1. Warom hot Yeesus, sayn tisipele mit xeef ferklaycht?

YEESUS hot sayn froyntxaft mit te tisipele ferklaycht mit te xpiirunge fon een xeefer noo sayn xeef. (Yoo. 10:14) Tas is een kuut ferklaychung. Ti xeef khëne sayn xeefer un tii tuun tëm heere. Eene man hot een mool tas pasiire kesiin. Tee hot kesaat: “Ti layt fon unser krup wolte etliche pilter fon te xeef ap nëme, un tan hon se fersuucht tëne lokre. Awer tii sin net khom, wayl tii hon net unser xtim kekhënt. Tan is een yunge puup khom, woo te xeefer waar, un soo wii eyer keruuft hot, sin se tëm noo kang.”

2-3. (a) Wii tsayche Yeesus sayn tisipele tas se tëm sayn xtim heere? (b) Was tuun mer in tiise artikel un im neekste lërne?

² Was tiise man kesiin hot erinert uns fon Yeesus sayn wërter iwer sayn xeef, es wil saan, sayn tisipele. Tee hot kesaat: “Tii tuun mayn xtim heere.” (Yoo. 10:16) Awer Yeesus is im himel. Tan wii khene mer tëm heere? Meyer mise aan wëne tëm sayn inlërnunge in unser leepe. (Mat. 7:24, 25)

³ In tiise artikel un im neekste, tuun mer etliche fon Yeesus sayn inlërnunge noo kuke. Wii mer noch siin tuun, Yeesus hot uns in kelërnt etliche tinge noo lose se mache un anere woo mer mache sole. Hayt wole mer 2 tinge siin woo Yeesus kesaat hot mer sole noo lose se mache.

4. Tëm noo Lukas 12:29, mit was khene mer uns tsu fiil ketanke mache?

⁴ Lees Lukas 12:29. * Yeesus hot fer sayn tisipele kesaat tas tii solte ‘noo lose sich tsu fiil ketanke mache’ mit sayn materyaalixe neetichkheete. Meyer wise tas Yeesus sayn aanreete  imer kluuch un kuut fer uns sin. Meyer wole tas aan wëne! Awer als mool, khan es xweyer fer uns sin tas mache. Warom?

5. Warom khene etliche sich soo fiil ketanke mache mit sayn materyaalixe neetichkheete?

 ⁵ Etliche layt mache sich ketanke mit ese, woonung un tsaych. Fiilaycht leepe se in een lant woo aarm is un woo es xweyer is een aarwayt fine. Es khan fer tëne xweyer sin kenuuch kelt kriin fer sayn familye fersoriche. Orer fiilaycht is ti persoon kextorep woo ti familye fersoricht hot, un yets hot ti familye net mee kenuuch kelt fer ti tinge khaafe woo se prayche. Un noch: weeche ti pantemii fon coronavirus fiile layt hon sayn aarwayt ferloer. (Ekl. 9:11) Wëns tuu etliche fon tiise xwiirichkheete orer anere am mit mache pist, wii khanst tuu Yeesus sayn aanreet noo keen fer noo lose sich soo fiil ketanke mache?

6. Was is mit Pheeter een mool pasiirt?

⁶ Een mool, waare Pheeter un anere aphostele in een xif im mite fon Kalilëa Meer wii een wint xtorm aan kefang hot. Tan, hon se kesiin Yeesus iwer tas waser am laafe. Pheeter hot kesaat: “Hër Yeesus, wën es tuu pist, xik mich iwich tas waser pis tich khome.” Yeesus hot tsu tëm kesaat: “Khom!”; too is Pheeter fom xif aus kextii un is iwich tas waser kang, fer pis Yeesus keen. Awer mërk mool was tan klaych pasiirt is. “Wii tee noom wint xtorm kekukt hot, hot eyer pang kriit. Un, wii tee aan kefang hot uner keen, hot eyer kexraayt: ‘Hër, ret mich!’” Yeesus hot sayn hant aus kextrekt un Pheeter keret. Es is interesant se mërke tas Pheeter khont iwer tas waser laafe ploos torich ti tsayt woo eyer tsu Yeesus kekukt hot. Awer wii Pheeter tsum wint xtorm kekukt hot, hot eyer pang kriit un hot aan kefang uner se keen. (Mat. 14:24-31)

