1. ¿Jamüshii maka aka saaʼin anneerü naashin Jesuu na nikirajüinkana?

NAASHIN Jesuu müshi aka naaʼin wanee anneetpüʼü namüin na nikirajüinkana (Juan 10:14). Pansaasü maʼin tia nümakat Jesuu süka shiain neʼe soonooin amaa tü anneetkat nünüiki chi anneetpüʼükai. Anuu nünüiki wanee wayuu alataka süʼütpaʼa waneirua anneerü: «Keeʼireesü waaʼin wayuʼlüin wayaakua sümaa tü anneetkalüirua. Warütkaaka süʼütpaʼamüin sümaa wounejüin shiairua, nnojotka jaa müin sümüin wanüiki. Shiasaʼa nüntapa chi jintüi arüleejüikai nuunejaka shiairua suʼunamaataka nümaa».

2, 3. (1) ¿Kasa waaʼinrajatka süpüla woonooin sümaa tü nümakat Jesuu? (2) ¿Kasa wekirajaajeetka anain sünain ekirajaayakat tüü jee sünain tü wane?

² Sünainjee tü nümakat chia wayuukai sotusü waaʼin tü nümakat Jesuu namüin na nikirajüinkana wanaa sümaa nümüin namüin: «Tantireena nayaʼaya tanainmüin süpüla noonooinjanain sümaa tanüiki» (Juan 10:16). ¿Jamüsü süpüla woonooin sümaa nünüiki Jesuu sümaa chain nia iipünaa? Wanee sukuwaʼipa shia waaʼinrüle tü nikirajakalü anain (Mat. 7:24, 25).

³ Sünain ekirajaayakat tüü jee sünain tü wane, wekirajaajeerü anain soʼutku tü nikirajakalü anain Jesuu. Nüküjain Jesuu süchiki waneirua kasa nnojoluinjatka waaʼinrüin otta süchiki waneirua kasa waaʼinrajatka. Palajana, wekirajaweerü anain piamasü kasa nnojoluinjatka waaʼinrüin naashin Jesuu.

4. Saashin Lucas 12:29, 30, ¿kasa shapaʼawaika maʼin atuma waaʼin?

⁴ (Paashajeʼera Lucas 12:29, 30). Naashin Jesuu nnojoliinjana ashapataain maʼin naaʼin na nikirajüinkana saaʼu tü kasa choʼujaakat namüin. Watüjaa aaʼulu anain maʼin tia nümakat sümaa jaloulin shia. Oonoojeeshiaajeʼe waya sümaa tü nümakat,  shiajaʼa neʼe kapüleʼewalin shia wamüin. ¿Kasa kapüleeka aaʼujee tia?

5. ¿Kasa shapaʼawaika maʼin atuma naaʼin waneinnua wawalayuu?

 ⁵ Eeshii noʼutku wawalayuu shapaʼawaikana maʼin aaʼin saaʼu tü neküinjatkat, tü nasheʼinjatkat otta tü nepiainjatkat. Eesüjaʼa mojule tü mma kaluʼukat naya jee masetaainre nakanain süpüla nayaʼlajüin tü choʼujaakat sümüin napüshi. Eeshijaʼa nünaajaale chi wayuu aʼyataakai süpüleerua nüpüshi otta müliaa müshiijaʼa na nüpüshikana sutuma tia. Sutuma tü ayuuliikat COVID-19, wainma wayuu maʼyataainkana jee manneetsekana (Ecl. 9:11). Sülatüle wamüin tia jee waneirua kasa kapüleeka, ¿kasa waaʼinrajatka süpüla nnojoluin shapaain maʼin waaʼin naashin Jesuu?

