1. Poukwa Jézi konparé disip a-y èvè mouton ?

 JÉZI té bon bon zanmi èvè disip a-y é i konparé lanmityé-lasa èvè sa ki ka lyanné on bèwjé èvè mouton a-y (Jan 10:14). Sé on bèl ègzanp toubònman, pas sé mouton-la konnèt bèwjé a yo é yo ka kouté vwa a-y lè i ka palé ba yo. Sé sa on touris ni lokazyon konstaté on jou. Mi sa i ka rakonté : « Konm nou té vlé filmé déotwa mouton, nou éséyé fè-yo vin owa an nou. Men yo pa té ka vin pas yo pa té konnèt vwa an nou. Aprésa, on jenn bèwjé rivé, i pò’ò menm té fin kriyé sé mouton-la é yotout té ja ka suiv-li. »

2-3. a) Kijan disip a Jézi montré kè yo té ka kouté vwa a-y ? b) Ka nou ké vwè adan awtik-lasa é adan sila ki ka vin la ?

² Sa touris-la di la ka fè-nou sonjé sa Jézi di anrapò èvè mouton a-y, kivédi anrapò èvè disip a-y : « Yo ké kouté vwa an mwen » (Jan 10:16). Men Jézi jis an syèl-la, alò kijan nou pé kouté-y ? Ében nou ké rivé fè sa si nou ka fè sa i ka di-nou fè (Mat. 7:24, 25).

³ Adan awtik-lasa é adan sila ki ka vin la, nou ké palé dè déotwa biten Jézi anségné. Nou ké ni lokazyon vwè kè dépawfwa Jézi ka di-nou arété fè sèwten biten é dòt fwa i ka di-nou fè sèwten biten. Pou koumansé, an-nou vwè 2 biten kè bon Bèwjé-la ka di-nou arété fè.

4. Dapré Lik 12:29, ka ki pé « tèwbolizé lèspri » an nou ?

⁴ (Li Lik 12:29.) Jézi di disip a-y ‘arété tèwbolizé lèspri a yo’ parapòt a sa yo bizwen pou viv. Nou sav byen kè lèwvwè Jézi ka bay on konsèy sé toujou on biten ki plen sajès. Kifè, nou ka fè éfò pou nou mèt sé konsèy-lasa an pratik. Men sa pa toujou fasil. Poukwa nou ka di sa ?

5. Poukwa sèwten moun pé ka pran tèt a-yo parapòt a sa yo bizwen pou viv ?

  ⁵ Sèwten moun ka mandé-yo kijan yo ké fè pou yo ni on biten pou yo manjé, lenj pou yo mèt asi yo oben on koté pou yo rété. Pétèt la yo ka rété la, sé moun-la maléré é sa rèd pou yo dè touvé on travay. Kifè, pou yo pé sa ni asé lajan pou pran swen a fanmi a yo, sa pa fasil. Oben pétèt, moun-la ki té ka pèwmèt fanmi-la ni on dèkwa mò. Anplisdisa, akòz dè Covid-19 la, ni onlo moun ki pèd travay a yo (Ékl. 9:11). Jézi di-nou arété tèwbolizé lèspri an nou. Men si nou ka jwenn yonn adan sé éprèv-lasa, kijan nou pé suiv konsèy-la i ban-nou la ?

6. Rakonté ka ki rivé Pyè on jou.

⁶ On jou, pannan Pyè é sélézòt apòt-la té ka vwayajé pa bato anlè lanmè Galilé, on tanpèt lévé é yo vwè Jézi ka maché anlè dlo-la. Alò mi sa Pyè di-y : « Ségnè, si sé vou, di-mwen vin jwenn-vou anlè dlo-la. » Lè Jézi di-y vini, i « désann an bato-la é i koumansé maché anlè dlo-la pou ay jwenn Jézi. » An-nou gadé ka ki fèt apré : « Lè i vwè jan té ni van, i pran pè. É konm i té ka koumansé koulé, i mété-y ka hélé : “Ségnè, sové-mwen !” » Alò Jézi lonji men a-y é i sové-y. Men on biten pou nou sonjé, sé kè touttan Pyè té ka gadé Jézi, i té ka rivé maché anlè lanmè-la. É lèwvwè i mété-y ka gadé tanpèt-la, i lésé lapè é enpé dout pran lanmen asi-y é i mété-y ka koulé (Mat. 14:24-31).

