1. ¿Mbaʼérepa Jesús okomparáne raʼe idisipulokuérape umi ovecha mimíre?

 JESÚS ningo heʼi vaʼekue idisipulokuérare haʼeha ijovecha mimi (Juan 10:14). Ha upe komparasión ningo iporãiterei, pórke umi ovecha oikuaa la ipastorkuéra ñeʼẽ ha osegi chupe. Por ehémplo peteĩ vuéltape peteĩ turísta onohesẽmoʼã fóto umi ovechápe, péro haʼe heʼi: “Ore roñehaʼã rohenói umi ovecha, péro haʼekuéra nopenái orerehe pórke ndaorekuaái. Upéi katu ou ore rendápe peteĩ mitãʼi oikóva hesevekuéra, ha haʼe ohenóire chupekuéra umi ovecha oupaitéma voi hendápe”.

2, 3. a) ¿Mbaʼéichapa ñande ikatu ñahendu Jesús ñeʼẽ? b) ¿Mbaʼépa jahecháta ko artíkulope ha pe sigiéntepe?

² La oiko vaʼekue pe turístare ohechauka umi ovecha siémpre ohenduha la ipastórpe. Ha upéva ñanemomanduʼa la Jesús heʼi vaʼekue idisipulokuérare: “Haʼekuéra ohendúta che ñeʼẽ” (Juan 10:16). Péro Jesús ningo oĩ yvágape, ¿mbaʼéichaiko upéicharõ ikatúta ñahendu la iñeʼẽ? Jajapóta upéva jastudiáramo umi mbaʼe haʼe omboʼe vaʼekue ha ñakumplíramo umíva (Mat. 7:24, 25).

³ Ko artíkulo ha pe sigiéntepe jahecháta unas kuánta kósa Jesús ñanemboʼe vaʼekue ndajajapói vaʼerãha, ha avei mbaʼe mbaʼépa jajapo vaʼerã. Ñepyrũrã ñaanalisáta mokõi mbaʼe: Ndovaleiha jajepyʼapyeterei umi mbaʼe ñaikotevẽvare, ha ndovaleiha jahusga ñande rapichakuérape.

4. Ohechaukaháicha Lucas 12:29, ¿mbaʼépa ikatu hína ñandepyʼapy?

⁴ (Elee Lucas 12:29). Jesús omokyreʼỹ vaʼekue isegidorkuérape  ani hag̃ua ojepyʼapyeterei umi mbaʼe oikotevẽvare. Ñande ningo jaikuaa Jesús iñaranduha ha umi mbaʼe heʼíva siémpre ideprovechotaha ñandéve, upévare jajaposeterei umi mbaʼe haʼe heʼi vaʼekue. Péro sapyʼánte ijetuʼu avei, ¿mbaʼérepa?

5. ¿Mbaʼérepa algúnope ikatu oipyʼapy ofaltárõ g̃uarã chupekuéra umi mbaʼe oikotevẽva?

 ⁵ Algúnope ikatu hína okevranta umi mbaʼe oikotevẽva káda día, por ehémplo okonsegi hag̃ua tembiʼu, ao térã opagami hag̃ua la ijalkilér. Ikatu hína oipyʼapy chupekuéra upéva oiko rupi peteĩ país imboriahúvape. Ha ivaiveha, ikatu omano raʼe anga pe persóna ombaʼapóva ha omantenéva pe famíliape. Hiʼarive pe pandémia káusare, heta persóna operde kuri la itraváho ha ndoikuaavéi mbaʼépa ojapóta omantene hag̃ua la ifamíliape (Ecl. 9:11). Oiméramo ñande jajecha hína upe situasiónpe, ¿mbaʼépa ikatu jajapo anive hag̃ua jajepyʼapyeterei?

