1. Petet akoz Zezi ti konpar son bann disip avek bann mouton?

ZEZI ti konpar son relasyon avek son bann disip avek sa relasyon ant en berze ek son bann mouton. (Zan 10:14) Sa ti en bon konparezon. Bann mouton i konn zot berze e zot ekout son lavwa. En touris ti vwar sa arive e i ti dir: “Nou ti anvi tir portre bann mouton e nou ti anvi fer zot vin kot nou, me zot pa ti vin kot nou parski zot pa ti konn nou lavwa. Me apre en zenn berze ti vini, i ti kriy zot e zot ti swiv li.”

2-3. (a) Ki mannyer bann disip Zezi i montre ki zot pe ekout son lavwa? (b) Ki nou pou vwar dan sa lartik e dan sa lot ki swiv?

² Sa ki ti arive avek sa touris, i fer nou rapel sa ki Zezi ti dir konsernan son bann mouton setadir son bann disip. I ti dir: “Zot pou ekout mon lavwa.” (Zan 10:16) Me Zezi i dan lesyel. Alor, ki mannyer nou kapab ekout li? Nou ekout li ler nou fer bann keksoz ki i ansenny nou pour fer.​—Mat. 7:24, 25.

³ Dan sa lartik e dan sa enn ki swiv, nou pou vwar serten lansennyman Zezi. Parey nou pou vwar, Zezi i ansenny nou ki i annan serten keksoz ki nou devret aret fer e serten keksoz ki nou devret fer. Premyerman, nou pou vwar de keksoz ki sa bon berze i dir nou ki nou devret aret fer.

4. Dapre Lik 12:29, kwa ki kapab fer nou “trakas tro bokou”?

⁴ Lir Lik 12:29. Zezi ti ankouraz son bann disip pour “aret trakas tro bokou” konsernan bann keksoz ki zot bezwen pour viv. Nou konnen ki bann konsey Zezi i toultan saz e i bon pour nou. Nou anvi aplik li me parfwa i kapab difisil pour nou fer li. Akoz?

5. Akoz serten dimoun i kapab trakase konsernan bann keksoz materyel?

 ⁵ I kapab ki serten dimoun i enkyet konsernan bann keksoz materyel parey manze, lenz ek en landrwa reste. I kapab ki zot reste dan en pei kot en kantite dimoun i pov e i difisil pour trouv en travay. Petet i difisil pour zot ganny ase larzan pour pran swen avek zot fanmir oubyen sa dimoun ki anmenn larzan kot lakour in mor e son fanmir napa ase larzan pour ganny bann keksoz ki zot bezwen. Osi, i kapab ki zot in perdi zot travay akoz sa pandemi COVID-19. (Ekle. 9:11, NWT) Si ou’n pas dan enn sa bann sityasyon oubyen lezot sityasyon difisil, ki mannyer ou kapab swiv sa konsey Zezi pour aret trakas tro bokou?

6. Dekri sa ki ti arive en fwa avek zapot Pyer.

⁶ En fwa, zapot Pyer ek lezot ti lo en bato lo lanmer Galile pandan en tanpet, ler zot ti vwar Zezi pe mars lo delo. Pyer ti dir: “Senyer, si vreman ou sa, donn mwan lord pour mars lo delo pour vin kot ou.” Apre ki Zezi ti dir li “vini,” Pyer ti sorti dan bato e i ti mars lo delo e al ver Zezi. Remark sa ki ti arive apre: “Ler i ti vwar sa tanpet divan, i ti per e ler i ti konmans koule, i ti kriye: ‘Senyer, sov  mwan!’” Zezi ti anvoy son lanmen e atrap li. I enportan pour rapel ki Pyer ti kapab mars lo delo tan ki i ti kontinyen konsantre lo Zezi. Me ler Pyer ti get sa tanpet, i ti per e i ti konmans koule.​—Mat. 14:24-31.

7. Ki nou kapab aprann avek legzanp Pyer?

⁷ Nou kapab aprann avek legzanp Pyer. Ler Pyer ti sorti dan bato e debout lo delo, i pa ti ekspekte ki i ti pou per sa tanpet e konmans koule. I ti anvi kontinyen mars lo delo ziska ki i ariv kot Zezi. Me olye konsantre lo Zezi, i ti les sa tanpet fer li per. Nou pa kapab mars lo delo me parey Pyer nou bezwen annan lafwa pour fer fas avek nou bann problenm. Si nou pa kontinyen met nou konfyans dan Zeova ek son bann promes, nou pou konmans koule setadir nou lafwa pou afeblir. Alor menm si nou annan bann gro problenm, nou bezwen kontinyen konsantre lo Zeova ek lefet ki i kapab ed nou. Ki mannyer nou kapab fer sa?

