1. ¿Kʼãrẽa jarasi Jesubara iyi kʼaidubemarãra obeja kĩrãkʼabʉta?

JESUBARA jarasi iyira obeja akʉbari kĩrãkʼabʉta akʉza iyi kʼaidubemarãra obejara kĩrãkʼabʉta (Juan 10:14). Naʉ̃ra wãrĩnu, obejarabara ũrĩ kʼawuabʉ yibari bedʼeara. Ẽbẽra abaʉba jarasi iyi dabʉba ũdudata obejaraba odara, iya jarasi: «Ewari aba daibara poto sakakĩrãpanasi obejarata, maʉ̃ kʼarea trʉ̃sida daima zemarẽã, mamina ãyira daima ze ẽ basi dai nemita ũrĩ kʼawuabʉ ẽ baera. Aramaʉ̃ne zesi warra aba obeja yibarita, iya trʉ̃side aramaʉ̃ta obejarãra iyima wãsida».

2, 3. (1) ¿Sãwũã ũrĩseapanʉ Jesu bedʼeara? (2) ¿Kʼãrẽta kʼawuadai naʉ̃ artikulode akʉza naʉ̃are zebʉrʉde?

² Naʉ̃ nebʉraba kĩrãbebibʉ Jesuba jaradata iyi kʼaidubemara ʉ̃rʉ, jaraside: «Maʉ̃rãbara mʉ bedʼeara ũrĩnaña» (Juan 10:16). Mamina Jesura ʉ̃tʉbʉ, ¿sãwũã ũrĩseapanʉ iyi bedʼeara? Ũrĩseapanʉ iya jaradiadata opanʉne (Mat. 7:24, 25).

³ Naʉ̃ artikulode akʉza naʉ̃are zeide kʼawuadayi Jesuba jaradiadata. Bari jaraita, Jesubara jaradiasi, dayirãba ʉ̃kʉrʉ nekʼãrẽ obʉra idubʉibarata akʉza jarasi kʼãrẽta oibarata. Nããra akʉdaya ʉ̃kʉrʉ nekʼãrẽ obʉra idubʉibarata.

4. Lucas 12:29de jarabʉdera, ¿kʼãrẽã krĩcha zroma oseabʉ?

⁴ (Akʉra Lucas 12:29). Jesubara jarasi iyi kʼaidubemara mejãcha krĩcha zroma oda ẽ marẽã ãya nesidabʉ erbai kʼarea. Dayirãba kʼawuapanʉmina naʉ̃  ũrãgʼara yibiata, edaʉde zareabʉ dayirãba mawũã oira.

5. ¿Kʼãrẽa krĩcha zroma obʉ ʉ̃kʉrʉ mebẽrãra?

 ⁵ Ʉ̃kʉrʉ mebẽrãra mejãcha krĩcha zroma obʉ de edaita, wua edaita akʉza yiko ũduita, edaʉde zare baera plata ũduita yi mebẽrã bia akʉita mawũã ẽ bʉrʉ yi plata deda ede badara beisi akʉza wuabemarãra trajo neẽ. Adewara COVID- 19 kʼarea ẽbẽra mejãchaʉta ãyi trajo aduasi akʉza plata neẽãbʉ (Ecl. 9:11). Dayirãta maʉ̃ne berabarisibʉrʉ mawũã ẽ bʉrʉ awuru bedʼea zromata erbʉbʉrʉ, ¿sãwũã krĩcha zromata oẽ bʼai Jesuba jarada kĩrãkʼa?

6. Jara ũrĩbira kʼãrẽta berabarisita Pedrora.

⁶ Ewari aba Jesu kʼaidubemarata puza Galileade jãbadepanasi, maʉ̃ne ãya ũdusi Jesuta do ʉ̃rʉ taita, aramaʉ̃ta Pedroba jarasi: «Nokʼó, bʉta taibʉrʉ mʉta bʉma wãbirua do ʉ̃rʉ̃». Jesuba jarasi: «Zerua» «Mawũãĩ Pedro jãbadʼeba udʼubʼaepe do ʉ̃rʉ̃ tebadʼewasia Jesúsma». «Mawũãmina zarea pʉ̃ãdrʉ nʉmʉta akʉpe perasia, maʉ̃ne tabʉsadʼewai bʼia mawũãsia: ¡Nokʼó, mʉrã kʼarebarua!», «Jesúsbara juwuadʼe jidape» kʼarebasi. Pedroba Jesu akʉbasidera do ʉ̃rʉ ne wãsi, mamina pʉãdrʉbʉsita akʉsidera pera sentisi maʉ̃ba tabʉzawasi (Mat. 14:24-31).