6. Püküja tü alatakat nümüin Pedro soʼu wanee kaʼi.

⁶ Soʼu wanee kaʼi anuwaluʼushi Pedro namaa na wane aluwataaushikana shirokupünaa tü palaakat Galilea. Napanapajaka wanee joutai katchinsü maʼin juyamaajatü, neʼraka Jesuu waraittüin sooʼopünaa tü palaakat. Nümaka Pedro nümüin: «Senyotkalee, müleka shiimainreje piain weʼrüin, anakaja peenaküle taya süpüla tantajachin pünainmüin sooʼopünaa tü palaakat». «Jalaichi pümaala», nümakalaka Jesuu nümüin. «Nüshakatakalaka joo Pedro suluʼujee tü anuakat sünain waraittüin sooʼopünaa tü palaakat nünainmüin Jesús. Otta mmotkalaka Pedro sotopa naaʼin tü wawaikat. Nuʼttakalaka sünain nimerolo nimerolo nümüin shirokumüin tü palaakat.—Jalia taya Senyotkalee—nümakalaka nümüin Jesús sünain nuʼwaatüin. Otta Jesús, niyurulamaatüin nütüna sünain naapaain Pedro». Nuuntuin Pedro waraittüin nia sooʼopünaa tü palaakat nünainmüin Jesuu. Shiasaʼa niirakaapa sümüin tü wawaikat niimolojooka  jee nimerolo nimerolo nümaka mapa (Mat. 14:24-31).

7. ¿Kasa watüjaka sünainjee tü alatakat nümüin Pedro?

⁷ Eesü wanee kasa watüjaka sünainjee tü alatakat nümüin Pedro. Wanaa sümaa nüshakatüin Pedro suluʼujee tü anuwakat sümaa waraittüin nia sooʼopünaa tü palaakat, nnojoishii mmoluin nia seema tü wawaikat otta nnojotsü jülüjain naaʼin nimerojooinjachin. Antajachia nüküjainruʼu eemüin Jesuu, nnojotpejeʼe nuuntuin tia sutuma niirakaain sümüin tü wawaikat. Mayaapejeʼe nnojoluin süpüla waraittüin waya sooʼopünaa wüin, eepejeʼe tü kasa kapüleekat wamüin. Nnojoire waaʼinmaain Jeʼwaa otta tü nümakat, amalajaajeerü wanoula. Jaʼitairü kasain alatüin wamüin, ayataʼaya waaʼinmaain Jeʼwaa. ¿Kasa waaʼinrajatka süpüla wountuin tia?

8. ¿Kasa waaʼinrajatka süpüla nnojoluin shapaain maʼin waaʼin saaʼu tü kasa choʼujaakat wamüin?

⁸ Wounteerü tia weʼitaale waaʼin nünain Jeʼwaa suulia shapaain maʼin waaʼin. Soto waaʼin naapeerüin tü choʼujaakat wamüin chi Washi iipünaajachikai waaʼinmaale maʼin tü waʼyataainkat nümüin (Mat. 6:32; 6:33, TNM). Nikeraajüin Jeʼwaa waneepia tü nümakat (Deut. 8:4, 15, 16; Sal. 37:25). Süka naaʼinmajüin Jeʼwaa tü wüchiikalüirua jee tü süsiikalüirua wunuʼu, jamataalaka shapaainjatka waaʼin saaʼu tü weküinjatkat jee tü waʼatüinjatkat (Mat. 6:26-30; Filip. 4:6, 7). Na wayuu aikana apüla nachonnii naapüin tü kasa choʼujaakat namüin, müshia chi Washikai Jeʼwaa naapüin tü kasa choʼujaakat namüin na aʼyataakana nümüin. Watüjaakalaka saaʼu naaʼinmajeenain waya Jeʼwaa.

9. ¿Kasa pütüjaka sünainjee tü alatakat nümüin wanee wawala sümaa nuʼwayuuse?

