1. Pine nemene matre hnei Iesu hna aceitunëne la itretre drei nyidrë me itre mamoe?

 HNEI Iesu hna aceitunëne la itretre drei nyidrë me itre mamoe. (Ioane 10:14) Ame la itre mamoe ke, canga wangatrehmekune hi itre ej la nin ne la atre thupë mamoe. Önine la ketre atr ka ihamë: “Hne huni hna tupath troa hëne la itre mamoe matre kuca la ketre video. Ngo tha xötrethenge huni kö hnei itre ej ke, tha wangatrehmekune kö la itre nine hun. Ame la kola ihë hnene la nekötrahmanyi ka thupë mamoe, itre eje hi lai a xötrethenge angeic.”

2-3. (a) Hnene la itretre drei Iesu hna amamane tune kaa laka, angatr a drengethenge nyidrë? (b) Nemene la hne së hna troa ce wang ngöne la tane mekun celë me ngöne la ketre tane mekun?

² Kola amekunë së hnene la hna melën hnene la atre ihamë, lo hna qaja hnei Iesu kowe la itretre drei nyidrë. Öni Iesu: “Tro nyudreni a drenge la aqane ewekëng.” (Ioane 10:16) Tro sa drei Iesu tune kaa nge nyidrëti pe e hnengödrai? Easa drengethenge Iesu ngöne la easa trongëne la itre ini i nyidrë ngöne la mele së.—Mat. 7:24, 25.

³ Tro sa ce wang ngöne la tane mekun celë me ngöne la ketre tane mekun, la itre xaa ini qaathei Iesu. Öni nyidrë ka hape, hetre nyine tro sa thipetrij nge hetre nyine tro sa kuca. Tro sa pane ce wang la lue ewekë nyine tro sa thipetrij.

4. Thenge la Luka 12:29, nemene la itre ewekë hne së hna “hnehengazon”?

⁴ E jë la Luka 12:29. Öni Iesu kowe la itretre drei nyidrë ka hape, tha tro kö a ‘hnehengazo menu’ göne la itre ewekë ne ngönetrei. Atre hi së laka, ka lolo la itre eamo qaathei Iesu. Matre easa trongëne itre ej, ngacama tha ka hmaloi kö. Pine nemen?

5. Pine nemene matre itre xan a hnehengazo göne la itre ewekë ne ngönetrei?

 ⁵ Ame itre xan, angatr a hnehengazo göne la nyine xen, iheetr, me uma. Maine jë, angatr a mel ngöne la itre nöj laka, kola elë la thupene mo. Matre, jole koi angatr troa hetrenyi la ka ijij. Ame pena itre xan, hna meci la atr ka huliwa thatraqane la fami. Maine pena, hnene la meci COVID-19, matre pëhë huliwa i angatr. (Ate cai. 9:11) Tune kaa la aqane tro sa trongëne la eamo i Iesu ka hape, “loi ju hë hna hnehengazo menu”?

6. Nemene la ka traqa koi Peteru?

⁶ Ame la ketre ijin, hnei Peteru me itre xaa aposetolo hna ti he e Galilaia. Traqa pi hi la ketre wene, nge hnei angatr hna öhnyi Iesu kola tro hune la hnagejë. Öni Peteru: “Joxu, maine nyipëti hi, hë ni jë, matre tro ni a tro hune la tim koi nyipë.” E cili, hnei Iesu hna hë angeic, nge hnei Peteru hna uti qa hune la he “me tro koi Iesu hune la tim.” Ngazo pe, hnei Peteru hna goeëne “la ecatrene la eny, ame hnei angeice hna xou ju me nyiqaane lö, me sue me hape: ‘Joxu, wai ni!’” Hnei Iesu hna li ime me amele angeic. Eje hi, hnei Peteru hna tro hune la tim ke, hnei angeic hna goeë Iesu. Ngo ame hë la  angeic a goeëne la eny, angeice hi lai a xou me luelu, me lö hnine la hnagejë.—Mat. 14:24-31.