7. ¿Kʼãrẽta kʼawuapanʉ Pedro berabaridadebara?

⁷ ¿Kʼãrẽta kʼawuapanʉ Pedro berabaridadeba? Pedro jãbadeba ubae  kʼãrãpe do ʉ̃rʉ ne wãsidera krĩcha ẽ basi tawãita. Iyira Jesuchuidu jʉ̃ẽkĩrãbasi, mamina jʉ̃ẽ ẽ basi iya pʉãdrʉbʉsita akʉsi baera. Idi ewadera dayirãbara ĩjã erbaita nesidapanʉ bedʼea zroma awuantaita, abarika Pedroba ĩjã nesidada kĩrãkʼa do ʉ̃rʉ wãita. Dayirãba ĩjãna ẽ bʉrʉ Jeowaba jarabʉta aduaseabʉ dayirãba ĩjãbʉra, naʉ̃ra tawãi kĩrãkʼa bʉ abarika Pedro tawãna kĩrãkʼa. Dayirãba bedʼea zromata mejãcha erbʉmina ĩjãibara Jeowaba kʼarebaseabʉta.

8. ¿Kʼãrẽba kʼarebayi dayirã krĩcha zroma oẽ baita dayirãba nesidabʉ ʉ̃rʉ?

⁸ Dayirã bedʼea zroma erpanʉne Jeowata ĩjãpanʉbʉrʉ naʉ̃ba kʼarebayi mejãcha krĩcha zroma oẽ baita. Kĩrãbedadrʉ Jeowabara jarabʉta dayirãba iya zokʼabʉta nããra odara, dayirãba nesidabʉra iya diaita (Mat. 6:32, 33). Jeowabara naʉ̃ra ewari jõmaʉ̃nẽ mawũã obʉ (Deut. 8:4, 15, 16; Sal. 37:25). Jeowaba nediabʉbʉrʉ ibana zakerata akʉza akʉbʉbʉrʉ neponorata, dayirãra krĩcha zroma oẽ baibara kʼãrẽ koi kʼarea akʉza kʼãrẽ wua jʉ̃i kʼarea (Mat. 6:26-30; Filip. 4:6, 7). Abarika yibari biaba yi wũãwũãra kãgabʉ baera ãya nesidabʉta diabʉ kĩrãkʼa, Jeowabara iyi nezokʼaraba nesidabʉta diabʉ kãgabʉ baera. Jeowabara dayirãra ewari jõmaʉ̃nẽ akʉyi.

9. ¿Bʉara kʼãrẽta kʼawuabʉ mebẽrã juwa jidapanʉra berabaridadebara?

⁹ Akʉdadrʉ nebʉra aba, naʉ̃ba ũdubibʉ Jeowabara diaseabʉta dayirãba nesidabʉta. Mebẽrã juwa jidapanʉba jʉrʉ wãsida ãyi karrode mebẽrã yi desplazabʉ kʼarebabarimaebʉta, mawũã ãba yi jʉrebarima ededaita. Ãba yi jʉreda tẽã mebẽrã juwa jidapanʉrabara jarasida, ãyi kʼaidu zeda mebẽrã ãyi deda neko wãnamarẽã. Mamina ãya kĩrãbesida ãyi dedara yiko neẽãta mebẽrã diaita. Mawũẽra, ¿kʼãrẽta berabasi? Ãya jarasida: «Dai deda jʉ̃ẽbʉrʉdera dai puertade yiko mejãcha kʉbasi, daiba kʼawua ẽ basimina kʼaiba diasita kʼawuabasi Jeowaba daiba nesidabʉta diasita». Mawũã berabaridata dããrane mebẽrã juwa jidapanʉ karrora ãrĩsi akʉza ãyira plata neẽbasi maʉ̃ ara oita. Maʉ̃ kʼarea ãyara karro ara obarima edesida kʼawuaita sõbe baleita maʉ̃ karro ara oira. Maʉ̃ne ẽbẽra abaʉba widisi ¿kʼaide naʉ̃ karrora?, aramaʉ̃ta mebẽãba panʉsi: «Mʉ̃re, naʉ̃ karrora wesi ãrĩsi baera». Yumakẽrãba jarasi: «Bedʼea neẽ, mʉ̃ kimaba kãgabʉ naʉ̃ karro kĩrãkʼabʉta, ¿bʉara sõbe bari nẽdoi naʉ̃ karrora?». Mawũẽra mebẽãra, mamaʉ̃ba mejãcha platabara wãsi awuru karro edamaba. Iya jarasi: «Maʉ̃ ewaridera mejãcha sobiapanasi Jeowaba kʼarebasi baera».

