1. Kuun minw kama Yezu y’a ka kalandenw suma ni sagadenw ye, u dɔ ye juman ye?

TERIYA min be Yezu n’a ka kalandenw cɛ, Yezu y’o suma ni jɛnɲɔgɔnya ɲuman ye min be sagadɛndɛla n’a ka sagadenw cɛ (Zan 10:14). O bɛnnin lo. Sagadenw b’u dɛndɛbaga kaan lɔn ani u b’a lamɛn. Cɛɛ dɔ y’o lo kɔrɔsi. A ko: “Ne ni n’ tɔɲɔgɔnw tun b’a fɛ ka saga dɔw foto ta. O la, an y’a ɲini k’a kɛ u ka gwɛrɛ an na. Nka u ma gwɛrɛ dɛ, sabu u tun t’an kaan lɔn. O kɔ, cɛdennin dɔ nana, u dɛndɛbaga tun lo. A ye sagaw weele tuma min na dɔrɔn, u sinna ka tugu a kɔ.”

2-3. a) Yezu ka kalandenw b’a yira cogo di ko u b’a kaan mɛnna? b) An bena mun lo lajɛ barokun nin n’a nɔfɛta la?

² O koo b’an hakili jigi Yezu ka kumaw na a ye minw fɔ a ka sagadenw koo la, o kɔrɔ, a ka kalandenw. A ko: “U bena na n kaan mɛn.” (Zan 10:16). Nka Yezu do be sankolo la. An be se k’a yira cogo di ko an b’a kaan mɛnna? An b’o kɛ cogo tigitigi min na, o ye k’a ka kalanw sira tagama.—Mat. 7:24, 25.

³ Barokun nin n’a nɔfɛta la, an bena Yezu ka kalan dɔw lajɛ. I ko an bena a ye cogo min na, Yezu y’an kalan ko an man ɲi ka koo dɔw kɛ ani ko an ka ɲi ka koo dɔw kɛ. An bena kɔn ka kuma koo fila dɔw koo la, sagadɛndɛla ɲuman ko an kana minw kɛ.

4. Ka kɛɲɛ ni Luka 12:29 ye, koo jumanw lo be se k’a to an be hami?

⁴ Luka 12:29 kalan. Yezu y’a ka kalandenw jija ko  u ‘kana u hakili ɲagami [wala u kana hami]’ tugun u makoɲɛfɛnw koo la. An b’a lɔn k’o ladili bɛnnin lo tuma bɛɛ ani ko hakilitigiyako lo. An b’a fɛ k’o sira tagama, nka tuma dɔw la, o be se ka gwɛlɛya an ma. Mun na do?

5. Mun na dɔw be se ka hami u makoɲɛfɛnw koo la?

 ⁵ N’a sɔrɔ dɔw be hami u makoɲɛfɛnw koo la, i n’a fɔ dumuniko, fani donta ani siyɔrɔko. N’a sɔrɔ u be jamana minw na, mɔgɔ caaman ye fantanw ye ani baara sɔrɔko ka gwɛlɛ. A be se ka gwɛlɛya ka wari sɔrɔ walisa k’u ka denbaya mako wasa. Wala mɔgɔ min tun be denbaya mɔgɔw mako wasa, o tigi sara ani denbaya mɔgɔ tɔɔw tɛ sera tugun k’u makoɲɛfɛnw sɔrɔ. N’a sɔrɔ dɔw ka baara tiɲɛna fana COVID-19 fɔɲɔbana kosɔn (Waaj. 9:11). N’o koo ɲɔgɔn wala gwɛlɛya wɛrɛw b’an kan, an be se ka Yezu ka ladili sira tagama cogo di, o min ye ko an kana hami tugun?