6. Emombeʼu mbaʼépa oiko raʼe apóstol Pédrore peteĩ vuéltape.

⁶ Peteĩ vuéltape Pedro ha umi ótro apóstol oĩ hína kuri peteĩ varkoʼípe, ha derrepentete oñepyrũ peteĩ torménta ivaietereíva pe mar mbytépe. Upéi ohecha sapyʼa Jesúspe oguataha oúvo pe y ári, ha Pedro osẽ heʼi: “Che Ruvicha, oiméramo nde hína, ere chéve aguata hag̃ua pe y ári aha hag̃ua ne rendápe”. Jesús heʼi chupe oho hag̃ua hendápe ha “Pedro oguejy pe varkoʼígui, ha oñepyrũ oguata pe y ári ha oho Jesús oĩha gotyo”. Péro jahechamína mbaʼépa oiko upe rire, la Biblia heʼi: “Péro omañávo pe torméntare, okyhyje ha oñepyrũ oñapymi, ha osapukái: ‘Che Ruvicha, ¡chesalvamína!’”. Upépe Jesús oñakarama hese ha osalva chupe. ¿Jahechakuaápa peteĩ detálle? Pedro omaña aja Jesúsre, haʼe trankiloite oguata ohóvo pe y ári. Péro upéi haʼe oñepyrũ rire omaña ijerére ha ohecha pe torménta,  upépe haʼe okyhyje ha oñepyrũ oñapymi (Mat. 14:24-31).

7. ¿Mbaʼépa ñanemboʼe apóstol Pedro ehémplo?

⁷ ¿Mbaʼépa ikatu ñaaprende apóstol Pedro ehémplogui? Haʼe ningo oguejýrõ guare pe várkogui ha oñepyrũ oguata pe y ári, noimoʼãieténe raʼe upéi oñepyrũtaha oñemondýi ha oñapymi. Haʼe oimoʼãne raʼe ikatutaha osegi oguata pe y ári og̃uahẽ meve Jesús rendápe, péro amo ipahápe ndaikatúi jey kuri ojapo upéva. Upérõ guare ningo tekotevẽ kuri Pedro ojerovia ojapo hag̃ua upéva, ha koʼág̃arupi ñande jajerovia vaʼerã avei Jehováre ikatu hag̃uáicha ñaaguanta umi provléma. Ndajajeroviavéiramo Jehováre ha ipromesakuérare, ikatu ñanekangy ha ñañepyrũ jajepyʼapyeterei umi provléma jarekóvare. Tahaʼe haʼéva la provléma oñepresentáva ñandéve, ñande jasegi vaʼerã jajerovia Jehováre ha ñakonfia haʼe ikatutaha ñanepytyvõ. ¿Péro mbaʼéichapa ikatu jajapo upéva?

8. ¿Mbaʼépa ñanepytyvõta ani hag̃ua jajepyʼapyeterei umi mbaʼe ñaikotevẽvare?

⁸ Jaiko rangue jajepyʼapyeterei ñane provlemakuérare, iporãvéta jajeroviáramo Jehováre. Haʼe ningo oasegura nombofaltamoʼãiha ñandéve umi mbaʼe ñaikotevẽva ñande ñamotenondéramo Irréino (Mat. 6:32, 33). ¡Ha haʼe siémpre okumpli upe promésa! (Deut. 8:4, 15, 16; Sal. 37:25). Ñapensamíntena, Jehová ningo oñangareko umi yvoty ha guyraʼi mimíre jepe. Upévare ikatu ñaĩ segúro haʼe koʼýte oñangarekotaha ñanderehe (Mat. 6:26-30; Filip. 4:6, 7). Umi tuakuéra ningo omeʼẽta ifamiliakuérape enteroite mbaʼe oikotevẽva, ha ojapóta upéva ohayhu rupi chupekuéra. Ha Jehová ningo upeichaite avei. Ikatu ñaĩ segúro haʼe núnka nombofaltamoʼãiha ñandéve mbaʼevete asy, pórke haʼe ñanderayhueterei. ¡Jehová siémpre okuida porãitereíta ñanderehe!

9. ¿Mbaʼépa ñanemboʼe ko matrimónio experiénsia?