7. Nemene la ini hne së hna xom qa ngöne la hna melën hnei Peteru?

⁷ Hetre ini hne së hna xom qa ngöne la hna melën hnei Peteru. Tha mekune kö angeic laka, tro angeic a luelu hnene la enyi ka catr. Ame koi Peteru, tro kö angeic a tro hune la hnagejë uti traqa koi Iesu. Ame pe, tha hnei angeice kö hna catre goeë Iesu. Ketre tu së fe, loi e tro sa catre lapaun matre atreine xomihnine la itre jol. Maine tha mejiune hë së koi Iehova me kowe la itre hnei Nyidrëti hna thingehnaean, tro hë sa iananyi qaathei Nyidrë. Loi e xecie koi së laka, tro kö Iehova a xatua së ngöne la itre ijine jol. Tune kaa?

8. Nemene la ka troa xatua së matre tha tro kö a hnehengazo menu göne la itre ewekë ne ngönetrei?

⁸ Maine tro sa acatrene la lapaune së, tha tro kö sa hnehengazo menu. Eje hi, hnei Iehova hna thingehnaean ka hape, maine tro sa amë panëne la itre huliwa i Nyidrë, tro hë Nyidrëti a hamë së la ka ijij. (Mat. 6:32, 33) Hnei Iehova palahi hna eatrëne la itre hnei Nyidrëti hna qaja. (Deu. 8:4, 15, 16; Sal. 37:25) Ketre, Nyidrëti a nyihnyawane la mele ne la itre waco me itre iengen. Haawe, the luelu kö së laka, tro fe Nyidrëti a hamë së la itre nyine xen me heetr. (Mat. 6:26-30; Fil. 4:6, 7) Ame la itre kem me thin, angatr a hnime la itre nekö i angatr, matre angatr a thupë nyudren. Ketre tune fe, Iehova a hnimi së matre Nyidrëti a hamë së la ka ijij. Loi e xecie koi së laka, tro kö Iehova a thupë së!

9. Nemene la ini hne së hna xom qa ngöne la hna melën hnene la lue trefën?

⁹ Hanawang la aqane xatuane Iehova la lue trefën. Hnei nyidroti hna trotheng la itre trejine föe ka lapa ngöne la ketre hunapo hna kötre mel (camp de réfugiés), matre troa sine la icasikeu. Caa hawa ne nyidroti a nyenyape memine la cane loto i nyidro. Önine la trejin trahmany: “Thupene la icasikeu, hnei nyio hna könëne la itre trejine föe troa pane xen. Ngo thëthëhmine hë nyio laka, pëkö xen ekoilo hnalapa. Nemene la hnei nyidroti hna kuca? Öni nyidrë: “Ame la eahuni a traqa, eahuni a öhne la lue watreng ka tiqa hnei xen. Thatre kö huni la ka traqa fë, ngo xecie koi nyio laka, Iehova a xatua nyio.” Thupene lai, hna ngazo la loto i nyidro, lo hna xom matre troa cainöj. Ngacama pëkö manie i nyidro, ngo hnei nyidro hna tro fë troa nyihnyawan. Traqa pi hi la ketre trahmanyi me hnying ka hape: “Loto i drei la?” Hnene la trejin hna sa ka hape, loto i nyidrë ngo ka ngazo pe. Önine jë hi lai trahmany: “Tha nyipiewekë kö. Kolo hnyawa hi la loto hna ajan hnene la föeng. Ije thupene la loto i nyipë?” Hnene la trejin hna salemën la loto nge ijije hi troa itö loto ka hnyipixe. Öni nyidrë: “Thatreine kö ni qaja la etrune la madrineng la drai cili. Eje hi, Iehova a xatua nyio!”