6. A ɲɛfɔ min ye ciden Piyɛri sɔrɔ loon dɔ la.

⁶ Loon dɔ, ka ciden Piyɛri ani ciden tɔɔw to kurun kɔnɔ Galile baji kan, fɔɲɔba dɔ wulila. U ye Yezu tagamatɔ ye jii kan. Piyɛri y’a fɔ Yezu ye ko: “Matigi, ni ele lo tiɲɛ na, a fɔ ko ne ka na e fɛ yen jii kan.” Yezu y’a fɔ a ye ko: “Na.” O kɔ, “Piyɛri bɔra kurun kɔnɔ ka taama jii kan n’a be tagara Yezu fɛ.” A kɔrɔsi min kɛra o kɔ. “Piyɛri y’a ye ko fɔɲɔ fanga ka bon minkɛ, siranya y’a minɛ. A y’a daminɛ ka jigi jii jukɔrɔ, o la, a kulera ko: ‘Matigi, n dɛmɛ.’ ” Yezu y’a bolo bɔ k’a minɛ. An k’a to an hakili la ko tuma min na Piyɛri tun be sera ka tagama jii kan, a ɲɛɛ lɔnin tun be Yezu lo kan. Nka a ye fɔɲɔba filɛ  minkɛ, a siranna ani a tun be sigasigara. O lo kama a y’a daminɛ ka jigi jii jukɔrɔ.—Mat. 14:24-31.

7. Min ye Piyɛri sɔrɔ, an be se ka kalan juman lo sɔrɔ o la?

⁷ Min ye Piyɛri sɔrɔ, an be se ka kalan sɔrɔ o la. Tuma min na Piyɛri tun be bɔra kurun kɔnɔ ka tagama jii kan, a tun t’a hakili la ko fɔɲɔba tun bena siranya bila a la ani ko a bena a daminɛ ka jigi jii jukɔrɔ. A tun b’a fɛ ka tagama jii kan fɔɔ ka taga se Yezu yɔrɔ. Nka a m’a ɲɛɛ lɔnin to Yezu kan minkɛ, fɔɲɔba ye siranya bila a la. Tiɲɛn lo ko an tɛ se ka tagama jii kan. Nka, koo dɔw be se k’an ka limaniya kɔrɔbɔ. N’an jigi tɛ Jehova n’a ka layiduw kan tugun, an ka limaniya barika bena dɔgɔya. O la, an ka gwɛlɛyaw mana juguya cogo o cogo, an ka ɲi k’an ɲɛɛ lɔnin to Jehova kan ani ka la a la kosɔbɛ ko a be se k’an dɛmɛ. An be se k’o kɛ cogo di?

8. Mun lo be se k’an dɛmɛ an kana hami kojugu an makoɲɛfɛnw koo la?

⁸ Sanni an ka to ka hami an ka gwɛlɛyaw kosɔn, an k’an jigi la Jehova kan. A to i hakili la ko an Faa kanutigi Jehova ye layidu ta ko n’an be Alakow kɛ an ɲɛnako fɔlɔ ye, a bena an makoɲɛfɛnw di an ma (Mat. 6:32, 33). A b’o layidu dafa tuma bɛɛ (Deter. 8:4, 15, 16; Zab. 37:25). Ni Jehova b’a janto kɔnɔw ni filɛruw la, siga t’a la an man ɲi ka hami dumuniko ni fani donta koo la! (Mat. 6:26-30; Filip. 4:6, 7). Kanuya lo be bangebaga ɲumanw lasun k’u deenw mako wasa bololafɛnw ta fan fɛ. O cogo kelen na, kanuya lo be an sankolola Faa lasun k’a sagokɛlaw mako wasa bololafɛnw ta fan fɛ. Tiɲɛn na, an be se ka la a la ko Jehova bena a janto an na!

