1. Ngatta nikumpara ni Jesus i tagatuttul na ira ta karneru?

NIKUMPARA ni Jesus i relasion na ta tagatuttul na ira ta madukko nga relasion na pastor ta karneru na ira. (Juan 10:14) Mepangngo laman yatun megafu ta ammammu na karneru ira i pastor da anna ginnadda i ngaral na. Yatun mismu i naobserba na tadday nga turista. Kinagi na: “Kayà mi nga pitchuran i karneru ira yayya nga pinuruebammi ira nga agalan. Ngem ariadda nagginna megafu ta ariadda ammammu i ngaral mi. Tapus egga i minay nga tadday nga abbing nga pastor. Turi ta inagalan na ira, insigida ira nga minaranni.”

2-3. (a) Kunnasi nga mepasingan na tagatuttul ira ni Jesus nga gigginnadda i ngaral na? (b) Anni i gigiammuattam taw nga artikulo anna ta tumunug?

² Iperaddam na ekspiriensa na turista i kinagi ni Jesus meyannung ta karneru na ira—i disipulos na. Kinagi na: “Ginnad-da i ngaral ku.” (Juan 10:16) Ngem egga ta langi si Jesus. Kunnasi tam gafu mepasingan nga gigginnattam yayya? Makua tam yatun nu iyaplika tam i tuttuddu na ira.​—Mat. 7:24, 25.

³ Gigiammuattam taw nga artikulo anna ta tumunug i karuan ta tuttuddu ni Jesus. Magigiammu tam nu anni i nituddu ni Jesus nga ariattam ngana kuan anna i mawag tu kuattam. Ikonsidera tam labbi i dua nga gannug nga nituddu na mapia nga pastor nga ariattam ngana kuan.

4. Segun ta Lucas 12:29, anni ira i posible nga ‘kavurungattam’?

⁴ Bibbigan i Lucas 12:29. Nitabarang ni Jesus ta tagatuttul na ira: “Arian nu gafu kavurungan i meyannung ta kanan anna inuman nu.” Kanayun nga masirib anna fustu i tabarang ira ni Jesus. Kayà tam nga iyaplika danatun. Ngem nu karuan, mariga nga kuan yatun. Ngatta?

5. Ngatta kavurungan na karuan i material ira nga kawagadda?

 ⁵ Kavurungan na karuan i material nga pakawagadda kagitta na makan, sinnun, anna paddianan. Awayya na nga maddian ira ta nasion nga mariga i pattolay yari tu ari nga makalanno i aleg da para ta pakawagan na familia da. Onu natay i magaleg para ta familia yari tu awan ngana tu manustentu nira. Aru gapa i nawanan tu trabahu megafu ta COVID-19 pandemic. (Ecl. 9:11) Nu nesimmu yatun nittam onu i tanakuan paga nga problema, kunnasi tam nga matuttul i kinagi ni Jesus nga ari mavvurung?

6. Iyistoria i nesimmu kani apostol Pedro.

⁶ Egga i tiempo nga nakabarangay da apostol Pedro anna i karuan nga apostoles ta Bebay na Galilea. Masiki-sikan i paddag, tapus nasingadda si Jesus nga lumaka-lakag ta utun na danum. Kinagi ni Pedro: “Afu, nu kurug tu sikaw, imandum tu umay ngà nikaw ta utun na danum.” Inagalan yayya ni Jesus nga “umay,” yari tu nanaw si Pedro ta barangay anna “liminakag ta utun na danum nga minay kani Jesus.” Anni i tumunug nga nesimmu? “Ta pakatageno na ta sikan na paddag, naganassing yaya anna namegafu nga limimmag. Ay kun-na nga nakkulle, ‘Afu, kuragam-mà!’” Nigawa ni Jesus i lima na anna kinurag na yayya. Nakalakag si  Pedro ta utun na danum turi ta naffokus yayya kani Jesus. Ngem turi ta naffokus yayya ta sikan na paddag, naganassing anna nadduda yayya, yari tu namegafu nga limimmag.​—Mat. 14:24-31.