7. Was khene mer mit Pheeter sayn payxpiil lërne?

 ⁷ Meyer khene was wichtiches mit Pheeter sayn payxpiil lërne. Wii Pheeter fom xif aus kextii is, hot eyer nii ketenkt tas eyer teet sich ketanke mache mit tëm xtorm un aan fange uner keen. Tee wolt wayter iwer tas waser keen fer pis Yeesus hin khome. Awer tee hot sich net wayter aan Yeesus traan kehal. Hayt mise mer aach een xtarke klaape hon fer ti propleeme aus hale, soo wii Pheeter must koraaj hon fer iwer tas waser laafe. Awer, wën mer uns net wayter aan Yeehoowa un aan sayn ferxpreche traan hale, khene mer aan fange uner keen in een kaystlich aat. Tes weeche, soo kaar wën mer xweyere propleeme in unser leepe hon, mise mer uns wayter traan hale aan Yeehoowa un aan sayn apiliteet fer uns helfe. Wii khene mer tas mache?

8. Was khan uns helfe net tsu ëngstlich sin iwer unser materyaalixe neetichkheete?

⁸ Xtats ëngstlich mit unser propleeme plaype, mise mer uf Yeehoowa traue. Tenk imer traan tas unser liipliche Fater, Yeehoowa, ferxprecht unser materyaalixe neetichkheete uf phase, wën mer Tëm im eyerste plats fon unser leepe tuun. (Mat. 6:32, 33) Yeehoowa halt sayn ferxpreche imer in. (Teut. 8:4, 15, 16; Psal. 37:25) Wën Yeehoowa ti feechele un ti pluume uf phase tuut, sicher prayche mer net uns tsu fiil ketanke mache iwer was mer ese un aan tsiie tuun. (Mat. 6:26-30; Fili. 4:6, 7) Weeche liip, tuun ti eltere ti neetichkheete fon sayn khiner uf phase. Kraat soo, khene mer uns sicher sin tas, weeche liip, tuut unser Fater im himel ti neetichkheete fon sayn tiiner uf phase.

9. Was host tuu mit te speryens fon een pheyerche kelërnt?

⁹ Kuk mool een speryens woo tsaycht wii Yeehoowa unser materyaalixe neetichkheete uf phase khan. Een pheyerche, woo wii pyoneer tiint, hot mee wii een xtun kefaar in sayn alte khare fer etliche xwestere hoole keen, woo in een auslënter khamp waare, un tii tsu te fersamlung nëme. Te pruuter hot kesaat: “Noo te fersamlung, hon mer ti xwestere in kelaat fer mit uns ese keen; awer klaych hon mer kemërkt tas mer niks tehëm hate fer tëne aan piite.” Was teet tas pheyerche mache? Te pruuter hot noch kesaat: “Wii mer pis unser haus hin khom sin, waare tswaay kroose thaxe mit ese foer unser teer kewees. Meyer wise net weer tas ese tat hin ketuun hot. Yeehoowa hot uns uf kephast.” Een tsayt xpeeter is tas pheyerche sayn khare kaput kang. Tii muste tiise khare hon fer ti preetich aarwayt, awer tii hate kheen kelt fer tëm kans mache. Tii hon te khare pis te mekanik kenom fer se siin wii fiil es khoste teet fer tëm kans mache. Wii se tat waare, is eene man khom un hot tëne kefroot: “Fon weem is te khare?” “Tas is mayne khare — hot te pruuter kesaat. — Awer tee mus kans kemacht wëre.” Te man hot keantwort: “Es is kheen propleem. Mayn fraa wil kraat soo eene khare wii teyer too hot, mit tiise selwiche farp. Wii fiil wolt teyer fer tëm?” Te pruuter hot te khare ferkhaaft un mit tëm kelt, khont eyer een aner khare khaafe. Tee hot kesaat: “Am ën fom taach waare mer seer froo kewees. Soo was khont net aleen pasiire. Meyer hon Yeehoowa sayn hant too tehiner kesiin.”