9. I be kalan juman lo sɔrɔ furuɲɔgɔnma dɔw ka koo la?

⁹ An ka ɲɛyirali dɔ lajɛ min b’a yira Jehova be se k’an mako wasa cogo min na bololafɛnw ta fan fɛ. Furuɲɔgɔnma dɔw ye piyɔniyew ye ani u ye lɛri kelen ni kɔ kɛ mobiliboli la walisa ka taga balimamuso dɔw ta kalifayɔrɔ dɔ la, ka taga n’u ye lajɛn na. U ka mobili tun kɔrɔnin lo. Balimacɛ ko: “Lajɛn bannin kɔ, an y’o balimamusow weele dumuni na an fɛ soo. Nka an hakili nana jigi ko dumuni foyi yɛrɛ tun t’an fɛ ka di u ma.” O furuɲɔgɔnw tun bena mun lo kɛ do? Balimacɛ y’a fɔ tugun ko: “Tuma min na an sera soo, an ye sakibaba fila bilanin ye an ka daa la ani dumuni tun b’u kɔnɔ. An tun m’a lɔn mɔgɔ min y’u bila yen. Jehova y’a janto an na.” Wagati damanin o kɔ, o furuɲɔgɔnmaw ka mobili tiɲɛna k’a sɔrɔ u mako tun b’a la u ka waajuli baara la. Nka wari foyi tun t’u fɛ k’a lalaga. Balimacɛ y’o mobili ta ka taga n’a ye garazi la. K’a to o yɔrɔ la, cɛɛ dɔ nana ɲiningali kɛ ko: “Mobili nin ye jɔn ta lo ye?” Balimacɛ ko ale ta lo ani ko a tiɲɛnin lo. O cɛɛ y’a fɔ a ye ko: “Basi t’o la. N’ muso b’o mobili nin ɲɔgɔn lo fɛ jaatika, ani o kulɛri kelen kelen nin yɛrɛ! Aw bena a feere joli le do?” Balimacɛ y’a ka mobili feere o cɛɛ ma. A mako tun be wari min na ka se ka mobili wɛrɛ san, a y’o sɔrɔ. A ko: “An ninsɔn tun ka di kosɔbɛ o loon wulafɛ! An tun b’a lɔn k’o tɛ kunfɛko ye, Jehova lo y’a janto an na.”

10. Ka kɛɲɛ ni Zaburuw 37:5 ye, mun na an man kan ka hami kojugu an makoɲɛfɛnw koo la?

¹⁰ N’an be sagadɛndɛla ɲuman kaan mɛn ani an tɛ hami kojugu tugun an makoɲɛfɛnw koo la, an be se ka la a la ko Jehova bena an mako wasa  (Zaburuw 37:5 kalan; 1 Piyɛri 5:7). An kumana gwɛlɛya minw koo la  dakun 5nan na, yala u dɔ b’an kan wa? N’a sɔrɔ Jehova be tɛmɛna denbaya kuntigi dɔ wala an ka patɔrɔn fɛ k’an mako wasa. Nka n’o denbaya kuntigi tɛ sera k’o kɛ tugun wala n’an ka baara tiɲɛna, an ka la a la ko Jehova bena a janto an na cogo wɛrɛ la. Sisan, an ka koo wɛrɛ lajɛ, Yezu ko an kana min kɛ tugun.

11. Ka kɛɲɛ ni Matiyo 7:1, 2 ye, Yezu ko an kana mun lo kɛ tugun? Mun na o be se gwɛlɛya an ma?

¹¹ Matiyo 7:1, 2 kalan. Yezu tun b’a lɔn ko adamadenw dafanin tɛ ani ko u ka teli ka sinsin tɔɔw ka filiw lo kan. O lo kama a ko: “Aw kana tɔw kiti [tugun].” N’a sɔrɔ an b’an jija kosɔbɛ walisa an kana an balimaw kiti. Nka, an si dafanin tɛ. N’an y’a kɔrɔsi ko tuma dɔw la, an be tɔɔw kiti, an ka ɲi ka mun lo kɛ? An ka ɲi ka mɛnni kɛ Yezu fɛ, o kɔrɔ, an k’an jija an kana tɔɔw kiti tugun.

12-13. Jehova tun be min miiri masacɛ Dawuda koo la, o be se k’an dɛmɛ cogo di an kana tɔɔw kiti tugun?