⁹ Jahechamína peteĩ experiénsia ohechaukáva Jehová omeʼẽha ñandéve umi mbaʼe ñaikotevẽva. Peteĩ matrimónio oservíva de tiémpo kompléto ojepokuaa vaʼekue oho unas kuánta ermána piári peteĩ kámpo de rrefuhiádope, ha ogueraha chupekuéra rreunionhápe. Pe ermáno omombeʼu: “Peteĩ vuéltape opa rire pe rreunión, roinvita koʼã ermánape okaru hag̃ua orendive. Péro upéi chemanduʼa ndororekoiha mbaʼevete asy roofresemi vaʼerã chupekuéra”. Ko matrimónio anga ndoikuaái kuri mbaʼépa ojapóta. Péro upéi pe ermáno heʼive: “Rog̃uahẽ rire ógape, rotopa pe okẽme mokõi úle renyhẽte provísta. Ndoroikuaái kuri mávapa oheja umíva upépe, péro rohechakuaa Jehová ojevale hague hese oñangareko hag̃ua orerehe”. Un tiémpo haguépe oñembyai chuguikuéra la hiʼáuto, péro hendy rupi hendivekuéra ndaikatúi kuri oarreglaka. Péro upéi peteĩ karai ohecha la áuto ha oporandu pe ermánope: “¿Máva mbaʼéiko pe áuto?”. Pe ermáno omombeʼu chupe imbaʼeha péro ofaltaitiha oarreglaka. Péro pe karai osẽ heʼi chupe: “Marãve ndoikói. Che rembireko oheka kuri oikóvo peichagua áuto, ha kavalete upe kolór la haʼe oipotáva. ¿Mboýiko ejerure hese?”. Amo ipahápe pe ermáno ovende pe karaípe la hiʼáuto, ha upéva repykuére ikatu jey kuri ojogua ótro áuto. Haʼe heʼi: “¡Rovyʼaitereíntemako! Ha roĩ segúro upéva ndahaʼéi hague peteĩ koinsidénsia, síno Jehová la orepytyvõ vaʼekue”.

10. ¿Mbaʼéichapa Salmo 37:5 ñanemokyreʼỹ ani hag̃ua jajepyʼapyeterei umi mbaʼe ñaikotevẽvare?

¹⁰ Ñande jajapóramo la Jesús omanda vaʼekue ñandéve ha ndajaikóiramo jajepyʼapyeterei umi mbaʼe ñaikotevẽvare, ikatu ñaĩ segúro Jehová nombofaltamoʼãiha ñandéve mbaʼevete asy (elee Salmo 37:5; 1 Ped. 5:7). Ñapensamína umi mbaʼe ñamensiona vaʼekuére  párrafo 5-pe. Oiméramo ñande jajecha raʼe umichagua situasiónpe, Jehová katuete ojevaléne raʼe peteĩ ñane hénte térã ñane patrónre ohupytyka  hag̃ua ñandéve umi mbaʼe ñaikotevẽva. ¿Péro mbaʼépa oikóta ni haʼekuéra ndaikatúiramo ojapo upéva? Jehová katuete otopáta la fórma oñangareko hag̃ua ñanderehe. Péro jahechamína koʼág̃a ótra kósa Jesús omanda vaʼekue ñandéve anivéma hag̃ua jajapo.

11. Heʼiháicha Mateo 7:1, 2, ¿mbaʼépa Jesús heʼi vaʼekue ñandéve anivéma hag̃ua jajapo, ha mbaʼérepa upéva ikatu hína ijetuʼu?

¹¹ (Elee Mateo 7:1, 2). Jesús ningo oikuaa porã vaʼekue ñande ñaneimperfektoha ha pyʼỹinte jahechaveha umi defékto orekóva ñande rapicha. Upévare Jesús heʼi vaʼekue: “Anive pehusga pende rapichápe”. Ñande ningo ñañehaʼãmbaite ani hag̃ua jahusga ñane ermanokuérape. Péro sapyʼánte upéva ñandeforsapaite, pórke ñaneimperfékto. ¿Mbaʼépa ikatu jajapo jahechakuaáramo japorokritikaitereimaha jaikóvo? Ñaneñeʼẽrendu vaʼerã Jesúspe ha ñañehaʼãmbaite anive hag̃ua jahusga ñande rapichápe.

12, 13. ¿Mbaʼéichapa Jehová ehémplo ñanepytyvõ ani hag̃ua jahusga ñande rapichápe?