10. ¿Sãwũã kʼarebabʉ Salmo 37:5ba dayirã krĩcha zroma oẽ baita nebia erbai kʼarea?

¹⁰ Jesura obeja akʉbari bia, iyi bedʼeata ũrĩpanʉbʉrʉ akʉza krĩcha zroma oda ẽ bʉrʉ nekʼãrẽ bia erbai kʼarea, Jeowabara diayi dayirãba nesidabʉra (akʉra Salmo 37:5; 1 Ped. 5:7). Jẽda kĩrãbedadrʉ  parrapo 5de jaradata,  Jeowabara dayirãba nesidabʉra diaseabʉ dayirã trajodeba mawũã ẽ bʉrʉ mebẽrãneba. Mamina yi plata deda edebʉta beira mawũã ẽ bʉrʉ dayirãta trajo aduara Jeowabara diayi dayirãba nesidabʉra, kʼawua ẽ mina iya sãwũã oita iya kʼarebayi. Atia kʼawuadayi Jesuba jaradata dayirãba obʉta idubʉibarata.

11. Mateo 7:1, 2de jarabʉdebara, ¿kʼãrẽta idubʉibara akʉza kʼãrẽa zareabʉ edaʉde?

¹¹ (Akʉra Mateo 7:1, 2). Jesubara kʼawuabasi dayirãra nemitia omiata akʉza mejãcha akʉbʉta wuabemaba nemitia obʉta. Maʉ̃ kʼarea Jesuba jarasi: «Zhãrãta kʼawua orãũdua». Dayirãba kãga ẽ mina wuabemaba nemitia obʉ akʉita, edaʉde zareabʉ idubʉita, ¿kʼãrẽta oseapanʉ? Ũrĩbara Jesuba jaradiabʉta akʉza zarea oibara wuabemaba obʉta akʉ ẽ baita.

12, 13. ¿Kʼãrẽa yiza bia Jeowara dayirãita?

¹² Dayirãitara Jeowara yiza bia, iya akʉbʉ baera ẽbẽraba nebia obʉtrʉ. Mawũã osi nokʼo Davidʼʉ̃me iya nemitia oside (2 Sam. 11:2-4, 14, 15, 24). Iya odaba zʉbʉriabisi yi mebẽrãta akʉza iyita (2 Sam. 12:10, 11). Ewari aba, Davidbara zokʼasi iyi gorogorora jʉachadamarẽã kʼawuaita sõbe bʉta iya ũduside mejãcha bʉta, ĩjã ẽ basi Jeowade awuarabʉrʉ ĩjãsi yi gorogororane. Maʉ̃ kʼarea 70.000 gorogorora beisi kayaba (2 Sam. 24:1-4, 10-15).

¹³ Dayirãta maʉ̃ ewaride basibʉrʉ, ¿sãwũã krĩchakasi David ʉ̃rʉ?, ¿iyi ʉ̃rʉ mitia krĩchakasika akʉza jarakasika Jeowabara iya mitia odara kĩrãdua ẽ baibarata? Mamina Jeowabara mawũã krĩcha ẽ basi, awuarabʉrʉ akʉsi iyi ewari jõmaʉ̃nẽ kʼẽrẽpa badata, adewara iyi soiduba nemitia oda jẽda krĩchabʉta. Jeowabara kʼawuabasi Davidba iyi mejãcha kãgabʉta akʉza nebia okĩrãbasita maʉ̃ kʼarea kĩrãduasi iya nemitia odara. Dayirãbara Jeowa biga diapanʉ, iya akʉbʉ baera dayirãba nekʼãrẽ bia obʉtrʉ (1 Rey. 9:4; 1 Crón. 29:10, 17).

14. ¿Kʼãrẽta kʼawuabʉ Jeowabara dayirã ʉ̃rʉ akʉza naʉ̃ba sãwũã kʼarebabʉ dayirãra?

¹⁴ Jeowabara kʼawuabʉ baera dayirãra nemita omiata maʉ̃ba jʉ̃ã ẽ jõma daucha oita, maʉ̃ kʼarea dayirãbida jʉ̃ã ẽ baibara wuabemaba jõma daucha omarẽã. Yi ẽbẽra Jeowade kĩrãkʼa obʉra ibiade panʉ wuabemabawara ãyi mitiata akʉbʉmina. Ẽbẽraba diamante ũdubʉrʉdera mõgaratrʉ akʉbʉ, mamina yi buru biabara bari mõgarata akʉ ẽ, kʼawuabʉ baera naʉ̃ ara obʉrʉde biʼia kiraita akʉza mejãcha baleita. Dayirãbara Jeowa akʉza Jesude kĩrãkʼa akʉdaibara ẽbẽrarãba ãyi sode nebia erbʉtrʉ.