7. Ka ègzanp a Pyè ka aprann-nou ?

⁷ Sa ki rivé Pyè ka aprann-nou on biten enpòwtan. Lè i désann an bato-la é lè i koumansé maché anlè dlo-la, i pa té ni lidé kè tanpèt-la té’é fè-y pè é kè i  té’é mété-y ka koulé. I té ni lentansyon maché anlè dlo-la joustan i rivé owa Mèt a-y. Men olyé i té rété konsantré asi Jézi, i touvé-y pè tanpèt-la. Menmjan Pyè té bizwen ni fwa pou maché anlè dlo-la, menmjan-la osi, nou bizwen ni fwa pou nou pé sa andiré difikilté nou ka jwenn. Si nou pa ka rété konsantré anlè Jéova é asi pwomès a-y, fwa an nou ké fébli é nou ké néyé anba sa ki ka trakasé-nou. Alò menmsi nou ka jwenn gwo difikilté fò-nou toujou sonjé kè Jéova pé édé-nou. Kijan nou pé fè sa ?

8. Lè nou ni pwoblèm, ka ki pé édé-nou pou sa pa pran tèt an nou twòp ?

⁸ Olyé nou pran tèt an nou akòz dè pwoblèm an nou, an-nou fè Jéova konfyans é sa ké trankilizé-nou. Fò pa nou jen oubliyé kè Pap’an nou ki plen lanmou pwomèt-nou kè i ké pran swen an nou é kè i ké ban-nou sa nou bizwen pou viv si nou ka mété-y prèmyé douvan an vi an nou (Mat. 6:32, 33). Jéova toujou tchenn pwomès a-y (Dét. 8:4, 15, 16 ; Sòm 37:25). Konm Jéova ka pran swen a sé zozyo-la é a sé flè-la, nou pé sèten kè i ké ban-nou manjé pou nou manjé é lenj pou nou mèt asi nou ! (Mat. 6:26-30 ; Filip. 4:6, 7). On papa oben on manman ki enmé timoun a-y ka fè tousa i pé pou ba-y sa i bizwen pou viv. Menmjan-la osi, Pap’an nou ki an syèl-la enmé-nou é i ka fè ansòt pou nou pé sa ni tousa nou bizwen pou viv. Alò nou pé sèten kè Jéova ké toujou pran swen an nou !

9. Ka ègzanp a on frè é madanm a-y ka aprann-nou ?

⁹ An-nou vwè on ègzanp ki ka montré-nou jan Jéova pé ban-nou sa nou bizwen pou viv. On frè é madanm a-y ki té pyonyé, ay chèché déotwa sè ki té ka viv on koté yo ka akéyi moun ki té oblijé kité péyi a yo. Yo woulé pannan 1 èdtan èvè vwati a yo ki té ja fè tan a-y. Mi sa frè-la ka di : « Lè réinyon-la fin, nou di sé sè-la an-nou ay manjé on ti biten akaz. Men sé apré kè nou sonjé kè nou pa té ni ayen pou manjé. » Alò ka ki pasé apré ? Mi sa frè-la ka di : « Lè nou rivé akaz, nou touvé 2 gwo sak plen konmisyon douvan pòt-la. Nou pa té sav kimoun ki té mèt-yo la men on biten ki té sèten, sé kè Jéova té pran swen an nou. » Kèlkètan apré, vwati a frè-la é madanm a-y pran pann. Yo té bizwen vwati a yo pou ay préché men yo pa té ni lajan pou réparé-y. Alò frè-la menné vwati-la adan on garaj é pannan mékanisyen-la té ka gadé vwati-la, on misyé rivé é mi sa i mandé : « Kimoun ki mèt a vwati-lasa ? » Alò frè-la di misyé-la kè sé té vwati a-y é kè vwati-la té anpann. Mi sa misyé-la di-y : « Men misyé an mwen sa pa ni pon enpòwtans, pas sé vwati-lasa madanm an mwen vlé é sé ègzaktèman koulè-lasa i vlé. Komen an ka ba-w pou vwati-la ? » Alò frè-la vann vwati-la ba misyé-la é èvè lajan-la misyé-la ba-y la, i té ni asé lajan pou achté ondòt vwati. Pou fin, mi sa frè-la ka di : « Lè jouné-lasa fin, a pa ti kontan nou té kontan ! Nou té sav kè tousa pa enn rivé konsa. Sé Jéova ki té dèyè do a sa pou pran swen an nou. »