⁹ Jülüjataa waaʼin tü naaʼinrakat Jeʼwaa süpüla naapüin tü kasa choʼujaakat nümüin wanee wawala sümaa nuʼwayuuse, pürekutsoot naya. Soʼu wanee kaʼi, oʼunushii naya suluʼu tü neʼejena laülaachonkot süpüla nasaapünaain na wawalayuu namaainjanakana sünain tü outkajawaakat, kepiashii naya wawalayuukana suluʼu wanee campo de refugiados. Anuu nünüiki chi wawalakai: «Süchikijee tü outkajawaakat wounejaaka naya wawalayuukana süpüla neküinjanain wamaa piichipaʼamüin. Jülüjalaa sümaka waaʼin nnojoluin eejatüin eküülü wamaʼana». ¿Jameetka joo nakuwaʼipa? Anuu nünüiki chi wawalakai: «Wanaa sümaa wantüin piichipaʼamüin eejatü wapüla piamasü wotsa wotojoko eküülü. Nnojotsü watüjaain aaʼu jaralüin kantiralain tia. Wayaawata aaʼulu niain Jeʼwaa aapüin wamüin tia». Maʼaka jeʼra kaʼi süchikijee tia, amojujaasü tü neʼejenakat, choʼujaapejeʼe shia namüin süpüla naküjain pütchi otta nnojotsü nneerü namaʼana süpüla nakumajirüin shia. Neʼikaajaka shia suluʼumüin wanee taller süpüla sütüjaanüin aaʼu jeʼrainjatüin sukumajünaka aaʼu. Nürütkaaka wanee wayuu sünain nüsakirüin jaralüin keʼejenain shia. «Taya keʼejenaka, takumajirüinjatü shia», nümaka chi wawalakai nümüin chia wayuukai. Nümaka chia wayuukai: «Jaʼitairü, shia seʼejeneeka maʼin taʼwayuusekat tüü. ¿Jeʼra puchuntaka saaʼu?». Saapünaka nümüin chi wawalakai tü süliakat, niyaʼlajaka shiiʼiraka. Anuu nünüiki chi wawalakai: «Talatüsü waaʼin soʼu kaʼikat tia. Wayaawata aaʼulu niain Jeʼwaa akaalinjain waya».

10. ¿Jamüsü nnojoluinjatka shapaain maʼin waaʼin saaʼu tü kasa choʼujaakat wamüin saashin Salmo 37:5?

¹⁰ Wanaa sümaa woonooin sümaa nünüiki Jesuu sümaa nnojoluin shapaain maʼin waaʼin saaʼu tü kasa choʼujaakat wamüin, watüjaweerü aaʼu naapeerüin Jeʼwaa tia choʼujaakat wamüin (paashajeʼera Salmo 37:5; 1 Ped. 5:7). Jülüja waaʼin tü kasa kapüleesü aküjünakalü  achiki suluʼu  tü pütchikat 5. Eesüjaʼa naapüle wamüin Jeʼwaa tü kasa choʼujaakat wamüin nükajee chi wayuu aʼyataakai süpüleerua wapüshi jee shiale nükajee chi laama waʼyataakai amüin. Kapüleere nümüin wanee wayuu naapüinjatüin shiküin nüpüshi jee shiale maʼyataainre nia, niajaʼa neʼe Jeʼwaa aapeechikai tia. Wekirajaa joo süchiki waneʼeya kasa nnojoluinjatka waaʼinrüin naashin Jesuu.

11. (1) Saashin Mateo 7:1, 2, ¿kasa nnojoluinjatka waaʼinrüin naashin Jesuu? (2) ¿Jamüsü kapüleeka tia?

¹¹ (Paashajeʼera Mateo 7:1, 2). Nütüjaa aaʼu Jesuu nnojoluin lotuin maʼin wakuwaʼipa otta jülüjain waaʼin tü kasa mojusü naaʼinrakat na waneinnua. Müshijeseʼe nümüin: «‘Kaainjarai niaʼ anakaja nnojorule jümüin sümüin wane wayuu». Mayaainjeʼe nnojoluin wayoujeein na wawalayuukana eejeerü tü kaʼi kapüleejeetkalü oʼu shia wamüin. ¿Kasa waaʼinrajatka sülatüle wamüin tia? Woonoo sümaa tü nümakat Jesuu otta wachajaa sukuwaʼipa süpüla nnojoluinjatüin wayoujain wayuu.