¹² N’an be miiri Jehova ka ɲɛyirali la, o bena an nafa kosɔbɛ. Jehova be sinsin mɔgɔw ka jogo ɲumanw lo kan. A ye masacɛ Dawuda minɛ cogo min na, o b’an dɛmɛ k’o lo faamu. Dawuda tun ye jurumubaw kɛ. Misali la, a ye ɲamɔgɔya kɛ ni Batiseba ye ani a yɛrɛ ye cii di ko u k’a cɛɛ faga (2 Sam. 11:2-4, 14, 15, 24). O sen fɛ, a ma tɔɔrɔ lase a yɛrɛ dɔrɔn lo ma, nka a ye tɔɔrɔ la a musow n’a ka denbaya mɔgɔ tɔɔw fana kan (2 Sam. 12:10, 11). Wagati wɛrɛ la, Dawuda m’a jigi bɛɛ la Jehova kan. A ye Israɛl sɔrɔdasiw daa jati k’a sɔrɔ Jehova tun m’o ɲini a fɛ. N’a sɔrɔ kuncɛbaya lo y’a lasun k’o kɛ. Wala a tun lanin b’a la ko a ka kɛlɛbolo ka ca minkɛ, o lo bena a latanga. O nɔfɛko kɛra mun lo ye? Israɛlden 70 000 ɲɔgɔn sara fɔɲɔbana dɔ la!—2 Sam. 24:1-4, 10-15.

¹³ N’i tun be Israɛl jamana na o wagati la, i tun bena mun lo miiri Dawuda koo la? Yala i tun bena a fɔ ko a man kan ni Jehova ka makari ye wa? Jehova kɔni tun t’o lo miiri. Dawuda ye kantigiya kɛ a ye cogo min na ani a nimisara sɔbɛ la cogo min na, Jehova sinsinna o lo kan. O kama, a ye Dawuda ka jurumubaw bɛɛ yafa. Jehova tun b’a lɔn ko Dawuda b’ale kanu kosɔbɛ ani ko a tun b’a fɛ ka koo ɲuman lo kɛ. An be Jehova waleɲuman lɔn kosɔbɛ sabu a be sinsin an ka jogo ɲumanw n’an ka kɛwale ɲumanw lo kan.—1 Mas. 9:4; 1 Til. Kib. 29:10, 17.

14. Mun lo be se k’an dɛmɛ an kana to ka tɔɔw kiti tugun?

¹⁴ Jehova t’a ɲini an fɛ an ka kɛ mɔgɔ dafaninw ye. An fana man kan k’a ɲini tɔɔw fɛ u ka kɛ mɔgɔ dafaninw ye, nka an ka ɲi k’u ka jogo ɲumanw lo filɛ. A ka nɔgɔ ka tɔɔw ka dafabaliyakow ye ani k’u jalaki o kosɔn. Nka mɔgɔ min be Jehova ladegi, o tigi be bɛn ni tɔɔw ye hali n’a b’u ka filiw kala ma. Diyama min ma lɛsɛ k’a nɔgɔ bɔ a la, a cɛ man ɲi. Nka mɔgɔ hakilitigi b’a lɔn ko a bena kɛ fɛɛn cɛɲumanin ani fɛɛn nafamanba ye n’u y’a baara k’a nɔgɔ bɔ a la. I ko Jehova ni Yezu, an man ɲi ka tɔɔw ka dafabaliyakow filɛ, nka an ka ɲi k’u ka jogo ɲumanw lo filɛ.

15. Mun na a kɔrɔtanin lo an k’an janto tɔɔw ka koow cogoya la?

¹⁵ An y’a faamu ko an ka ɲi ka sinsin tɔɔw ka jogo ɲumanw lo kan. Nka, koo wɛrɛ juman lo be se k’an dɛmɛ an  kana tɔɔw kiti? An ka miiri k’a filɛ min b’u kan. Yezu tun b’o lo kɛ. Loon dɔ, k’a to Alabatoso kɔnɔ, a ye firiyamuso dɛsɛbagatɔ dɔ ye a be tama fila donna kɛsu kɔnɔ. Yezu m’a fɔ ko: “Mun na o muso ma wari caaman don?” Muso ye wari daa min don, Yezu ma sinsin o lo kan. Nka a y’a ka koow cogoya n’a ka ŋaniya lo filɛ. O lo kama, a y’o muso tando sabu a seko tun ye min ye, a y’o lo kɛ.—Luka 21:1-4.