10. Dapré Sòm 37:5 poukwa fò pa nou enkyété-nou twòp parapòt a sa nou bizwen pou viv ?

¹⁰ Si nou ka kouté bon Bèwjé-la é kè nou ka arété tèwbolizé lèspri an nou parapòt a sa nou bizwen pou viv, nou pé sèten kè Jéova ké pran swen an nou (li Sòm 37:5 ; 1 Pyè 5:7). Adan  paragraf 5 la, nou palé dè plizyè sitiyasyon. Ès ou  ka jwenn yonn adan yo ? Pétèt Jéova té ka sèvi èvè chèf a fanmi an nou oben èvè patron an nou pou i té pé sa ban-nou tousa nou bizwen pou viv. Men vinvwè chèf a fanmi an nou pa la ankò oben kè i mò, oben vinvwè nou pèd travay an nou, Jéova ké touvé ondòt mannyè pou ban-nou tousa nou bizwen pou viv. Nou pé sèten dè sa ! Alèla an-nou vwè, on dézyèm biten bon Bèwjé-la ka di-nou arété fè.

11. Dapré Matyé 7:1, 2, ka Jézi di fò-nou arété fè é poukwa sa pa fasil ?

¹¹ (Li Matyé 7:1, 2.) Jézi té sav byen kè lézimen enpawfè é kè yo byen enmé gadé sa lézòt ka fè ki pa bon. Sé pousa i di « Arété jijé. » Noutout ka fè éfò pou nou pa jijé frè é sè an nou. Men sa pa fasil pas nou enpawfè. Men si on jou nou ka rann-nou kont kè nou ka kritiké on moun, ka pou nou fè ? Fò-nou kouté Jézi é fò-nou fè tousa nou pé pou arété jijé.

12-13. Kijan ègzanp a Jéova pé fè-nou arété jijé lézòt ?

¹² Si nou ka pran tan réfléchi asi ègzanp a Jéova, sa pé pòté onlo bon biten pou nou. Sa Jéova ka gadé, sé bèl kalité on moun ni. Sonjé ka ki pasé lè David fè déotwa péché ki té grav. Pa ègzanp, David fè on péché sèksyèl èvè Bètsabé é i mandé-yo tchouyé mari a-y (2 Sam. 11:2-4, 14, 15, 24). Akòz dè péché-la i fè la, ki li, ki fanmi a-y é tout sé madanm-la i té ni la soufè adan sa osi (2 Sam. 12:10, 11). Ondòt jou ankò, David montré kè i pa té ka fè Jéova konfyans a san pou san lèwvwè i mété-y ka konté konmen moun ki té adan lawmé a-y, alòskè Jéova pa té mandé-y fè sa. Pétèt i fè sa pas i té fyèw dè gwo lawmé-la i té ni la é pétèt kè dapré-y grasa gwo lawmé-lasa, ayen pa té ké rivé pèp-la. É ka ki rivé apré ? Jéova voyé on gran épidémi asi pèp-la ki chayé 70 000 Izraélit apépré (2 Sam. 24:1-4, 10-15).

¹³ Siwvwè ou té ka viv an Izrayèl a épòk-lasa, ès ou té’é jijé David é ès ou té’é di kè i pa mérité Jéova padonné-y ? A pa konsa Jéova vwè sa. Jéova sonjé kè avan David té fè sé péché-lasa, i té rété fidèl tout vi a-y. Konm i rèpanti-y poudèbon, Jéova tchenn kont dè sa. Jéova té sav kè David té enmé-y fò toubònman é kè i té vlé fè sa ki byen. Jéova ka vwè tout kalité kè nou ni é tout bon biten nou ka fè. Ès sa pa’a ba-w tchè-kontan ? (1 Wa 9:4 ; 1 Kron. 29:10, 17).

14. Ka ki pé édé-nou arété jijé ?

¹⁴ Jéova sav kè nou enpawfè é i pa ka atann kè nou aji on mannyè ki pawfè. Menmjan-la fò pa nou atann kè frè é sè an nou aji èvè nou on mannyè ki pawfè men sa pou nou gadé, sé bèl kalité a yo. Sa tèlman fasil dè vwè défo a lézòt é dè kritiké-yo. Men on moun ki bon bon zanmi èvè Jéova ka rivé antann-li byen èvè lézòt menmsi i ka vwè défo a yo. Odépa, on dyaman kon on wòch, kifè onlo moun pa ka vwè-y. Men on èspésyalis pa’a vwè sa konsa. I sav kè lè yo ké travay asi dyaman-lasa i ké bèl é i ké ni onlo valè toubònman. Menmjan ki Jéova é Jézi, olyé nou gadé défo a lézòt, an-nou gadé bèl kalité a yo.