7. Anni i magigiammu tam kani Pedro?

⁷ Anni i magigiammu tam kani Pedro? Turi ta nanaw si Pedro ta barangay anna liminakag ta bebay, magga arian na ninono nga mavurungan yayya ta sikan na paddag tapus lummag. Kayà na nga makalakag ta utun na danum adde ta makadde kani Jesus. Ngem nawawan na i fokus na tatun nga gakkag na. Kawagan ni Pedro i pangurug tapenu makalakag ta utun na danum. Sangawe, kawagattam gapa i pangurug tapenu maattammattam i problema tam ira. Ngem nu mawawan i pattalo tam kani Jehova anna ta promesa na ira, makkafi i pangurug tam anna gitta na lummag ittam megafu ta problema tam ira. Yatutta maski nu kuruga madammo i problema tam ira, mawag nga kanayun nga nakafokus ittam kani Jehova anna ta pakawayya na nga uffunan ittam. Kunnasi tam nga makua yatun?

8. Anni i makoffun nittam tapenu ariattam kuruga kavurungan i material nga kawagattam?

⁸ Mawag nga mattalo ittam kani Jehova imbes nga kavurungan i problema tam ira. Daddammattam nga nipasiguradu na minaggiddu nga Yama tam nga si Jehova nga iyawa na i material ira nga kawagattam nu ipoppollu tam i espiritual ira nga gannug. (Mat. 6:32, 33) Kanayun nga tuppalan na yatun nga promesa na. (Deut. 8:4, 15, 16; Sal. 37:25) Iyayawa ni Jehova i kawagan na mammanu anna lappaw ira, yatutta ariattam nakuan nga mavurung nu anni i kanan onu passinnuttam! (Mat. 6:26-30; Fil. 4:6, 7) Megafu ta aya, iyawa na mappagana i material nga kawagan na ána da. Aya gapa i mamaguyu ta Yama tam ta langi tapenu iyawa i material nga kawagan na totolena. Wan, makasiguradu ittam nga tangngallan ittam ni Jehova!

9. Anni i magigiammum ta ekspiriensa na magatawa?

⁹ Ikonsidera tam i tadday nga ekspiriensa nga mangipasingan nga mawayya ni Jehova nga iyawa i material ira nga kawagattam. Egga i magatawa nga payunir nga sinundu da i karuan nga sister nga maddian ta lugar na refugee ira tapenu magatende ta study. Maturu tu tangoras i biahe da anna niyusa da i dadana ngana nga takay da. Kinagi na brother: “Kabalin na study, inimbita mi i sister ira nga kuman ta balemi. Ngem awan balo tu iyarubammi nira.” Anni i nesimmu? Niyistoria na brother: “Ta pallabbe mi, egga i nadanganammi ta puerta mi nga dua nga darakal nga supu nga puru makang i naddian na. Ariammi ammu nu sinni i naggafuanan na. Talaga sinangngallan nakami ni Jehova.” Turi kua, nadaral i takay na magatawa. Kawagadda yatun ta ministerio ngem awan tu kuartu da nga pappapoli. Niyangeda i takay da ta repair shop tapenu mammuadda nu piga i magasto. Tapus egga i lalaki nga nakkiavu: “Makattakay taw?” Kinagi na brother nga kukua na yatun ngem egga i daral na. Nitabbag na lalaki: “Okay lang. Kunnaw nga klase na takay anna kulor i kayà na atawà. Piga i kayà mu? Gatangakku ‘na!” Nilaku na brother ta lalaki i takay yari tu egga ngana i paggatang na tu bagu nga takay. Megafu tatun, kinagi na: “Kuruga magayayya kami tatun nga aggaw. Ammu mi tu ari nga nekakkanna laman yatun. Talaga inuffunan nakami ni Jehova.”