¹² Tuichaiterei ningo ñanepytyvõta jajepyʼamongetáramo Jehová ehémplore. Haʼe ningo siémpre oñekonsentra umi kualida porã orekóvare umi hénte. Ñanemanduʼamína mbaʼéichapa haʼe otrata vaʼekue rréi Davídpe. Por ehémplo, peteĩ vuéltape David ou vaʼekue hekovai Bat-Sébandi ha upéi ojukauka voi la iménape (2 Sam. 11:2-4, 14, 15, 24). Ojapo haguére upéva David oike vaʼekue hetaiterei akã rasýpe ha heta ombosufri ifamíliape, umíva apytépe umi ótro hembirekokuérape (2 Sam. 12:10, 11). Ótra vuéltape katu David nopenái vaʼekue Jehováre, ha lomímonte ojapoka peteĩ sénso oikuaa hag̃ua mboy soldádopa oreko. ¿Mbaʼérepa oiméne ojapo raʼe upéva? Posívlemente oñepyrũma rupi ijorgullóso ha ojeroviaiterei la ijehérsitore, ojerovia rangue Jehováre. ¿Mbaʼépa oiko raʼe upe haguére? La Biblia omombeʼu amo 70.000 israelítarupi omano hague peteĩ péste káusare (2 Sam. 24:1-4, 10-15).

¹³ Oimérire nde reiko raʼe Israélpe upe tiémpope, ¿mbaʼépa epensáne raʼe Davídre? ¿Erénepa raʼe: “No, haʼe nomereséi Jehová operdona chupe”? ¿Péro mbaʼépa opensa raʼe Jehová? Haʼe imanduʼa kuri mbaʼéichapa David heta tiémpore ifiél vaʼekue chupe, ha ohecha avei hese oñarrepenti hague ipyʼaite guive. Upéicha rupi, Jehová operdona vaʼekue Davídpe opeka vaietereíramo jepe. Jehová ningo oikuaa kuri David ohayhuha chupe ha ojaposeha la iporãva. ¡Ajépa javyʼaite Jehová siémpre oñekonsentra haguére umi kualida porã jarekóvare! (1 Rey. 9:4; 1 Crón. 29:10, 17).

14. ¿Mbaʼépa ñanepyvõta ani hag̃ua jahusga ñande rapichápe?

¹⁴ Jehová ningo nohaʼarõi ñandehegui perfeksión, ha ñande nañahaʼarõi vaʼerã avei upéva ñande rapichakuéragui. Upéva rangue, jahecha vaʼerã umi kualida porã orekóva hikuái. Legálmenteko ifasilve jepi jahecha umi defékto orekóva umi hénte ha jaiko japorokritika, péro peteĩ persóna osegíva Jehová ehémplo lomímonte ojogueraha porãta entérondi, ohecháramo jepe umi defékto orekóva hikuái. Ñantende hag̃ua upéva ikatu ñamoĩ peteĩ ehémplo. Peteĩ diamánte ningo ñepyrũrã naiporãi jepi, péro umi expérto oikuaa mbaʼeichaitépa ivaliósota hína upe diamánte oñembaʼapo rire hese. Ha upéva hustaménte la ojapóva Jehová ha Jesús, haʼekuéra noñekonsentrái umi ñande deféktore síno ohecha umi kualida porã jarekóva. Ha ñande ñañehaʼãmbaite vaʼerã jasegi iñehemplokuéra.

15. ¿Mbaʼépa avei ñanepytyvõta ani hag̃ua jahusga ñande rapichakuérape?

¹⁵ Jahecháma haguéicha, iñimportanteterei hína ñañekonsentra umi kualida porã orekóvare ñande rapicha. ¿Péro mbaʼépa avei  ñanepytyvõta ani hag̃ua jahusga chupekuéra? Ñapensamína Jesús ehémplore. Peteĩ vuéltape haʼe oĩrõ guare pe témplope, ohecha vaʼekue peteĩ viúda mboriahumi omoĩha mokõi monedaʼi saʼieterei ovaléva pe káha de kontrivusiónpe. Péro haʼe ohechárõ guare upéva ndeʼíri vaʼekue: “¿Mbaʼéreiko la saʼieterei omoĩ?”. Upéva rangue haʼe oreko enkuénta la isituasión ha ohecha la ipyʼapýpe oĩva. Upévare oguerohory chupe ojapo haguére opa ikatúva (Luc. 21:1-4).