10. Tëm noo Psalm 37:5, warom prayche mer uns net soo fiil ketanke mache mit unser materyaalixe neetichkheete?

¹⁰ Yeesus hot uns kesaat tas mer sole net uns tsu fiil ketanke mache mit te materyaalixe neetichkheete. Wën mer tëm aan heere, khene mer uns sicher sin tas Yeehoowa uns uf phase tuut. (Lees Psalm 37:5; * 1 Phe. 5:7)  Tenk mool iwer ti xwiirichkheete woo mer kexproch hon in tëm  apsats 5. Khan sin tas, pis yets, tuut Yeehoowa yemant fon tayn familye penutse fer aych fersoriche; orer fiilaycht host tuu een aarwayt un tuu selepst khanst tas mache. Awer soo kaar wën tiise persoon khan net mee tayn familye fersoriche, orer soo kaar wëns tuu tayn aarwayt ferliirst, tuu khanst tich sicher sin tas Yeehoowa tuut een aner aat fine fer tayn familye uf phase. Yets wole mer een aner tings siin woo Yeesus kesaat hot mer sole noo lose se mache.

11. Tëm noo Matheus 7:1, 2, was hot Yeesus kesaat mer sole noo lose se mache, un warom khan tas xweyer sin?

¹¹ Lees Matheus 7:1, 2. * Yeesus wust tas ti mënxe imperfekt sin un tas se als mool sich aan te anere sayn feeler konsentriire tuun. Weeche tas, hot eyer kesaat: “Lost noo se richte.” Meyer tuun uns fiil aan xtrenge fer unser priiter net richte. Awer meyer sin imperfekt; tan, als mool kriin mer tas net hin. Soo, was khene mer mache wën mer mërke tas mer als mool ti anere kritikiire? Meyer mise Yeesus heere un uns aan xtrenge fer noo lose se richte.

12-13. Wii khan Yeehoowa sayn payxpiil uns helfe noo lose ti anere richte?

¹² Meyer khene fiil lërne wën mer traan tenke aan Yeehoowa sayn payxpiil. Tee tuut sich imer aan te layt sayn kuute kwaliteete traan hale. Tenk mool triwer noo aan was Yeehoowa kemacht hot wii te kheenich Tawi xweyer kesint hot. Tawi hot sëks mit een ferhayrat fraa, Pat-Sëpa, kemacht un nochter hot eyer kexikt tëne sayn man um pringe. (2 Sam. 11:2-4, 14, 15, 24) Tes weeche, hot Tawi un sayn kans familye kelit, too tepay sayn anere fraae. (2 Sam. 12:10, 11) Een aner mool, hot Tawi etwas kemacht woo Yeehoowa tëm net kexikt hat: tee hot ti mëner in Israël sayn militeer ketseelt. Tas hot ketsaycht tas eyer net kans uf Yeehoowa ketraut hot. Fiilaycht hot Tawi tas kemacht wayl eyer sich inkepilt hot fon sayn kroos militeer un ti xitsung woo tas pringe khent. Was fer waar te resultaat? Yeehoowa hot een phest kexikt woo unkefeer 70.000 israeliiter um keprung hot! (2 Sam. 24:1-4, 10-15)

¹³ Wëns tuu in Israël in tiise tsayt keleept hëst, was teest tuu iwer Tawi tenke? Teest tuu tenke: ‘Eyer fertiint net Yeehoowa sayn fertsayung kriin’? Yeehoowa hot net soo ketenkt. Tee hot sich traan kehal aan Tawi sayn troyheet torich sayn kans leepe un tas eyer sich wërklich peroyt hat. Tes weeche, hot Yeehoowa Tawi fertsayt fon tiise xweyere sinte. Yeehoowa wust tas Tawi tëm fiil keliipt hot, un tas eyer tas richtiches mache wolt. Meyer sin aarich petanklich tas Yeehoowa sich traan halt aan unser kuute kwaliteete un aanxtelung. (1 Khe. 9:4; 1 Kro. 29:10, 17)

14. Was tuut uns helfe noo lose ti anere richte?

¹⁴ Yeehoowa waart net tas mer perfekt sin. Tes weeche, sole mer aach net waarte tas ti anere perfekt sin. Meyer sole uns traan hale aan tëne sayn kuute kwaliteete. Als mool, is es laycht ti anere sayn feeler mërke un tëne kritikiire. Awer yemant woo Yeehoowa noo macht, tuut sich kuut kepe mit te anere, opwool eyer tëne sayn feeler mërkt. Een tyamant in te natuer is net xeen; awer weer kluuch is wees tas noo te tyamant xnayte un xlayfe, kriit tee fiil weyert. Meyer sole soo  wii Yeehoowa un Yeesus sin: meyer mise uns traan hale aan te layt sayn kwaliteete, net aan tëne sayn feeler.