12, 13. ¿Jamüsü anaka nnojorüle jülüjain waaʼin tü kasa mojusü saaʼinrakat wayuu maʼaka naaʼinrüin shia Jeʼwaa?

¹² Aneerü maʼin wakuwaʼipa jülüjale waaʼin nukuwaʼipa Jeʼwaa jama jülüjain naaʼin tü kasa anasü saaʼinrakat wayuu. Shia naaʼinraka tia nümüin David mayaainjeʼe wainmatuain kaainjalain nia. Amaʼüjiraashi nukuwaʼipa sümaa Bat-Seba otta nuʼutirüin naaʼin chi suʼwayuusekai (2 Sam. 11:2-4, 14, 15, 24). Sutuma tia müliashi David sümaa nüpüshi, akaʼaya tü wane nuʼwayuusekalüirua müliasü (2 Sam. 12:10, 11). Soʼu wanee kaʼi nnojotsü niʼitaain naaʼin nünain Jeʼwaa süka niyaawajirüin tü surulaatkat sümaa nnojoluin süküjünüin nümüin naaʼinrajatüin tia. Yaletüsü naaʼin sümaa niʼitaain naaʼin sünain wainmain surulaat nümaajatü. Sutuma tia naaʼinrakat, outushii 70.000 israeliita sutuma wanee ayuulii (2 Sam. 24:1-4, 10-15).

¹³ Kepiale waya soʼu kaʼikat tia chaa Israel, ¿jamüsüje wanüiki nüchiki David? ¿Wayoujainjee nia? ¿Jülüjasüche waaʼin nnojoluin anain tü naaʼinrakat süpüla nümüliajüin naaʼin Maleiwa? Eeyaai jülüjain naaʼin Jeʼwaa tia. Shia jülüjaka naaʼin waneepiapuʼuin David nümaa otta shiimain niyaawajaain suulia naainjala. Müsüjeseʼe motuin naaʼin Jeʼwaa naainjala. Nütüjaa aaʼulu aishaatain nia nüpüla David otta naaʼinreein tü kasa anasükat. Anataʼaleeshijaʼa maʼin Jeʼwaa jülüjaka naaʼin tü kasa anasü waaʼinrakat (1 Rey. 9:4; 1 Crón. 29:10, 17).

14. ¿Kasa naaʼinraka noʼutku wawalayuu suulia nayoujain na waneinnua?

¹⁴ Wamüliaja saaʼin wayuu jee jülüja waaʼin tü kasa anasü naaʼinrakat maʼaka naaʼinrüin shia Jeʼwaa sümüin wayuu mayaainjeʼe nnojoluin lotuin nakuwaʼipa. Mapüleesat wamüin weʼrüin tü kasa mojusü naaʼinrakat na waneinnua sümaa wayoujain naya. Eekajasaʼa chi wayuu ashatakai nukuwaʼipa Jeʼwaa anasü nukuwaʼipa namaa na waneinnua mayaainjeʼe niʼrüin tü kasa mojukat natuma. Süpülapünaa sukumajünüin wanee diamante mojuyaasü shiyolojo, niyaawatapejeʼe aaʼu chi wayuu kekiikai anashaateerüin shiyolojo sunoutunapa. Washata nukuwaʼipa Jeʼwaa otta Jesuu sünain jülüjain waaʼin tü kasa anasü saaʼinrakat wayuu suulia waaʼinmaain tü kasa mojukat natuma.

15. ¿Jamüshii nnojoleenaka wayoujain na waneinnua weʼraajüle nakuwaʼipa?