16. Veronica ka koo be mun lo yira an na?

¹⁶ Min ye Veronica sɔrɔ, o b’an dɛmɛ k’a faamu ko a kɔrɔtanin lo an k’an janto tɔɔw ka koow cogoya la. A ka kafo kɔnɔ, balimamuso dɔ tun be yen min b’a dencɛ lamɔna a kelen. Veronica ko: “A tun be n’ ɲɛɛ na ko u tɛ na lajɛnw na tuma bɛɛ ani u tɛ waajuli kɛ tuma o tuma. O kama, n’ tun tɛ ni miiriya ɲuman ye u koo la. Nka loon dɔ, n’ ye waajuli kɛ n’o balimamuso ye. A y’a ɲɛfɔ n’ ye ko a dencɛ hakili dafanin tɛ ani ko a man nɔgɔ ale fɛ k’a lamɔ. A tun b’a seko bɛɛ lo kɛra walisa k’a yɛrɛ n’a dencɛ mako wasa bololafɛnw ani Alako ta fan fɛ. A dencɛ ka bana kosɔn, tuma dɔw la, a be taga lajɛn kɛ kafo wɛrɛ kɔnɔ.” Veronica y’a ka kuma kuncɛ ko: “N’ tun m’a lɔn ko gwɛlɛya nin ɲɔgɔn lo b’a kan. Bi bi nin na, o balimamuso koo ka di n’ ye kosɔbɛ ani n’ b’a bonya sabu a b’a seko bɛɛ lo kɛra Jehova ka baara la.”

17. Zaki 2:8 b’an jija an ka mun lo kɛ, ani an be se k’o kɛ cogo di?

 ¹⁷ N’an nana a ye ko an y’an balima dɔ kiti, an ka ɲi ka mun lo kɛ? An ka ɲi k’a to an hakili la ko an ka kan ka an balimaw kanu le (Zaki 2:8 kalan). Ka fara o kan, an ka ɲi ka Jehova deli n’an dusu bɛɛ ye, a k’an dɛmɛ an kana to ka tɔɔw kiti tugun. O kɔ, an ka koow kɛ kɛɲɛ n’an ka deliliw ye: An ye mɔgɔ min kiti, an k’a latigɛ ka wagati kɛ n’a ye. O bena an dɛmɛ k’o tigi lɔn ka ɲɛ. An be se k’a ɲini ka waajuli kɛ n’a ye wala k’a weele dumuni na an ka soo. N’an b’a ɲinina k’a lɔn ka ɲɛ, an ka Jehova ni Yezu ladegi: An k’a ɲini k’a lɔn a be ni jogo ɲuman minw ye. N’an b’o kɛ, an b’a yira ko an be sagadɛndɛla ɲuman kaan mɛnna, ale min b’a ɲini an fɛ ko an kana to ka tɔɔw kiti tugun.

18. An b’a yira cogo di ko an be sagadɛndɛla ɲuman Yezu kaan mɛnna?

¹⁸ Sagadenw be mɛnni kɛ u dɛndɛbaga fɛ. O cogo kelen na, Yezu ka kalandenw be mɛnni kɛ a fɛ. N’an b’an jija kosɔbɛ an kana to ka hami an makoɲɛfɛnw koo la, ani n’an b’an jija an kana to ka tɔɔw kiti tugun, Jehova ni Yezu bena an duga o kosɔn. An ye “sagakulufitini” mɔgɔw ye wo, an be “saga dɔ wɛrɛw” lo cɛma wo, an ka to ka sagadɛndɛla ɲuman Yezu ka kumaw lamɛn ani k’u sira tagama (Luka 12:32; Zan 10:11, 14, 16). Barokun nata la, an bena koo fila lajɛ Yezu y’a ɲini a ka kalandenw fɛ u ka minw kɛ.