15. Warom uns foer xtele wii te aner persoon sayn leepe is, khan uns helfe noo lose se richte?

¹⁵ Was noch khan uns helfe ti anere net mit kropheet richte? Fersuuch tich foer xtele wii tëne sayn leepe is. Kuk mool tiise payxpiil. Een mool waar Yeesus im thempel kewees. Tat, hot eyer een aarm witfraa kesiin woo 2 nikelche in tëm kelt khaste rin kexmis hot. Yeesus hot net kefroot: ‘Warom hot tii net mee rin kexmis?’ Xtats sich konsentriire aan wii fiil kelt ti witfraa kep hot, hot eyer sich traan kehal aan te uersach warom tii tas kep hot un wii sayn leepe waar. Un tee hot ti witfraa keloopt wayl se kemacht hot ales was se khont. (Luk. 21:1-4)

16. Was khene mer lërne mit Veronica sayn speryens?

¹⁶ Ti speryens fon een xwester woo Veronica heest helft uns ferxteen wii wichtich es is se wise was in te aner persoon sayn leepe pasiirt. In te kemaynt woo se ketiint hot, waar een xwester kewees woo sayn soon aleen ketsoo hot. Veronica saat: “Es hot aus kesiin tas tii waare net imer in te fersamlunge un uf te preetich aarwayt. Tes weeche, hat ich een nekatiiw mënung iwer tëne. Awer een mool, hon ich in te preetich aarwayt mit tiise xwester kexaft. Tii hot aus keleet tas sayn soon autista waar. Tii waar sayn pestes am mache fer tëne fersoriche un tëne sayn froyntxaft mit  Yeehoowa xtark hale. Awer als mool, weeche ti propleeme woo sayn soon hat, waar es neetich in een aner kemaynt ti fersamlung kuke.” Tsum xlus hot Veronica kesaat: “Ich hon net kemërkt wii xweyer tëne sayn leepe waar. Yets, tuun ich se aarich fiil liipe un respektiire, weeche ales was se macht fer Yeehoowa tiine.”

17. Was saat Tyako 2:8 woo mer mache sole, un wii khene mer tas mache?

¹⁷ Was sole mer mache wën mer mërke tas mer hon een pruuter kericht? Meyer mise uns erinere tas mer sole unser priiter liipe. (Lees Tyako 2:8.) * Meyer mise aach eerliche kepeete tsu Yeehoowa mache, un tëm aan hale tas eyer uns heleft noo lose se richte. Meyer sole tëm noo unser kepeete leepe un uns aan xtrenge fer mee tsayt fertraype mit te persoon woo mer kritikiirt hon. Soo, khene mer tiise persoon peser khëne lërne. Meyer khene tii in laate fer mitsamer uf te preetich aarwayt xafe orer etwas ese. Wën mer tii peser khëne lërne, khene mer Yeehoowa un Yeesus noo mache, un uns traan hale aan te kuute kwaliteete fon tiise persoon. Wën mer tas mache, tuun mer tsayche tas mer tas kepoot fon unser xeefer Yeesus heere, woo uns kesaat hot fer noo lose se richte.

18. Wii khene mer tsayche tas mer ti xtim fon unser xeefer Yeesus heere?

¹⁸ Soo wii ti xeef te xeefer sayn xtim heere, soo heere mer Yeesus sayn xtim. Yeehoowa un Yeesus tuun unser aanxtrengung seechne, wën mer unser pestes mache fer noo lose ti anere richte un fer noo lose uns tsu fiil ketanke mache mit unser materyaalixe neetichkheete. Ekaal ep mer fon te “anere xeef” orer fon tëm “kleene trop” sin, wole mer wayter ti xtim fon unser xeefer aan heere. (Luk. 12:32; Yoo. 10:11, 14, 16) In tëm neekste artikel, tuun mer 2 tinge siin woo Yeesus kesaat hot mer mache sole.