15. ¿Kʼãrẽne kʼarebai wuabema berabarinʉmʉta krĩchabʉbara?

¹⁵ Dayirãbara akʉibara wuabemaba ãyi sode nebia erbʉta, adewara krĩchapanʉbʉrʉ ãyi sãwũã berabarinʉmʉta, naʉ̃ba kʼarebayi ãyi ʉ̃rʉ imitia bedʼea ẽ baita. Akʉdaya yiza aba, ewari aba Jesura templodechuasi mama ũdusi pẽdra abaʉba moneda ũme  eda bʉesita plata bʉebadamae Jesubara widi ẽ basi kʼãrẽa moneda ũmepai bʉesita, awuarabʉrʉ krĩchasi kʼãrẽa diakĩrãsita akʉza iyi sãwũã berabarinʉmanata, maʉ̃ kʼarea pẽdra ʉ̃rʉ ibia bedʼeasi iya jõma erbʉta diasi baera (Luc. 21:1-4).

16. ¿Verónica berabaridebara kʼãrẽta kʼawuapanʉ?

¹⁶ Verónica berabaridaba ũdubibʉ kʼãrẽa krĩchaibarata wuabemara sãwũã berabaribʉra. Iyi kongregasionera basi mebẽã wẽrã aba yi wauʼʉ̃me, Verónicaba jarasi: «Mʉ̃mara ãyira badua wã ẽ basi ãba yi jʉrebarima akʉza Daizeze bedʼea jaradiade, maʉ̃ kʼarea mʉ̃ra mitia krĩchabasi ãyi ʉ̃rʉ. Maʉ̃ tẽã ewari aba mʉ̃ra wãsi Daizeze bedʼea jaradiade naʉ̃ mebẽãʉ̃me. Maʉ̃ne iya jara ũrĩbisi iyira bedʼea zroma erbʉta yi waura buru morrode kayabʉ baera akʉza zarea obʉta ãya nesidabʉ ũduita, adewara Jeowa kʼawa bʼaita akʉza edaʉde awuru kongregasionma wãbasita yi wũãwũãta kayabʉ baera». Verónicaba jarasi: «Mʉ̃ara kʼawua ẽ basi iyira mejãcha bedʼea zroma erbʉta. Idi mʉ̃a bia akʉbʉ akʉza sobiabʉ iyira zarea obʉ baera Jeowa kʼawa bʼaita».

17. ¿Kʼãrẽta zokʼabʉ Santiago 2:8bara akʉza sãwũã ũrĩ maʉ̃ bedʼeara?

 ¹⁷ Wuabemara ʉ̃rʉ imitia bedʼeapanʉta kʼawuadara, ¿kʼãrẽta oseapanʉ? Kĩrãbedaibara kãgaibarata dayirã mebẽrãra (akʉra Santiago 2:8). Adewara Jeowa widibara kʼarebamarẽã wuabema ʉ̃rʉ imitia bedʼea ẽ bʼaita. Dayirãba kʼawuaita wuabemara sãwũã berabaribʉta trʉ̃seabʉ, ãyibawara bedʼeaseabʉ, trʉ̃seabʉ nekomarẽã dayirãbawara akʉza Daizeze Bedʼea jaradia wãseabʉ ãyibawara. Mawũã opanʉbʉrʉ, Jeowa akʉza Jesude kĩrãkʼa odayi, mebẽrãba ãyi sode nebia erbʉta ũdukʼawuakĩrãpanʉ baera, mawũã odara wuabemaraba obʉta akʉda ẽ bayi.

18. ¿Kʼãrẽta odaibara Jeowaba dayirãʼa nebia diamarẽãra?

¹⁸ Abarika obejaraba yibari bedʼea ũrĩ kʼawuabʉ kĩrãkʼa dayirãbida ũrĩbʉ Jesu bedʼeata. Zarea opanʉbʉrʉ krĩcha zroma oẽ baita nekʼãrẽ bia erbai kʼarea akʉza wuabemara ʉ̃rʉ mitia bedʼea ẽ baita, Jeowa Jesuʉ̃meba dayirã nebiata diayi. Yi ʉ̃ta wãiraba mawũã ẽ bʉrʉ ẽbẽra nama egorode bʼaiba ewari jõmaʉ̃ne ũrĩnaibara obeja akʉbari bia bedʼeara [Jesu] (Luc. 12:32; Juan 10:11, 14, 16). Wuarebema artikulode kʼawuadayi bedʼea ũme Jesuba jaradata iyi kʼaidubemaraba oibarata.