16. ¿Mbaʼépa ñanemboʼe Verónica experiénsia?

¹⁶ Ñantende porãve hag̃ua mbaʼeichaite pevépa iñimportánte jareko enkuénta ñande rapichakuéra situasión, jahechamíta ermána Verónica experiénsia. Ikongregasiónpe ningo oĩ peteĩ ermána omongakuaáva haʼeño imembykuimbaʼépe. Verónica heʼi: “Che apensa vaʼekue ko ermána ndaijaktivaguasuiha kongregasiónpe, upévare añepyrũ vaʼekue apensa vai hesekuéra. Péro upéi asẽ predikasiónpe ko ermánandi ha upépe haʼe oñepyrũ omombeʼu chéve mbaʼe mbaʼépa la ohasáva. Por ehémplo heʼi chéve la imembykuimbaʼe orekoha autísmo, ha upévare ijetuʼuetereiha chupe okuida hag̃ua hese ha oipytyvõ chupe oservi hag̃ua Jehovápe. Ha sapyʼánte la imemby oñeñandu vai jave, haʼe ohechámante vaʼerã oho hag̃ua rreunionhápe ótro kongregasiónpe”. Upéi Verónica heʼi: “Naimoʼãiete ningo ko ermána ohasaha anga entéro koʼã mbaʼe. Upe guive apyta arrespetaiterei chupe, ha amombaʼeterei pe esfuérso haʼe ojapóva omongakuaa porã hag̃ua imemby ha oservi hag̃ua Jehovápe”.

17. ¿Mbaʼépa heʼi Santiago 2:8 jajapo vaʼerãha, ha mbaʼéichapa ikatu jajapo upéva?

 ¹⁷ ¿Mbaʼépa ikatu jajapo jahechakuaáramo ñandejehe japorokritikaitereimaha jaikóvo? Ñanemanduʼa vaʼerã jahayhu vaʼerãha ñane ermanokuérape (elee Santiago 2:8). Ñañemboʼe vaʼerã avei Jehovápe ha jajerure chupe tañanepytyvõ anive hag̃ua jahusga ñande rapichakuérape. Ha ñañemboʼe rire Jehovápe, ñañehaʼã ñañamiga pe persónare ha jaikuaa porãve chupe. Ikatu por ehémplo ñainvita chupe osẽ hag̃ua ñanendive predikasiónpe, térã ñainvita chupe ñande rógape okaru hag̃ua ñanendive. Jajapóramo péicha jaikuaa porãvéta hína pe persónape ha ifasilvéta ñandéve jahecha hag̃ua umi kualida porã orekóva. Péicha jajapóramo jasegíta hína Jehová ha Jesús ehémplo, ha ndajaikomoʼãvéima jahusga ñande rapichakuérape.

18. ¿Mbaʼéichapa ikatu jahechauka ñaneñeʼẽrenduha Jesúspe?

¹⁸ Umi ovecha mimi iñeʼẽrenduháicha ipastórpe, ñande ñaneñeʼẽrendu avei Jesúspe. Upévare ñañehaʼãmbaitéramo anive hag̃ua jajepyʼapyeterei umi mbaʼe ñaikotevẽvare, ha ñañehaʼãramo avei anivéma hag̃ua jahusga ñande rapichakuérape, Jehová ha Jesús katuete ovendesíta la ñande esfuérso. Upévare oiméramo ñande unhído térã ñaĩ umi “ótro ovechakuéra” apytépe, siémprekena ñañehaʼã ñaneñeʼẽrendu Jesúspe (Luc. 12:32; Juan 10:11, 14, 16). Pe sigiénte artíkulope jahecháta mokõi mbaʼe Jesús omanda vaʼekue isegidorkuérape ojapo vaʼerãha.