10. Kunnasi makoffun i Salmo 37:5 tapenu ariattam kavurungan i material ira nga kawagattam?

¹⁰ Nu ginnattam i mapia nga pastor anna ariattam kuruga mavurung ta material ira  nga kawagattam, makapattalo ittam nga iyawa ni Jehova danatun. (Bibbigan i Salmo 37:5; 1 Ped. 5:7) Awayya na nga iyayawa ni Jehova i kawagattam ta inaggaw megafu ta egga i trabahu na ulu na familia tam onu awayya na nga paguyuan i boss tam. Ngem kunnasi nu nesimmu i situasion ira nga nakagi ta  parapo 5? Angngarigan na, baka ari ngana makapattrabahu i ulu na familia onu nawanan yayya tu trabahu. Onu baka sittam gapa i nawanan tu trabahu. Siguradu nga egga lagapa ira i kuan ni Jehova tapenu meyawa i kawagattam. Ikonsidera tam ngana i tadday paga nga nipagaram na mapia nga pastor nga ari tam ngana kuan.

11. Segun ta Mateo 7:1, 2, anni i kinagi ni Jesus nga ariattam ngana kuan, anna ngatta mariga yatun?

¹¹ Bibbigan i Mateo 7:1, 2. Ammu ni Jesus nga imperfekto ittam ngamin anna maruddu nga maffokus ittam ta nakkamalian na tanakuan. Yatutta kinagi na: “Ari kamu nga mamanunnu” onu ma-husga. Baka kukukuattam i ngamin tapenu ari nga husgan i kapangngurug tam. Ngem megafu ta imperfekto ittam, makua tam lagapa yatun nu karuan. Nu mesimmu yatun, anni i kuattam? Ginnattam si Jesus anna mappursigi ittam nga ari ngana husgan i tanakuan.

12-13. Kunnasi nga makoffun i pagimamma ni Jehova kani Patul David tapenu ariattam husgan i tanakuan?

¹² Mabenefisiowan ittam ta ehemplo ni Jehova. Naffokus yayya ta mapia nga kukukuan na totolay. Masingattam yatun turi ta nakakua tu madammo nga liwa si Patul David. Sinaddena si Bat-seba anna niplano na paga i nikapatay na atawa ni Bat-seba nga si Urias. (2 Sam. 11:2-4, 14, 15, 24) Megafu tatun, aru i marake nga nesimmu kani David anna ta familia na kunne na gapa ta tanakuan nga atawa na. (2 Sam. 12:10, 11) Egga gapa i tiempo nga ari tu buu i pattalo ni David kani Jehova. Niparehistro ni David i suddalu ira na Israel maski nu awan tu kinagi ni Jehova nga kuan na yatun. Awayya na nga kingngua na yatun megafu ta kinapakatannang anna nattalo yayya ta karu na suddalu na ira. Anni i resulta na? Natay i 70,000 nga Israelita megafu ta palakag nga tulagan!—2 Sam. 24:1-4, 10-15.

¹³ Nu nattolay ka ta Israel tatun nga tiempo, anni i makagim ta kingngua ni David? Husgammu kari yayya nga ari mepappangngo ta pamakoma ni Jehova? Ari tu kunnatun i kingngua ni Jehova. Naffokus yayya ta kinamatalo ni David ta interu nga pattolena anna ta napafutuan nga pabbabawi na. Megafu tatun, pinakoma ni Jehova si David ta madammo ira nga liwa na. Ammu ni Jehova nga kuruga iddeddukan yayya ni David anna kayà na nga kuan i fustu. Dakal i appabalo tam megafu ta maffokus si Jehova ta mapia ira nga kualidad anna kondukta tam!—1 Pat. 9:4; 1 Cro. 29:10, 17.

14. Anni i makoffun ta Cristiano ira tapenu ariadda ngana nga husgan i tanakuan?

¹⁴ Nu pasensian ni Jehova i imperfekto nga totolay, mawag tu pasensiattam gapa i kataggi-tadday anna maffokus ittam ta mapia nga kualidad anna kukukuadda. Mabi laman nga masingan i pakkafian na tanakuan anna kritikan ira. Ngem i tadday nga manakam ta espiritual ay makasta lagapa i pakikavulu na ta tanakuan maski nu masingan na i pakkafiadda. Angngarigan na, ari tu makasta innan i diamante nga ari paga nga napafinu. Ngem ammu na masirib nga tolay i kasta anna balor natun sonu napakarenuan anna napafinu ngana. Kagitta ni Jehova anna ni Jesus, maffokus ittam nakuan ta mapia nga  kualidad na tanakuan, ari tu ta masingi-singattam nga pakkafiadda.