¹⁵ Watüjaaitpa aaʼu anain maʼin shiale waaʼinmaain tü kasa anasü saaʼinrakat wayuu. ¿Kasa maa akaalinjeenaka waya suulia wayoujain wayuu?  Shia weʼraajüinjatüin nakuwaʼipa. Jülüjataa waaʼin tü naaʼinrakat Jesuu wanaa sümaa chajachin nia suluʼu tü aʼwaajüleekat Maleiwa sünain nünanajaain nümataain wanee wayuu outa aʼwayuuset ejitaka piamasü nneerü kachueerachein suluʼu tü kojon süpülajünakat nneerü. Nnojotsü niyoujain shia saaliijee shijitüin palitchoin, shia jülüjaka naaʼin jamüin saaʼinrakat tia otta tü sukuwaʼipakat. Anasü nünüiki Jesuu süchiki süka saapüin süpüshuaʼa tü nneerü eejatkat sümaʼana (Luc. 21:1-4).

16. ¿Kasa pütüjaka sünainjee sukuwaʼipa Verónica?

¹⁶ Jülüjataa waaʼin tü watüjakat sünainjee sukuwaʼipa Verónica süchiki weʼraajüinjatüin nakuwaʼipa na waneinnua. Anuu sünüiki süchiki wanee wawala epijaka süchon sümüiwaʼa: «Teʼrüin nnojoliin noutkajaʼawalin jee naküjawalin pütchi, müsüjeseʼe mojuin tanüiki nachiki. Soʼu wanee kaʼi, ojuʼitusü taya sümaa. Süküjaka tamüin süpüshuaʼa tü saaʼinrakat sünainjee ayuulin chi süchonkai. Jülüjashaatasü maʼin saaʼin saapüinjatüin tü kasa choʼujaakat nümüin jee shikirajüinjachin nia nüchiki Maleiwa. Naapuupa chi süchonkai, eesü nnojorüle suutkajaain wamaa, oʼunusü shia suluʼumüin wanee outkajaalee naata». Anuu sooʼomüin sünüiki Verónica: «Sutuma tatüjaaitpain saaʼu tü kasa alatakat sümüin, kojutuitpa maʼin shia tamüin süka wainmain tü kasa saaʼinrakat süpüla suʼwaajüinjachin Jeʼwaa».

17. (1) ¿Kasa waaʼinrajatka saashin Santiago 2:8? (2) ¿Jamüinjatü sukuwaʼipa watuma?

 ¹⁷ ¿Kasa waaʼinrüinjatka wayaawatüle saaʼu wayoujain wanee wawala? Sotuinjatü waaʼin alinjanain wapüla na wawalayuukana (paashajeʼera Santiago 2:8). Oʼuraajüinjana waya nümüin Jeʼwaa otta wachuntüinjatü nümüin nükaalinjaiwa waya suulia mojuin wanüiki süchiki wayuu. Aashajaainjana waya nümaa chia wawalakai wanaapünaa sümaa tü wachuntakat nümüin Jeʼwaa. Waaʼinrüle tia, weʼraajeechi maʼin nia. Wounejaa nia sünain aküjaa pütchi jee shiale sünain ekaa. Weʼraajapa maʼin nukuwaʼipa chia wawalakai, ayata jülüjain waaʼin tü kasa anasü naaʼinrakat maʼaka naaʼinrüin shia Jeʼwaa otta Jesuu. Waaʼinrüle tia, jaʼyeerü waaʼu woonooin sümaa nünüiki Jesuu sünain nnojoliinjanain wayoujain na waneinnua.

18. ¿Kasa waaʼinrajatka süpüla woonooin sümaa tü nümakat Jesuu?

¹⁸ Oonooshii waya sümaa nünüiki Jesuu maʼaka soonooin tü anneetkat sümaa nünüiki chi arüleejüikai. Ayatüle wachajaain sukuwaʼipa süpüla nnojoluin shapaain maʼin waaʼin saaʼu tü choʼujaakat wamüin otta nnojorüle wayoujain na waneinnua, walaajeena waya nutuma Jeʼwaa otta Jesuu. Jaʼitainna yaainjanale waya yaa mmapaʼa jee chainjanale waya chaa iipünaa, ayata woonooin sümaa nünüiki Jesuu (Luc. 12:32; Juan 10:11, 14, 16). Sünain tü wane ekirajaayakat wekirajaajeerü anain piamasü kasa waaʼinrajatka naashin Jesuu.