15. Poukwa sa enpòwtan kè nou tchenn kont dè sa lézòt ka viv ?

¹⁵ Sé vré kè fò-nou gadé bèl kalité kè lézòt ni. Men ka ki pé édé-nou pou nou pa kritiké lézòt ? Sé lè nou ka éséyé mèt-nou an plas a lézòt pou éséyé konprann sa yo  ka viv. Sé sa Jézi té ka fè. On jou pannan i té an Tanp-la, i vwè on vèv ki té maléré ki mèt 2 ti pyès adan yonn adan sé bwèt a lajan-la. Sé 2 ti pyès-lasa pa té ni onlo valè ditou-ditou. Lè i vwè sa, i pa di : « Poukwa sé sa lajan sèlman madanm-la mèt ? » I pa rété gadé konmen lajan madanm-la mèt an bwèt-la, men i té préféré gadé ka ki pousé madanm-la mèt lajan-lasa é adan ki sitiyasyon madanm-la té yé. É dayè, sé pousa i palé anbyen dè madanm-lasa pas i té sav byen ka i té ka viv (Lik 21:1-4).

16. Ka sa ki rivé Veronica ka aprann-nou ?

¹⁶ Pou nou konprann plibyen jan sa enpòwtan dè tchenn kont dè sitiyasyon a lézòt, an-nou gadé sa ki rivé on sè non a-y sé Veronica. Adan lasanblé a-y, té ni on sè ki té ka lévé gason a-y tousèl a-y. Mi sa Veronica ka di : « An té ka touvé kè sè-lasa é gason a-y té ka raté onlo réinyon é an pa gè té ka vwè-yo an prédikasyon. Alò akòz dè sa, an té ni enpé mové lidé asi yo. Men on jou, an préché èvè sè-lasa é i di-mwen kè gason a-y té ni on gwo andikap é i di-mwen kè sa té difisil pou-y dè lévé timoun a-y men kè i té ka fè tousa i té pé pou ba-y tousa i té bizwen pou viv é pou i té vin bon zanmi èvè Jéova. Délè akòz dè maladi a gason a-y, i té oblijé ay réinyon èvè ondòt lasanblé. » Pou fin, mi sa Veronica ka di : « An pa té’é jen imajiné kè vi a sè-lasa té rèd konsa. Aprézan  an byen enmé sè-lasa é an ni onlo rèspé ba-y pas i ka fè tousa i pé pou sèvi Jéova. »

17. An Jak 2:8, ka yo ka mandé-nou fè é kijan nou pé fè sa ?

¹⁷ Si nou ka rann-nou kont kè nou mal jijé on frè oben on sè, ka pou nou fè ? Fò pa nou jen oubliyé kè nou dwètèt enmé frè é sè an nou (li Jak 2:8). Anplisdisa, fò-nou sipliyé Jéova pou nou arété jijé lézòt. Aprésa, fò-nou aji annakò èvè sa nou mandé adan priyè an nou. Pousa, fò-nou òwganizé-nou pou nou pasé tibwen tan èvè moun-la nou té ni labitid mal jijé la. Sa ké édé-nou konnèt-li plibyen. Pétèt kè nou té’é pé mandé-y préché èvè nou oben mandé-y si i vlé manjé èvè nou. Toupannan nou ka vin zanmi èvè-y, fò-nou fè éfò pou imité Jéova é Jézi ki ka gadé tout bèl kalité kè i ni. Konsa, nou ké montré kè nou ka kouté bon Bèwjé-la ki ka mandé-nou arété jijé.

18. Kijan nou pé montré kè nou ka kouté vwa a bon Bèwjé-la ?

¹⁸ Sé mouton-la ka kouté vwa a bèwjé a yo. Menmjan-la osi, disip a Jézi ka kouté vwa a-y. Si nou ka arété tèwbolizé lèspri an nou parapòt a sa nou bizwen pou viv é si nou ka arété jijé lézòt, Jéova é Jézi ké béni-nou pou tout sé éfò-la nou ka fè la. Ki nou ka fè pawti a « ti twoupo-la », ki nou ka fè pawti a ‘sélézòt mouton-la’, an-nou kontinyé kouté vwa a bon Bèwjé-la, kivlédi, an-nou kontinyé obéyi-y (Lik 12:32 ; Jan 10:11, 14, 16). Adan awtik-la ki ka vin la, nou ké palé dè 2 zòt biten kè Jézi ka mandé disip a-y fè.