10. Thenge la Salamo 37:5, pine nemene matre tha tro kö sa hnehengazo menu göne la itre ewekë ne ngönetrei?

¹⁰ Maine tro sa drenge la atre thup ka lolo me tha hnehengazo menu göne la itre ewekë ne ngönetrei, tro hë Iehova a thupë së. (E jë la Salamo 37:5; 1 Pet. 5:7) Hapeu, epuni kö a melën la itre jol  hna qaja ngöne la  paragarafe 5? Maine jë, hnei Iehova hna xatua së jëne la he ne la fami maine maseta së pena. Ngo tune kaa e meci hë la he ne la fami maine e pëhë huliwa së? Tro palahi Iehova a hamë së la ka ijij. Tro pena sa ce wang la hnaaluene ewekë hnei Iesu hna upi së troa thipetrij.

11. Thenge la Mataio 7:1, 2, nemene la hnei Iesu hna upi së troa thipetrij, nge pine nemene matre tha ka hmaloi kö?

¹¹ E jë la Mataio 7:1, 2. Atre hi Iesu laka, itre atr ka tha pexeje kö së, nge ame itre xaa ijin, easa xöjetriji itre xan. Celë hi matre, öni nyidrë: “Ea loi ju hë hna iwaigele.” Ngo eje hi, tha ka hmaloi kö. Nemene la nyine tro sa kuca e cili? Loi e tro sa drei Iesu me nue trengecatr matre tha tro kö a qejegele itre xan.

12-13. Tro la tulu i Iehova a xatua së tune kaa matre tha tro kö sa qejegele itre xan?

¹² Ame Iehova ke, Nyidrëti a wangatrune la itre thiina së. Celë hi lai hnei Nyidrëti hna kuca ngöne lo Dravita a kuci ngazo. Hnei Dravita hna nyixetë me Batheseba me humuthe la föi eahlo. (2 Sam. 11:2-4, 14, 15, 24) E cili, hna traqa la itre akötr ka tru koi Dravita me fami angeic. (2 Sam. 12:10, 11) Ame la ketre ijin, hnei Dravita hmaca hna ena la wathebo me e la etrune la itre sooc. Maine jë, Dravita a pi mama fë la trongene isi angeic laka, angatre hi la ka troa thupëne la nöj. Ngo nemene la ka traqa e thupen? Traqa koi 70 000 lao atre Isaraela ka mec hnene la ketre meci ka solesol!—2 Sam. 24:1-4, 10-15.

¹³ Maine easë fe ngöne la ijine cili, tune kaa la aqane tro sa goeë Dravita? Tro kö sa qejegele angeic me hape, tha ijiji angeice kö la ihnimi Iehova? Tha celë kö lai mekuna i Iehova. Hnei Nyidrë hna lapa mekun la aqane mele nyipici Dravita. Hnei Iehova hmaca hna kepe Dravita me nue la itre ngazo i angeic. Ketre, atre hi Iehova laka, tru la ihnimi Dravita koi Nyidrë nge aja i angeic troa kuca la loi. Hapeu, tha madrine kö së laka, Iehova a goeëne la ka loi the së?—1 Ite jo. 9:4; 1 A. l. ite jo. 29:10, 17.

14. Nemene la ka troa xatua së matre tha tro kö sa qejegele itre xan?

¹⁴ Tui Iehova, loi e tro sa hnime la itre xan me goeëne la ka loi thei angatr. Nyipici laka, canga öhne hi së la itre tria i angatr me xöjetriji angatr. Ngo ame la atr ka hnimi Iehova ke, angeic a ce mel me itre xan, ngacama öhne hi angeic la itre tria i angatr. Pane mekune jë la ketre wene etë ka melemel. Qëmekene troa nyihnyawane la wene etë cili ke, tha mama palakö la emingömingön. Ngo ame la atr ka troa huliwane ej ke, atre hi angeic laka, ketre wene etë lai ka troa melemel nge ka tru thupen. Celë hi matre, tui Iehova me Iesu, tha tro kö sa goeëne la ka mama koi lue mek. Loi e tro pe sa wangatrune la itre thiina ka loi itre xan.