15. Kunnasi nga makoffun i pangikonsidera tam ta paddia-paddian na tanakuan tapenu ariattam ira nga husgan?

¹⁵ Fuera paga ta paffokus ta mapia nga kualidad na tanakuan, anni paga i makoffun tapenu ariattam ira nga husgan? Nonopattam i paddia-paddiadda. Ikonsidera tam yaw nga angngarigan. Mittan ta templo, nasingan ni Jesus i kuruga mariga nga balu nga nangipay ta aggipayyan ta limus tu dua nga sinsiliu nga pilippiga i balor na. Arian na nga niyavu: “Ngatta yatun laman i nipay na?” Ari naffokus si Jesus ta balor na niyawa na balu. Mas importante nisa i motibo anna i paddia-paddian na balu. Yatutta zinayaw na yayya megafu ta niyawa na ngamin i pakkatolayan na.​—Luc. 21:1-4.

16. Anni i nagigiammum ta ekspiriensa ni Veronica?

¹⁶ Ikonsidera tam i ekspiriensa ni Sister Veronica tapenu mas mantindiattam i importansia na pannono ta paddia-paddian na tanakuan. Egga i kakongregasion na nga single mother. Inamin ni Veronica: “Gitta na ari ira regular ta study anna ta ministerio. Yari tu negatibo i paningakku nira. Ngem turi ta nakapartner ku i yena ta ministerio, niyistoria na i ziga na megafu ta egga i autism na ana na. Kukukuan na i ngamin tapenu meyawa i material anna espiritual nga kawagadda. Yayya nga nu karuan, megafu ta taki na ana na,  ta tanakuan nga kongregasion ngana laman ira nga makistudy.” Megafu tatun, nakagi ni Veronica: “Talaga mariga balo i situasion na. Mas appresiakku ngana anna mas irespetò yaw nga sister megafu ta ngamin nga kukukuan na ta passerbi kani Jehova.”

17. Anni i nakagi ta Santiago 2:8 nga kuattam, anna kunnasi tam nga makua yatun?

¹⁷ Anni i kuattam nu manono tam nga hinusgattam i kapangngurug tam? Daddamman nga mawag tu ayatattam i wawwaragi tam. (Bibbigan i Santiago 2:8.) Mawag gapa nga napafutuan nga ipakimallo tam kani Jehova nga uffunan na ittam tapenu ariattam ngana nga ma-husga. Magguyu ittam mekunnay ta pakimallo tam gukaban na pakikavulu ta tolay nga hinusgattam tapenu mas mammammu tam yayya. Awayya tam nga makikavulu ta nisa ta ministerio onu imbitattam yayya nga kuman kavulu tam. Durante nga mas mammammu tam i kapangngurug tam, parigattam nakuan i ehemplo ni Jehova anna ni Jesus nga nakafokus ta mapia nga kualidad na tanakuan. Nu kuattam yatun, gigginnattam i kinagi na mapia nga pastor nga ari ittam ngana nga ma-husga.

18. Kunnasi tam mepasingan nga gigginnattam i mapia nga pastor?

¹⁸ Magginna i literal nga karneru ta ngaral na pastor da. Magginna gapa i tagatuttul ira ni Jesus ta nisa. Nu kuattam i ngamin tapenu ariattam nga mavurung ta material ira nga kawagattam anna ari tam ngana husgan i tanakuan, bendisionan ittam ni Jehova anna ni Jesus. Nu parte ittam na baddi nga ipastoran onu na tanakuan nga karneru, tulu-tuloy nakuan nga ginnattam i mapia nga pastor anna tumuttul nisa. (Luc. 12:32; Juan 10:11, 14, 16) Ta tumunug nga artikulo, gigiammuattam i dua paga nga nituddu ni Jesus ta tagatuttul na ira nga mawag nga kuadda.