8. Kwa ki kapab ed nou pour pa tro enkyet konsernan sa ki nou bezwen pour viv?

⁸ Olye enkyet konsernan nou bann problenm, nou bezwen met nou konfyans dan Zeova. Rapel ki nou Papa Zeova i kontan nou e i promet ki i pou donn nou sa ki nou bezwen si nou met li premye dan nou lavi. (Mat. 6:32, 33) Zeova in toultan gard sa promes. (Det. 8:4, 15, 16; Ps. 37:25) Si Zeova i pran swen avek bann zwazo ek bann fler sirman nou pa bezwen enkyet konsernan sa ki nou pou manze oubyen mete. (Mat. 6:26-30; Fili. 4:6, 7) Zis parey lanmour i motiv en paran pour donn son zanfan sa ki i bezwen, lanmour i motiv nou Papa ki dan lesyel pour donn son pep sa ki zot bezwen pour viv. Nou kapab asire ki Zeova pou pran swen avek nou.

9. Ki nou aprann avek leksperyans en koup?

⁹ Annou vwar en legzanp ki montre lafason ki Zeova i pran swen avek nou. En koup ki dan servis a plen tan, ti dray pour plis ki enn erdtan dan zot vye loto pour al zwenn detrwa ser ki reste dan en kan refizye e pour anmenn zot renyon. Sa frer ti dir: “Apre renyon nou ti envit sa bann ser pour en repa. Me apre nou ti realize ki nou ti napa manze pour donn zot.” Ki ti arive apre? Sa frer ti dir: “Ler nou ti ariv dan lakour, i ti annan de gro sak konmisyon devan laport. Nou pa ti konnen lekel ki’n met zot la. Zeova ti pran swen avek nou.” En pe letan pli tar, sa koup ti ganny problenm avek zot loto. Zot ti bezwen zot loto pour predikasyon me zot ti napa larzan pour repar li. Zot ti anmenn zot loto kot en garaz pour vwar konbyen pou koute pour repare. Apre, en zonm ti vini e demande pour ki sa loto. Sa frer ti dir ki i pour li e ki i bezwen ganny repare. Sa zonm ti reponn: “I pa fer nanryen, mon madanm i anvi en loto koumsa dan sa menm kouler. Konbyen ou oule pour sa loto?” Sa frer ti vann sa loto avek sa zonm e i ti ganny ase larzan pour li aste en lot loto. I ti dir: “Nou ti vreman kontan. Nou ti konnen ki sa pa’n ariv par azar me Zeova ki’n ed nou.”

10. Ki mannyer Psonm 37:5 i ankouraz nou pour pa enkyet konsernan sa ki nou bezwen pour viv?

¹⁰ Ler nou ekout sa bon berze e nou pa tro enkyet konsernan sa ki nou bezwen, nou kapab asire ki Zeova pou pran swen  avek nou. (Lir Psonm 37:5, NWT; 1 Pyer 5:7) Mazin lo sa bann sityasyon ki’n ganny mansyonnen dan  paragraf 5. I kapab ki Zeova i servi en sef fanmir oubyen en anplwayer pour ed nou ganny sa ki nou bezwen. Me si sa sef fanmir nepli kapab pran swen avek son fanmir oubyen si nou perdi nou travay, nou kapab asire ki Zeova pou pran swen avek nou dan lezot fason. Aprezan, annou vwar en lot keksoz ki sa bon berze i demann nou pour aret fer.

11. Dapre Matye 7:1, 2, ki Zezi ti dir nou aret fer e akoz sa i kapab difisil?

¹¹ Lir Matye 7:1, 2. Zezi ti konnen ki bann imen i enparfe. Souvandfwa zot konsantre lo defo lezot. I pour sa rezon ki Zezi ti dir: “Aret zize.” Petet nou fer bokou zefor pour pa ziz nou bann frer ek ser. Me parfwa i kapab ki nou pa arive fer sa. Si nou remarke ki parfwa nou kritik lezot, ki nou devret fer? Ekout Zezi e fer bokou zefor pour aret zize.

12-13. Ki mannyer legzanp Zeova i kapab ed nou pour aret ziz lezot?

¹² Nou kapab ganny bann byenfe ler nou medit lo legzanp Zeova. Zeova i konsantre lo sa ki bon dan nou. Reflesir lo sa ki i ti fer ler Lerwa David ti fer bann fot grav. Par egzanp, David ti komet adilter avek Bat-Seba e i ti menm fer touy son msye. (2 Sam. 11:2-4, 14, 15, 24) Sa ki David ti fer, ti fer li ek son fanmir soufer, enkli son bann madanm. (2 Sam. 12:10, 11) En lot fwa, David ti fer en keksoz ki Zeova pa ti’n donn lord pour fer. I ti konte ki kantite zonm i ti annan dan larme Izrael. Sa ti montre ki i pa ti met tou son konfyans dan Zeova. I kapab ki David ti fer sa parski i ti fyer ki i ti annan en kantite solda e ki i ti annan konfyans dan son bann solda pour proteksyon. Ki ti arive apre? Apepre 70,000 Izraelit ti mor avek en lepidemi.​—2 Sam. 24:1-4, NWT; 10-15, NWT.