15. Pine nemene matre nyipiewekë tro sa goeëne la aqane mele i itre xan?

¹⁵ Nyipiewekë tro sa goeëne la ka loi thei itre xan. Nemene la ka troa xatua së matre tha tro kö a qejegele itre xan? Tui Iesu, loi e tro sa goeëne la aqane mele i angatr. Ame la ketre ijin, hnei Iesu hna öhne la ketre sine föe kola kuiëne la lue manie ka co, e hnine la uma ne hmi. Tha hnei Iesu kö hna qaja ka hape: “Hnauëne laka, tha tru kö la hnei eahlo hna kuiën?”  Ame la ka sisitria koi Iesu ke, ene la aliene hni eahlo me aqane mele i eahlo. Hnei Iesu hna qaja la tulu eahlo ke, hnei eahlo hna hamën asë la hnei eahlo hna hetreny.—Luka 21:1-4.

16. Nemene la ka traqa koi Véronica?

¹⁶ Nyipiewekë tro sa goeëne la aqane mele i itre xan. Hanawang la ka traqa koi Véronica. Ame ngöne la ekalesia, hetrenyi la ketre trejine föe ka hetrun caasine la nekö i eahlo trahmany. Öni Véronica: “Tha sine kö eahlo la itre xaa icasikeu me cainöje trootro. Matre, hnenge hna wangaconyi nyidro. Ngo ame la ketre ijin, hnenge hna ce cainöj me eahlo. Öni eahlo ka hape, ka wezipo la nekö i eahlo matre tha ka hmaloi kö troa hetru nyën. Ketre, eahlo a kuca la hnei eahlo hna atrein, matre tro nyidroti a catre lapaune koi Iehova, me hetrenyi la ka ijij. Ame la kola wezipo hnene la nekö i eahlo, eahlo a icasikeu memine la ketre ekalesia.” Öni Véronica hmaca jë hi: “Tha mekune kö ni laka, tru la itre jol ka traqa kowe lai trejin. Tru la ihniming koi eahlo. Trotrohnine hë ni laka, eahlo a nue trengecatr matre troa nyihlue i Iehova.”

17. Nemene la hna upi së troa kuca ngöne Iakobo 2:8?

¹⁷ Nemene la nyine tro sa kuca e hne së hna qejegelene la ketre trejin, ngo ka tria pe la mekuna së? Loi e tro sa acatrene la  ihnimi së koi angeic. (E jë la Iakobo 2:8.) Ketre, loi e tro sa sipo ixatua koi Iehova ngöne la thith, matre tha tro kö sa iwaigele. Thupene lai, loi e tro sa ujë thenge la itre thithi së, me xomi ijin matre troa atrepengöi angeic hnyawa. Maine jë, tro sa sipo angeic troa ce cainöj me easë, maine könë angeic pena troa xen. Tui Iehova me Iesu, loi e tro sa thele la ka loi thei angeic. Aqane tro hi së lai a drengethenge la atre thup ka lolo, lo nyidrëti a hape, tha tro kö a qejegele itre xan.

18. Tro sa drengethenge tune kaa la aqane ewekë ne atre thup ka lolo?

¹⁸ Ame la itre mamoe ke, wangatrehmekune hi itre eje la nin ne la atre thupë mamoe. Ketre tune fe, wangatrehmekune hi la itretre drei Iesu la nine i nyidrë. Haawe, tha tro kö sa hnehengazo göne la itre ewekë ne ngönetrei me qejegele itre xan. E cili, tro Iehova me Iesu a amanathithi së. Ngacama easa sine “la itre mamoe ka xalaith” maine “itre xaa mamoe” pena, ngo loi e tro sa catre drengethenge la atre thup ka lolo. (Luka 12:32; Ioane 10:11, 14, 16) Ame ngöne la ketre tane mekun, tro sa ce wang la lue ewekë hnei Iesu hna upi së troa kuca.