak an tuah i a vapa hmanh kha a thah. (2 Sam. 11:2-4, 14, 15, 24) Cucaah amah lawng si loin a dang a nupile i telin a chungkhar pawl zong harnak an rak tong. (2 Sam. 12:10, 11) Caan dang zongah Jehovah nih tuah dingin a fial lomi Israel ralkap milu a rel hnanak thawngin David nih lungthin dihlak in Jehovah aa bochan lo kha a rak langhter. David nih cutin a tuahmi cu a ralkap an tam tuk caah porhlawt a duh ca le an ka huhphenh khawh lai tiah a ruah caah a si kho men. A phichuak cu zeidah a si? Israel mi 70,000 cu rai in an rak thi.—2 Sam. 24:1-4, 10-15.

¹³ Israel mi hna chan lioah a nungmi na si ahcun David kha zeitindah na hmuh lai? Jehovah zaangfahnak hmuh awkah aa tlak lo tiah na ruat lai maw? Jehovah nih cun cutin a ruat lo. David cu a nun chung dihlak zeitlukin dah zumhfek tein a um timi cung le lungtak tein aa ngaihchihmi cungah lungthin a pek. Cucaah sualnak ngan a tuahmi kha Jehovah nih a rak ngaihthiam. Jehovah nih David nih zeitlukin dah a ka dawt ti le i zeitlukin dah thil ṭha tuah a duh ti kha a hngalh. Pathian nih kan ṭhatnak a kan zohpiak caah naa lawm tuk ko lo maw?—1 Si. 9:4; 1 Chan. 29:10, 17.

14. Khrihfa pawl kha midang soi lo awkah zeinihdah a bawmh hna?

¹⁴ Jehovah nih kan sinin tlinnak aa ruahchan lo caah kannih zong midang sinin tlinnak kha kan i ruahchan ve awk a si lo i midang ṭhatnak tu kha kan zohpiak hna awk a si. Midang tlinlonak hmuh le soi cu a fawi tukmi a si. Asinain Jehovah aa zohchunhmi nih cun midang tlinlonak a hngalh hmanhah anmah he ṭha tein rianṭuan awkah aa zuam. Tat rih lomi lungvar cu aa dawh men lai lo nain mifim nih cun ṭha tein tat hnuah aa dawh tukmi le a man a sung tukmi a si ti kha a hngalh. Jehovah le Jesuh bantukin midang tlinlonak kha si loin an ṭhatnak tu kha kan zohpiak hna a hau.

15. Midang sining kong ruahnak nih midang soi lo awkah zeicah a kan bawmh lai?

¹⁵ Midang ṭhatnak cungah lungthin pek  lawng si loin midang soi lo awkah zeinihdah a kan bawmh khawh? An nunning cu zeidah a lawh kha na mitthlam cuanter. Mah tahchunhnak hi ruathmanh. Nikhat cu biakinn ah a si a fak ngaingaimi nuhmeinu nih thawhlawm kuangah phaisa sen pahnih a sanhmi kha Jesuh nih a hmuh. Mah tikah “zeicah tam deuh in a sanh hnga lo?” tiah a rak ti lo. Nuhmeinu nih zeizat dah a pek timi cungah si loin cutin a tuahnak a ruang le a nunning cu zeidah a lawh timi kong tu ah lungthin a pek i a tuah khawhmi dihlak a tuah caah a rak thangṭhat.—Luka 21:1-4.

16. Veronica hmuhtonnak in zeidah kan cawn khawh?

¹⁶ Unaunu Veronica hmuhtonnak nih midang nunning kong ruah cu zeicah a biapit tuk timi kong kha a kan hmuhsak. Pathian rian a ṭuannak Khrihfabu ah nuhmei unaunu le a fapa an um. Veronica nih hitin a ti: “Annih cu Khrihfabu rianṭuannak ah aa tel tuk lomi an lo. Mah ruangah a ṭhatlonaklei in ka hmuh hna. Asinain mah unaunu he phungchim kan kalṭi i a fapa cu lungthinlei zawtnak a ngei tiah a ka ti. Anih cu thlaraulei le pumsalei an herhmi zohkhenh awkah fakpi in aa zuammi a si. A caan ah a fapa zawtnak ruangah a dang Khrihfabu ah aa pum.” Veronica nih hitin a ti chap: “Cu bantuk harnak a tonmi kha ka hngal bal lo. Atu cu mah unaunu nih Jehovah biak awkah a si khawh chungin aa zuammi kha ka sunsak tuk i ka upat tuk.”

17. Jeim 2:8 nih zei tuah awkah dah a kan fial i cutin zeitindah kan tuah khawh?

 ¹⁷ Zumtukhat unau pawl soi kan hmang ti kha kan hngalh ahcun zeidah kan tuah awk a si? Unau pawl kan dawt hna a hau ti kha kan philh lo awk a si. (Jeim 2:8 rel.) Midang soi lo awkah rak kan bawm tiah Jehovah sinah lungtak tein thla kan cam zong a hau. Cun kan soimi hna kha kanmah nih kan chawnh hmasa hnanak thawngin kan thlacammi ningin kan tuah khawh. Mah nih an kong tam deuh in hngalh awkah a kan bawmh lai. Kanmah he phungchim kalṭi awk le rawl eiṭi awk zongah kan sawm khawh hna. Kan unau pawl kong kha ṭha deuh in hngalh awkah kan i zuam i an ṭhatnak kha kan zohpiak hna ahcun Jehovah le Jesuh i zohchunh awkah kan i zuam kho lai. Mah lam in midang va soi hna hlah u timi tuukhal ṭha nawlpekmi kha kan zulh khawh.

18. Tuukhal ṭha bia kan ngaih kha zeitindah kan langhter khawh?

¹⁸ Tuu nih anmah a khaltu hna bia kha an ngaih bantukin a zultu pawl zong nih Jesuh bia kha an ngaih ve. Pumsalei kan herhmi kong he aa tlaiin lungretheih lo awk le midang soi lo awkah kan i zuam ahcun kan i zuamnak cungah Jehovah le Jesuh nih thluachuah a kan pek lai. “Tuurun hmete” asiloah “tuu dang” ah aa telmi kan si hmanhah tuukhal ṭha bia kha kan ngaih peng awk a si. (Luka 12:32; Johan 10:11, 14, 16) A hnu capar ah Jesuh chimmi a zultu pawl nih an tuah awk a simi thil pahnih kong kha kan i ruah hna lai.