¹³ Si ou ti reste Izrael sa letan, ki ou ti pou panse lo David? Eski ou ti pou mazinen ki Zeova pa devret pardonn li? Zeova pa ti mazin koumsa. I ti konsantre lo lefet ki David ti fidel tou son lavi e lo lefet ki i ti’n repantir. Alor Zeova ti pardonn David pour sa bann pese grav. Zeova ti konnen ki David ti kontan li en kantite e ki David ti anvi fer sa ki byen. Nou vreman apresye ki Zeova i konsantre lo sa ki bon dan nou.​—1 Rwa. 9:4; 1 Kron. 29:10, 17.

14. Kwa ki’n ed bann Kretyen pour aret ziz lezot?

¹⁴ Zeova pa ekspekte ki nou parfe. Alor nou osi nou pa devret ekspekte ki lezot i parfe e nou devret rod sa ki bon dan zot. I fasil pour vwar defo lezot e kritik zot. Me en dimoun ki swiv legzanp Zeova i travay byen avek lezot menm si i vwar defo lezot. En dyanman ki pa ankor ganny poli, i pa zoli me en dimoun ki saz i konnen ki apre ki sa dyanman in ganny koupe e poli i pou vin zoli e presye. Parey Zeova ek Zezi, nou pa devret konsantre lo defo lezot me lo zot bann bon kalite.

15. Ler nou reflesir lo sirkonstans lezot dimoun, ki mannyer sa i kapab ed nou pour pa ziz e kritik zot?

¹⁵ Apard ki konsantre lo bann bon kalite ki lezot i annan, kwa ki kapab ed nou pour pa ziz e kritik lezot? Esey mazin sa ki zot pe pas atraver. Annou  vwar en legzanp. En zour kot tanp, Zezi ti vwar en vev pov met de pti sou ki napa bokou valer, dan bwat kontribisyon. Zezi pa ti demande: “Akoz i pa’n met plis ki sa?” Olye konsantre lo lakantite larzan ki sa vev ti’n met dan bwat, Zezi ti konsantre lo son motivasyon ek sirkonstans e i ti dir ki sa vev in fer tou sa ki i ti kapab.​—Lik 21:1-4.

16. Ki nou kapab aprann avek leksperyans Veronica?

¹⁶ Annou vwar akoz i enportan pour reflesir lo sirkonstans lezot dimoun atraver leksperyans en ser ki apel Veronica. Dan sa kongregasyon kot i ti ete, i ti annan en manman tousel ek son garson. Veronica i dir: “Ler mon ti get zot, mon ti krwar ki zot pa asiste renyon ek predikasyon regilyerman. Sa ti fer mwan annan en move pwennvi lo zot. Me apre mon ti al predikasyon avek sa manman. I ti dir mwan ki son garson i otistik. I ti pe fer son mye pour ganny tou sa ki zot bezwen pour viv e pour kontinyen gard zot lanmitye avek Zeova for. Parfwa i ti bezwen asiste renyon dan en lot kongregasyon akoz son garson ti malad.” Veronica i dir: “Mon pa ti zanmen realize ki i ti pe pas dan tou sa bann difikilte. Aprezan mon apresye e respe sa ser pour tou sa ki i ti pe fer pour Zeova.”

17. Ki Zak 2:8 i demann nou pour fer e ki mannyer nou kapab fer sa?

 ¹⁷ Ki nou devret fer si nou realize ki nou’n ziz en frer oubyen ser? Nou devret rapel ki nou bezwen kontan nou bann frer ek ser. (Lir Zak 2:8.) Nou devret osi priy Zeova e sipliy li pour ed nou pour aret ziz lezot. Nou kapab azir an armoni avek nou lapriyer par pas letan avek sa dimoun ki nou’n kritike. Sa pou fer nou konn li pli byen. Nou kapab envit li pour al predikasyon oubyen pour pran en repa ansanm. Anmezir ki nou aprann konn nou frer oubyen ser pli byen, nou kapab esey swiv legzanp Zeova ek Zezi par rod sa ki bon dan li. Dan sa fason, nou montre ki nou pe ekout lord sa bon berze pour aret zize.

18. Ki mannyer nou kapab montre ki nou pe ekout lavwa sa bon berze?

¹⁸ Zis parey mouton i ekout lavwa zot berze, bann disip Zezi i ekout lavwa Zezi. Si nou fer nou mye pour aret enkyet konsernan sa ki nou bezwen pour viv e aret ziz lezot, Zeova ek Zezi pou beni nou zefor. Ki swa nou form parti “pti troupo” oubyen “lezot mouton,” annou kontinyen ekout e obei lavwa sa bon berze. (Lik 12:32; Zan 10:11, 14, 16) Dan sa lartik ki swiv, nou pou vwar de keksoz ki Zezi ti dir son bann disip zot devret fer.